An Thiamning Tlukin Thangt'hatnak Le Minthannak A Co Rih Lomi Lai Hlasak/Phuah Thiam Minung Pathum

"Chanthar Lainu ah ahodah hlasak a thiam bik na ti" tiah Lai mino pawl hi hal si usihlaw kan zapi nawnin "Dawt Hlei Hniang (Hniang Hniang) hme teh" kan ti dih ngawt ko men lai dah. Mi tlawmte taktak nihkhin "Merry Lynn le Sung Tin Par khi an aw a puam deuh hleiah an awrau a t'ha i uar an um bik" kan ti khawh men. "Sui Tha Par kha a nungak a tawi tuk deuhvak le duhning in hla a sa tuk manh loh le a si, amah kha ka uar bik bak a van si pah cang nain" a timi zong (keimah telhin) kan um ve men lai. Lungleng ngaiin inndai tangah Lai zuun hla ngaih a hmangmi upa tam-u tu nihcun "Bil Sung ciammam hi hlasak thiam timi cu a si ko, midang thamtham cu an isak sek ko zongah an aw pei hnakhaw chungah tluang ririai tein a luh khawh bak lo cu" an ti ka zumh. A dik! Ka langhtermi Lainu hlasak thiam pawl hi anmah sining cio in an thiam tuk dih___ka langhter lomi hlasak thiam Lainu dangdang zong cu an tam lengluang rih ko. Um ta rih hmanh! Lainu hlasak thiam bikbik min cazin ah an min telhlo awk bak a t'ha lomi minung tam ngaite an tang rih eeh! A thiam tuk nain Pathian hla deuh lawng bak a sami hme an um len hna khi!


Pathian hla deuh lawng a sami Lainu hlasak thiam lakah teh ahodah a thiam bik na ti ne? "Emily Ngun Hlei Sung bak hme teh, ramleng a chuakmi hlasak thiam lak lebang ahcun siangnuhrang bantuk a si khih, Lai hla sak a thiam tluk bakin mirang hlasak zong a thiam fawn khi mu" a timi kan tam bik theo lai dah. Lai hla deuh lawng a ngai kho vemi mi zeimawzat nihcun "Esther Van Hnem Sung khi a awrau a t'hat hlei ah hla a sak tikah aa biatak tuk i a thiam chinchin, nungakno nawnte a si nain hlaphuah zong a thiam chihmi hrimhrim khi a mak tuk si, ahohmanh nih an tluk bak lo" kan ti khawh ve men. Lungthin tak tein Pathian hla ngaih a hmang tuk lem lomi mi cheukhat nihcun "atulio cu Lainu hlasak thiam an tamtuk rumro le a thiam bik hmanh hi theih khawh ding khawm in an um loh, Phakanh sui kawlnak hmanh khan a har deuh ding phun in a um" tiah nih pahin a chimmi zong kan um len kho men. "Pathian hla koko ahcun Thomas Tial Uk le B. Rinzual khi Lainu hlasa dang vialte nakin an thiam deuh tuk le anmah khi ka uar bik ko hna" tiah biahalnak tuaktan lem loin a chimmi zong kan um len men lai awh. A dik t'hiamt'hiam! Laimi dirhmun in cun an zapi in an t'hiam tuk viar ko. Sihmanhsehlaw, minung tlawmpalte taktak tel nihkhin "Naomi Par Tha Sung khi teh" kan ti hnga maw? Atulio ahcun amah bak hi Lainu hlasak thiam lakah ka uar bik! A aw hi amak tuk lawmmam, ka ti. A hme tuk lo, a ngan tuk fawn lo. A pum bakin a pum. Tluang thliahmah in hnakhaw chungah a lutmi a awhno hi a thlum bakin a thlum. Ka chimthiamnak nih a tlinh lo. A ngaih in rak ngai ve. Pathian nih amah sunparnak caah hmang chin lengmang ko seh!



