A Voi 5nak CBCUSA Civui le Kei

Civui ka zawh balmi lakah amak cem bak! Cu lawng hlah, Laimi nih tuahmi tonnak puai vialte lakah a ropui bik a si hrimhrim ka zumh. Biaknak lei in siseh, vawlei lei in siseh, Laimi nih mah bantuk tonnak puai makdaduai kha kan tuah bal rih lai lo dah? Mipum in aa telmi poah nihcun ka chimmi hi an chim cio dih ko lai dah ka ti. Maivan (online) in a rak zoh tawntu zongnih an khuaruah a har ve theo ko lai dah? Zeicatiah, amak tuk palia ko hme cuuu!!

Civui pi bulletin phaw (hnu-hmai fonh)

A voi 5nak CBCUSA Civui zawh dingah kan Khrihfabu in hmunkhat te ah aa thawh khomi mino 18 nih civui chung kan riahnak ding hmun "Country Inn & Suites" kan phanh tiang ahhin ka thinlung a cawlcang tuk lem lo. Voidang ah ka zawh tawnmi biaknak lei tonnak puai pakhat menmen ahkhin ka hei ruah ko. "CBCUSA" timi min zong nih ka lungthin a hninsai lem lo i "Civui" timi biafang zongnih umzia thiamlo phun in a ka tuah fawn lo. Asinain, civui tuahnak hmun,"The Gathering Place" timi hall ngan taktak chungah lian taktakin donhmi donhhmun(stage) cungah mino hna nih thangthatnak hla in caan an van kan thokpi ciammam cu ka lau ko. An thiam tuk ning cu khuaruahhar. Inntek Zophei Christian Church (ZCC) nih Civui Donnak Program in an van peh tikah ka lau chinchin. TV lawngah ka hmuh balmi Olympics onnak program he bak khin ka tahchunh!

Emily Ngun Hlei Sung le a hawile minung pali nih "Jarusalem, the city of God" timi The Hoppers hla kha ringawn tur hluaimai in an sak cuahmah lio ah Lai thilthuam dawhdawh ihruk in donhhmun cungah a kai diahmanhmi ZCC mino hna cu zoh an rem hringhran. An dihlak in an idawh tukmi nakin an tam tukmi nih ka khuaruah a ka har ter deuh rih. Zeicatiah, USA bantuk ram thangcho ahcun biakinn ah mino tampi chuahlangh khawh hi a har tukmi a si. Anmah Americans pawl lebang cu biakinn ah mino an chuak huaha bak ti lo. Sihmanhsehlaw, ZCC mino cu a hmaicem tlang ah a dirmi bak lawng hmanh hi minung 18 hrawnghrang an si. Ka t'hut hmun in rel ka timh len hna nain an tamtuk caah felfai in ka rel kho hna lo. An zapi in Rev. Lai Ram Hu nih midonnak ding ca bakah a phuah piakmi hna hla an van sak cu khuate pakhat pumpululh certual tlukin a nganmi hall pi an kheh ciomalau. "Semnak Lairam ah paiper le ruksai ibei in civui rak zawh lio hna kha tuni cu mitthlam ah a cuang ruangmang ai ee" timi an hlabia ko nih ka lungthin a ka sukning a fak. Anmah nihcun "biazai" an ti i a hla in an sak. An hla hruaitu pa nih a phuahmi a si rua, an van phomh ciammam hoi cu mipi kan mitau a phiing dih cikcek! Akaa aa aan mi cu kan tampi nain a aw a chuahmi kan um lo. A sining bakin chim ko ahcun thawdawp a tolhmi hmanh kan tlawmte lai lo dah. "ZCC nih kan in don hna" tiah donhhmun hnulei bik tlang ah a dirmi tlangval pawl nih hlasak pah in an van tarmi catial pi a van chuah ahcun din tein a zapei a bengmi kan um lo. A puah bakin a puak ko, bengh hngal loin a ngawng phahmi kan tam ngai buin.

