Lar A Uar Sawhsawhmi Lai Mino Kan Tamtuk Sual Maw?

Atulio Facebook vawlei cu Miss Universe 2015 tiluan nih a chilh bakin a chilh. Host a t’uantu Steve Harvey nih teinak hmutu thanh a palhmi nih fak tukin thil umtuning a thlen tikah minung tamtuk nih buaipimi thil ah a van cang. Miss Colombia caah cun a fak bak ko lai___Vawlei pumpi hmai ah teinak luchin chinh cang hnu ah van chuh t’han cu. Miss Philippines ca zongah a nuam tuk lai lo. Thin tur tukin aa hngahhlangmi caan lio ah teinak a hmuh theihlo in tlaihnu pi ah teitu luchin vaa chinh t’han cu a thinlung a nuam tuk kho hrimhrim lai lo. A zumh hmanh aa zumh kho colh ve lai lo dah, mifanau.

 

 

Teinak laksawng lawmh hlan ah luchin chuht’han a tongtu Miss Colombia hnemh hmasa a herhmi hrimhrim kha Miss Philippines caah thil harsa tuk a si lai dah. Teitu nihcun hlikmahlaklo in lawmh zairel phung a si. Cun, tlawmpal ah lawmhnak mitthli te hna tiang in luan phung a si. Nain, tutan cu ningcang aa mahcahlo dan a tiru tuk tikah aa laklawh tuk viar. Aho ca hmanh ah a fawi bak lai lo; teitu he, teit’hanmi he, thawngthanhtu he.

 

 

 

Caantlaitu Steve Harvey nih teitu thanh a palh sualmi cungah chim dingmi ka ngei lo. An chim viar ko cang, tiah ka ruah. A palh sualnak cungah t’uanvo a lak ngammi kong zongah chim ding a um in ka ruat lo. Minung nihcun palh phung a si ko i a palh bak. Professional pakhat nihcun mah bantuk palhnak ngan pipi kha cu t’uanvo an lak hrimhrim a herh i “t’uanvo ka lak lai” a ti ve fawn ko. Aa sukhak dihmi thil siningpi tu cu sia a rem bak lo. Nain, mipi nih Miss Universe kan urhsaih chinchinnak caah lamsialtu a si caah puai a tuahtu nih kum dang nakin an hlawk deuh lehlam lai dah. Cucaah, buaipi len ding a um rua lo dah ka ti. Kan buaipi deuhdeuh le an miak/hlawk deuhdeuh men ko.

 

Congratulations to Miss Philippines, Pia Alonzo Wurtzbach!!!!

 

 

Asian ka si caah a si kho men. Miss Colombia cu ka zaang a fak ngai nain Miss Philippines nih teinak a comi cungah ka lungawi ngai. Nain, kaa lawm tuk cu a si fawn lo. A ruang cu miss zuamnak hi ka uarmi zuamnak a si bal lo i ka sunhlawih tuk bal lo. Naihrawng lebang cun ka uarlo a zual chin lengmang. Zeicatiah, Lai mino nih luarparkai tukin kan i buaipi peng rua ka ti i ka rem lo.

Thein Sein cozah nih democracy dengdeng uknak phun in kan ram uk an thok hnu in aa kharmi kan ram kutka an on i ramdang he pehtlaihnak phunphun an tuah. Ramdang zongnih a lamkip in pehtlaihnak tuah an thok ve hna. Cucaah, vawleicung pumpi huap in tuahmi Miss zuamnak puai kenkip zongah Kawlram aiawh in aa zuammi an um pah lengmang cang. Cucu, lunglawmh awk ngaingai a si ko. 

 

 

Lunglawmh awk chinchin a simi cu ram pumpi huapin tuahmi miss zuamnak puai ti bantuk ah Chinmi chungin aa tel khomi an van um pah lenmi hi a si. An itel khawh sawhsawh hmanh a si lo. Aa zuammi lakah a cuanghleimi tete an van um ngai. Tahchunhnak ah Van Sui Par @Tin Sandar Myo le Rosy Tawk Tha Par ti bantuk hna cu miphun dang sin ah Chinmi kan hmai an hngalter ngai tikah zeimawzat nih kan buaipi pah hna ding hrimhrim a si ko, tiah ka ruah. Nain, miss zuamnak puai poahpoah kongah Lai mino nih kanmah buai in kan rak buaibai tuk peng ve mi hi cu thilt’ha ah ka ruat bak lo. Dawh le Lar ti bantuk luklak a uar tukmi kan sining a langhter tuk rua dah ka ti.

