Chungkhar Vanram

Naihrawng cu kaa manhlo ngaingai caah ka blog ka update kho lo ngai. "Voidang zongah update loin sau nawnte na um pah tawn ko cuh" nan ka ti men ko lai. A hman ko. Nain, voidang ahcun tutan bantukin siarem loin ka um bal lo. Zeicatiah, minung 50 renglo nih nifatin in nan rak ka len peng caah kaa phuhrung. Nan ka dawtnak le tleihchannak ka hmuh tikah a lawmh cu kaa lawm tuk ko mu. Ka nolh ta rih ko lai, "kaa lawm tuk hringhran".

A phunphun ruangah ca ka t'ial khawhlo caan zong ahhin computer hmai ah ka t'hut poahpoah ahcun hla ka ngai pah peng t'hiamt'hiam. Tuzan zong thil dangdang tuah pahin Lai hla ka ngai i fung tamlakte ka lim. Ka ngaihmi hla lakah ka lung a ka tong bikmi cu Noami nih a sakmi "Chungkhar Vanram" hi a si. Hlasatu hi a aw a t'hat tuk hlei ah aa biatak tuk caah a ngaih a nuam hringhran. A awkal dan a tluang i a hlabia zong a tiru. Ka cim kho loh i voi nga khelte kaa nawlh.

Biatak tukin ka ngaih tikah music nih a chuahter khawhmi nuamhnak sawhsawh lawng khi a ka pe lo. Khua zaza a ka ruah ter. A lung a hno bantuk, a ngaih a chia dengmang bantuk hna khin ka um pah. Ka mitthlam ah ka semnak innchungkhar a cuang. Cun, nifatin ka nunnak ah ka hmuh camcinmi Laimi innchungkhar tampi i an sining zongnih ka thluak an pal pah ve. A donghnak ah ka ruah bikmi cu Laimi innchungkhar ahhin zeizat zatuak khi dah "chungkhar nuam (happy family)" kan si hnga, ti a si. Ngaihchiat tuk awk a simi cu dawtnak Pathian a zumtu Laimi nih kan sermi innchungkhar hi "chungkhar nuam" ti ngam ding an tlawm tuk lawmmam lai dah!!!

                                                        

Happy Martin Luther King Day!!!

Martin Luther King Jr timi pa hi ahodah a si, timi cu tampi chim a haumi ah ka ruat lo. Zeicatiah, kan theih dihmi a si. Tuchun zong hi amah philhlonak ni cu a si cumu. Dr King cu an vun(cuar) rong ruangah rialditnak le zawmhteihnak phunkip a tuarmi African-Americans nih an ngeihmi zohchunhtlak hruaitu lawng a si lo. Nunnak pek tiangin a dirpimi thil hi minung a simi poahpoah nihcun kan sunhsak dihmi a si. Amah philhlonak ni ah upat peknak caah tiin a rak chimmi bia makmak cheukhat cu hnawhsare in Laica in ka van leh hna.

Kum 2014 Cuanht'hannak: Vawlei Caan A Dong Deng Hnga Maw?

AD 2014 cu mi tampi nih vawlei caan a dongh dengmangnak a langhtertu kum bak a si ko, kan ti. Zeicatiah, buaibainak nih a chilh bakin a chilh. Muslim ralhrang an tho, Ebola zawtnak a karh, fak tukin Israel le Palestinian (Hamas) ral an itu, Putin nih amah nawlin Ukraine a en i Russia ram a kauh mei, Tuluk nih ka t'hazang a t'hawng aipat tiin a innpa innhmun a cuh hna, zauk phung lei ah dawhcah ngaiin aa thleng thluahmah tiah ruahmi kan ramte zongnih rawhral lei a panh t'han___Kawl ralkap pawlnih miakpi in training a kai liomi tlangcungmi ralkap tampi an thah hna. Malaysia ca ko ah huat a tlai khun lai dah____an vanlawng pathum le minung tam lakte an vaivuan. Chim rih lomi vanchiatnak tampi a um lengluang rih. Kan huatnak hi a ruang a tam lengluang ko. Cucaah, "liam zokzok seh" a timi kan tam.  A luanciami caan chungah harsatnak kan tuarmi kha caan sinah philh diam ko loin  kan nunnak ah kan i pai. Cucu, minung kan ziate a  si ko cumu.

An Thiamning Tlukin Thangt'hatnak Le Minthannak A Co Rih Lomi Lai Hlasak/Phuah Thiam Minung Pathum

"Chanthar Lainu ah ahodah hlasak a thiam bik na ti" tiah Lai mino pawl hi hal si usihlaw kan zapi nawnin "Dawt Hlei Hniang (Hniang Hniang) hme teh" kan ti dih ngawt ko men lai dah. Mi tlawmte taktak nihkhin "Merry Lynn le Sung Tin Par khi an aw a puam deuh hleiah an awrau a t'ha i uar an um bik" kan ti khawh men. "Sui Tha Par kha a nungak a tawi tuk deuhvak le duhning in hla a sa tuk manh loh le a si, amah kha ka uar bik bak a van si pah cang nain" a timi zong (keimah telhin) kan um ve men lai. Lungleng ngaiin inndai tangah Lai zuun hla ngaih a hmangmi upa tam-u tu nihcun "Bil Sung ciammam hi hlasak thiam timi cu a si ko, midang thamtham cu an isak sek ko zongah an aw pei hnakhaw chungah tluang ririai tein a luh khawh bak lo cu" an ti ka zumh. A dik! Ka langhtermi Lainu hlasak thiam pawl hi anmah sining cio in an thiam tuk dih___ka langhter lomi hlasak thiam Lainu dangdang zong cu an tam lengluang rih ko. Um ta rih hmanh! Lainu hlasak thiam bikbik min cazin ah an min telhlo awk bak a t'ha lomi minung tam ngaite an tang rih eeh! A thiam tuk nain Pathian hla deuh lawng bak a sami hme an um len hna khi!

The Interview: Sony, North Korea, Obama le Even Spiegel

Kumthar kan phan cang! 2014 cu amin ah Nikum ti a si rawh. Hmailei cuanin a luancia caan cu kaltak kan izuam. Nikum chungah a cangmi thil tampi cu philh in an um manh. Sihmanhsehlaw, mirang nih "Holidays Season" an timi tu cu a dong deuh rih lo. Kan hman cuahmah rih ko. Holidays Season sinah kumhnih aa khaapmi cu "The Interview" a si.

Biadang pi ah, mirang pawlnih Christmas caan zongah Merry Christmas tiah mi chawnhbiak duh loin Happy Holidays rumro an hmanmi tu hi cu kannih Laikhal zumtu caahcun a thlumlo ngaingai tawn. Sorry! Ka biahram ah ka kir t'han lai. A laar ngaimi "The Interview" cu zeikohme a si?