Snapchat: Vawleicung a laar bikmi “App” maw, a lotlau colh dingmi US$3 billion man serthiamnak dah?

“Menlo Park, kan headquarter ah rak ra law bia kan iruah lai, pakhat le pakhat tha deuh in itheihngal sih ti ka duh ko,” tiah vawleicung mino lak ah a rum bik pakhat, Facebook founder le CEO, Mark Zuckerberg nih kum 23 lawng a simi, Evan Spiegal cu aluancai thla hlei-thum lio ah e-mail a kuat. “Ka zohcho zungzalmi nangmah he biaruah cu ka duh tuk ko nain na duh ah cun nangmah van ra ko…,” tiphun deuh khi Los Angeles pate bialehnak si dawh a lo___Mark Zuckerberg nih Los Angeles apartment pakhat ah a thli tein tonnak ding a timhtuah than. 

Spiegel cu Mark ton ding ah amah lawng in a ra lo. A company Chief Technology Officer,Bobby Murphy he Mark nih a rak ngahnak hna innkhan lei ah cun an van izul.Biadang tampi an iruah lo. Mark nih caan tha aa lak colh. “Nan sermi App hi uar a um ngai, asinain kanmah nih “Poke” timi kan ser ve le atu tlawmpal ah kan chuah cang lai caah nan tuahmi hi nan ruahning tluk in an thathnem tuk men te hna lai lo awh,” ti phun in biahram a domh. Mark ngai tawn, bianeem le biathlum chim thiam lo kan ti cu, “kan ruahning bantukin thil a kal ah cun kan headquarter ah “Like Sign” kan taarmi zong khi “Poke Sign” in kan thlen te hmanh maw,” tiin a bia a peh. Spiegel nih a chim duhmi ai fiang tuk. Murphy zong nih a theih tuk ve. “Nan sermi le kan sermi aa lo ngai va si kaw, nan maak ah a tha deuh ko lai, asiloah kanmah sin ah man deng tein zuar ko u___nan dirhmun le kan dirhmun ai danning cu nan theih ko le” timi cu zeibantukin chim poah ah lungfian lo awk a um lo hrim cu mu. Spiegel le Murphy nih tampi chim lem loin an chuak tak. An sermi thil kha fawi tein an rak zuar siang lo hrimhrim.

December,21,2012 ah Facebook nih “Poke” cu zapi hman ding in an chuah. A thaizing ah cun “Iphone App Store” ah “download” bikmi ah aa cang.“Na lung an tong maw?” tiah Mark nih Evan cu e-mail a hei kuat. Sihmanhsehlaw, nithum-li a rauh cun “Poke” cu “Snapchat” nih a tei than. Christmas ni ah cun Spiegel le Murphy cu mirh lawng an rian. “ Kha lio kha cu a mak tuk teh, Merry Christmas Snapchat!! bak si ko” tiah Spiegel nih Forbes Magazine he tonnak an ngeihnak ah a chim. January,2014 ah Forbes Magazine nih an tuaknak ah vawleicung ah Snapchat a hmangmi hi $50 million hrawng an si cang an ti. “Facebook a hmang tu ah mino an zor deuhdeuh nain Snapchat a hmangtu cu mino deuh lawng te an si,” tiah an chapchih. Pe 6 le lehmah 1 a sangmi Spiegel cu 2013 vawleicung kum 30 tang, mi mak bik minung sawmthum an thimmi zong ah an telh. Cu lawng hlah, January, 2014 chuak Forbes Magazine a hmailei phaw bak ah an cuanter. Hi tlukin Spiegel dirhmun sang ah a chiatu hi Forbes Magazine an si lo: Snapchat a si.

