UN Hnatlaknak Loin US Le A Hawile Nih Syria ah Bombs An Thlakmi Hi Thilhman A Si Maw?

Nihnih ni zingka khuadei laite ah IS ralhrang nih an hmunlai ah an hmanmi Raqqa khua cu a hnih in aa hnin. Syria ram peng dangdang cio ah a ummi khua pali, Abu Kamal, Aleppo, Hasana le Deir al-Zour hna zong cu bomb puah thawngnih a chilh dih colh ve hna. President Obama nawlpeknak in US van ralkap nih Syria ramah hmun a khuarmi IS ralhrang cu an kah taktak cang! Sorry, anmah lawngnih an kap lo. Bomb thla dingin a ruangmi US vawlawng kiangah ram dang raltuknak vanlawng an zuang ve. A si. Middle East Muslim ram nga a simi Qatar, Saudi Arabia, Bahrain, United Arab Emirates le Jordan hna nih US an bawmh. Erlet ralhrang ISIS hi Iraq ram ahcun France he i bawm in US van ralkap nih voi 190 renglo bomb an thlak hnawh cang hna nain Syria ram ahcun tutan hi an voikhatnak an kah a si.

Pentagon biachimtu, John Kirby

US nih tutan IS a kahnak ahhin vanlawng lawng a hmang lo. Persian Gulf ah ralring in a dirmi USS Bush timi raltuknak tilawng in Tomahawk rocket zong a hman chih. A bawmtu ram nga tel loin amah lawngnih a tuah chihmi thil dang a um fawn. US le nitlak ram hna cungah fahnak tlunter dingin timhtuahnak nganpi a ngeimi Khorasan timi ralhrang buu kha fak lakin a den chih lawlaw. US cozah nih fehternak an tuah rih lo nain ralhrang buu nih an hmanmi Twitter thawngthanhnak zoh tikah US thlakmi bombs nih a thahmi minung ahhin Khorasan hruaitu bik, Mr Fahli le an bochanmi hruaitu dang pakhat, Abu Yasef al-Turki, hi i tal dawh an si, ti si. "Kan bombs thlakmi hi fiang ngaingai cun a nehhnu kan dawi kho rih lo nain thil sining zoh tikah kan itinh ning bantukin sullam tampi a ngei ko rua tiah kan ruah ko" tiah US ralkap in chimnak nawl ngeitu John Kirby nih a chim.

Osama bin Laden he neihniam ngaiin rian a rak t'uant'imi, Kuwait rammi Fahli nih a hruaimi Khorasan ralhrang hi Al-Qaeda he fek ngaiin aa pehtlaimi ralhrang bu an si. US rallei thiamsang nih an chimnak ahcun Khorasan hi Syria ramchung buaibainak kha US le nitlak ram dangdang dohnak ding caah timhtuahnak caant'ha ah ilak dingin Al-Qaeda lubik, Ayman al-Zawahri nawlpeknak in Syria ramchungah a lutmi an si. Thir le a puak khomi tleihnak seh nih a tleih khawh lomi thilri, hasi bawm le a dangdang hmangin bombs an ser i mah cu bombs cu US asiloah nitlak ram khualtlawnnak vanlawng cungah puah dingin timhtuahnak t'ha ngaingai an ngei kho cang tiah an ruah caah hnawhhnam in an kah hna hi a si. "Khorasan hi an cawlcanghning kum hnih hrawnghrang kan ngiat cang hna, vanlawng chungah battery charge lomi laptop computer ken kan khapmi te hna kha anmah sermi bomb runvennak caah ralrinnak kan lakmi a si. Tulio an sining zoh tikah kanmah fahnak pe dingin timhtuahnak fiang ngaingai an ngei tiah kan ruah caah an irelh hlan ah kan kah hna hi a si" tiah Attorney General Eric Holder nih Yahoo News in Katie Couric sinah a chim.

