Lar A Uar Sawhsawhmi Lai Mino Kan Tamtuk Sual Maw?

Atulio Facebook vawlei cu Miss Universe 2015 tiluan nih a chilh bakin a chilh. Host a t’uantu Steve Harvey nih teinak hmutu thanh a palhmi nih fak tukin thil umtuning a thlen tikah minung tamtuk nih buaipimi thil ah a van cang. Miss Colombia caah cun a fak bak ko lai___Vawlei pumpi hmai ah teinak luchin chinh cang hnu ah van chuh t’han cu. Miss Philippines ca zongah a nuam tuk lai lo. Thin tur tukin aa hngahhlangmi caan lio ah teinak a hmuh theihlo in tlaihnu pi ah teitu luchin vaa chinh t’han cu a thinlung a nuam tuk kho hrimhrim lai lo. A zumh hmanh aa zumh kho colh ve lai lo dah, mifanau.

 

 

Teinak laksawng lawmh hlan ah luchin chuht’han a tongtu Miss Colombia hnemh hmasa a herhmi hrimhrim kha Miss Philippines caah thil harsa tuk a si lai dah. Teitu nihcun hlikmahlaklo in lawmh zairel phung a si. Cun, tlawmpal ah lawmhnak mitthli te hna tiang in luan phung a si. Nain, tutan cu ningcang aa mahcahlo dan a tiru tuk tikah aa laklawh tuk viar. Aho ca hmanh ah a fawi bak lai lo; teitu he, teit’hanmi he, thawngthanhtu he.

 

 

Hakha i aruak in an hlawmmi bawhte/naute kongah ka hmuhning/ruahning

The Hakha Post nih an Facebook Page ah an tarmi a hmantlak kha ka hmuh hmasa bikmi a si rua dah? “Aho fa si hngalh lomi hngakchia ruak an char” timi tangah a langmi hmanthlak nih umtuzia bak a ka thiamter lo. Ka thling a kik i ka hmulthi a ling. The Chinland Post nih tlamtling deuh in thil sining an van t’ialmi ka rel tikah ka sivangh a zual. “A luancia kumthum chungah mah bantuk thil hi voithum a um bal cang, atu hi a voilinak a si” tiah an t’ialmi ko nih a ka lauter khun. 

Facebook ah aa tarnak hmun poah ah khat thup in comments an thlakmi pawl ka rel chap tikah ka siaremlo a zual chinchin. Ka thin hna a hang i ka ngaih hna a chia bantuk fawn. A chimzia ka thiam lo. Pathain min hmang in bia fakfak an chuah i (hngalh lomi) anu an mawhchiatnak comments pawl ko nih lungsivang in an ka tuah. 

Caan Sinah Aa Thlengmi Ka Sining (Part II)

US December thla cu akik tuk. Nort-Eastern lei ko hi akih a zual i snow a tam khun fawn.

Rumra a ngei ngai nain a hlun tuk cangmi inn pipi deuh in a khatmi New York State khuapi, Albany khua cu Malaysia in a van phankami ka caah cun akihning a fak tuk hringhran. Mi chawkvak an tlawm tuk caah a daih zong a dai tuk fawn. Kuala Lumpur he cuai van thlai lebang ahcun ziak a umlo tuk. Sihmanhsehlaw, ka lungthin cu a dai lo, a vamh in aa vaam. Ruahchannak ka ngeihmi zong, innhlun pipi sin ah an hlun fawn lo. A tuanh(ran) khawh chungin sianginn ka kai lai i chawhlehnak (business) kong ka cawng lai, tiin ka tha a tho tuk. Zokzok in ka zalh colh nain duhning in a tlamtling kho lo. Sianginn cu ka lut kho colh nain sianginn man pek ding phaisa ka ngei lo (A caan a um tilo caah cozah sin ah phaisa cawinak ding zong ka tuah manh ti lo) Cucaah, teimaak deuh in chawva kawl kaa awt. Chikhat te cu ka tha a chia pah nain ka ruahchannak a zor taktak hlei lo. A ngaingai ahcun ka tonmi hi kum 18 a si hnu ah US a phan i college kai a duhmi mino poah nih an ton cio hngami thil a si ko cumu.

Caan Sinah Aa Thlengmi Ka Sining (Part I)

Na upat tikah zeidah si na duh?

Mah biahalnak hi a tong bal lomi kan um men lai lo dah. Kei zong ka rak tong lengmang ve (atu ahcun keimah lila nih ka fale/tule pawl hi ka hal lengmang hna).

Na rak ton lio ahkhan zeitindah na rak leh(phit) ve tawn hna?

