Sung Sung A Lungfakkk

Sung Sung hi ka chuahpi ka far cu a si lo. Ka nu lei in pehtleihnak kan ngei lo i ka pa lei zongin sahlawh ngaingai kan si fawn lo. Nain, ka far ka ti ko. A ruang cu Laitlang kan khua ah aa daw tukmi innpa kan rak si i t’a le far zohin aa zoh pengmi kan si. Kan ingamhtlak i kan itleihchan. A t’a taktak bantukah a ka ruah ve caah a ka bochan ial. Amah lawng a si lo. A unu le a naunu zongnih an t’a bantukah an kan ruah ve t’hiamt’hiam. An ka tleihchan tuk hi chuahpi t’a an ngeihlo ruang zongah a si pah kho men. An hngakchiat lio ah an lentecelh t’i hawi nih an lung an father hna caan ah bochannak nganpi he an rak ka chimh tawn. Sung Sung ko hi a rak pa ngai caah hawidang he aa sik a rak tam khun. Cuticun, pakhat le pakhat ichanh pah cun nuam ngaiin nifatin kan rak tlawngleng hna. Sihmanhsehlaw, keimah tangriat kai ding ka si kum ah kan chungkhar in Thantlang ah kan pem. Cu hnu cun Sung Sung te unau he hin kan i hmu bal theng ti lo.

Kum zeimawzat hnu ah USA ka rak phanh ahcun Sung Sung te cu an chungkhar tlingin US ah khua an rak sa cang. Amah lawngin kuli t’uan dingah Malaysia a rak fuhmi a pa nih US ah a rak lak diam hna. Vunrang le vunnak pawlnih a chilh in an kan chilhnak ramah a rak i daw tukmi innpa kan iton t’hanmi cu ka caah a sunglawi tuk. Anmah ca zongah a sunglawi ngai ve ko rua, an ka chawnhbiak huam tuk ve. A unau dang nakin Sung Sung nihhin a ka tleihchan bikmi a lo. An inn ka len caan poah ahcun aa lawmmi mithmai he dongcat loin bia zaza a ka ruah peng. Asinain, nai hrawnghrang cu bia a ka ruah caan ah a mithmai a panh tuk ti lo. A ca cawnnak kong kan ceih poah ahcun bia a chim pah khin t’ah thluahmah aa timmi kho khi a lo. Amah le amah aa hua. Cun, Laimi nih kan ngeihmi biaknak buu le zatlang buu pawl cung zongah a lung a fak.

Sung Sung hi Kawlram ah tanghra tiang cu sianginn a rak kai ko. Nain, hawidang cio bang, thiammi zeite a ngei lo. Mirang holh a thiam bak lo. A ca koko hmanh hi zoh bu zongin a rel thiam huaha lo. Sihmanhsehlaw, a kumkhua nih catang niam tukin thok awk t’ha loin a tuah caah tanghra in a domh. An holh zong a theih bak lomi, amah nakin kumkhua in a hngakchia deuh tukmi pawl sin ahcun dai zimziam tein nitin tein ca a cawng ve. Ca chimtu nih an chimmi kha a lung a fian khawhmi a umlo tikah a ca cawnmi cu a ruat bal tuk theng lem lo. A ruahtonh awk hrimhrim khi a theih pumpuluklo tikah a ca thiamlo hmanh kha aa thei tuk lo. A mawh lo. Ca thiamlo ruangah taksa fakin dantatnak pek timi a um lomi fimthiam cawnnak system tangah sianginn a kai tikah a ca thiam lomi nih nifa a nunnak ah hnahnawhnak a pekmi ngaingai a um lo. A rengrenglo ah ca hi thiamlo tuk lawmmam ahcun thiam duhnak lungthin zong hi ngeih khawh a si lo hrimhrim cumu. Sung Sung nih a ca cawnmi kongah a buai bak lo hi a rak mawh lo. A theilo pumpuluk hme c! Nain, US ah sianginn a kainak kum hnih a si hnu, atu ahcun amah le amah aa hua cang. A sianginn kainak kong a chim poah ah a lung a fak. Amah hnu ah US a phanmi Korean a hawi nute sining a hmuh pengmi nih a lungfah a zualter chinchin.

Sung Sung nih a ca cawnnak kongah a lung a fahmi hi kam khat ahcun US a rak phanhka nakin a cawnmi a thiam deuh ngaingai cang caah a si ko. Sianghngakchia kha an cawnmi thil i a hrampi lawng chimh i anmah cerei cio in tuaktanter le kawlhawlter mi fimcawnnak system (aa ongmi system) kha a thawtnam a van theih pah cang nain a thiamnak nih hawidang a tluklo tuk caah a duhning in kar a hlang kho lo. Bawmtu a herh. A hmuhlo tikah, a ngaih a chia. Kan iton caan ahhin a ca cawnnak kong hi kan ceih bikmi a si theo i “keimah pi hi cu a si ka si loh eeh, kai hua tuk” a ti lengmang. A nulepa a zoh hna ah a zaang an fak tuk. An thlanri putin an fale caah overtime an t’uan pengmi nih umsiarem loin a tuah. A caancaan ahcun sianginn kai i ngol in a re thei tukmi a nulepa dirkamh a duh hna. An cungah a lung aa lawm tuk i a dawt tuk hna. Nain, Korean a hawinu i a nu a hmuhah zeitindek a um. Aa pumh tawnnak a Lai Biakinn ah lunglawmhnak tampi a hmu ko. Sihmanhsehlaw, Korean a hawi nute biakinn ah voi hnih-thum a kal hnu cun a ruahning aa thleng. Aa lawmh tuk tawnnak a Khirhfabuu cungah a lung a fak. Cu zong cu mawhchiat awk a t’ha hoi lo.