Ropui takin khual a dongtu ZCC mino

 ZCC midonnak program nih phundang tein ka lung a ka suk khunnak cu an mino chungin zohchunhtlak pahnih nih an tuahmi chimfiannak/hmuhsaknak (presentations) ruangah a si. T'a Lung nih Indianapolis ah khua a sami Laimi an sining le an dirhmun tete a chimmi cu civui a sawhmi khual pawl kan caah theihtlei taktak an si hlei ah theiht'ha zong an si fawn. Zeicatiah, Laimi kan kong cu kanmah Laimi nih teh theih kan herh bik ko cu. A Ngun nih Indiana State tuanbia le Indianapolis khuapi kong a chimmi zong kha ka uar chinchin. Zeicatiah, mi ramdang ah duhdim in inntung a bunh ko nain khual-lung a thlau kho rih lomi Lai miphun caah aa dawh tukmi thil ah ka ruah. Miphun dang kan thluk khawhnak ding ahcun khua kan saknak hmunhma poahpoah ahhin "lai-lung" kan ken a biapi hringhran. Mi ramdang ah hlawhfa dingin a kalmi bantukin caantawi miakmainak lawnglawng kha kan ruah chung poahpoah cu thil lianngan kan chuahcenh kho bal lai lo. Pawngkam le minung hawi nih rem lomi dirhmun ah kan phan camcin ko lai. Cucaah, Indiana State ah khua a sami Laimi chungin mino pakhat nih CBCUSA Civui pi ah Indiana State tuanbia le Indianapolis khuapi cawisannak biathlum a chimmi cu kaa lunghmuih tuk. Hi bantukin ZCC nih an kan hmuhsakmi thil duhnung hi t'uanvo aa hngalhmi pumpak (responsible citizen) tampi nih a chilhmi miphun kan si hramthoknak ah cang hram ko seh.

Midonnak program cu kaa lunghmuih tuk caah ZCC mino upa cheukhat he biaruahnak kan ngeih lio ah fiangfai deuh in an timhtuahnak kong ka hal hna. "Minung tampi nih zeimaw tete cu ruahnak kan chuah cio nain a tlangpi in a suaisamtu cu Salai Thang Cin Mang a si" an ka ti. Ka upat tuk hringhran. Hika hin upatnak ka pek colh. Suaisam ning tein thil a tuah khotu ZCC mino dihlak zong upatnak ka pek hna. Pathian tu nih hmailei ah hmang chin lengmang hram hna seh. Anmah bantukin kan tuahmi thil ah dawhcah tein a tuah khomi minung kan tampi tik ahcun kan miphun hi vawlei ah a liannganmi miphun pakhat kan si te ko lai, tiah ruahchannak ka ngei.

Thlahnak a tuahtu ZCC mino

Tutan Civui cu a lumsa kho tuk! Nikhua a linh ruangah a si lo. Minung kan tamtuk i thuttonak kan itet ruang zongah a si fawn lo. Thangt'hatnak hla (Praise & Worship) in an kan hruaitu mino nih an lumsat ter tukmi tu a si. Thiangthlarau nih a umpi hna caah an sin ah thangt'hatnak hlasak a nuamh tuk i "ka mang hlah maw a si" ka ti phah! Hlasak thiamthiam minung 15 hrawng nih an mitcinh buin hla an van kan sakpi tikah minung thong tampi nih hmunkhat ah Pathian kan thangt'hatt'inak hall pi cu vanram ko a hluan. An khup an ibil i an mitthli he hla an van sak ahcun ka thinlung a ka suk tuk tawn. "Rili aa huk i t'ek tla hmanh seh, nang he kaa zuang lai tilet cungah ka pa tilet cung bawi siangpahrang, ka Bawipa nang na si ka hngalh" tiah kan van sak ahcun ka mit in lawmhnak mitthli a luang i ka taksa fahnak a tlau."Ka sining tein nang kan biak, tlinglo le chambau buin, ka sualnak ngaihchih buin na ke hram ah ka ra" timi hla kan sak zongah ka hnar ruhno a ka t'am i "dawtnak ruangah a luangmi thisen sung misual kei caah" tiin "thangthat hallelujah" timi hla kan sak zongah ka mitthli a hai thluahmah. Pathian a duh tukmi mino tampi kan ngeihmi hi cu Laimi kan van a tha tuk hringhran, ka ti. An hlasak thiamnak zong hi Pathian lila nih hmang chin lengmang ko hna seh.