Kei cu ka bialehnak a rak idang lengmang. "Engineer si ka duh" ti hi ka rak chim tam bikmi a si men lai nain caan a van kal deuh hnu cun ka zuam taktakmi a rak silo ka fiang t'han. Atu lebang ahcun kaa fiang chinchin. Ka cawn zuam phun le ka tuaktan zuam phun a rak si bak lo. Ka rak uar pah sawhsawh, uar tuk hmanh a rak si lo. Pumpululh chuih zong hi ka rak zuam meisei nain pawcawmnak ding ngaingai ahcun rinhchanhtlak a rak silo kha ka lungki in ka rak theih peng ko.

2016 US President Thimnak Cuanh Chungnak (March 17,2015)

Zatceo hmanh kan hman rih lomi AD 2015 kum nih zeibantuk thluachuahnak le buaibainak dah a chuahpi lai ti kong hmanh hi chimrel awk ah a har tuk. A ngaingai ahcun thaizing kong hmanh kha a thei kho lomi minung nih hmailei kongah kan fianmi a um lo. Cucaah, 2016 kum dihlei sang ah a cang te dingmi thil pakhat kong cu ceihphai len awk aa tlak rih lo, ti khawh a fawi. A hman. Tukum a tang rihmi caan chungah ruahpak loin a cangmi thil koko hmanh hi chimrel cawk an si te lai lo. Sihmanhsehlaw, USA kong ceih ahcun “2016 Ramhun Thimnak (Presidential Election) ah ahodah aa zuam lai i teinak a hmu te lai,” timi hi hrelh awk a ṭha ti lo. Zeicatiah, USA Ramhun thimnak cu American lawng nih si loin vawlei pumpi nih kan sunhlawih tuk. Thimnak ah teinak a hmutu cu vanraangtawi minung nih (a tlawm le tam in) kanmah hruaitu cio ah kan rak iruah cio ṭheo. Cucu, nihin vawlei kalning phun khat a si caah kan hrial khawhmi a si lo.

Cauk Thar A Chuak!!

Lai bloggers Salai Biak Hnin Sang (www.biahalpangpa.blogspot.com) le Si Bawi Mang Lian (www.teirialcatialtu.blogspot.com) nih an tialmi cabia 26 cu Vuichip Cachuah Phu nih “Vawleicung Thawngpang Le Hmuhning Capar” tiin cauk pakhat ah an chuah.

“Vawleicung Thawngpang le Hmuhning Capar” cauk chung ahhin kum 2013-2015 karlak ah vawlei pumpi a hnintu thawngpang hna le thilcang hna cu a tlangpi in an thling ngaingai. Ukraine buainak, Scotland nih UK ramkomh chungin chuah an itimhnak, IS ralhrang pawl thawhkehnak, USA le a hawile nih IS dohnak ah chawva an dih ningcang le USA President pawl nih US Congress sinah kumtin in an riantuanning fianternak an tuah tawnning (State of The Union) kong tibantuk aa tel. USA nih Ramhun (President) an thimdan cu fiangfai ngai in aa tel hlei ah atulio ah alinsa ngai cangmi, 2016 USA President Thimnak ding kong zong aa tel fawn. Cucaah, careltu caah theihhngalhnak tampi a chuahpiter dingmi cauk pakhat a si.

Mah hi cauk cu Laimi khua kan saknak vawleicung ram kenkip ah cawk khawh a si lai. Kawlram le USA ahcun August 30,2015 thok in cawk khawh a si cang lai. Laimi tlawmtuk lawng nih khua kan saknak ram ah khua a sami hna zongnih tuanvo ngeitu sin ah cah khawh thiamthiam a si (cauk man hlei ah a kuatnak man bel liamchih a si lai). USA ram chungah hmun dangdang in cah a duhmi zongnih cauk man hlei ah kuatnak man liam a si ve lai.

Kawlram ah khua a sami nulepa, hawi-le-kom le khuami hna ca zong ah hlut khawh a si fawn. Kawlram ah hlut na duh ahcun a tanglei tuanvo ngeitu pakhat khat sin ah thawng na kan thanh lai i na hlut duhnak hmun ah cauk a phan hrimhrim lai ( A phanhlo sual ahcun phaisa kan in khirh bak lai). Cun, Kawlram caah hlut a duhmi caah tiin aman kan den ter deuh. Uk khat lawng na hlut ahcun $ 5.00 a si lai nain Uk 5 na hlut ahcun $20 lawng a si lai.

