Occupy Central For Love And Peace: Hong Kong Mipi Nih Zeidah An Hauh?

Nitlak ram mipi nih internet hmangin ihawikomhnak ah Facebook an hman bantukin Tuluk mipi nih Weibo an hman ve. A bikin mino nih an hmanmi social network site Weibo chungah aa chawkmi cabia le hmantlak hna cu Tuluk cozah nihhin a hnawh pah lengmang ko. Nain, naihrawng cu a zual tuk. Forbes nih an chimnak ah Tuluk cozah nih social networks chungah an hnawhmi cabia, hmantlak le videos hi voidang nakin alet nga in a karh. Media zalennak a hua ngaitu Tuluk communist hruaitu hna nih t'ihnung thil ah an rak ruah bal lem lomi Instagram (hmantlak le videos phozarnak le icheuhboahnak hmun) zong an phih bak. "Google Search" bantukin Tuluk mi tambik nih an hmanmi "Baidu" ah hnawh(hloh) a tong bikmi cafang cu "Hong Kong" timi a si.

Doaunak a tuahtu mi thong tampi

Hong Kong cu Tuluk(China) ram chungah a ummi khua nganpi pakhat a si ko. Nain, an khualai fangah a cang cuahmahmi thil hi Tuluk ram khua dangdang ahcun a cang kho naisai lai lo dah! Zeicatiah, minung 7.2 million hrawngnih an khurhawmhmi Hong Kong cu Tuluk khuapi dang he aa lo lo. Vawlei ralpi pahnihnak a dih hnu zongah mirang(British) cozah nih zalennak nawl tampi a pek i a langtlangin a rak pen pengmi vawleicung khua makbik pakhat a si. Zalong tein chimrelnak, hnahnawhtu um loin mah duhmite biaknak, dawnkhantu um loin chawlehnak le nawlngeitu t'ihnak um loin daihnak he duhlomi phozarnak ti bantuk nuhrin covo cungah aa hngatmi phunghram hmangin mirang cozah nih kum 150 renglo an uk hnu ah 1997 ahkhan Tuluk sinah pennak nawl an up. Hong Kong pennak caah British nih an rak sermi, nuhrin covo tling ngaiin a petu phunghram, mini-constitution(the Basic Law) cu Tuluk cozah zongnih an lungtlinmi a si caah Hong Kong cu a ramt'hen dang bantukin ruruhranghrang in an uk lo. Phihkharkanhnak an tuahlo i hnahnawhnak zong an peklo tikah daihnak a leng. A kutka kaupi in onnak nawl an pek i a tur in a turmi vawleicung chawlehnak khuapi nganbik pakhat ah cuang ko in an dirter ko. Cucaah, "ram pakhat, uknak phunhnih (One Country, Two Systems)" tiah an min a thang phah. Sihmanhsehlaw, minung tam taktak nih lam zawhin an cozah le Tuluk cozahpi cungah an lungtlinlonak an langhter cuahmah t'hiam ko.

Zeiruangah dah vawleicung ah a rum bikmi mibu pakhat a simi, Hong Kong mipi nih an cozah dohin an au___zalennak zong aa zatawkin pek an si ko tung? A hman. Tuluk ramchung an unau dangdang he tuakchun ahcun zalonnak an tingco taktak ko. Nain, palik nih an kahmi mitthli tlaknak gas khu zongnih a kham kho hna lo. Kan hnu zarh zarhpi ni ahkhan dai tein duhlonak a langhtermi mipi cu t'io hna seh tiah palik nih mitthli tlaknak gas in an kah hna nain an t'io nemmam lo. Palik tuahsernak cungah a lungtling lomi mipi an karh ciammam i nikhat ni ahcun alet in minung an tam lehlam. Thil sining an hmuhmi nih Hong Kong cozah cu a lau ter tuk hna caah palik cu zokzok in an tuahmi an ngolter t'han hna. Duhlonak a langhtertu mipi hi an tamtuk hringhran caah a lianbik dohaunak a si, an ti. A thongthong in lam cungah dohaunak a tuahtu mipi nih an hal bikmi thil pahnih a um. "Tuluk cozahpi nih kan uktu thimnak kongah ithlak hlah seh" timi le "Tuluk cozah dirkamhnak in Hong Kong uktu (Chief Executive) a simi Leung Ching-yeung hi a rian in i din sehlaw a hmanmi thimnak kan tuahpi seh" timi an si.

