Iran Nuclear Kong Ceihhmainak: Daihnak Caah Ralt'ha In Hmai A Nawr Ngamtu Barack Obama le John Kerry

USA nihhin Israel cu a fapa bantukin a dawt i a zohkhenh zungzal. Dawtnak in bawmhnak kutnem a chanh peng i upatnak mithhmai he a chawnhbiak camcin. Aa semka tein a ral ven a bawmh i himnak a hmuh khawhnak ding ahcun UNO zongah a dirkamh peng. Cucaah, Israel zongnih aa bochan tuk hlei ah a tlaihchan tuk ve. An ipehtlaihnak hri hi reng piopeo tein aa zam camcin i a dor tuk bal lo. Ram hruaitu an ithlen caan zongah fek tein aa zammi dawtnak hri cu laangsar in a dor hlei bal lo. Sihmanhsehlaw, a luancia caan tlawmpal chungah fiang tukin a van langmi cu US President Obama le Israel Prime Minister  Netanyahu karlak pehtlaihnak hi fak piin a rawk, timi a si. Cucu, anmah pahnih lila zongnih an thup ti lo. Fiang bakin an chim veve ko cang. Zeiruang bik ahdah a si hnga?

Iran Nuclear Kong ah Fak piin an ruahning aa dangmi President Obama le Israel PM Netanjahu

Obama le Netanhayu kuttang ah fak tukin a rawkmi US-Israel pehtlaihnak hi fawi tein fianter khawh dingmi thil cu a si hrimhrim lo. Zeicatiah, a ruang a tamtuk hringhran. Sihmanhsehlaw, felfai deuhin cuanh ahcun a ruang ngan bikbik zeimawzat an um. Mah cu kong cu nikum atu tik hrawng ahkhan ka rak t'ial bal cang. Atulio ah US-Israel pehtlaihnak a hrawktu bik thil pakhat cu Iran Nuclear kong a si. Iran Nuclear kong ahhin Obama le Netanyahu cu an ruahning aa dang tuk hringhran i mithmai t'ha hmanh an i pe kho veve ti lo. Ramleng pehtlaihnak lei ah mi thiamsang tampi nih "US le Israel karlak pehtlaihnak tuanbia ah atulio tluk fakin aa mahcahlo hi a um bal rih lo" an ti.

Obama cozah hruaimi P5+1 le EU partners nih Iran he caan saupi biakchawnhnak an ngeih hnu ah Iran Nuclear kongah a tlangpi in April 2. 2015 ah hnatlaknak an ngeihmi tungtlangpi cu rak ruahcia bantukin Netanyahu nih tongta soi in a soi colh. "Obama cozah hruainak in vawleicung ram pipum hna nih Iran he an sermi Nuclear kong hnatlaknak tungtlangpi hi kanmah Israel le kan kiangkam ram pawl caah t'ih a nung tukmi thil a si. Ningcang loin thil a tuahmi cu dantatnak pek an rak si tawn nain vawlei pumpi kalh in a cawlcangmi Iran cu a tuahsernak cungah laksawng an pek bantuk a si. Hnatlaknak an sermi nihhin Iran caah nuclear bomb ser a fawiter deuh lai caah a chiakha tukmi hnatlaknak a si" tiah a chim. "June thla dih hlan ah tlamtlinh dingin an i zuammi hnatlaknak ah Israel ram hi midle east ah dotla tein umnak nawl a ngeimi ram pakhat in Iran nih kan cohlan ko, timi biafang an telh hrimhrim a herh" tiah April 3, 2015 ah a riant'uannak zungpi in a chimchap.

Switzerland ram Lausanne khua ah biaruahnak a ngeimi, P5+1+EU Partners le Iran ramleng vuanci hna

