2016 US President Thimnak Cuanh Chungnak (March 17,2015)

Zatceo hmanh kan hman rih lomi AD 2015 kum nih zeibantuk thluachuahnak le buaibainak dah a chuahpi lai ti kong hmanh hi chimrel awk ah a har tuk. A ngaingai ahcun thaizing kong hmanh kha a thei kho lomi minung nih hmailei kongah kan fianmi a um lo. Cucaah, 2016 kum dihlei sang ah a cang te dingmi thil pakhat kong cu ceihphai len awk aa tlak rih lo, ti khawh a fawi. A hman. Tukum a tang rihmi caan chungah ruahpak loin a cangmi thil koko hmanh hi chimrel cawk an si te lai lo. Sihmanhsehlaw, USA kong ceih ahcun “2016 Ramhun Thimnak (Presidential Election) ah ahodah aa zuam lai i teinak a hmu te lai,” timi hi hrelh awk a ṭha ti lo. Zeicatiah, USA Ramhun thimnak cu American lawng nih si loin vawlei pumpi nih kan sunhlawih tuk. Thimnak ah teinak a hmutu cu vanraangtawi minung nih (a tlawm le tam in) kanmah hruaitu cio ah kan rak iruah cio ṭheo. Cucu, nihin vawlei kalning phun khat a si caah kan hrial khawhmi a si lo.

Vawleicung ah a ṭhawngṭha bikmi ram, USA cu Presidential Democracy in an i hruai i an Ramhun cu kum li ah voikhat an thim. 2012 lioah a voihnihnak an thim ṭhanmi President Barack Obama nih tikcucaan a phanh tikah a ṭumtaak dingmi bawi ṭhutdan a rolhtu ding minung cu US mipi nih November, 2016 ah an thim te lai. Mah cu thimnak ahcun zei party in mizei nihdah teinak a hmuh te lai, timi cu chimchung awk a har hringhran. Sihmanhsehlaw, tuanbia le atu lio thil umtuning hi fianrel deuhin zoh tikah zeimawzat cu chimchung ngam dingin a um pahmi a lo. Zeisihmanhah kan theihchung duh ciomi thil a si caah ka purhdah khawhmi chungin ka ruahnak ka van langhter phot ko lai. Adik le diklo tu cu caan nih kan chim te ko seh.

Kum 2016 US Ramhun Thimnak kongah biatakte in ka luh hlanah US Ramhun thim ningcang kongah tlawmpal in van bualcel ta ka duh ko. Zeicatiah, minung tampi nihcun fawizaang tuk le tluangtlam tuk in kan ruah sual ṭheo. US Ramhun thimnak ah teinak a hmutu cu phungning tein thimnak ah thimfung (mee) thlaknak nawl a ngeimi minung tamdeuh nih an thimmi minung poah khi an si hrimhrim lai, tiah kan ruah tawn. Sihmanhsehlaw, cuticun a rak si lem lo. Thimnak ah minung tamdeuh nih an duhmi minung nih teinak an hmuh lo caan a um. Tahchunhnak ah, kum 2000 US Ramhun thimnak ahkhan Al Gore nih G Bush nakin mipi thimfung (popular vote) tamdeuh a rak hmuh ko nain Ramhun a rak tling lo. Zeicatiah, thimnak ah a biapi deuhmi Vote, Electoral College Vote in G Bush nih a rak tei. Fiangfai deuhin lut lawlaw hmanh usih.

US Ramhun Thimnak Dundaan

USA cu Ramkulh (state) 50 le Pengkulh (district) pakhat (District of Columbia) fonh in sermi ram a si. Ramkulh pakhat le pakhat hi an milu an izat cio lo i an ram hruaitu ding zongah an duhmi party le minung aa dang tuk lengmang. An sining zoh tikah pumpak minung pakhat cio nihkhin an ram hruaitu ah an duh bikmi minung pakhat cio kha thimnak ah thimfung hei pe hna sehlaw mee tambik a hmutu minung poah nihkhan ram hruaitu rian hei ṭuan hna sehlaw aa dawhcah ngai ko hnga. Sihmanhsehlaw, thimnak an hman zungzalmi dundaan cu cuticun a si lo. Phundangte in a kal ve. Biadang in chim ahcun, Ramhun khi thimfung thlaknak kuang ah mee a tlatu pumpak  pakhat cio nih dairek in an thimmi a si lo, ti khawh a si.

USA cu United Kingdom, Australia, India le zaukphung a hmangmi vawleicung ram dang tampi nih an hmanmi Parliamentary Democracy phung in aa ukmi an si lo. Presidential Democracy uknak phung in aa hruaimi ram an si. A sullam cu ram pumpi thimnak (general election) ah Members of Parliament (MPs) tambik a tlingmi party chungin minung pakhat nih ram hruaitu tlin colh a si lo. Party pakhat aiawh in asiloah amah pumpakte in thimnak ah aa telmi minung (independent candidate) bak nihkhan Ramhun tlinnak dingah a zatawk in thimfung a hmuh a herh. Mah cu thimfung cu thimfung thla kho a simi, mizapi chungin pumpak pakhat cio nih an thlakmi thimfung khi a si lem lo. Electoral College asiloah Electors timi thimfung  a si.

