Biadang pi ah, mirang pawlnih Christmas caan zongah Merry Christmas tiah mi chawnhbiak duh loin Happy Holidays rumro an hmanmi tu hi cu kannih Laikhal zumtu caahcun a thlumlo ngaingai tawn. Sorry! Ka biahram ah ka kir t'han lai. A laar ngaimi "The Interview" cu zeikohme a si?
"The Interview" cu "Sony Entertainment" nih an chuahmi nihchuak capo movie film pakhat sawhsawh khi a si ko. Sihmanhsehlaw, Hollywood capo film dangdang bantuk cu a si thlu lo. Aa phundang deuhvak. North Korea ram hruaitu Kim Jong-un kha James Franco le Randall Park nih nihchuak ah an seih. Nihchuak capo film ahcun North Korea hruaitu cu C.I.A nih thahnawn an zalh. "The Interview" cu Christmas hlan deuhah a cangmi thil sining nih phundang chinchin ah a ser chapbei rih. Fitlaw hmangin nihchuak capo ah an seih salammi Kim Jung Un nih a mit'hi pawl hmangin Sony cu a tongh ve hna. Internet in an innchung ah an luhhnawh hna i an tappi le ihnak khan lawngah an chimmi biathli tiangin an va ngaih. An thingkuang tawne ah an chiahmi roca tiangin an lak. "Nan ngamh rilmal ahcun nanmah duhduh in vawleicung mipi sinah nihchuak capo ah rak kan sai uca, nan sining kan phuan viar lai si, a herh ahcun nanmah he nan niht'i hawi he kan in puah viar hna lai si" tiah an t'hihphaih hna. "Kan chimmi hi nan zumhlo ahcun kan kut cung a phanmi nan thliri cheukhat hi rak zoh hmanh hna u" timi biahrang he Sony riant'uantu upa pawlnih Sony Network hmangin pakhat le pakhat an ikuatmi cakuat pawl cu internet vawlei ah an samh piak hna.
Sony an lau! An thinphan tukah an timhtuahmi an ngol. "Christmas tikah mipi nih zoh khawh dingin movie zung kenkip ah kan thlah lai kan rak timi The Interview cu ruah loin a cangmi thil sining ruangah kan thlah thlah t'han lai lo" tiah cathanh an chuah. Sony Entertainment CEO Michael Lynton nih min a thutmi cathanh cu Dec, 19, 2014 ah kumdongh thawngfianhnak tuah dingin thawnglatu in a khatmi innrangpi thawngthanhnak innkhan ah a van chuakmi US President Obama nih fiangko in a mawhchiat colh. "Zalennak a thleihchanmi kan ram chungah hmunhma a khuarmi company pakhat a simi, Sony Entertainment nih vawlei khatlei kilah a mipi a hrem cuahmahmi hruaitu pakhat bia ngai riangmang in tuah an timhmi an iletmi cu a palh deuh ko ruah tiah ka ruah" tiah zeirel tuklo mithmai he mirh pahin a chim. "Zeisihmanh ah kan ram chungah a ummi company kha internet hmangin nicang loin hnahnawhnak le t'hihphaihnak a tuahtu cu aa tlak ning in kan lehrulh hrimhrim lai" tiah biakamnak a ser.
President Obama nih Sony Pictures khuakhannak cungah a lungtlinlonak a chimmi cu Sony Entertainment hruaitu Lynton nih "amah aa palh deuh sual" tiah CNN he tonnak an ngeihmi ah a rak chim. "President nihhin kan theihmi vialte hi thei ve sehlaw The Interview hi thlak rih lo dingin an kan lungtlin pi ko lai dah" tiah a ti. Sihmanhsehlaw, caan sau a rau lo. Sony Entertainment nih an dirhmun an thlen. Christmas Ni ah The Interview cu an thlah t'han. Movie Theaters ngan deuhnih an piah ngam lo caah a ngamhmi cheukhat le online channel a simi, Youtube channel le a dangdang hmangin an thlah hmasa. Sony Entertainment nih an rak phanning bantukin buaibainak ngaingai a chuaklo caah an thlahnak lam zong cu an karh ter t'han cang.