Chanthar Lai hla vawlei hi "Thawng" timi min nih a chilh ngaingai. Zuun hla koko lebang ahcun "Thawng  Bawi le Thawng A" cu siangpahrang bantuk an si. Laipa hlasa dangdang he cuai van thlai chun tikah an hipmi hmunhma a kau deuh rumro ko. Laimi dirhmun in cun naihrawnghrang ahhin pa hlasak thiam tampi an chuak ko nain "Thawng" pahnih tlukin a min a thang khomi cu an um kho bak rua lo. Hiti ti tikah anmah pahnih hi zeizong tein midang nakin an thiam bik zungzal, ka ti duhnak a si lo. A ngaingai tiahcun anmah a uarlo tawk zong cu kan um len ko lai. CARD in hlaphel tampi an kan chuah piaktu Samuel Hrat Hmung hna nihcun hlasak thiam a sawmmi hna ah a telh bal bak hna loh khi mu. Mi cheukhat nihcun "Thawng" pahnih nakin Van Siang Mang, Sui Lian, Van Lal Mang, Tha Lian Bawi, Bawi Min Lian, Cung Hlei Lian, Ngun Thawng Chin tibantuk pawl khi an thiam deuh kan ti cio ko men hna lai. Keimah lila zong nihhin "Thawng Bawi" nakhin "Thawng A" ka uar deuh. Cun, Indianapolis, USA ah a ummi Aa Ta aw khi Laipa nih an tluk lo rengreng, ka ti ve ko.

Youtube deuhin hla a ngaimi ramleng um Lai mino tu nihcun Australia ramah khua a sami Lai thlangvalno pathum nih an dirhmi "Chokhlei Media Production" in an hla phuahtu le satu bik, "Van Biak Lian" khi kan uar bik khawh men. Annih cu an t'hilri hmanmi a t'hat hleiah multimedia lei ah cawnnak a ngeimi zong an itel tikah an videos tuahmi pawl hrimhrim khi a zoh an nuam tuk. Mirangte nih "creative idea" an timi khi an ngei ngaingai i mino lungthin la dingin thil tuah an thiam tuk. Mirang hla sangsang zong kha anmah mirang bantuk maktaktara in a sa khotu Aa T'a zong khi Facebook ah mileng a ngei taktak ve fawn. "Information Age" ah kan um bantukin single album pakhat hmanh aa chuah bal rih lomi Lai hlasak thiam zongnih internet hmangin zultu tampi an ngeih khawh ve cang cumu. Chantiluan nih kan Lai music cu a fenh chih duahmah ve tikah a hmanzia a thiammi hlasa thiam cheukhat cu internet nih fawi tein minthannak a pek ko hna. Youtube ah voi tambik zoh a tongmi Lai hla lakah aa telmi "Nunu Kan Duh Tuk Ee" timi  hla a satu, Tha Lian Sang hna khi hla fungkhat bakin fak tukin a min a thang ko (A thiam loh ka tinak si lo fawh iai, hawidang he tuak chun tikah fawi deuh ngain a laar tibia). B. Rinzual nih a sakmi "Khoiah Dah Na Um" timi hla lebang khi cu Youtube ah voi singhnih,tong sawmnga le tong riat, za le sawm li-nga (258145) bakte zoh a tong. Chinmi hi ka dihlak ah sing 10 ualal lawng kan si va sikaw "Lai" aa timi lebang hi cu kan tlawm ngaingai. Sihmanhsehlaw, B. Rinzual hla cu Youtube ah voi sing 2 renglo bak zoh a tong ko. Hei chim duhmi cu mahhi hla a zohtu poahpoah nihcun B. Rinzual cu an theih tinak a si cang cumu (minung pakhat nih voi tampi an zoh ko lai nain).

A cunglei ah ka langhtermi Laipa hlasak thiam lakah aa tello nain a thiam taktak vemi na theihmi an um ti maw? Um rilmal ee! An tampi rih teeh! Laipa hlasak thiam koko ahcun amak tuk lawmmami pakhat a um. Midang nih an sak rih lomi hlathar zong tampi a sa i a thiam tuk meisei fawnmi cu "Van Hmun Lian" a si. "Ruah Riangmang Ahhin" timi ramhla a sakmi lebang hi cu a t'hiam tuk lehpek palia.  "Lawmh Zia Ka Thiam Lo" timi hla zong ahhin a tiru tuk thotho. A awrau a t'hat tuk hlei ah aw thluk le aw phih a thiam tuk rumro. Aw khumhnak ah a hmanmi studio le muicawl thlaknak ah an hmanmi seh thilri pawl khi a t'ha deuhmi si chinchin hna sehlaw cu zeitlukin dek amak chinchin rih hnga, ka ti. A tanglei ah ka tarmi hi rak ngai ve hmanh. Naa ngaichih lo hrimhrim lai. Phone in ka cabia na rel sual ahcun a tarmi muicawl hi na hmuh khawh men lai lo caah "Van Hmun Lian" timi hi  hmet law a ngah ko lai.