Switzerland ram, Lausanne khua ah Iran Nuclear kongah biaruahnak a ngeimi Secretary of State John Kerry hruaimi US palai hna nih dide rak ngai deuh dingin thawng an thanh caah Kentucky State ah khualtlawn aa timhmi kal caan a thawntu Obama nih hnatlaknak tungtlangpi an ngeihmi cu nili ni (April 2, 2014) chunhnu ah lunghmui takin chimfiannak a tuah. "Kan timhtuahning bantukin a tlamtlin khawh dih taktak ahcun vawlei tuanbia ah a cam len dingmi hnatlaknak ropui a si" tiah hmaipanh taktakin a chim. Israel PM Netanyahu telin Nuclear kongah Iran he chawnhbiak hrimhrim a duhlotu pawl sin ah thil sining taktak le a dirhmun zong fianhnak a tuah chih. "Fiang bakin chim ko ahcun Iran Nuclear kong ahhin thim dingmi pathum lawnglawng kan ngei; Nuclear an sernak sehzung poahpoah kha bombs thlak hnawh i ral thawh beh, chawlehnak in kan reemmi hi ngol loin tuah i a herh ahcun fak chinchin in rengh chap, le kaphnih tonbiaruahnak ngeih i nuclear hriamnam serlo dingin hnatlaknak ngeih hna hi an si. Cucaah, kan tuahmi hnatlaknak tungtlangpi hi (a tlamtlin khawh taktak ko ahcun) aa tlak bikmi khuakhannak a si ko. Minthut in hnatlakmi ngaingai kan ngei rih lo, a tungtlangpi kan sermi hi a ralaimi thlathum chungah tlamtling tein a chungthil tete kan remh khawh hnu lawngah minsen kan thut khawh te lai. A tlamtlinnak dingah lungkhat in kan t'uanti a herh tuknak cu a t'ha deuhmi lamdang hlei a um lo" a ti.

Iran nih nuclear an sernak sehzung pawl hi vanlawng in bombs thlakhnawh ahcun nichuah laifang muslim ram ah ral a tho t'han lai, timi cu chim hau loin a fiang tuk. Zeicatiah, Iran cu midle east muslim ram pawl vialte lakah ralkap le hriamnam in a t'hawng bikmi ram pakhat a si ve tikah hriamnam hmangin fahnak a petu cu lehrulh loin a um lo hrimhrim lai.USA, Israel le nitlak ram pawl cu Satan bantuk ah a ruahmi hna an si caah tihngamh in a cawlcang lai. Iran le Arabs ram muslim mipi zongnih US cungah an lunghrinnak le an huatnak a lian chinchin lai i nunnak pekin raldohnak ah thazang a chuahmi an karh chinchin lai. Dawhcah tein an dohdal khawh hlei lai lo caah ralhrang nih an hmanmi tactics phunkip in fahnak le buaibainak an chuahpi lai. Cucu, vawlei pumpi caah t'ih a nung tukmi thil a si.

Iran nih a thlithup in Nuclear an sernak sehzung pawl hi fawite in bombs thlakhnawh khawh an si men lai lo, tiah ralkap thiamsang hna nih an ruah. Zeicatiah, an sehzung pawl hi t'ha tukin an thuhhnawh hna hlei ah ralkap thazang in felfai tukin an ven ve. Fordow timi nuclear sehzung pakhat lebang cu tlang nganpi tang bakah an sakmi a si. Nuclear bombs ser khawhnak ding ahcun sehzung thilri nakin nuclear scientists hi a biapi deuhmi an si fawn tikah Iran nih aa ngeihmi nuclear scientists pawl hi tampi an thih khawhnak ding ahcun chun niceu ah bombs thlakhnawh an herh hnga. Chun niceu ahcun nuclear sehzung a vengtu ralkap nih siarem tukin an cawlcangh khawh ve lai caah bombs thlatu vanlawng caah t'ih a nung tuk hringhran lai. Cu lawng a si lo, tlamtling tein bombs an thlakhnawh khawh hmanh ahhin Iran nih nuclear a ser t'han khawh t'hiamt'hiam lai, tiah ruah a si. Zeicatiah, nuclear ser khawhnak dingah a herhmi fimthiamnak le thilri hna cu tlamtling tein an ngeih cang caah atulio ah a tawlreltu scientists tampi an thih hmanh ah an hnuzultu mino deuh nih an pehzulh t'han khawh lai. A ruang cu a herhmi theihhngalhnak le thilri hna cu an mitka ah a um cang caah fawi tein an cawn khawh ko lai, tiah ruah a si. Cucaah, Iran nuclear sehzung pawl kha bomb thlakhnawhnak nih a tuah khawhmi cu Iran nih nuclear a ngeih khawhnak ding a caan thawn lawnglawng a si. Kum nga in kum hra karlak ahcun an ser khawh t'hiamt'hiam lai, tiah thiamsang hna nih an zumhmi a si.