A voi 5nak CBCUSA Praise & Worship team hi ka mit in ka hmuh balmi Laimi P&W team ah a thiambik bak an si. Ka langhter cang bantukin an sin in thlarau thazang tampi kaa lak i an cungah kaa lawmhnak a sang hringhran ko. Amahbelte, thazang an ka pek thluk dengmang in an ka vaihvuanh caan a um len ve. Lungthin cawlcanghnak (emotion) sawhsawh bak kha hrem (control) loin mipi an kan hruaimi an lawh caan tete a um pah lengmangmi ka lawhter i ka sia a rem lo caan a tam. Pastors le Pathian raint'uantu tampi an um ko nain thangt'hatnak hlasak caan lio ah hlathiang sak pi loin mi damlo pumpak kha hmai ah an chuahter i thla an kan campi. A turcawl (rock) deuhmi hla kan van sak caan ahcun "mino vialte kha donhhmun hmai ah rak chuak ulaw zalong tein Pathian thangt'hat usih" an kan ti thulh. An ruahning tlukin hmai ah a chuakmi mino kan tamlo tikah "Pathian nih Bible chungah a ka zahpimi cu ka zahpi ve hna lai a ti kha awh" tibantuk bia hna an chim. An kan tuahpi mi kha ka lung a tlinlo tuk caan ahcun ka pawngkam ah a t'humi hawikom sin ah ka zai pah tawn. "Pathian kan zahpi bia a si lo ee, a biak hmanh cu hme kan biak leh cu, kan thutnak hmun ah zalong tein kan thangt'hat khawh ko mi cu hmai ah chuah thengtheng a herh tung lo hme" tiin. Ka hawipa pakhat lebang nihcun "Pathian cu a fim tuk, nanmah minung duhnak in mah bantuk nan kan tuahpimi te hna hi cu a fih men lai" a ti mei.

Khuaruah har in Pathian nih an awzai a hmanmi P&W team

A luancia kum tlawmpal tiang ahkhan Lai hlasak thiam cheukhat nih media he tonnak an ngeih tawnnak ah ka huat tukmi bia an chim lengmang. "Zuun hla ka sa (ti) lai lo, Pathian thangthatnak hla lawng bak ka sak cang lai," tiin. "Hi tluk Laimi kan tlawm i bia le hla in kan sifah hleihlei ah kan hlasak thiam cheukhat nih zuun hla an vai sak ter duh thulh lomi hi cu miphun leirawi bantuk a si" ka rak ti tawn. Sihmanhsehlaw, 2005 ah Pathian dawtnak ka theih hnu in cun Pathian thangt'hatnak hla lawng a sami hlasatu hi ka upat tuk cang hna. Zeicatiah, an sakmi hla nih ka lungthin chungah fak deuh in rian a tuan khawh tuk hringhran. Pathian hla deuh a sami nihcun zuun hla sa loin kan um piak deuh hna sehlaw mipi kan caah t'hathnemnak a chuah deuh hlei ah anmah pumpak ca zongah hlawhtlinnak a um deuh hrimhrim lai, tiah ka zumh cang.

Pathian t'hangthatnak hla nihhin thazang tamtuk a ka pek peng caah ka ngaih ngaingai ve. Biakinn chungah aa khawmmi dihlak nih hlawptlo ngai in kan van sak caan lebang ahkhin cun ka sining pi bak khi kaa philh duak theo. Cu tluk cun hla nihhin ka lung a ka lak khawh. Sihmanhsehlaw, zei bantuk hla poah nih ka lungthin cekne an khawih kho lo. A bikin a turcawl (rock) tukmi hla pawl hi kaa ziak lo. Laam buin Pathian thangt'hat rumro an van kan sawm ahkhin ka hul bak tawn. Huamsam tein sakmi hla pawl khi a biafang sullam ruahpah chih caan ka ngeih khawh caah rianrang piin sakmi hla nakin ka nunnak ah rian a t'uan deuh tuk palia. Cucaah hmailei ahcun P&W hruaitu mino nihhin anmah lungthawhnak sawhsawh in tongta sawm in laam kan sawm ti hna sehlaw an kan hruaining cungah kaa lawmhnak a sang chinchin hnga. Kha zatzat civui a zawhmi lak ahkhan cun keimah bantuk minung hi an tlawmte men lai lo dah ka hei ti. "Minung hi kan i dang cio i sertu kan thangt'hat duhning dan zong hi aa lo cio lo," timi hi caan hruaitu nih kan theihchih peng a biapi ngaingai. Tutan civui cu perchoi le aukhuan fial chih a tam tuk ruangah pumhnak ah a ra huam lomi hmanh an um phah kho men, tiah ka ruah.

