Social Networks(Facebook) Hi A Chia Maw, A T'ha Dah??

Vawleicung ah hmuhtheih khawhmi  information hi kum hnih dan ah alet bakin a karh peng ti a si(Silver,2012). Phundang in chim ahcun, a ralaimi kum hnih chung lawng ah minung nih kan chuahser dingmi information hi vawlei aa thokka in aluancia caan vialte chungah rak sermi vialte he aa zat lai tinak a si. Zeitindah cuticun a si khawh tiahcun a thawng tukmi information chuahtu thilri, internet kha a hmangtu kan tam tuk cang caah a si. Internet cu phun tampi in hman a si i “Social Networks” hi atulio ah a laar bik a si. “Social Networks” cu maivan(internet) hmang in “mibuu le pumpak, pumpak le pumpak ipehtleihnak” a si kan ti ahcun kan palh lai lo dah. A hlan ah rak hman tawnmi media dangdang he aa dannak bik cu a hmangtu pumpak pakhat cio nih information ser khawh a si. Tahchuhnak ah Social Networks a simi Youtube le Facebook tibantuk kan hman tikah a um ciami info lawng kan hmang lo, kanmah zong nih kan duhmi kan tarlangh khawh ve. Social Networks tampi lak ah Laimi nih ka hman bikmi cu Feb 4, 2014 ah kum hra a tlingmi, Facebook a si ko. Vawleicung minung pasarih ah pakhat renglo nih hmanmi Facebook cu internet a hmang khomi Lai mino poah nihcun kan hman dih ngawt cang theu lai.

Iran Ahcun Nuam ngaiin Lam le Hlasak Hi Sual Phun Khat A Si....

Tuzarh nihnih ni ah Iran cozah TV in mino paruk nih rammi vialte sinah sualchirnak le ngaihthiam halnak bia an chim. Anmah lungtho tein an iawtmi cu a si lo. Hramhram in Palik nih an tuahter hna ruangah an duhlo tuk buin an tuahmi tu a si. Mino sawhsawh tete nih mipi sinah rampi cozah TV rilmal in ngaihthiam hal an hauh cu zeibantuk sualnak ko dah an tuah hnga? Tehran khuapi palik bawizik nih a puhmi hna sualnak cu nuam tuk lawmmam in "lam le hlasak" a si ko.

Kan Miphun Rothil Sunglawi Bik Hngakchia Hna Hi kan Hrawh Hna Awk A si lo....

"Fale hi Pathain sin in kan hmuhmi ro sunglawi bik an si" tiah Bible nih a kan cawnpiak. Bible cathiang a rel lomi zongnih kan Pastors le biaknak lei hruaitu hna hmurka in kan theih lengmang. Nulepa vialte nih an chimmi bia, aa khat dihmi pakhat cu "ka fale, nanmah hi a sunglawi bikmi ka thluachuah nan si. nanmah nan t'hat le ka chan chung kai nuam lai, nan sual le ka thih tiang ka lungre thei lai, nanmah hi ka zeizongte nan si ko" timi a si. Miphun cu innchungkhar tete fonhin sermi mibu a si. Tikah, innchungkhar cio nih kan ngeihmi hngakchia hi Miphun caah rosung bik thluachuah an si ve. Chin hngakchia tete hi Chinmi nih kan ngeihmi Pathian thluahchuah rosung bik an si ko.

Lung Thonh In A Paw Aa Cawmmi Michael Grab..

Midang nih "na pawcawmnak caah zei rian dah na t'uan" tiah Michael Grab cu an hal tawn. "Lung thonh in ka paw kaa cawm" tiah a leh tawn hna i an i zumh tawn lo. An nih a chuak. Sihmanhsehlaw, a mit in a thonhmi lung a hmutu poahpoah nihcun a pawcawmnak kongah si loin a lungthonh thiamnak cung tuah an khuaruah a har deuh t'han. A bangmi kaw hmang lo bakin hi bantukin lung fa tete cungah lung ngan pipi a thonh khawhmi hi cu khuaruahhar taktak a si ko.

Hmantlak In Tuluk Ram Ka Cuan....

Tuzan cu zanriah ka khim lecaangka in carel dingin computer hmai ah ka t'hu hngap. Cat'ial lungthawh tikah tial te dingin theihhngalh t'ha thil pawl kong deuh khi rel dingin ka kawl. Ka blog ahhin chawlehnak kong hi tam deuhin t'ial ka duh caah chawlehnak kong cabia deuh khi ka hngiathlai. Atulio ah chawlehnak kong he pehtlaiin thil sining hlathlai duh ahcun China(Tuluk) kong hi rel loin lanh tak awk a t'ha lo. Cucaah, China chawlehnak kong he aa pehtlaimi cabia t'ha khi caruuk minthang cheukhat ah beisei in ka dap. Nain, cabia pakhat hmanh ka rel manh lo. A dangpi ah ka pial. Hmantlak ka zohnak ah ka hngang.

Nu A Upatmi Miphun Kan Si Ahcun....

Zant'im khuaking ah Muslim pialsual ralhrang a portu, Truck(kungkaa), Bus le Van pipi hna cu izul duahmah in aa kulhmi inn pipi chungah an lut. Tlawmpal ah tlai thluahmahin a puakmi meithal thawngnih dai tein aa hngilhmi khua cu a van hlauh colh. Meithal thawng he aa zulmi auro pi auhnak ruangah thir le phangin an ihnak khan cio in a van chuakmi siangsangruun kaimi nungakno 300 renglo cu ralhrang pawl nihcun seh nunhcia in a dirmi motors lei ah caw-run khanh in an khanh hna. Minung an tamtuk caah inn le motors karlak hrawng hmunlawng ah an i tuaibur. Cu caan cu zaam a ngamhmi nih caant'ha ah an ilak i thih-le-thih,nun-le-nun in an zaam. Minung 53 nih luat lakin an zaam kho. Cu zaan cu April 14, 2014 zaan a si. A hmun cu Nigiria ram, Borno State ah a ummi Chibok khua ah a si. Meithal putin nungakno tete a firtu cu Boko Haram timi ralhrangbuu an si.

Dear Ka Nu....

 Ka nu, na dam lio a si maw? Keizong na thlacam piaknak thawngin ka dam ve. Pathian dawtnak thawngin Mother's Day camtuak ka van phan i kan ngaih a zual. Ngaihdawn ah cakuat ka van tial.

Ka nu, na cungah kai lawm tuk! Kai lawm tuk hringhran. Harsa in thlakua na ka pawi. Keimah nih vawlei ka hmuhnak dingah thi dengmangin fahnak na tuar. Na hnuktlum in na ka cawm rih. Vawlei ah nungdam tein ka chuah khawhnak ding caah na intuarmi le na tuahsermi vialte cungah lawmhnak bia ka chim.