Sandy hi Sung Sung hnu ah Korea in US a phanmi a si. Tangkua an cawn lio ah an sianginn khan chungah mirang holh a thiam lomi hi Sung Sung le amah lawng an si. An sining aa khah ngai hleiah an ratnak ram zong aa neihniam ngai caah caan sau a rauh hlanah an itleihchan colh. Hmun khatah rawl an ei t’i i an khan aa khah caan poah ahcun neih tein an t’hu. An thiam chun mirang holh tlawmpalte le an kutke hmangin bia an i ruah ko nain an tlo kho ngai. An dirhmun aa khat bak ko____an vunhawng(cuar) aa nah-raan deuh dah ti lo cu. Sihmanhsehlaw, kum hnih a rauh hnu ahcun an sining aa dang tuk. Sandy cu an khan chungah cathiam bik lakah aa tel cang. Sung Sung tu cu amah cang cun aa zuam sek ko nain a dirhmun t’hing te ah a dir ko rih. Zeiruangah dah an i dan tuk hnga? Sandy hi Sung Sung nakin a thluak thazang a t’hawn deuh tuk caah a si hnga maw? A si kho men ko. Nain, Sung Sung nih a lung a fahnak hi Sandy thlukin a thluak a t’hatlo ruangah a si lo. 

Sandy cu a nu nih nifatin in a unu he sianginn ah a thlah hna i a don peng hna___a pa tu cu Korea ah a um. Sianginn chuah caan ah a nu motor lei panhin lawmhnak mithmai he a tlimi Sandy hi Sung Sung nih a hngar tuk. Asinain, a hngar deuhmi thil dang a um rih. Cucu, zarh dongh i Sandy te inn a riah caan ah a hmuh tawnmi a si. Sandy nu nihhin a fale hi a dawt tuk hna i awhrang in a chawn bal hna lo. An nunnak chung tu ah a lut. Tuah an duhmi poahpoah kha lungsau tein a tuahpi hna. Sihmanhsehlaw, an halmi kha a pe sawhsawh bal hna lo. Thil pakhat khat he a thlen zungzal hna. An ca cawnnak kongah a buaipi hna i an homework kongah aa thlak. “Sandy, mah hi na homework na dih bak ahcun tuzan cu zoh na duhmi movie kha kan zoh hna lai” tiah an duhmi thil in a tarh hna. A fialmi kha an tuah dih taktak tikah a kamhmi kha a pek bak hna. A hleng bal hna lo. Tikah, a fale nih an nu an zumh i an ca cawnmi ah teirial duhnak lungthin an ngei. An tuah dingmi cio kha thathawhnak he zuamnak in an tuah caah an chungkhar a dai i a nuam.

Voikhat cu Sandy t’hanchonak ah a bawm tuktu thil pakhat kha ruah loin Sung Sung nih a va hmuh ai. Cucu an Khirhfabuu nih an ngeihmi program a si. An khirhfabuu nihhin zarh khat ah zaan hnih poah cu sianginn a kaimi mino hna nih an ca cawnmi kongah le a dangdang kongah an herhhai mi poahpoah kha an Khrihfabuu chungin University a kai liomi hna hmangin zohfel pi nak le tuaktan pi nak program an ngei. Amah tein homework aa tuah kho lomi kha an tuahpi hna. Mirang holh a thiam rih lomi kha mirang holh an chimh hna i essay an t’ial pi hna. Korean holh a philh cangmi kha Korean holh le ca an chimh hna. “Sung Sung, nan khirhfabuu le community ah hi bantuk program hi nan ngei ve ko lo maw? Kei cu mah hi bak nihhin teh a ka nunh ko cu! Hi program hi rak ngei hlah usihlaw cu ka phanhka na rak ka hmuhning bak kha ka si ko rih lai dah ka ti” tiah Sandy nihcun aa lawmhnak a chimh tawn. A si! Sandy a t’hancho tuk cu Sung Sung nih a mit bakin a hmuhmi a si ko. A lung fah tukmi zong hi a rak mawh hrimhrim lo.

Sung Sung bantukin harnak a tongmi hi Lai mino chungah an tampi men lai dah! Nulepa nih zeidah kan tuah piak hna? An homework tuah cu kan bawm kho men hna lai lo. Nain, kan dawt hna nak le kan sunhlawihnak hna hi kan hmuhsak nak hna in thazang tampi kan pek khawh men hna lai dahaw. An nunnak chungah lut loin a tlang lawngin kan au hnawh sual tawn hna maw? An ca cawnmi le an tuahmi thil ah itel deuh usih. Khrihfabuu nih teh mino thanchonak caah phaisa kan hmang siang maw? Sualnak ah fawi tukin an tluknak hnga lo caah crusade lawngin a za men lai lo dahaw? An min chinchiah cawk loin kan sermi nunphung le zatlang buu pawl nih hin teh “kan hmailei cu nanmah bak hi nan si ko” kan ti lengmangmi mino hna caah hin zeidah kan tuah ngaingai? Kan mino hna hi timhtuahnak ngei lem loin sining aa dang tukmi dirhmun pahnih karlah ah rang tukin aa khapmi an si tikah bawmhnak kutnem an herh hringhrang dahaw. Sung Sung bantukin a ngaih a chiami Chin mino an tamtuk sual ding hi kan phan ngaingai awk a si.

Theihternak: Hi cabia hi Chin Youth Organization of North America (CYONA) nih chuahmi The Chin Youth Voice ah rak chuah bal cangmi a si.