Pumhnak hmun a remning le aa pummi kan tamning cu khuaruahhar

Sailo Thang nih a hruaimi ringawn (music) tumtu cu an thiam lawlaw. Laimi kan dirhmun in ka cuanh tikah an chambaunak tindum tia zong ka hmu bak lo, music ka thiamlo tuk ca zongah a si kho ko. Zeisihmanh ah Pathian nih a umpi hna, timi cu al awk a um lomi ah ka ruah. Stage cungah dawhcah tein an cawlcanghmi hmanh nihkhan ka lung an ka ton tuk. Laimi lak ahhin ringawn tum thiammi hi kan har tuk caah maw a si hnga, puai poahpoah ahhin ringawn tumtu pawl hi hna an hnok duh tuk! Ningcang tlai te le dawhcah tein an um duh tuk bal huaha lo. Anmah duhning deuh cio in ringawn an tum tawn i a thiam bak lomi kan hnakhaw hmanh ah a lut kho tawn lo. Cu bantuk ziaza dawhcahlo vialte cu tutan civui ringawn tumtu sin ah hmuh ding a um lo. Ringawn an tum pah in tlo tukin thangt'hatnak hla an sak vemi hrim nih ka lungthin ah thathawhnak tampi a chuahter. An bau deuhvak rua tiah ka ruahmi pakhat te tu cu pumhnak program chungah pumpak in hlasaknak caan a hmangtu dingmi hlasakthiam cheukhat he felfai tein pehtlaihnak an ngei rua lo dah ka ti. Minung nihcun tlamtlin dih khawh a si lo bantukin chambaunak pelpawi tete an ngeihmi cu chim awk hmanh an tlak lo. A tlangpi in van cuanh tikah an ti tha tuk (lawngtlai Laiholh kaa hlan) hringhran. Amah Pathian tu nih hmailei ah hmang chin lengmang ko hna seh!

Pathian dawtnak thawngin Lai miphun hi a luancia kum tlawmpalte chungah  a lamkip in khuaruahhar in kan t'hangcho. Fimthiamnak lei in siseh, muisam pumrua in siseh, hlasak thiamnak in siseh, chawlehthalnak in siseh, ringawn tum thiamnak in siseh, fak piin kan dirhmun aa thleng. Media lei ko ahhin kan t'hangcho ning a zual bik rua dah ka ti. Asinain, kannih Hakha holh a hmangmi pawl hi media lei ah hawi kan hnu ngaingaimi a lo. Zeicatiah, kan tuahmi hi midang kan unau tuahmi he epchun tikah quality an ngeilo tuk. Sihmanhsehlaw, tutan civui pi ah media t'uanvo a latu hna cu makdara bak an si. An muicawl quality a t'hat tuk hlei ah biahaltu nih biahal an thiam tuk i a zohtu caah thethnemnak tampi a chuahpi. Bianuam chim thiam Interview Bawi hna nihcun "an muicawl quality a t'hat tukmi cu va um rih seh, civui tuahnak hmun chungah a to ve sawhsawhmi zaran kanmah pawl luklak hmanh kha aa buaktlak tein TV ah an kan langhter lengmangmi hrimhrim hi uar an um tuk cang" tiin thangt'hatnak a pek hna.

Quality a ngei tukmi media team hi an tuahmi thil a lianngan tuk nain mipi sin ah a lang tuk lem lomi an si. Unsung heroes!!