“Snapchat” cu zeidah a si? Atulio vawleicung ah a laar bikmi “App” phunkhat a si. Hmantlak le video tawimi in ipehtleihnak app a si. Snapchat hi mino nih an uar khun. A ruang cu social network dang he ai lo lo. Social networks dangdang cung ah na taarmi hmantlak le ca poahpoah cu nangmah nih na phiat hlan lo, a hmun zungzal. Nangmah nih na laak than ko zong ah midang nih an rak i download cang ah cun zeitikhmanh ah na phiat kho ti lo. Sihmanhsehlaw, Snapchat in na kuatmi hmantlak le video cu na kuatmi nih a tambik second 10 an zoh khawh in amah loh in a lo. Na kuatmi nih anzoh khawh ding caan  tawisau zong kha nangmah nih na kuat pah ah na duhning in na tuah khawh cia. Phundang in chim ah cun, Social Networks dang ah cun na tar cangmi thil, na lungtling than lomi kha hlawmh nai zuam nain Snapchat ah cun na duhmi poah kha amah tein aa hlawnh hlan ah fim nai zuam. Social Networks dangdang ah cun mino nih zalonnak tling an hmu kho taktak ti lo. An tuahsermi kha an nu le an pa nih an checkhlet hna poah ah an hmuh than khawh lengmang. Snapchat ah cun atu an tuahmi kha second tlawmpal chung ah amah loh in a loh colh caah mino hna nih nu le pa ralven len ding an ngei lo. Mino nih an phone an itleih poahpoah ah cun Snapchat hmang in nu le pa sin in full freedom an hmuh khawh kan ti ah cun kan palh lai lo.

Snapchat aa thokning cu hitihin a si. 2010 thal caan lio ah Stanford University ah kum hnihnak a kai liomi Spiegel innkhan ah a hawipa Riggie Brown timi pa a rak lut. Brown nih cun lungrawk ngai khin social network ah hmantlak pakhat a rak taarmi cung ah ai chir tuknak kong khi a hei chimh. “Hmantlak tarmi le kuatmi a hlo kho colhtu app hna hei um sehlaw a tha hnga ee…” tiah a lungrawknak kong cu dong loin a chim thluahmah. “Um rih! hmantlak kuat dih bakin amah tein a tlauter kho colhtu app na ti maw cu…million pakhat man idea bak a si lai, ka dua” tiah Spiegel nih a van ti. Tlawmpal an van iceih deuh i ser khawh a si hrimhrim lai tiah an pahnih in an ruah veve. Cu zaan bak ah cun an mitthlam in an suaimi cu a taktak software ah a ser khotu ding software engineer kawl ah an vai colh. Minung pahnih nih an khirh hnu hna ah Standford University in sianginn dihka te Bobby Murphy he hnatlaknak an va tuak khawh.

An tuanding rian cio an van iphaw: Spiegel cu Chief Executive Officer (CEO), Brown cu Chief Marketing Officer (CMO) le Murphy cu Chief Technology Officer (CTO) tiin. A nikhatnak in officer viar an si colh hna. An “million pakhat man idea” cu web-based si ding in ser hram an thok. An lungning in an chuahcenh kho ti lo. Cu lio ah Spiegel nih ruahnak pakhat a van chuah. “Ziah kan phone ah a hnulei he a hmailei he camera a um ko hi, ziah phone ca tuah kan ser ko hna lo,” tiah a van ti i an zapi an lung a tling. An van sermi thil cu a min pek awk an thei lo. A donghnak ah Brown nih a chuah pimi “Picaboo” tiah a min an sak i July 13, 2011 ah IOS App Store ah a voikhatnak bik an van taar. A nikhatnak ah minung 25000 nih an download caah an ilunghmuih ngaingai. Sihmanhsehlaw, thal caan a van dih ah cun minung 127 lawng nih an hman cang. CEO Spiegel le CTO Murphy cu CMO Brown riantuanning cung ah an lung a tling huaha lo i thlen ding in an iceih. Cucu, Brown nih ai theih ve tik ah an pathum cung ah theihthiamnak a hung bau. Rian thul-in buaipi awk a tlak lomi “Picaboo” tawlrelnak password cu Spiegel le Murphy nih Brown theih lomi in an thlen ta hnu ah anmah le rian cio ah an imer than hna. Murphy cu Revel Systems timi company ah rian a lut. Brown cu Florida ah a nu le pa sin ah a tlung. Spiegel zong, Standford ah sianginn peh ding in aa thawh ve.