 

 

Mirangte nih “Miss Competitions” asiloah “Beauty Pageants” an timi puai khi muidawh le pumruat’hat ti bantuk zuamnak puai lawng a si bak lo. Aa zuammi nih an ngeihmi pahrang le an thiamnak phunkip hmangin hawi cungcuang si zuamnak puai phun deuh a si. Nain, Laimi nih kan tuahmi “Miss Zuamnak” cu muidawh le pumruat’hat zuamnak puai deuh a si ko. Mirangte nih an tuahmi “Miss Zuamnak Puai” hmanh khi Laimi zaran nih kan zohdan cu muidawh zuamnak puai a si ko rua dah ka ti (ka palh kho). Cucaah, Miss Zuamnak hi ka sunhlawihlo tuk! Dawh le pumruat’hat sawhsawh hna cu atu chan ah zuam dingah a tlakmi thil hmanh ah ka ruat hna lo. San an tlaihnak ngaingai ka thei lo i uangthlar ngai in izuam len ding ah a phu lo tukmi ah ka ruah hna.

 

 

Lai mino nih civui le tonnak ropui deuh ti bantuk kan ngeih caan poah ah zuamnak phunkip hmang in hawikhawmhnak ser kan i zuam tawn. Zuamnak phunkip lakah mipi nih kan urhsaih tukmi cu “Miss Zuamnak” asiloah “Muidawh Zuamnak” a si lengmang. Hmun kenkip ah kumtin in tuahmi Chin National Day (CND) puai ti bantuk zongah Fashion le Miss Zuamnak hi telhlo khawh dingmi zuamnak phun ah kan ruat ti lo. Hmunhma le caan nih a peklo zongah kan tenh chih hramhram t’heo. CYO Convention/Conference ti bantuk caan lebang ahcun “Miss Zuamnak” hi kan sunhlawih dan a zual i inn tlumlo in puai tuahnak hmun kan phanh caan a si tawn. 

 

 

Lai mino nih sunglawi ngai in kan tuah i kan urhsaih tuk tawnmi “Miss Zuamnak” pawl hi puai a dih cun mipi caah sullam a ngei bak lomi zuamnak an si tawn rua ka ti. Kan society caah an t’hathnemnak hi a pelpawite zong ka thei sual lo. “Muidawh le Tungtairem Zuamnak” menmen cu a si ko caah pumpak chikkhat larnak menmen lawng khi a chuahpi khawhmi a si tawn ko rua dah ka ti. 

 

 

Mah bantuk zuamnak cu sunlawih le urhsaih tuk a phu maw?

 

 

Hihi cu a chan nih a chuahpimi thil a si, kan ti khawh men. Atu kan chan hi thiamnak zei huaha ngei lem loin dawhcahlo emem in khua a sa hramhram mi Kardashian te chungkhar ti bantuk an lar chan cu a si taktak. Lai mino zaran zong hi lar duhnak zawtnak in a zawmi kan tamtuk ve rua. Stage cungah voi khat-hnih hei ilei luklak in minthan a duhmi kan tamtuk caah miss zuamnak le hlasak puai ti bantuk kan tlaihchan tuk hi a si sual hnga maw?

 

 

“Tuluk mino nihcun an ram ah khual a va tlawng sawhsawhmi Bill Gates cu siangpahrang bantukin an don i a kalnak hmun poah ah an dawi i inn tlumlo in a bia an ngaih peng lio ah Americans kan mino hna cu Britney Spears hlasaknak puai ah lutaw hngal loin an lam tung ko mi nih ka thin a ka phanter......Tuluk nih US hi an kan chawhkhanh taktak zau ko lai maw, tiin” tiah American cat’ialthiam Thomas L. Friedman nih a cauk ah a t’ial.

 

 

Lai mino zong hi thiammi ngaingai ngei lem loin lar a uar tuk sawhsawhmi kan tamtuk ve ko rua hlah maw?