Laimi hi kan kokek in hlasak kan thiam ngaingai ko rua. Hlasak hi teimak chuahin a cawng ngaingai mi cu kan um huaha men lai lo nain kanmah tawkin a thiammi kan tam ngaingai. Cucu, tutan civui ahhin fiang tukin a langmi ka lawhter. Pumpak hlasatu vialte kha an thiam tuk dih. An ral zong a t'ha i mipi zong an hip kho tuk. A thiam tukmi an tamtuk lawmmam caah hlasak zuamnak puai si sehlaw a thiam bikmi thim khawh an si men hnga lo. An sak lio ahhin "a sa cangmi vialte lakah amah bak hi a thiam cem a si rih" ka timi hi kutdong khiah in relphu pi an si. Sihmanhsehlaw, ka lung an ka tonlo tuknak pakhat te a um. Hla an sak hlan ah caan lakin bia an chim ngai hna nain an sak dingmi hla a phuah piaktu hna min hi khualdon zaan ah duet a sami, Diana Cer Vang le Van Zi lawnglawng nih an chim ka hngalh. Midang vialte cu an sak dingmi hla sullam an fianternak ah caan a kal thlu. Ka hei ruahmi cu "a sullam an fianter lenmi hi a phuahtu nih a phuahhnawh chan an si taktak hnga maw,
a silo sual ahcun aw.." ti khi a si. Keimah ka pawmdan ahcun hlasathiam pakhat nihcun hla a phuah piaktu cu mipi sin ah upatnak (credit) a pek hrimhrim ding a si, ka ti. Chawva in a cawkmi a silo chinchin lebang ahcun a langhter chinchin a herh. Laimi nih hla hlei ah miphun dang kan phanh khawhnak hna ding ahcun mipi le hlasakthiam hna nih hlaphuahthiam hi kan thangt'hat deuh hrimhrim hna a herh. Culocun hla t'ha kan ngei tlawm tuk zungzal ko lai.

Tutan civui ah solo a sami vialte lakah minung pathum cu phundang tein ka lungthin ah an caam. Pakhatnak cu Kentucky State, Bowling Green khua ah a ummi Len Remi a si. A mit nih khua a hmulo nain "lawmhlo in ka um kho lo" timi hla bak a sak ko___Pathian dawtnak hi t'ha tein ruah setmat ahcun a cungah lawmh loin a um kho ding kan si hrim tak lo. A aw a t'hat tuk hlei ah hlasak a thiam tuk tikah a sining ruahpiak chih pah buin ngaih piak ahcun t'ah thluahmah a fawite. Kaa sum len nain ka mitthli a hai thluahmah. Ka pawngkam ka zoh hna i an rak si cio ve. Atutiang ahhin ka mitthlam ah a cuang lengmang rih. Pahnihnak cu nikum Lawngtlai Lai Idol ah teinak a hmutu Linda Lalchhanhimi a si. Lawngtlai Lai Idol kha YouTube ah ka rak zoh pah tawn i Linda zong hi a hlasakmi tampi ka rak ngaih bal. Sihmanhsehlaw, ka ruahning nakin a taktak ah a rak thiam deuh tuk! Sangau hi ka hmu ballo nain khua fate ah ka hei ruah i "sangau ah a t'hanglianmi nih mah tlukin hlasak a thiam hi cu a men lo" ka ti. "Laiholh zong hi ka ruahning nakin a thiam deuh tukmi alo" ka ti sual i "dai law, Sangau cu na phan bal loh cuh, Laiholh in teh an holh deuh ko cu, T'iao tiva kap hrawng ah khua a sami Laimi nih mizo holh an hman bantuk khin Sangau hrawng nihcun Laiholh hi an hman ve" tiah Interview Bawi nih a ka hrilhfianh. A pathumnak cu Simon Ci Lian a si. Lai mino lakah amin a thang ngaingaimi hlasakthiam a si nain ka ruahning a ka khel cikcek! Milai minthang pi nih hollow guiter te aa tum salam i zoh bu bakin hla a sak mei ko. Hi bantuk civui lianpi hna ah caan pekmi minung nih timhtuahnak ngei lem loin caan hman salam cu Pathian cu va um rih seh, mipi upatlo bak ah ka ruah i a hlasakmi cu ka hnakhaw chungah a lut kho bak lo. Mah bantuk minung pawl hi cu zeitluk minngei an si zongah hmailei ahcun caan pek tilo bak ding an si ka ti. Zeicatiah, rumra le ningcang ngei tukin tawlrelmi program an hrawk tuk!

A voi 5nak CBCUSA Civui pi ah kaa lunghmuih tuk hoimi pakhat cu niruk ni zaanlei tiang kha suaisam ning tein caan a kal. Nubu nih an hruaimi niruk ni zaanlei pumh lebang cu suaisam ciami caan nakin tampi in a tawi deuh. Kan nule pawl cingcing hi an rak tiru ko. Minung 90 hrawnghrang baknih Laithil dawhdawh he hla an remh kho i khuaruahhar viar in an kan tuah. Mah bantuk hlaremh kha cu semnak Laitlang hmanh ah a um theng ti men lai lo dah ka ti. Lawngtlai lei in a rami Lairam Isua Krista Baptist Kohran ah nubu secretary a t'uan liomi C.Z. Rammawipani nih thawngt'ha a chimmi cu a tawite nain a fiang taktak. Cu hlei ah civui tlangtar a khen bak fawn i sullam a ngei khun.  Sihmanhsehlaw, suaisamning bantuk tein caan a kal diahmah ko mi cu mino caanhman zaan, niruk ni zaan, ah a rawk viar.