Thawnglatu sinah a chimmi a biakamnak cu Obama nih a tuahsernak in a tlinter taktak. A innchungkhar he aa dinhnak Hawaii ah executive power hmangin North Korea dantatnak cu Jan, 02, 2015 ah min a thut. Obama nih President nawlngeihnak hmangin North Korea dantatnak a tuah tharmi hi US cozah nih dantatnak an rak chiah cangmi cheukhat cungah a van ichap chinmi a si (North Korea cu vawlei pi duhnak kalhin amah siaremning in nuclear ser aa tim peng tiah an ruah caah US le a hawile nih chawleh phihkharnak tampi an pek cangmi a si cumu). Tutan ah Obama nih a chapmi phihkharnak cu North Korea cozah nih ningcang loin a cawlcanghnak ah a hman bikmi cozah department pathum le pumpak minung pahra an si. Phihkhar tharmi minung pahra nihhin US ram chungah ngeihmi thilri an ngeih lem lai lo caah sullam tampi a ngei lo kho men. Sihmanhsehlaw, ram dangdang nih US cozah nih phihkharnak a tuahmi minung cu dotlalo ah an ruah deuh hna lai. Cucu, an itinh bikmi si dawh a si.
US President nih min a thutmi phihkharnak ah aa tel lo nain a buaitlak ngaimi thil pakhat a um. North Korea cozah lebang cu a hlirh bakin an ihlirh. An ram chung internet lines a tluang lo. A tla thlulh, a nuar thluh! "The Interview" kongah Sony Pictures he an buaibai hnu in aa mahcah lomi an ram internet cu Obama cozah nih an hrawh hramhrammi a si, tiah North Korea cozah nihcun an chim. Obama lebang cu fak taktakin an soisel! "Obama cu tupi ah amah duhduh in a tlawngleng tawnmi Zawng bantuk a si" an ti. "Sony Pictures networks vanpang a baohtu hi kanmah kan si lo, nan kan zumhlo ahcun kan sawm ulaw sualnak a tuahtu hi kan in kawlpi hna lai, tiah kan ruahnak kan chim ko nain zeihmanh ah an rel lo i kanmah tu cu sual phunkip an kan puhmi hi a hmanlo rumro mi a si" an ti. North Korea cozah nihhin Sony Pictures networks a hackhu hi kanmah kan si lo, tiah an chim zungzalmi a si. Sihmanhsehlaw, Obama cozah le FBI nih an cohlang lo. Anmah an si hrimhrim ko, an ti peng ve.
Mi tampi nih atutan thil cangmi kongah Sony Pictures hi mawh an phawt. Zeicatiah, Kim Jong-un cu zeitluk hmanhin va sual ko sehlaw ram pakhat hruaitu a si caah a zatawk cu upatnak an pek hrimhrim ding a si, an ti. Hollywood nihhin phaisa hmuhnak menmen ah mi ramdang hruaitu kha nihchuak ah an ser tawnmi hna hrim hi a palh tuk, an ti. Cun, anmah company chung riant'uantu hna nih an hmanmi network hi t'ha tein tawh an hrenhlo (encrypted) caah hi bantuk cu an in awk a si ko. Zeicatiah, internet chan ahcun aa ralring lomi cu ihauh len phung a si ko, an ti. Obama cozah nih North Korea cungah lehrulhnak a tuahmi zong hi a hmanlo, a ti tu an um len. "Sony Pictures cu pumpak company a si ko caah amah tein aa tawlrel awk a si ko. An company kongah US cozah nih a vai thlak len a hrelh lo. North Korea nih hnahnawhnak a pekmi hi US cozah networks a silo pi. FBI nih Sony Pictures hacktu ah North Korea an puhmi hmanh hi a palh men lai dahaw" an ti. Sihmanhsehlaw, Obama nihcun kan ram chungah upadi ning tein rian a t'uanmi company cu ramdang cozah nih hnahnawhnak an pek hna ahcun kan chanh hrimhrim hna awk a si, a ti.
Sony Pictures hacktu nih The Interview chuahlo dingin hrocernak ah an phozarmi thilri lakah aa tel ngaimi cu Sony Entertainment CEO Michael Lynton e-mail account ah a lutchuakmi cakuat a si. Mah cu cakuat lakah tamlak te aa telmi cu Snapchat le kum 25 lawng a si rihmi an CEO, Even Spiegel kong a si. Ruahnak t'halo hna nih fawi tukin midang hnahnawhnak an pek khawh chin lengmangnak internet vawlei ahhin humhimnak tlamtling ngaingai a um kho rih lo, timi cu al awk a t'ha lomi a si. Cucaah, Even Spiegel nih a hruaimi "Snapchat" timi Apps company te hi hmailei ah sunlawi chin lengmang dawh in a um. Mah cu Apps aa semnak kong cu nikum kum thawkka hrawng ahkhan ka rak t'ial bal. Cucu, "Happy New Year" timi cafang hi hmet law na rel khawh lai. Happy New Year!!
(
No comments:
Post a Comment