"minung pakhat, mee pakhat" tiah a aumi sianghngakchia pawl

Hong Kong hi an hruaitu (Chief Executive) thimnak, kum nga ah voikhat, an tuah tawn. Sihmanhsehlaw, thimnak ahcun mipi pakhat cio nih an duhmi minung kha an hruaitu caah thimnak nawl an ngei lo. Minung 1200 member a simi Election Committee i mi tam deuh nih an thimmi kha Tuluk cozah nih fehternak a tuah hnu ah an hruaitu an si ko. Atulio ah mipi nih a todan kaltak dingin an auhnawhmi Leung Ching-yeung zong hi 2012 lio ah minung 1200 a tling lomi election committee nih 689 vote in Chief Executive ah an rak thim. Mr Leung hi dawhcah tein a rian a t'uanmi hruaitu pakhat a si ko. Santlailo le mi nauta cung zongah zawnruahnak lungthin a ngei ko tiah mi tampi nih an ruah ko. Sihmanhsehlaw, Tuluk cozahpi le Hong Kong mirum hna nih an duh poahin an mawgh khawhmi a si tiah a ruattu an um tung ve. Beijing cozahpi nih an hruaitu thimnak kongah biakamnak a rak pekmi hna cu phundang deuhin a mer piak t'han hna caah dawhcah tein lungtlinlonak a langhtertu Hong Kong mipi cu mitthli tlaknak gas in palik a kahter hna caah a duhlotu nih an huat a zual tuk. Cucaah, "Tuluk Communist party nih an duhning poahin an thuimi Leung Ching-ying hi a rian in idin seh" tiah an auhnawh cang. Nain, dinh aa timmi alo rih naisai lo. "Himnak le daihnak a len i mipi nih sit'hatnak an conak hmun, kan khuapi hi cozah doaunak a tuahtu nihhin vawleipi sinah a muihmai a chiatter tuk caah hmailei Hong Kong caah t'umchuknak a chuak kho. Cucaah, an tuahsernak hi an ngol hrimhrim awk a si" tiah nihnih ni ahkhan hnangam ngaiin bia a chim rih ko.

Hong Kong uknak hrampi ah hmanmi mini-constitution(Basic Law) cu Tuluk rampi cozah nih an ngeihmi upadi sertu, The National People's Congress, hnatlaknak lawngin an remh khawh i an thlen khawh. The National People's Congress cu Communist Party nih an chilh taktakmi upadi sertu congress an si tikah Communist Party duhning in rian a t'uan deuh tawn. Tutan zong cu 2007 lio ah Tuluk cozah nih Hong Kong mipi sinah biakamnak a rak pek cangmi kha an party hruaitu duhning in an let mei. Cucaah democracy a tleihchantu cathiam sang le sianghleikai hna nih zalam cungah an duhlonak an aupi hi a si. "2017 ah tuah dingmi thimnak ahcun kum tlingmi Hong Kong minung poahpoah nih nan khuapi caah nan duhmi hruaitu thimnak caah vote(mee) pakhat cio nan ngei lai" tiah 2007 lio ah Tuluk cozah nih upadi hmangin biakamnak a rak tuah. Sihmanhsehlaw, democracy a tleihchan tuktu Hong Kong mipi nih ruahchannak nganpi he a tikcu a phanh lai an hngahmi biakamnak cu August 31, 2014 ah tuahmi The People's Congress Standing Committee meeting biakhiahnak nih phundang deuhin a mer. "Chief Executive thimnak ah a lut kho dingmi cu Election Committee nih lungtlinnak a ngeih hmasami minung pathum renglo an si lai i mipi nih minung pakhat vote pakhat in an duhmi an thim lai" tiah anmah duhning in ri an ser. Biadang in chim ahcun Hong Kong minung pakhat cio nih vote pakhat cio cu an ngei ko lai nain Tuluk cozahpi nih a lungtlinmi minung lawng kha an hruaitu ah an thim khawh lai. Cucu, Occupy Central For Love And Peace le sianghleikai hna nih ngol hngal loin an auhnawhmi cu a si.

