Vawleicung khuacaan hman ti lo nak ruang ah a chuakmi
harsatnak phunkip , uknak tha lo le hruaitu sualmi nih an ukmi ram hna nih an
chuah pimi hnahnawh buaibainak tibantuk lawng hi vawlei pumpi nih
thinphan dingmi buaibainak le harsatnak an si lo.Vawlei pumpi ah le abik in
USA ah a cangmi thil sining pi cu chanthar vawlei harnak phunkip chuahpi tu
thil ngan bik pakhat a si ve tiah mifim cheukhat nih an ruah. Cucu “angei le
ngeilo karlak ah angan tukmi ithlaunak/iruallonak (an extremely wide gap
between the haves and the have-nots)” a si.
Economic in Noble prize a hmu i atulio vawleicung economists ah upat bikmi pakhat a simi,Columbia University ah professor a tuanmi Joseph Stiglith nih “ 1% thawng in,1% nih, 1% caah (of the 1%, by the 1%, for the 1%) timi tlangtar in Vanity Fair ah capar a tialmi ah le “ iruallonak/ithlaunak hman: Zeitindah aa cheuhmal tukmi tuchun kan sining nih hmailei kan sithatnak a hrawh (The Price of Inequality:How Today’s Divided Society Endangers Our Future)” timi cauk ah “a lam kip in US a hrawktu bik cu mah hi itlau/iruallo tuknak hi a si” a ti. “US ramchung milu rel dihlak chung in a rum bik zatuak 1% lawng nih US ram ngeihchiah chawva dihlak fonh i zatuak 25% dengmang an ngeih, cu nak in a poi deuhmi cu hibantuk in a rum nih rum chinnak tilet hi kumkhat hnu kum khat in a thang, kan cawlehthelnak (economy) a thanning ret le mirum nih an ngeihchiah a thanning ret ai kawngkawh lo tuk caah sifakmi nih an sifah ning afak chin lengmang” tiah professer stiglitz nih a tial. “Rumnak nih thazang/thilti khawhnak (power) aa ken chih caah sifak cu akiken ah hnawn peng an si ko” tiah a chap. Pakhat le pakhat kan rumning akan danter tu bik cu kan riantuanmi a si. Hi bantukin kan rian cio in hmuhmi nihlawh athlau tuknak cu kan fimthiamnak aa niamsaan tuk caah a si. Cucaah "kan fimthiamnak cawnning kan remh hrimhrim a herh" tiah Staglitz nih a capar le cauk atlang akawm.
Vawleicung ram thawngtha bik a simi USA ah khua asa mi
Chin miphun kan caah teh zeidah a biapi bik? “Rian” a si ko! Duhdim in nun
khawhnak ding caah cun rian sawhsawh hmanh in aza lo, rian pipa/rian tha deuh
tuan a hau. “Rian Pipa/ Rian Tha” asiloah nihlawh tampi hmuhnak rian cu
zeibantuk rian dah an si? Thazang thawngmi le ngandammi mi sawhsawh
nih tuan khawh lomi, fimthiamnak deuh chirhchan in tuanmi rian pawl an si. US
Education Department le Labor Department nih 2011 ah hlathlainak an tuahmi ah
“High School adihmi nih mi sawhsawh nak in alet in rianhmuh an ifawih deuh,
B.A/B.Sc nih alet in an ifawih chinchin…an hmuhmi nihlawh tlawmtam zong
buaktalk in van tuak ah alet bak in an idang ko” an ti. Cucaah kannih Chin
miphun zong nih riantuan sawhsawh lawng si loin rian tha deuh kan hmuh khawhnak
ding ah cun fimthiamnak cawnnak ah thazang kan chuah deuh a hau. Mino hna nih
kan sining dihlak chuah in teimak tein fimnak kan cawn a herh bantuk in nu le
pa zong nih fale fimcawnnak ah thazang kan pek hna a herh hringhran. Tlai deuh
awk kan tha ti lo!
UNDP cazin ah Laimi cu vawleicung ah a sifak
bikmi ram pakhat a simi kawlram ah a sifak bikmi miphun kan si. “Kawlram chung
miphun dang nak in fak tuk in kan sifah deuhnak cu kan ram in thilmansung chuak
kan ngeih lo ruang lawng ah a si lo, rian kan tuan lo tuk ruang tu ah a si
deuh” tiah Laimi in chawlehthalnak lei ah min ngei bik pakhat a simi Sui Hingz
nih CACC nih an tuahmi seminar ah cahluan a chauhpi. “Singapore, South Korea le
Hong Kong tepawl ah cun minung 100 ah minung 2 lawng nih rian an tuan lo, US ah
minung 100 ah minung 7 hrawng nih riantuan loin an um caah an cozah an thin a
phang tuk, cu lio ah kannih Laimi cu minung 100 ah minung 70 hrawng nih
caantling in rian kan tuan lo” tiah a chimchap. Mi cheukhat nih cun Laitlang ah
cun tuan dingmi rian ngaingai teh a um lo cu kan ti men lai. Sihmanh sehlaw,
vawleicung ah tuanmi rian tam-u hi amak tein a chuakmi rian an si lo, minung nih
sermi rian an si hna. Rian ser khawhnak ding caah cun zeidah a herh bik? Cawva
a si lo,fimnak a si. Cucaah Pathian pekmi kan ram te hawi ramdang vanhngai loin
duhdim lennak ram a si ve khawhnak ding ah cun Laimi nih fimthiamnak phunkip
kan cawn i kan sersiam a herh.
“Hruhman cawi cawk lo, fimman ei cawk lo”
timi kan Lai phungtluk hi voidang nak in atu kan chan “Information Age” ko ah
hin ahman bik ko rua.....
No comments:
Post a Comment