Laithil he dawh tukin hla a remhtu CBCUSA nubu

CBCUSA hruaitu kan pale nih US khuasa Lai mino caah tiin duhsaknak nganpi he Australia ram ah an hei cahmi Rev.Dr Dennis Shu Maung nih phung a chim ciammam cu suimillam pakhat le cheu dengmang bak caan a lak ko ai. "Pipu zumhnak kha kaltak(philh) hna hlah u" timi tlangtar in thawngt'ha a chimmi cu aa thokka hrawng cu ngaih a nuam  tuk. Bible chungah kan hmuhmi zohchunhtlak zumtu Abraham tepawl kong in Jesuh Khrih thih hnu ah fak piin hremnak a tuarmi Khrihfa hmasa pawl zumhnak kongah a van kal tiang hi cu lunghmuihnak lusuk pah in a bia ka ngaih ko. Sihmanhsehlaw, tlawmpal a van lanh cun ngaih ding ngaingai a um tilo. A duhning poah in a kal ciammam i suimillam pakhat hnu ceo ah a tlangtar lei ah a kir t'han caah thawngt'ha chim dih hnu ah drama a piahmi CEBC mino pawl cu an thiam tlukin zohtu an ngei tilo. Civui ngan pipi cu pumhnak program pakhat chungah caanhmannak a tamtuk tikah thawngt'ha chimtu hi a caan khiah piak ding an si (tutan zong hi an khiah ko men lai nain). Thawngt'ha chimtu nih an zulhlo ahcun neem tein ngol ter ding an si ko. Culocun, khuakhang laireltu le mipi caah thil kalning a rawk dih i hna a hnok tuk. Pumh zuam tilo nak hmanh a chuak kho.

Mizoram hi ka mipum in ka phan bal lo nain hringtu ka pa hi mizoram ah thil a zuar tawnmi (sumdawng) a rak si caah mizo kan unau pawl nih Laimi an kan hmuhning hi ka theih ngaingai ve, tiah kaa ruat. Zeicatiah, Laimi a si ruangah mizo nih an zawmhtaih i hnahnawhnak an rak peknak kong hi ka pa hmurka bakin voi hnihkhat cu a rak theih bal. "Ka fale, nan pa nih nanmah hmailei ca ruah ah hi bantukin harsatnak le nehsawhnak phunkip ka tuarmi hi nan hngalh ko ahcun fimnak nan cawnnak ah tei nan rial hrimhrim awk a si," tiah lungfak ngai in a rak kan chimh theo. Cun, mizo ram ah aa hlawhfa balmi ka hawile tampi sin zong in mizo nih an kan nautatnak kong hi ka rak theih pah lengmang. Cucaah, mizo hi ka rak rem lem hna lo. Biadang in chim ahcun zeite ah ka rak rel ve hna lo. CYONA le Laimi Zatlangbuu cheukhat nih conference le hlasaknak puai tepawl kan tuah caan ah mizo hlasakthiam kan sawm tawnmi hna zong khi ka rak doh peng (atutiang zong ahhin ka uar kho taktak rih lo). Mizoram ah khua a sami Laimi kan unau cheukhat zong khi mizo zia an keng, tiah ka rak theih lengmang caah ka rak uar bak ve hna lo. Lawngtlai hrawngah khua a sami kan unau zong khi ka uar lomi cazin ah an rak itel. Sihmanhsehlaw, 2014 kum ah an tuahmi Lai Idol kong kha ka Facebook newsfeed ah ka hmuh leklek ruangah ka rak zoh pah tawn hna i ka hmuhning hna tampi aa thleng. An thiam baklo nain Laiholh an hman chihmi nihkhan phundang piin ka thinlung a hninhsaih ter. Cawnduhnak lungthin an ngeihmi hrimhrim kha ka upat tuk hna.