Tutan Hong Kong mipi doaunak kong ahhin President Xi Jinping hruaimi Beijing cozah cu direct in an ithlak duh bak rih lo. Communist Party nih an ngeihmi thawngthanhca hmangin duhlonak a langhtertu mipi pawl cu an soisel pah len nain Hong Kong cozah tu kha an rinh bak ko rih. Sihmanhsehlaw, Tuluk ram chung ahcun Hong Kong doautu thapeknak phunphai a tuahmi poahpoah cu an tleihhren hngap fawn hna. Human Rights Watch nih an thanhnak ahcun Hong Kong buaibainak kong he aa pehtlaimi tuahsernak tete ruangah Tuluk ram chungah cozah nih an tleihhrenmi hi minung pakul an reng ti lo. Zeicatiah, Hong Kong buainak bantuk hi Tuluk ram chung khua dangdangah a chuah ve sual lai an phang tuk. Sihmanhsehlaw, President Xi nihhin Hong Kong mipi nih an halmi democratic thimnak taktak hi cu a pe lem hna lai lo, tiah thiamsang hna nih an zumh. A ruang cu Communist hruaitu nihcun democracy cu an remlo hlei ah President Xi Jinping hi a huatu sinah a nemmi hruaitu a si bal lo. Tuluk nih Hong Kong an pennak ah an hmanmi "One Country, Two Systems" ahkhin "Two Systems" timi nakin "One Country" timi khi biapi deuh tukah a chiatu a si fawn, ti si. Tikah Hong Kong doaunak hruaitu pawl hi an halmi pek cu chimlo, a tong hmanh a dong duh lem hna lai lo, tiah a hruaining dan a theimi nih an zumh.

Hong Kong Chief Executive Leung Chun-ying

Democracy kau deuhin a duhtu hna nih an aunak aw cu a than tuk cang caah Hong Kong Chief Executive Mr Leung nihcun a kapau a tlen pah cang. Zahan zaan ah bia a chimnakah doaunak hruaitu pawl cu cozah he biaruahnak ngei dingin a sawm cang hna. Asinain, amah pumpak nihcun ton a tim hna lo. A rian zongin dinh aa tim fawn lo."Beijing cozah le kan phunghram nih a onhmi ri chungah doautu hna nih ton biaruahnak ngeih an duh ko ahcun Secretary Carrie Lam nih cozah aiawhtu buu cu a hruai lai i biaruahnak kan ngei ko lai. Sihmanhsehlaw, ka rian in kaa din lai lo. Zeicatiah, Hong Kong nih vawleipi nih pommi democratic phunglam ningin hruaitu thimnak nawl kan ngeih khawhnak dingah ka t'uan cuahmahmi thil hi pehzulh hrimhrim a hau" tiah a ti.

Mr Leung nih biaruah dingin a sawmnak hna cu doautu hna nih lunghrinhnak an ngeih caah tluang ngaiin an cohlang duh ve lo. Nain, a al cun an al fawn lo. Tutan doaunakah fak ngaiin aa telmi Hong Kong Federation  Of Students nih "Mr Leung cozah nih biaruahnak ngei dingin an kan sawmmi hi mipi(public) hmaiah tuah dingin an duh lawngah kan cohlan khawh lai. Hnatlaknak kan ngeih khawh hlan cu doaunak kan tuah cuahmahmi zong hi kan ngol fawn rih lai lo" tiah cathanh an chuah. Occupy Central nihcun "cozah he biaruahnak ngeih ding hi kan duh ko. Nain, Mr Leung nih a rian a chuak tak hrimhrim lai, timi biakamnak theih kan duh hmasa" an ti ve.

Acozah nih ton biaruahnak ngeih dingin an timhlamhmi hi a takin a tlamtling te lai maw? Occupy Central nih a rian dinh tak dingin an halmi teh Mr Leung nih a cohlang t'han te lai maw? An duhnak bantukin cabuai cung ahcun ton biaruahnak ngei hmanh hna sehlaw doautu hna nih an auhnawhmi hi Hong Kong cozah nih an pe duh hna lai maw? Zalam khatin mipi nih an halmi thil cu Mr Leung cozah nih pek duh hmanh hna sehlaw an pek khawhmi hna thil a si maw? An karlak ah lungtlinlonak a um peng ko ahcun an buaibainak hi fawi tein an dai men lai lo. Tikah, an uknak phung a dohtu minung poahpoah cu zangfahnak ngei loin tuahto a hmangtu Tuluk cozahpi nihhin a zoh sawhsawh peng hna lai maw? Biahal ding a tam hringhran.