Electoral Colleges cu Ramkulh pakhat cio nih an ngeihmi zat aa dang cio. Ramkulh 50 hi cu anmah cio nih thimnak nawl an ngeihmi House of Representatives le Senators (ramdang ahcun members of parliament or MPs  ti an si) minung zat in Electoral College an ngei. District of Columbia asiloah Washington D.C timi pengkulh tu hi Federal cozah pi nih an tawlrelmi district a si caah Electoral College Vote pathum an pek. A tlangpi  in chim ahcun, minung tamdeuh an umnak Pengkulh poahpoah nih Electoral College Vote hi tamdeuh an ngeih i milu a tlawm deuhmi Ramkulh poah nih tlawmdeuh an ngeih ve. Tahchunhnak ah kan chim ahcun US ram ah minung tambik an umnak, California Ramkulh nih Electoral College Vote 55 a ngeih nain mitlawmte lawngnih an umnak States a simi, Montana le Vermont hna nihcun Vote 3 veve lawng an ngeih ko.

USA Ramhun le Ramhun Chang (Vice President) thimnak ah aa cuhmi minung nih ram pumpi huap in an icuhmi Electoral College dihlak cu 538 a si. Mah cu Electoral College (Electors) 538 cu Ramkulh pakhat cio nih an milu zat tuak cio in an thimmi House of Representatives (Union of Burmah ahcun pituh hlutdaw) minung 435, State pakhat nih minung pahnih cio an van chuahpi mi, Senators (UB ahcun Amyota Hlutdaw) minung 100 le District of Columbia (Washington D.C) aiawhtu Electors 3 hna fonhmi a si. 2010 ah tuahmi milurelnak cazin hmangin phawtzamhmi Electoral College cazin hi 2012, 2016, 2020 hna ah tuah dingmi USA Ramhun Thimnak caah hman dingin fehtermi cazin a si. Mah hi cazin ning ah Ramkulh pakhat cio le District of Columbia nih Electoral Colloge Vote an tinco ning cu: Alabama – 9, Alaska – 3, Arizona – 11, Arkansas – 6, California – 55, Colorado – 9, Connecticut – 7, Delaware – 3, District Of Columbia – 3, Florida – 29, Georgia – 16, Hawaii – 4, Idaho – 4, Illinois – 20, Indiana – 11, Iowa – 6, Kansas – 6, Kentucky – 8, Louisiana – 8, Maine – 4, Maryland – 10, Massachusetts – 11, Michigan – 16, Minnesota – 10, Mississippi – 6, Missouri – 10, Montana – 3, Nebraska – 5, Nevada – 6, New Hampshire – 4, New Jersey – 14, New Mexico – 5, New York – 29, North Carolina – 15, North Dakota – 3, Ohio – 18, Oklahoma – 7, Oregon – 7, Pennsylvania – 20, Rhode Island – 4, South Carolina – 9, South Dakota – 3,Tennessee – 11,Texas – 38, Utah – 6, Vermont – 3,Virginia – 13, Washington – 12, West Virginia – 5, Wisconsin – 10 le Wyoming – 3 hna an si.

Electoral Colleges (Electors) hi a dihlak ah thimfung 538 si ko hmanh sehlaw thimnak ah aa cuhmi Ramhun le Ramhun Chang nih teinak an hmuhnak dingah an herhmi(majority) cu thimfung 270 a si. Biadang in chim ahcun, thimnak ah Electoral College Votes 270 a hmutu poahpoah kha Ramhun le Ramhun Chang an tling. Electoral Votes kong chim tik ahhin kum 18 a tling i thimnak ah thimfung thlaknak nawl a ngeimi pumpak pakhat cio nih an thlakmi thimfung hi man a ngeilo ngaimi a lo tawn. Hika zawn hi ramkhel thiamsang cheukhat nih US thimnak an soisel ngai tawnnak a si ṭheo. Nain, thiam sang cheukhat nihcun, “Aa tlak bikmi, Ramhun thimnak ah hma a kal tukmi dundaan a si lehlam,” tiah an thangṭhat ve. Zeisihmanhah tutan cabia ah langhter ka duhmi cu pumpak pakhat cio thlakmi thimfung (popular vote) le Electoral College thimfung aa pehtlaih ningcang lawng a si ko caah thimnak dundaan kong ahcun thukdeuh in ka lut ti lai lo.

