Alicia Keys: We Are Here!!!

Tuzarh cu cabia ngaingai ka t'ial kho lo. Thil dangdang tete ka tuah ruangah a si bik. Tial dingah ka lung ah a chuak tukmi thil zeimaw a umlo pah bia zong cu aa tel.

Ih kaa timh hnu ah mahhi hla hi ka ngai sual. A t'ha ngaingai in ka thei i ka lung a ka lak tuk. A awrau a t'hat tuk hlei ah hlasak thiam muidawh Alicia Keys nih hi hla a phuahnak kong a chimmi ka ngaih chih caah a si kho men. Ka uar tukmi cat'ial thiam Nicholas Kristof nih "Alicia Keys Ask: Why Are We Here?" timi tlangtar in column a t'ialmi ka rel chih tikah ka uar deuh chinchin. Nau a pawi caah a puar deuhmi a paw cungah aa suaimi Daihnak hmelchunhnak zuk he khin aa rem tuk in ka hmu fawn___a langhter duhmi cawlcanghnak kha fak deuhin a minung hawi nih ruat hna seh, tiah taklawng in aa tuah hramhrammi a si. Zeiruangh ah hme vawlei ahhin kan nun rengreng tak? A hla hi rak ngai ve hrim te.

Obama Nih ISIS Ralhrang Kahdohnak Dingah A Sermi Strategy Hi Hma A Kal Lai Maw??

Tuzarh nithum ni zaan US boruak cu aa phundang ngai. Zeiti phun pi khin dek lungthin a um. Khing a rit nain i hngahhlang pahmi thil nih lungthin a hliphlau ter nawn.US Eastern Time zaan suimilam 9:00, Americans minung tam bik nih TV zoh tawn caan thengte ah, President Obama nih State floor, innrangpi in biachimnak a ngeih. Minutes hleili dengmang chung a chimmi bia cu minung hawidang cungah tuk a summi thahnawnnak le rialditnak lam phunkip hmangin Islam ramthar ser aa timmi ISIS(ISIL) kong deuh lawng bak a si. "Ka hawidawt Americans, tuzan nan sinah chimfian ka duhmi cu ramdang kan hawile hna he i bawm in ISIL(ISIS) timi ralhrang buu hi zeitindah kan doh hna lai, timi a si. Nan hruaitu ah nan ka thim bantukin ka rian lianngan bik ah ka chiah zungzalmi cu kan ram humhimnak hi a si ko. Cucu Yemen le Somalia ti bantuk ah a herhning poah in ralhrang ka dohmi nihhin fiang tein a langhter ko" tiin a bia a domh.

Obama nih ISIS Siorawl A Ei Lo......

ISIS ralhrang nih U.S jounalist Steven Sotloff cu a hngawng an tan hoi. Steven hngawngtantu hi Foley hngawntantu pa kha si dawh a si. A ruang cu a hmai a lang lo nain a aw aa khatmi a lo. Cun, a bialak ning hrimhrim aa zul. A hmai aa hup dih i namte aa kenmi, Britist mirang awcawi a ngeimi pa nih "Obama, ka ra t'han ko hih!" a ti. "Iraq ram ah van ralkap hmangin na kan kahmi hi na ngollo ahcun Steven hi atu bantuk hin kan tuah ve hrim lai" tiah Foley hnawng a rak lek lio ahkhan Obama cu a rak hrocer cang. Obama nih Iraq ah akahmi hna cu a ngol naisai lo. "Kah tilo dingin nawl kan pek nain an kan kah peng rih ruangah Steven hngawng kan tannak hi a si" tiah anmah nihcun an ti. Nain, Obama nihhin Iraq ah a kahmi hna hi ngol taktak sehlaw Steven Lotoff nunnak hi a him hlei hnga maw? Beisei awk a um lo.

August

"Thla" timi biafang telhlo zongah "August" cu "August Thla" khi ka chim duhmi a si ko. "August" cu kum khat chungah a ummi thla hleihnih lakah thlakhat sawhsawh khi a si. Christmas thla zong a si lo i kum thar thla zong a si lo. Thawht'han thla zong a si fawn lo. "Chin Miphun Ni" he zong pehtlaihnak a ngei lo. Laimi nih kan sunhlawih ngaingaimi ni nikhat zong khi August chungah a um lo hrimhrim. Atu hi a dong deuh vak fawn rih lo. Nain, ka cabia tlangtar ah ka hman ko. A ruang cu tukum August hi ka caah a mak tuk! Chinchiah tlak thil tampi ka ton i lunglawmhnak tluachuah tampi ka co. Cu chungin tlawmpalte tal van chimphuan loin ka um kho lo.

