Nunnak

Tu zanlei cu Kawi Biak nih mizapi nih man pek loin hman khawhmi “tennis court” ah tennis tuk a ka chimh. Capo seih pahin nuam ngai in ka cawng. Tlawmpal kan van tuk ahkhin mirangnu pakhat nih kan tennis court kamah a ummi hngakchia lentecelhnak hmunah a fale pahnih a van i hruai hna. Caan raulo ah mirangpa pakhat nih a fale pahnih a van i ratpi ve hna khi a langhlat in ka hei hmuh ve. Nu nih a van ratpi mi ngakchiapa te cu lentecelhnak ah um ziar loin kan tennis tukmi zoh duhah kanmah lei ah a van ra lengmang. Kan tennis ball hna a rak kan char piak i “thank you” ka hei ti leklek. A nu nih a van auh caan poahah huam lo nawn khin a hei kir tawn. 

A caancaan ahcun a kan neih ngai tawn caah kan kawn sual lai ti phan in a dirnak lei khi ka mitsir in ka hei zoh pah lengmang. Ka ngiat nain sau nawn ka hmu ti lo. Felfai deuh in ka hei cuanh cu nih-kheh buin an pali ningin “pi-pian” an i thui khi ka hei hmuh. A van ratpitu upa pahnih bal ka hmu hoi hna lo. Ka hei ngiat deuh ve hna. Hngakchia pawl he aa hlat ngainak zawn ahkhin an rak dir zirziar. Artlang in hmunkhat ah an dir nain an i chawn lo. An pahnih in an fale lei an zoh veve i an mithmai ah lawmhnak a khat. Pi-pian thui pahin aa dai lenmi an fale an zoh hna ah an i lunghmuih tuk ti khi a langhlat hmanh in fiang tukin hmuhkhawh an si. Ka mitthlam ah ka nu le ka pa an cuang colh. Ka nu nih “ka fale, kan dawt tuk hna, vawlei chawhlawn ka mit thi lo, chimh nan ngeih i felfai tein nan um poah ahcun ka caah a za, nun man ka ngei, nanmah nunnuam tein khua nan sak poah ahcun kai nuam peng ti hi thei camcin u” tiah a rak timi bia ka hnathlam ah a leng. Aw…tefa a ngei cangmi nu le pa caah cun “Nunnak” timi hi “fale” bak kan rak si ko rua.

Ka pa ka lo. Pumpululh chuih le zoh ka huam taktak! Laitlang ka rak um lio ahcun zanlei chiarte ka rak chuih peng. Pumpululh chuih ruang ah rawl voikhat ei lo hi a poi ah ka rak chia lem lo. “Pumpululh chuih” hi ka “Nunnak” phun ah ka rak ruah. Asinain, Malaysia ka phanh hnu cun thil sining aa dang. Caanhman tein chuih peng ding a fawi ti lo. Rian le khai nih a ka nenh hlei ah phungninglo khuasa ka si bantukin zalonnak tling ka ngeih lo caah tihal in ka rak hal tawn. “USA cu phan citcet ning, ka huam chung ka tong lai si..” tiah keimah le keimah ka rak i hnem tawn.

Pathian dawtnak thawngin dam tein US ka van phan taktak. Malaysia ka um lio nakcun caanhman deuh in ka chuih kho tak ko. Asinain, khuacaan le thil sining nih ka duhning in an kal thiamthiam lo. Khuasik caan a sauh tuk hlei ah team hnih tling dingin minung ikhawmhsuat a har hringhran. Certual kawl nih le a har meisei hoi iai. Laitlang bantukin khuapi nih ngeihmi certual a um lo tluk a si. Pumpak le buu cio nih an ngeihmi certual ah a thli deuhin kan chuih theo tawn caah dantat kan ihuah lai tiin lungkil in thin a phang ziar. Keimah rengreng zong Laitlang ka rak cawlcangh khawh bantukin ka cawlcang kho ve ti lo. Ka khing a rit i ka thabaat a fawi. Tikah, Laitlang bantukin USA ah pumpululh chuih a nuam ti lo. Cucaah “Tennis” tuk ka cawn hi a si pah.“Nunnak” hi ka caah cun “Thlennak(change)” a si ve.

Ni a nem deuhdeuh, ka tukmi kaa biatak deuhdeuh! Thildang zeihmanh ruat loin ka tukmi “tennis” lawng bak ah ka “Nunnak” ka van phum. Ka thlan a luang nain ka baa lo. Ka thinlung a zaang hirhiar! Maak/ngol hmanh ka siang ti lo. Ka lung chung in,“aw..Nunnak timi hi kan tuahmi thil ah a zapi in kan iphum dih ah teh a thawtnamnak a rak um hi” ka ti.

Naihrawng hi ka vaivuan ngai. Facebook zong ah voidang nakin caan tam  deuh ngai ka hlohhlak! Nungak hmantlak zong tam lak te “Like” ka pek. Ka “News Feed” lebang cu minutes panga ah voikhat hrawng ka check. Cucaah, ka hawile nih an “statuses” update an tuahmi le an “profile” an thlenmi hi ka herlh sualmi a um theng lo. Khuaruahhar ngaiah ka ruahmi cu "___ is in a relationship with ___” le "___, you are my life, I can’t live without you” ti bantuk catar a thangcho dom! San a tlailo ngang nain“ralt'hat” a uar ngangmi ka si ve caah mi tampi nih “social network” ah ralt'ha tein an “duhdawtmi” an langhtermi cu ka upat ngai hna. Asinain, nungak tlangval cheukhat caah hin an duhdawtmi nungak/tlangval khi maw an “Nunnak” cu a si tak ko hnga?  Duhdawtnak tili chung ahcun an “Nunnak” cu anmah pumpak ta a si ti hnga lo maw? Aa thi-um cangmi lehlam cu “pahnih an si lo, pakhat an si cang” ti a va si ko le chim ding a um lo. Ka ruah len ah ka thluak nih a phan lo! Ka lungmit!

Zumhnak mit in van zoh ah cun “Nunnak” hi “Khirh” bak a si. Kan “Nunnak” nih amah Pathian sunparnak langhter ding bak hi a rian pi bik. Aa thleng zungzalmi caan chungah din loin aa her pengmi vawlei mit in van zoh tu ahcun “Nunnak” hi..??