Khorasan lubik Mr Fahli

President Obama nih UN Security Council meeting kai dingin aa thawh hlan deuh ah zahan thil sining kong cu innrangpi kam in thawngfianhnak a tuah ta. "Keimah nawlpeknak in kan ralkap nih Syria ramah hmun a khuarmi IS ralhrang cu an kah cang. Kanmah fahnak pek dingin timhtuahnak a ngeimi Khorasa ralhrang zong an kah chih hna. Ka chim lengmang bantukin US mipi fahnak pek a timtu poahpoah cu an caah hmunrem kan pe hna lai lo. Kan dawi peng ko hna lai. Kan fian dingmi cu tutan kahdohnak hi kanmah US lawngnih kan tuahmi a si lo. Ka rak thanh cia bantuk khan bawmtu hawi dang ka sawm taktak hna i ram 40 renglo nih anmahle si khawh ning cio in bawmh ding an kan timh. IS cu kanmah ral cio a si ve tiin kan sinah a dirtu kan hawi Muslim ram nga he hmunkhat ah kan kaht'i khawh caah kaa lunghmuih ngaingai. IS cancer zawtnak hrik hi kan hrawhnak ding ahcun caansau pi kan rau men lai i harsatnak tampi kan ton te men lai. Sihmanhsehlaw, IS ralrang bantuk an rawh i hnagamnak le remdaihnak a len khawhnak ding caah a herhmi poahpoah cu a herhning poahpoah in kan khan thluahmah ko lai " tiah a chim. Thawnglatu sinin biahalnak tu cu a cohlang lo.

Thawngfianhnak a tuah khawh tlawmpal ah UN General Assembly kai dingin New York lei ah a zuang colhmi Obama nihhin Syria ram um IS kahnak dingah UN sinah nawl a hal lo. Syria mipi nih an duhlo tuk cangmi Assad cozah sin zongah lungtlinnak a la ta fawn lo. "IS kan kahmi hi Syria cozah bawmh kan duh caah a si hrimhrim lo, Assad cozah hi Syria ram buaibainak a chuahtertu bik an si caah riant'uant'i kan duh lo, kan vanlawng pawl hi hnahnawhnak a pek sual hna ahcun a vanlam  system vialte hi kan sawksam piak viar lai" tiah aa hrocer lehlam. Biadang in chim ahcun Syria cozah le UNO nawlpeknak loin Syria ram chungah US nih a hawlei he bombs an thlak. An dohmi IS ralhrang cu vawleicung pumpi nih an huat tukmi an si caah US tuahsernak hi ram tampi nih an cohlan ko. Sihmanhsehlaw, vawleicung vialte nih i hrawmmi phunglam a buar, tiah a soiseltu ram an um ve.

"Syria cozah lungtlinnak le UN Security Council nawlpeknak loin amah tein aa penmi ram pakhat cungah US nih hriamnam a hmanmi hi vawleicung phung a buar a si. Syria cozah sinin lungtlinnak a lak t'ung lo ahcun ngol hrimhrim seh" tiah Russia nih a ti. Syria ramchung buainak aa thokka tein Assad cozah a dirpi pengtu Iran zongnih US raint'uannak cungah an zai ve. " US tuahsernak hi vawlei pumpi nih kan i hrawmmi UN phunglam he aa kalh. Ram pakhat chungah daihnak a umnak ding caah mi bawmh a duh taktak ko ahcun Syria cozah he rian a t'uant'i awk a si. Ralhrang buu pakhat kah pahin tapung dang buukhat rak bawmh pahnak nihhin zeite a chuahcanh lai lo" tiah UN General Assembly a kai liomi, Iran President Rouhani nih a chim ve. Khuaruahhar ngai pakhat a simi tu cu anmah Syria cozah nih an lungtlinlonak an langhter lem lo. "Ram kenkip i bawm in ralhrang dohnak poahpoah cu thilt'ha ah kan ruah ko, US nihhin nawlhalnak ngaingai cu an kan tuahlo nain UN ah an palai nih kan palai sinah chimhchungnak a rak ngeih ko" an ti diam. "An ram chungah bombs thlak kan timhmi kong cu Syria UN palai sinah ka chimh ko nain a hmunhma le a caan ti bantuk tu cu ka chim lo. Thlaknak nawl ka hal lo, thawng ka thanh chung bia a si" tiah UN ah US palai a t'uan liomi  Samantha Power nih thil umtuning a fianh ve.