President Obama le aa bochan tukmi a rameng vuanci John Kerry

Obama cozah hruainak in vawlei pumpi nih Iran cungah fak piin chawleh hrenphihnak an rak tuahmi hi azatawk cu rian a rak t'uan ko. Iran cu vawleicung ah meiti a chuah kho bikmi ram pakhat ah aa tel ve nain zalong tein ramleng ah a zuar khawhlo tikah chawlehnak lei ah fak piin harsatnak a tong. Ramdang mirum le company nih Iran ram chungah chawphumnak le chawlehnak an tuah lo tikah t'hanchonak a um lo i mipi nih sifahnak khur chung in an chuak kho lo. An thil chuahmi hnihkhat tete zong kha ramleng ah an zuar khawhlo tikah duhsah tukin a liammi kum caan sin ah an nun a har chin lengmang ve. Cozah zongnih an hmuh nga ding tlukin phaisa an hmuh khawh ve lo hlei ah an ram phaisa man kha a tlak tuk fawn tikah ram t'hanchonak caah rian an t'uan kho loh i sivang in an um. Ziknawhnak le eihmurnak a tamtuk chinchap bei caah rammi hna cu nikhat hnu nikhat in an cozah cungah an lung a tling lo chin lengmang. Iran cozah cu an awlawk a chon ngaingai ve cang caah "Sehtan" tiah a rak auh tawnmi, USA le a hawi ram dangdang hna he biaruahnak ngei dingin cabuai cungah an rak chuak (Obama cozah aiawh in 2011 lio ah Oman ram ah a rak kal i Iran cozah he tonbiaruahnak ngei kho dingin lam a rak sial hmasa biktu cu kha caan lio ah senate arm committee chairman a rak t'uanmi John Kerry hi a rak si). Cucaah, US hruainak in vawlei pumpi nih chawleh phihkharnak an rak tuahmi hi rian a rak t'uan ko, timi cu a fiang ngaingai ko. Sihmanhsehlaw, Iran nih fak tukin an tuarmi chawleh phihkharnak ruang ahhin an nuclear sernak program hi an ngol bal lo. Ngol cu van chim hlah, a nuar zong an nuar ter deuh bal lo. A hnawh tuin an hnawh chinchin caah a ralaimi thla thum-li chung ahcun tlamtling tein nuclear bombs an ser khawh cang lai, tiah thiamsang hna nih an ruah lawng si loin anmah hrimhrim nih an ichim cang. Cucaah, chawleh hrenphihnak lawngin kan nam pengmi hi cu a za bak lo, tiah Obama nih a ruah caah biaruahnak lei in a nawrnak hi a si.

John Kerry nih a hruaimi US palai hna (Pa lakah a sam a sau bikmi hi Nuclear scientist zong a si i atulio US Secretary of energy vuanci  Meniz a si).

2011 lio ah Oman ram ah a thli tein khual a rak tlawngmi Senator John Kerry nih Iran nuclear sernak kongah chawnhbiaknak ngei dingin lam a va sialmi cu duhsah tein a van tlamtlin tikah Obama cozah ah rank a sang tuk lem lomi palai cheukhat le Iran cozah palai cheukhat hna nih rianhma an rak domh hmasa. Chawnhbiaknak an ngeihmi cu kaphnih lei in beiseinak an ngeih veve caah US nih a hawile ramdang aa sawm hna i Iran cozah cu hmunkhat ah an nawr t'i. Vawlei pumpi a huapmi buaibainak (a bikin nuclear kong tibantuk) kong ceihhmainak ahcun Tuluk le Russia zong hi hrelh awk an t'hat lo caah Obama cozah nih an sawm chih ve hna. Cuticun, vawleicung ram ropui bikbik paruk a simi, USA, Germany, Britain, France, Russia le China tiin Iran cozah cu cabuai cungah an nawrt'i i an min ah "P5+1" ti an si. European Union (EU) ramleng pehtlaihnak zung zongnih an telpi ve hna caah naihrawnghrang ah USA cozah nih Iran nuclear kong he pehtlai in thawngthanhnak an tuah poah ahcun Iran cozah a chawntu buu min cu "P5+1 le EU Partners" tiin an hman. Voi tampi tonbiaruahnak an ngeih hnu ah kaphnih lungtling in biachahnak ngeih khawhnak ding ah a tungtlangpi (framework) tal cu lim hrimhrim dingin timhtuahnak an ngeih i an i chawnhbiak cu niriat chung bak an rau. Iran foreign minister Zarif nih a hruaimi Iran palai le Secretary of State John Kerry nih a hruaimi USA palai hna cu Switzerland ram, Lausanne khua ah a ummi hotel pakhat bakah an tlungt'i i ngol loin ceihhmainak an ngei. P5+1 le EU palai hna zongnih atu leklek in an fuh peng ve hna___An foreign minister nih an telpi khawh hna lo caan zongah anmah aiawh khotu pakhatkhat nih biaruahnak ah an itel peng ve. Cuticun, mitkuh cimlo le rawlei kathawlo in zarhkhat renglo chung ceihhmainak an ngeih hnu ah "Parameters for a Joint Comprehensive Plan of Action Regarding the Islamic Republic of Iran's Nuclear Program" tiin Iran nuclear kongah hnatlak dingmi a tungtlangpi cu an chuahpi khawh.