Cauk cawknak/cahnak/hlutnak kongah pehtlaih khawhmi hna cu;

Bawi Tling Uk (Interview Bawi)
Ph -214 659 2056 (Dallas, Texas)

Bawipi
Ph-317 771 5928 (Indianapolis, Indiana)

Biak Hnin Sang (Sangbawi)
Ph-8595124589 (Waco, Texas)

Siang Tha Hnem (Newstar Sui Tin Tial)
Ph-4693475965 (Lewisville, Texas)

Mang Hram Kung.
Ph-703 304 0632 (Indianapolis, Indiana)

Maria Bawi Hnem Sui
Ph-972-8379114 (Evansville, Indiana)

Boi Mang Lian
Ph- +4795439495 (Langaasen, Norway)

Salai Joseph KB Thawng
Ph- (01195)9256202894(Yangon/Halkha, Myanmar)

Puicimh Vanchiatnak Kan Ton Caan Ah Zumlotu Nih Nehsawh(Neek) Dingin Kan Um Sual Rua...

Tukarhrawng cu zatlak-puicimh a tongmi Laitlang kan unau hna thawngpang nih awlawkchong in an kan tuah dih. Vanchiatnak an tonmi cu lam kenkip in kan cuanh cio hna i thilt'ha ngaingai a si ko, tiah ka ruah. Sihmanhsehlaw, ka sia a remlo tukmi pakhat a um. Cucu, mi tampi nih kan zumhnak mit in kan cuanh dan a si. Zeicatiah, zumlotu hna nih Khrihfa an kan neek/nehsawhnak sining tampi a langmi ka lawhter.

Zumlotu cheukhat nih a tlangpi in Zumtu (Khrihfa) an kan neek/nehsawhnak a ruang bikbik cheukhat hna cu:

1. Chungthu-lengnaal (Hypocritical): Kan chimmi le kan nunning aa khat/zul lo. Hawidang nakin a fel deuhmi (sualnak a hrial deuhmi), sualnak tlawm deuh a tuahmi phun in bia kan chim nain sualnak phunkip kan tuah ve t'hiamthiam. Sihmanhsehlaw, a felmi le a nunning aa dawhmi bantukin bia kan chim peng.
2. Biaceihtu kan t'uan tuk (Judgemental): Kan pom khawhlo ning deuh in khua a sami hna le taksa duhnak kha tam deuh in a tuah tiah kan ruahmi hna cu Pathian min chirhchan in sual kan phawt colh tawn hna. Kanmah le kanmah cu a dingfel ngaimi bantuk ah kan iruat i sualnak a tuah tiah kan ruahmi midang hna kha Pathian min in bia kan ceih lengmang hna. (A ngaingai ahcun Pathian lawnglawng hi minung biaceihnak nawl a ngeitu a si).
3. Midang kan cohlang/theithiam/ngaithiam kho lo (Intolerant): Kanmah zumhning he aa khatlo deuhmi poahpoah cu kan hnon colh hna. An sining in kan cohlang kho hna lo (anmah bantuk kan si ve duhlo tinak a si lo). Kan pomning he aa kalh deuhmi chinchin cu neihniamlo ding phun hmanh in kan ruah hna.
4. Khuaruahhar kan zum tuk (Superficial): Phundang deuh in thil a cangmi poah cu "Pathian nih a khanmi a si ko cuh" ti menmen in donghter kan hmang theo. Aa thleng lengmangmi vawlei sining le Science te hna hi a pom duh lomi kan lawh lengmang lawng si loin a tuaktan zuam lomi kan hluan deuh lengmang. Kanmah tuahsernak ruang bakah a cang ko mi thil zong kha "Pathian khuakhan" kan puh leklek. Kan biakmi Pathian lila hmanh hi a ruat huam huaha lomi kan lo lengmang ( a sining kan fianglo tuk).
5. Kanmah biaknak phung hawih in ram-uk phung ser duh tuk/ Politics ah kan itel duh tuk (Too political) : Khrihfa mi hi kan biaknak phung bak ah aa hngat dih in rampennak (Theocracy) ser cu kan hmang theng lemlo nain kan ram-uknak phung le power hmang in midang chilh a duh ngaingaimi kan si peng. Biaknak le ram-uknak phung cu aa dang tein an kal awk a si, tiah a chimtam cem kan si fawn.

A cunglei hna hi Jesuh nih an kan fialmi thil an si bak hna lo. Aa ralkahmi dirhmun tu khi an kan duh piakmi an si. Sihmanhsehlaw, zumlotu nih an kan hmuhning pawl khi zumtu tampi nih nitin kan nunnak ah kan langhter ngaingaimi sining an si fawn. Zumtu aa timi kanmah Laimi sin ko ahhin mah bantuk ruahnak le kalning pawl hi a tam khunmi ka lawhter theo. Naite ah Laitlang ah a cangmi vanchiatnak ko nihhin kan sining a langhter khun rua dah ka ti. Hosea 4:6 ahcun "ka mi hna cu hngalhnak an ngeihlo tuk caah an rawkral (my people are destroyed from lack of knowlege)" a ti.

Note: A cunglei number aa khenhmi cabia pawl hi "changing the face of Christianity" chung in ka lakmi deuh an si.