USA cu ramkhel party pahnih lawng nih an chilh zungzalmi ram a si tikah thimnak ah thimtu mipi pakhat cio nih an thim deuh pengmi cu Democratic Party le Republican Party aiawh in aa zuammi an si ko. A caancaan te ahcun ramkhel party aiawh siloin anmah pumpak (independent) in aa zuammi an um ṭheo nain teinak ngaingai cu an hmu kho bal lo. Ram pumpi thimnak ah ramkhel party pahnih lawng nih biatakte in zuamcawhnak an ngeih pengmi zong hi zaukphung kalumning in cuanh ahcun aa mahcah lomi ko a lo, tiah an ti tawn. Zeicatiah, zaukphung ahcun rammi poahpoah nih zalongte in ramkhel buu dirh khawh a si tikah thimnak ah aa zuammi ramkhel bu an tam hringhran tawn. Cucu, zaukphung i a muisam pakhat ah ruahmi a si. Sihmanhsehlaw, USA tu cu an i phundang ngaingai.

Thimnak tikcu a phanh ahcun kum a tling i thimnak ah thimfung thlaknak nawl a ngeimi poah nih anmah Pengkulh cio ah a ummi thimfung thlaknak kuang ah mee an rak thlak cio. Pengkulh pakhat chungah an thlakmi dihlak cu an rel tikah mi tamdeuh nih an thimmi Party aiawh in aa cuhmi minung nihkhan mahkha State Electoral College cu a zapite in aa lak dih. Tahchunhnak ah, California State ah vote a tlami minung zatceo renglo nih an thimmi cu Democratic Party aiawh in aa zuammi a si ahcun California Ramkulh nih a ngeihmi Electoral College Votes  55 kha a zapi in aa laak lai, tinak a si. Cu ve bantuk in Republican Party aiawh in aa cuhmi kha Montana Ramkulh thimfung thlatu zatceo renglo nih an thim hna ahcun Montana Ramkulh nih an ngeihmi Electoral College Vote dihlak kha anmah nih an ilaak ve lai.

Ramhun aa cuhmi nih an hmuhmi Electoral College Votes kha aa tluk sual asiloah minung pakhat nih teinak tlamtling hmuhnak dingah a herhmi Electoral College 270 tal kha an hmuhlo sual ahcun US House of Representatives (pyituh hlutdaw) nih aa tlukmi pahnih chungin minung pakhat cu Ramhun ah an thim lai. Sihmanhsehlaw, US House of Representatives (pyituh hlutdaw MPs) pakhat cio nih Ramhun thimnak ah aa tlukmi chungin minung pakhat thimnak dingah thimfung pakhat cio an ngei lai lo, an aiawhmi Ramkulh (delegation) lawng nih thimfung thlaknak nawl a ngeih lai. Ramhun Chang thimnak ah aa tlukmi asiloah a tam-u Electoral College Vote (270) a hmutu an um lo sual ahcun US Senate (Amyota hlutdaw) nih an thim lai. Ramhun Chang thimnak ah aa tlukmi chungin minung pakhat thimnak ding ahhin Ramkulh pakhat nih minung pahnih cio an ngeihmi senators pakhat nih thimfung pakhat cio an ngei ko.

A cunglei ah ka langhter bantuk in US Ramhun Thimnak cu mipi pumpak pakhat cio nih an thlakmi thimfung tlawmtam bak in teitu thim colh a si lo. Ramkulh pakhat cio nih an milu tuak in an ngeihmi Electoral College Vote tu in biakhiahmi a si. Cucaah, minung tambik nih an thimmi minung nih teinak hmuhlo khawh a si. Cucu, kum 2000 lio thimnak zong ahkhan Republican Party in aa zuammi George W. Bush cu Ramhun ah a tling nain American minung tamdeuh nih an Ramhun caah thimfung an rak pekmi taktak cu Democratic Party in thimnak ah aa zuammi A.Gore a si. W. Bush nih  a hmuhmi pumpak pakhat cio thimfung (popular vote) dihlak cu 50,456,002 (47.87%)  lawng a si nain A.Gore nih a hmuhmi cu 50,999,897 (48.38%) a rak si.

Note: "2016 US Ramhun Thimnak cuanh chungnak" kong hi tlamtling tein rel na duh ahcun a tanglei cauk hi tawlreltu sin ah rak caw. Laitlang khua/khrihfabuu/zatlangbuu caah hlut a duhmi hna caah aman a deng deuh. Fiang tein hika hin hmuh khawh a si.  Cauk cawk/cahnak kong ah pehtlaihnak tuah khawhmi hna cu a tanglei ah ka rak tar.

Cauk cawknak/cahnak/hlutnak kongah pehtlaih khawhmi hna cu;

Bawi Tling Uk (Interview Bawi)
Ph -214 659 2056 (Dallas, Texas)

Bawipi
Ph-317 771 5928 (Indianapolis, Indiana)

Biak Hnin Sang (Sangbawi)
Ph-8595124589 (Waco, Texas)

Siang Tha Hnem (Newstar Sui Tin Tial)
Ph-4693475965 (Lewisville, Texas)

Mang Hram Kung.
Ph-703 304 0632 (Indianapolis, Indiana)

Maria Bawi Hnem Sui
Ph-972-8379114 (Evansville, Indiana)

Boi Mang Lian
Ph- +4795439495 (Langaasen, Norway)

Salai Joseph KB Thawng
Ph- (01195)9256202894(Yangon/Halkha, Myanmar)