Mitkuh cim huaha loin niriat chung aa chawnmi US le Iran palai cheukhat

European Union’s foreign policy chief, Federica Mogherini le Iran Foreign Minister Mohammad Javad Zarif nih lunglawmhnak mithmai he April 2, 2015 ah thawngthanhnak an tuahmi, P5+1+EU le Iran hnatlaknak tungtlangpi cu nuclear thiamsang hna nih an rak ruahning nakin a fianghlang deuh ngaingai. Obama cozah cu Iran an chawnh ruangah tongta huat in a rak huatu mi cheukhat hmanh nih "aaa, kan rak ruahning nakin an tit'ha deuh tuk" tiah a chimmi an um. John Kerry nih Switzerland in a van tlunpimi, Iran Nuclear kongah hnatlaknak ngeih dingmi tungtlangpi, cu Obama cozah nih congressmen/women sinah zuar hram an thok colh. "Iran nuclear kong hi ramkhel kong menmen a si lo, ralthawhnak le daihnak kong bantuk a si. Cucaah kan van chuahpimi a tungtlangpi hi congress nih ramkhel mitin zoh loin a chungah aa telmi biafang le hnatlaknak suallam tuin an kan zoh piak i an kan buaipi ding a si. Iran hi kan zumh caah hnatlaknak serpi kan timhmi a si hrimhrim lo. A tlangpi in lungtlinnak kan ngeihmi vialte hi a taktakin zohfelnak kan ngeih hnu lawnglawng ah kan cohlan dingmi thil an si ko caah ningcanglo tukin kanmah nih kan hrawhhral sual ahcun sualphawt awk aa tlakmi kan si kho te hi iai.." tiah  (a bikin republican party) congressmen/women pawl kha cohlang dingin a sawm pah hna in biahri a tlirh pah hna. Rouhani hruaimi Iran cozah zongnih US le a hawile sinah biakamnak an pekmi cu nuclear kongah ramdang he chawnhbiak hrimhrim a duhlotu ramkhel hruaitu tampi sinah zuar hram an thok ve. "P5+1+EU he hnatlaknak kan ngeihmi ruang ahhin Iran nih sunghzatlaknak kan ton dingmi a um lo, t'hanchonak tu an kan pek lai. Zeicatiah, kan nuclear sehzung hi pakhat hmanh kan hrawh tung lai lo, nuclear bombs ser kho colh lo ding lawng in teh kan tawlrel ko lai cu, bomb ser ding hrimhrim hi kan rak itimhmi a si bal tung lo" tiah chimfiannak an ngei ve. Iran cozah nih US le a hawile he nuclear kongah hnatlaknak an ngeihmi hi a lung a tling lomi Iran ramkhel riant'uantu tampi an um ve. Pakhat lebang nihcun "kan centrifuges vialte cu midang kutah kan up dih lai caah kan nuclear cu electric mei le a dangdang a herhmi t'hanchonak ah hman khawh cu van chim lo, carrot juice sernak fangfang hmanh ah a t'hahnem te hnga maw" ti tiangin a doh ve.