Laimi ahhin hlaphuah bakin a paw aa cawmmi cu an um rih men lai lo dah ka ti. Zeicatiah, Lai hla cu aa zuar khawhnak hmunhma(market) a biit tuk hringhran tikah hlaphel aa chuahtu nih phaisa an hlawk bal tuk lo. Cun, hlaphuahtu hi mipi nih hlasatu bantukin kan sunhlawih tuk hna lo. VCD in chuahmi music video cheukhat ah aa telmi hlafung tampi cu "Hlaphuahtu: Theihlo" ti an si rih. Phundang in chim ahcun hlaphuahtu hi Laimi nih an man kan niam ter tuk hna. Mi cheukhat lebang nihcun thathut hna kan puh salam hna. A ngaingai ahcun hlaphuahtu hi hlasatu tluk tein an biapi ve. Kan remnak ramah a ummi Lai hlaphuah thiam cheukhat nihcun aman loin hla an phuah duh tilo timi thawngpang ka theih tikah keimah lunghmuih in ka rak ilunghmuih ngai ve. Hei chim duhmi cu Lai nunphung le biahla t'hanchoter kan duh ko ahcun hlaphuahtu hna hi kan sunhsak deuh hrimhrim hna awk a si, ti hi a si ko.

Laimi hlaphuah thiam ahhin mipi nih fiangfai taktakin theihhngalh ngaingaimi cu an tlawm ngaite. Mino lebang ahhin cun an tlawm taktak! Mino zaran nih theihmi hnihkhat taktak zong hi Zuun Hla lawng a phuahmi deuh an si. Chanthar he aa tlakin ramhla t'hat'ha a phuahtu lebang hi cu mino nih theih awk an um tuk lem rua lo. Samuel Hrat Hmung hi Siangpahrang a si ko lai dah. Midang tampi zong an um ko rih nain fianghlang in an min ka char khawhmi an tlawm ngaingai caah an min ka van t'ial ti lem hna lai lo___tamtuk ka hrelh sual hna lai i kaa muai cawk sual lai lo. Sihmanhsehlaw, naihrawng caan zeimawzat chungah ka ngaihmi Lai hla tampi nih ka lung an ka suk. Lunghno viar in a ka chiatu hla lakah hin ram dawtnak hla ko hi a tam. Fak ngaiin ka lung a ka sumi hla ka ngaih caan poah ah hlikmahlak in a phuahtu min ka zoh tawn. "Areeh! Mah thluk hla t'hat khawh cu.." tiah fak deuhin mit rengh pahin ka zoh tikah ka hmuh lengmangmi hlaphuahtu min cu "Phun Lian Cung" a si. A phuahmi tampi lakah ka uar bikmi ramhla pahnih cu "Zing Hlei Sung" nih a sakmi "Chin Miphun Ni" le "Van Hmun Lian" nih a sakmi "Ruah Riangmang Ahhin" timi an si.

A cunglei ah ka langhtermi hlasak/phuah thiam minung pathum, Naomi Par Tha Sung, Van Hmun Lian le Phun Lian Cung hna nih an sakmi/phuahmi hla hna hi rak ngai ve law Laimi pakhat dirhmun in naa lunghmuih ve hrimhrim lai dah. Laimi dirhmun ahcun khuaruahhar in a thiammi minung pathum hna hi mipi nih kan thinlung chungah kan t'ialmi "Lai hlasak/phuah thiam bikbik cazin" cungah an min telh ve cang hna usih, tiah kan sawm hna. Pathian nih ngandamnak pe hna sehlaw anmah hmangin Lai miphun, Lai nunphung le Lai bia-hla t'hangcho chinchin hram ko seh!

Biabeuh: Ka cabia chungah ka cawimi minung pathum hi pumpak in ka theihmi an si lo. Pumpak cio in kokek an sining ruangah si loin an tuahmi thil ah pahrang an ngeih tuk caah ka upat hna caah an thiamnak kong ka t'ialmi a si. Conglawmh awk a tlakmi cu mipi nih kan conglawmh hna ding hi kan rian a si ve, tiah ka ruah ca zongah a thainak a si fawn. Ka cabia chungah ka langhtermi hlasak thiam dangdang hi thlak duhnak lungtlin in ka t'ialmi a si lo rengreng, timi hi na ka theih piak ahcun kaa lawm tuk ko hnga.