Lawngtlai lei khual le CBCUSA Officer Council hna

CBCUSA hruaitu kan pale nih civui caah Lairam Isua Krista Kohran (Lawngtlai) hlaremhbuu an rak sawmmi hna cu an thiam tuk ka ti. Anmah um hna hlah sehlaw civui cu a chambau ngaimi alo lai dah. Hlaremh an thiam tuk rumro le puai an lumsatter tuk. Civui tuahnak hmun ka phanhka ah mitpurh-hnarcawih in ka ngiatthlai hna i an hmuisam nih ka lung an ka tong lem lo. Lamneih nawn tein ka zoh hna tikah US khuasa Lainu pawl nih vunhawng t'hat lei in an hneh tuk hna in ka hmu ( kan din-ei zong cu a t'ha deuh ve cumu).An diingdong tu cu a tlangpi in an irem dih. Sihmanhsehlaw, hninhsaih pahin donhhmun(stage) cungah hla an van remh ciammam ahcun an idawh tuk viar. "Hallelujah Chorus" an van sak lebang khan ahcun vanmi ko khi an hluan ka ti.Hlaremh an sak dan hrim khi kanmah lei sakning he cun aa dang tuk. Kannih cu awcareng chuah in a t'eekmi(raak) kan tamtuk. Annih cu aa ruangin an aw an pum ter dih i tluangtlam tukin hnakhaw chungah a lut kho. An aw an hrem (control) dan te tal khi cawng kho hna usihlaw zarhpi ni pumh caan ah mino hlaremh hi ngaih a nuam deuh tuk ko hnga.

Hlaremh ahcun Vancungmi bantuk, LIKBK hlaremhbuu

Laimi nih tuahmi civui ah a ropui bikah ka ruahmi civui pi ah kaa rak ihngahhlang tlukin ka lung a ka tong lomi cu thawngt'ha chim a si. Hiti ka chim tikah ah an chimmi thawngt'ha an t'halo ka tinak a si lo. Mi tamu caah cun an dihlak zong in an t'ha dih ko men lai. Rev. Dr Stephen Hre Kio nih a chimmi hna kha cu keimah ca zong ah makdara a si ko. Biaknak lei ah kan upatmi kan pa a si bantukin mi ramdang ah khua a sami kan miphun nih ralrin awk kan ngeihmi tete a chimmi hrimhrim kha kaa lunghmuih tuk. USA khuasa Lai mino tampi chungah meisei in a sualmi zeimawzat kan um lenmi zong a cohlan lawng si loin ralt'ha tein a chimphuan ngammi lebang kha cu ka uar tuk palia. Voi tampi cu kan sining bakte a si komi hi ralt'ha tein kan cohlang(acknowledge) kho tawn lo i siamremhnak ding ah lam a um kho tawn lo. Zammang Mualcin nih a chimmi zong kha ngaih a nuam tuk thiamthiam ve i midang cio nih an chimmi zong kha anmah sining cio in lung an la dih ko. Sihmanhsehlaw, kaa hngahhlang ning tlukin kaa lunghmuih bak hna lo (Rev. Dr Hre Kio chimmi dah lo cu). A ruang ngaingai hi van thlir len awk ka theih tuk fawnlo tikah keimah lei in ruahchannak a rak san tuk lawmmam ca zong ah a si men lai, ka ti pah. Midang cio teh zeitindek an hei si cio hnga?

Laimi cu Americans Baptist Churches (ABC) mission riant'uannak thawngin Pathian a theimi miphun kan si. Phundang in chim ahcun ABC hi thlarau in Lai miphun hringtu kan pa a si. Cu ruangah a si lai cu, ABC nih Laimi an kan dawt tuk hi. Atulio ah an General Secretary a t'uan liomi Rev. Dr Roy Medley lebang nihhin cun Laimi hi an kan dawt tuk rumro ko rua. Mi ramdang ah harsatnak tuar in a sivangmi Laimi sinah bawmhnak kutnem a samh zungzal i Laitlang zongah voihnih khelte a tlawng cang. Tutan civui ah thawngt'ha chimnak caant'ha an pek vemi cu aa hlawh ve hrimhrim ko, tiah ka ruah. A chimmi thawngt'ha hrimhrim zong kha theiht'ha tuk a si fawn. Sihmanhsehlaw, holh an leh piakmi tu kha a site a si lo. An vaihvuanh piak viar. Mirang holh a thei lomi kan tamtuk tikah miphun dang nih mirang holh in phung an chim ahcun Laiholh in lehlo awk a t'ha lo. Asinain, civui lianpi ah minung thong tampi nih kan ngaihmi thawngt'ha cu holhleh a thiammi nih an leh hrimhrim a herh. Hruaitu pastor thengtheng zongnih leh a herh lem lo, an thiamlo tikah anmin a chia menmen. Minung hi thiammi thil kan ngei cio i kan thiamlo tukmi thil cu midang a thiammi an um ko ahcun zapi caah kan tuahlo ah a t'ha bik. Hmailei civui ah miphun dang kha caan kan pek hna ahcun professional holhlettu nih holhleh piak cang hna sehlaw mipi caah t'hathnemnak a tam deuh hlei ah an kan hruaitu kan pale ca zong ah mualphonak a umlo deuh lai.