Lunglawmhnak thawngpang a thanhtu, European Union’s foreign policy chief,Federica Mogherini le Iran Foreign Minister Mohammad Javad Zarif

US le a hawile nih Iran sin in hnatlaknak tungtlangpi an hmuh khawhmi cu a tam ngaingai caah Laica in ka van let lai lo (hika hin mirangca in rel khawh a si). A tlangpi in chim ahcun (1) Iran nih a ngeihmi nuclear thilri le thiamnak hmangin bombs ser aa timh sual hmanhah aa thok in kumkhat hlan ah a lim khawhlo dingin a nuclear thilri (fissile material)an zorter lai____Iran nih an ngeihmi highly enriched uranium pawl kha UNO kuttang ah a ummi Nuclear bomb lei chekhlattu buu IAEA kutah a up lai. (2) Nuclear dat in bomb sernak dingah a herhmi "centrifuges" zong hi Iran nih atulio ah a ngeihmi 19,000 chungin 6,104 lawnglawng hi electric mei chuahnak ding caah kum hleinga chung aa chiah lai___mei chuahnak ah an hman ruangah a rawkmi centrifuges tlennak ding caah a herh dingmi centrifuges cu Nathaz timi nulear sehzung pakhat lawnglawng ah an chuah cang lai i an chuahnak zong ahcun UNO in nuclear scietists nih an telpi hna lai. (3)Tlang nganpi tangah an sakmi Furdow timi nuclear sehzungpi cu nuclear thiamnak t'hanchonak ding caah a herhmi hlathlainak (research) tuahnak ding lawngah an hman cang lai____Nuclear kong hlathlainak (research) a tuahtu scietists lak ahcun UNO nih an thlahmi scientists an itel ve fawn lai. (4) Iran nih an ngeihmi nuclear sehzung poahpoah ahhin IAEA scientists hna nih an duh caan poah ah luhnak nawl an ngeih hlei ah a herh an tining in chekhlatnak nawl an ngei lai____chekhlat khawhnak nawl cheukhat cu atu in kum 25 chung tiang a si lai. (6) Iran nih biakamnak a ngeihmi cu a tlamtlinhning hoih in US le a hawile nih chawleh phihkharnak an tuahmi an phawih piak ve lai____rianrang deuhin a tlamtlinh ahcun rianrang deuhin an thlah piak lai, a buarmi a um t'han poahpoah ahcun phihkharnak an rak tuah t'hingmi kha amah tein a kir t'han fawn lai.

A dohtu ramkhel riantuantu sin ah nuclear deal a zuartu Obama le Rouhani hi voi khathnih cu phone an i chawn tawn

US le a hawile nih Iran cozah he a tungtlangpi an vahmi lungtlinnak hi minsen thuknak he fehtermi kaphnih hnatlaknak tlamtling a si rih lo. A fekmi hnatlaknak a si khawh taktaknak ding ahcun a chungthil kongah ceihhmai ding le chap dingmi thil tampi a tang rih. A chung thilri cu June 30, 2015 hlan ah tlamtlinh kho dingin kaphnih nuclear thiamsang hna nih ceihhmainak pehzulh an timh. Aa ceihhmaitu hna nih lungtlinnak an ngeihmi cu biaruahnak ah aa telmi chungtel ram hruaitu hna nih an cohlan khawh a hau rih fawn lai (a bikin US le Iran cozah ah t'uanvo a ngeitu hna nih an lungtlinnak hi a biapi bik lai). Cucaah, Obama hruaimi US cozah nih siseh, Rouhani hruaimi Iran cozah nih siseh, an ram hlutdaw MPs (legislators) pawl sin ah teimak chuakin an zuarnak hi a si. A fiangmi cu Iran nuclear kongah ceihhmainak hrimhrim ngeih a duhlotu republican congressmen/women tampi hi Obama nih fawite in a nawr kho hna lai lo. Rouhani zongnih US le a hawile pawl kha a hua tukmi Iran ramkhel hruaitu cheukhat pawl cu fawite in a naam kho ve men hna lai lo. June 30, 2015 hlan ah donkhantu tampi an ngei veve te lai, timi cu a fiang cia tukmi a si. Zeisihmanh ah tukthahnak le buaibainak phunkip in a khatmi nihin vawlei ah lungsau thinfual in daihnak a kawltu hruaitu hna cu thangt'hat awk an tlak hringhran ko. Hriamnam le thazang in a t'hawng deuh tukmi an si nain dawtnak le zawnruahnak lungthin in daihnak lam a kawltu, US President Obama le daihnak caah hngilh loin lohma a nawrtu Secretary of State, John Kerry hi upat conglawmh awk an tlak khun ko  rua.