Hmantlaknak company pakhat nih kanmah company min he aa khatmi nan hman caah taza kan in cuai hna lai an ti caah “Picaboo” in “Snapchat” tiah a min an thlen. Spiegel le Murphy nih hmantlak le video cung ah catial khawhnak zong a van chap chih. Cu hnu cun ruah loin a hmangtu an van karh thluahmah. Social Networks dang he an concept aa dan bantukin a hmangtu an karh ningcang le an karh bik caan zong aa phundang ngaingai. Zinglei suimilam 9:30 in zanlei 3:00 karlak ah a hmangtu an karhning a fak khun____hmantlak kuatmi poah a loh colh peng caah High School sianghngakchia nih an saya/mah te theih loin sianginn khan chung ah an rak tongh tuk caah a si. December,2011 ah 2241 lawng nih an hman nain April,2012 ah cun minung 100000 nih an hman cang.Spiegel nih a sianginn kaimi a dihnak kum, kum dih lai camipuai lai teah a cacawn a mak i Snapchat ah full-time in ai phum. Murphy zong nih a rian a chuahtak ve. An thancho ning a thawn tuk caah phaisa phumtu mirum (Venture Capitalists) pawl nih an company ah phaisa an phum ngam duahmah caah riantuannak caah phaisa an chambau ti lo. Riantuantu zong an hlan chap hna. January,2014 ah Snapchat ah riantuantu an zapi minung 35 an si cang. An sermi thil nih miaknak taktak a chuah kho rih lo nian hmailei ah cun Facebook le Twitter bantukin phaisa tampi a miak khotu company pakhat a si te lai tiah an ruah. 

Brown nih ning cang loin an ka pheu tiin taza a cuai hna. A dang tampi keimah idea a si hlei ah Snapchat nih an hmanmi “mithla-lu-phung__ghost head shape” logo zong khi keimah idea a si caah company dihlak i 30% liamh ding in taza a cuai lio hna a si. Spiegel nih hi zatzat hmu ding ah aa tlaknak a um hrimhrim lo ti a si ve. Murphy zong nih cu thiamthiam. Cucaah, Snapchat hi anih cu cuzat a ngeih i anih nih cuzat a ngeih ti hmanh fiang loin a kal cuahmah. An buai ning hi Facebook kong ah a rak serti tu hna an rak buaining he aa lo ngaingai. Mark Zuckerberg nih Facebook a tinco bantukin Spiegel le Murphy nih an tingco kho ve te hnga maw timi cu hohmanh nih theih khawh rih lomi a si. 

 Jim Henson nih “na tei khawh hna lo ah cun, an lei ah tang lawlaw,” a ti bang, 2013 busik tlak lai ah Mark nih Spiegel cu a van chawnh than. Atutan cu a awcawi aa dang. Thihpheihnak a si ti lo. “Nan sian ah cun snapchat hi US$ 3 billion in kan in cawk hna lai,” tiah nem tein a van hal cang hna. Spiegel nih “No” tiah a lu a lei thiamthiam.“Chun mang zaza he harnak phunkip tuar hnu ah kan ruahmi bantuk kan van chuahpi khawhmi thil, caan tawi teah phaisa tampi hmuhnak ah zuar colh cu ka duh hrimhrim lo,” tiah Spiegel nih Techcrunch nih bia an halnak ah a chim. “Phaisa fangkhat hmanh a miak ahmu kho rih lomi Snapchat hi atu ah cun $ 3 billion hman a si naisai rih lo,” tiah phaisa lei thiamsang pawl nih cun an ti ve. Mark Zuckerberg nih US$ 3 billion in cawk a timhmi a al-tu Spiegel nih Snapchat cu US$ 3 billion renglo man company pakhat ah a ser kho te lai maw? Asiloah, Myspace bantuk hna in a donghnak ah a vaivuan sawhsawhmi USD 3 billion man serthiamnak dah a si te lai? 

Murphy & Spiegel