Obama Cozah Nih ISIS Pawl Hi Syria Ram An Umnak Hmun Tiangin A Naam Hna Lai Maw?

US humhimnak vuanci(Secretary of Defense) Chuck Hagel le U.S ralkap bawizik General Dempsey hna cu kan hnu zarh nili ni ahkhan atulio vawleicung ah duk a summi ralhrang pawl cawlcanghnak ruangah a cang cuahmahmi buaibainak phunkip le US humhimnak kong he aa pehtlaimi thil dangdang kongah fianternak tuah dingin Patagon ah a ummi an thawngfianhnak innkhan ah an van chuak t'i. An tonak dingah rak chiahmi, cabuai he aa hungmi, t'hutdan ah an tawt'awk an chiah lecangka in secretary Hagel nih biatawi chimnak a ngeih hmasa. Hramthoknak bia a chimmi cu minutes panga telawng a sau nain thil tam taktak a kemh khawh.


Ferguson, MO Ah A Cangmi Buaibainak nih A Phozarmi Aa Buaktlaklo Tukmi Nawlngeihnak??

Ferguson, MO ah Mr Michael Brown thihnak in a chuakmi mipi le nawlngeitu karlak buaibainak cu tuni in ni hleithum a si cang. Nain, a dai naisai rih lo. Zalam cungah an lungtlinlonak a langhtermi mipi an khat rih ko. Daihnak a len i ningcang zulh tein thil a kal zau t'han khawhnak dingah tiin Governor Jay Nixon hruaimi Missouri State cozah nih thil phunphun an tuah. Zaan suimilam 12 in zinglei 5 karlak caah curfew order a chuak i order a buarmi cu minung sawm riat renglo bak an tleih cang hna. Sihmanhsehlaw, zeipi aa hlei t'hiamt'hiam lo. A sivangh celhlo ah Coast Guards tiangin a kawh hna nain an buai t'hiamt'hiam ko. Lam cungah duhlonak a langhtertu mipi nih hnahnawhnak phunkip an chuak ter t'hiamt'hiam ko. Tutan buaibainak cu khua fate pakhat ah a cangmi a si ko nain phundang deuhte a si hlei ah alinhsat tuk caah ramkomhpi cozah zongnih an van itlak ve. Eric Holder nih a hruaimi, Federeral Justice Department nih Brown thihnak kong cu chekhlatnak kan tuah ve lai, tiah thawng an thanh ve. Sihmanhsehlaw, cu zong nihcun daihnak thlam a lenter kho hlei lo. Cucaah, President Obama nih Eric Holder cu amah pumpak hrimhrim nih thil sining va zoh dingin tuchun ah Ferguson khua ah a thlak. Asinain, atu caan tiang ahcun daihnak a leng kho t'hiamt'hiam colh hlei lo.

Zeiruangah Dah Obama Nih Iraq Ah Bombs A Thlak??

"ISIS pawl nih hmunhma an laknak Irbil khua kiangkam le Sinjar tlang pang ahcun a herh ning poah in van hriamnam hmang cang dingin kan ralkap pawl sinah nawl ka pek cang hna" tiah President Obama nih innrangpi in tuzarh nili ni ah  biathanhnak a tuah ahkhan mi tampi kan lau.  A ruang cu kan hnuzarh tiang ahkhan Iraq buainak cungah hriamnaam hmangin cun kan itlak lai lo, a rak ti peng caah a si. A biachim a dihin caan sau a rau lo. "US vanlawng nih Sinjar tlangkam le Irbil khuakam hrawnghrangah bombs an thlak thluahmah ko cang" tiah thawngthanhtu media vialte nih an van au colh. Tikah, Innrangpi ah nichiarte ti awkin media riantuantu pawl sinah President hruaimi cozah he aa pehtlaimi cawlcanghnak poahpaoh thawngthanhnak le bialehnak a tuahtu, Whitehouse press secretary, Josh Earnest nih cacawn ninga ni ah thawnglatu sin in a tonmi biahalnak cu an ilo pah dih. "Zeiruangah dah President nih Iraq buaibainak ah ruahlo nawn in hriamnam a hman" ti deuh phunphai rumro khi an si ko.