Apple CEO Tim Cook Nih Gay A Sinak Kong Aa Phuanmi Cu Chantiluan Nih A Fenhchihmi Laikhal Mitin Ka Cuan Ve

Theihternak: A tanglei cabia hi vawleicung company lian bik pakhat a simi, Apple Inc ah CEO a tuanmi, Tim Cook nih mipi theihin padawk-nudawk(gay) a si nak kong a chimmi kha rianrang in ka cuanh sawhsawhmi a si tikah a fil ngaingai men lai i nan theihthiamnak kaa ham cia.

Mipi theihin Gay a sinak a phuangtu Tim Cook

Tuzing ah chuahmi Bloombergbusinessweek ah Timothy Cook nih "Gay, padawk-nudawk ka si" tiah aa phuan. Vawleicung ah a lar bikmi thilri, Iphone, Ipad le Macbook tepawl a sertu, Apple company ah CEO a tuanmi nih atu bantukin gay a sinak aa phuanmi cu upat awk a tlak tuk, ka ti. Zeicatiah, mipi nih theih dingin a sining chim a herhnak a um lo nain an i chuahpi mi an sining ruangah nehsawhnak le tlanglamhnak phunkip a tongmi mitlawm, LGBT hna nih aa tlukmi nuhrin covo an hmuh khawhnak ding caah a tuahmi a si caah a si. A bialak dan hrim hi a thiam tuk hoi. "Gay sinak hi Pathian nih a ka pekmi laksawng sunglawi bik lakah pakhat a si tiah ka ruah" a timi nihhin biaknak mit lawngin khua a cuan i anmah kal ning loin a kalmi poah cu tongta phomhin phomh a hmangmi pawl kha chim ding ngeilo in a tuah hna. Bill Clinton telin vawleicung mi makmak tampi nih an van lawmh tukmi zong hi a phu bak tak ko. Mark Zuckerberg nih " Tim, hruaitu t'ha timi cu a sining dik taktak teah ral t'ha tein a dirngammi hi an si ko, timi na kan hmuhsak t'han caah kan lawmh tuk" tiah a Facebook cahmai ah a tar phah. Thuk deuh vakin ka van lut lawlaw tuah lai iai!

Vanmi.....

Hmantlak hi ka rak hmang tuk bal lo. Camera hmai ahcun zeitipi khin dek ka um. Umtuzia bak khi ka thiam lo. Ding tein ka dir kho loh i dawhcah tein ka t'hu kho lo. Tikah, hman kaa thla theng bal loh i ka hmantlak hi a tlawm ngaite.Tanghra ka cawn tiang ah keimah pumpak telawng hmantlak hi pahnih lawng bak ka rak ngei. Mah cu pahnih hmanh ahcun pakhat cu ka hngakchiat lio, mawm nawn cerhcorh in duh ka rak nun saling, hmanthlak khi a si.

Biaknak A Ngei Lomi Nih Biaknak An Hmunhning Hmangin Biaknak Kong Biaruahnak!

Zalong tein ruahnak le hmuhning chim hi ka tleihchan bikmi pakhat a si. Midang nih thil pakhat khat cungah zalong tein an ruahning le an pomning an chimmi ka hmuh zong ahkhin kaa lawm ngai tawn. Zeibantuk thil le issue a si hmanhah dawhcah tein pumpak hmuhning le ruahnak cio paihter lebang cu ka uar tuk. Cucaah, Social Networks ka hmang taktak! Facebook hi ka phone ah log-in cia in ka chiah peng. Blog ka sernak zong hi issue kenkip ah ka ruahnak le ka hmuhning kha zalong tein chimphuan ka duh caah a si ko.

Biaknak a ngei lomi Richard Dawkins nih biaknak cungah a ruahnak a chimmi kha ka Facebook ah a tanglei bantukin ka tar. Ka tarmi cabia tawite nihcun ka hawile lungthin ah phundang tein rian a t'uan caah a t'ha ngaimi biaruahnak a chuak. Kan biaruahnak cu rel t'ha ah ka ruah caah ka blog a leng tawntu nih nan rak rel cio dingah ka van phozar phawt ve.

Nunnak

Tu zanlei cu Kawi Biak nih mizapi nih man pek loin hman khawhmi “tennis court” ah tennis tuk a ka chimh. Capo seih pahin nuam ngai in ka cawng. Tlawmpal kan van tuk ahkhin mirangnu pakhat nih kan tennis court kamah a ummi hngakchia lentecelhnak hmunah a fale pahnih a van i hruai hna. Caan raulo ah mirangpa pakhat nih a fale pahnih a van i ratpi ve hna khi a langhlat in ka hei hmuh ve. Nu nih a van ratpi mi ngakchiapa te cu lentecelhnak ah um ziar loin kan tennis tukmi zoh duhah kanmah lei ah a van ra lengmang. Kan tennis ball hna a rak kan char piak i “thank you” ka hei ti leklek. A nu nih a van auh caan poahah huam lo nawn khin a hei kir tawn. 

Occupy Central For Love And Peace: Hong Kong Mipi Nih Zeidah An Hauh?

Nitlak ram mipi nih internet hmangin ihawikomhnak ah Facebook an hman bantukin Tuluk mipi nih Weibo an hman ve. A bikin mino nih an hmanmi social network site Weibo chungah aa chawkmi cabia le hmantlak hna cu Tuluk cozah nihhin a hnawh pah lengmang ko. Nain, naihrawng cu a zual tuk. Forbes nih an chimnak ah Tuluk cozah nih social networks chungah an hnawhmi cabia, hmantlak le videos hi voidang nakin alet nga in a karh. Media zalennak a hua ngaitu Tuluk communist hruaitu hna nih t'ihnung thil ah an rak ruah bal lem lomi Instagram (hmantlak le videos phozarnak le icheuhboahnak hmun) zong an phih bak. "Google Search" bantukin Tuluk mi tambik nih an hmanmi "Baidu" ah hnawh(hloh) a tong bikmi cafang cu "Hong Kong" timi a si.