Minung kan tamtuk lawmmam i hmanthlak ah kan lang dih kho bak lo

A voi 5nak CBCUSA Civui pi tlangtar cu "rawl cu an hmin dih cang i t'uan an cu diam cang" timi John 4:35 kha a si. Civui dongtu ZCC nih zohco emem in an sermi poster pi cungah a hmutu poah khuaruah tamter kho dingin aa tialmi bible cacaang cu lungthin a su tuk hringhran. Jesuh Khrih nih a zultu pawl kha thawngt'ha bia karhter dingin rian a fial hna nak bia a si, timi cu kan theih dihmi a si ko cumu. A tawinak in chim ahcun "mission t'uan zokzok cang uca" ti a si ko. Civui chungah thawngt'ha chimtu vialte nih tlangtar he aa hawih in mission riant'uan a herhnak kong lawngte an chim dih taktak ko. Sihmanhsehlaw, CBCUSA nih hrahsah ngai in aa hmaithlakmi mission riant'uannak program a simi, International Chin Baptist Mission (ICBM), ah rian a t'uanmi hna cu biachimnak caan minutes pa 6 lawng bak pek an si ai. Rev. Dr Cung Lian Hup le Rev. M Thawng Kam celngel an si caah an riant'uannak kong cu tawifiang tein chimfiannak an ngei kho i a tlamtling ngaingai lehlam. Asinain, thawngt'ha chimtu hna nih pakhat hnu pakhat in kan tlangtar an fiantermi ka ngaih lengmang tikah caan tambik pek dingah aa tlak bikmi cu an liang cungah mission rian aa khinhmi anmah bantuk minung kha an si rua dah ka hei ti. Midang nih zeitindek an hei ruah cio hnga?

Tlangtar cacaang he aa tlak tukin sermi poster

Laimi nih sermi buu nana ahcun CBCUSA hi a t'hangcho bik a si men lai. 2004 kum lio ah Khrihfabuu buu 6 in rak thokmi cu nihin ahcun Khrihfabuu 92 nih hmunkhat ah rian an t'uantinak buu nganpi a si cang. Pathian nih thlua a chuah hrimhrim timi cu mithmuh kuttongh a si ko. Sihmanhsehlaw, Pathian duhnak le miphun dawtnak lungthin he an fimthiamnak le an  thazang tampi chuahin khua a khang i mipi an kan hruaitu kan pale hna hi upatawk an tlak tuk hna. Amah Pathian lila nih lunun-ngandamnak pe hram ko hna seh. CBCUSA hruaitu vialte hi anmah sining cio in thangt'hat conglawmh tlak dih an si ko. Asinain, Executive minister a t'uanmi Rev. Dr C. Duh Kam cu ahopoah nih kan upat tuk dih. Pathian a duh lawng si loin a nun zong a nem. Cu hlei ah mibu hruaithiamnak pahrang hrimhrim a ngei. Amah bantuk hruaitu t'ha kan rak ngeih hi Lai miphun kan van a t'ha tuk! CBCUSA BT nih 2018 kum tiang caah Executive Minister rian peh dingin an thim t'hanmi cungah lunglawmhnak a sang ko. Pathian tu nih a riant'uannak ah umpi zungzal hram ko seh. A riant'uan hawi vialte zong Pathian nih lamhruai hna sehlaw CBCUSA hmangin Pathian le Lai miphun a cawisangtu si cio hram hna seh.

CBCUSA a nunkhua sau sehlaw Pathian min thangt'ha ko seh! 2018 kum ah Indiana Chin Baptist Church nih an tuah dingmi a voi 6nak CBCUSA Civui Pi zawh lai kaa hngahhlang!