US UN palai Samantha Power

Obama cozah nihcun Syria cozah le UN Security Council nawlpeknak loin Syria ah bombs kan thlaknak ah vawlei pumpi nih zulh dingin UN nih a sermi phunglam kan buar lo an ti ve. UN phunglam an buarlonak kong cu hiti hin an chim ve. "Iraq cozah nih a pennak hrawkhral a timtu ralhrang kutin aa khamh khawhlo caah bawmhnak kut chan dingin phung ning tein an kan sawm. Mah cu an kan sawmnak cabia cu UN security council zongah Iraq ramleng vuanci nih a rak kuat chih bal ko. Iraq cozah bawhhalnak cu kan cohlan i a ral kan doh pi taktak. Kan theih bantukin IS ralhrang nihhin Syria ram an umnak in Irap ram pennak hi hnahnawhnak an pek lengmang nain Syria cozah nih a ram chung ralhrang tuahsernak cungah t'uanvo a lakmi ngaingai a um lo tikah Iraq ram nih amah le mah aa vennak dingah a kah hrimhrim hna a hau. Kannih cu Iraq ram cozah kha an ram runven a bawmtu kan si tikah mah le mah ivennak caah Syria ram IS ralhrang pawl hi UN phunglam ningin kahnak nawl kan ngei" an ti. "US ramchung upadi zong kan buarmi a um lo. 2001 ah rak sermi Al-Qaeda dohnak upadi nih anmah he aa pehtlaimi ralhrang buu poahpoah cu a herhning in kahnak nawl a onhmi a si ko caah Syria ah IS le a dang ralhrang kan kahmi hna hi phunglam he aa kalhmi a si lo" tiah an chap.

Obama cozah nih vawlei pumpi zulhmi phunglam he pehtlaiin tutan an tuahsernak ah an dirhmun an chimmi hi cu international laws a thiammi hna nihcun an lung a tling tuk lo. Phunglam mitin zoh ahcun anmah ram cozah lungtlinnak asiloah UN Security Council hnatlaknak um loin amah tein aa penmi ram pakhat chungah ramdang cozah nih hriamnam hman cu thilhman a si hrimhrim lo. Mah le mah ivennak caah cun ramdang kha kah a ngah taktak ko nain US nih Iraq hi dotla tein ai a awh khawhmi a si taktak lo. Tutan US tuahsernak nihhin UN Security Council nawlngeihnak kha  a zor ter ngaingai caah Russia le Tuluk tibantuk ram t'hawngt'ha hna nih hmailei ah an duhsalam in khuasaknak ah an hman ve sual lai tiah phan awk a um, an ti. A ngaingai ahcun Obama cozah nihhin an theih cuahmah buin an buar hramhrammi a si ko. An duhmi tu cu a si ruam lo. Sihmanhsehlaw, Syria cozah he riant'uant'i an duhlo tikah thim ding lam dang an ngei lo. Syria cozah tel loin Syria ramah a ummi IS ralhrang pawl kah dingin UN security council ah nawlpeknak kan hal ahcun Russia nih a veto power in a thlak hrimhrim lai, ti hi US nih an theih tuk. Zeicatiah, Russia nihcun Assad cozah hi a dirkamh tuk i hriamnam zongin tampi a bawmhmi a si.

UN phunglam le Russia le Iran tepawl dirhmun hi Obama nih a theih tuk caah UN Security Council sinah nawlhalnak tuah loin a pah chih hramhrammi tu a si. Cucaah, aa ralring tuk ve. Vawleicung ram kenkip kha IS ralhrang doht'i dingin UN lengin a sawm hna. Syria ram he aa innpa mi Arab Muslim ram pawl ko hi tongta nawr in a nawr hna. US lawngnih kan doh ahcun ral ruangah harsatnak a tongmi mipi kha "Sehtan lianpi US nih Muslim biaknak aa tleihmi ram le miphun poahpoah hi kan cihmih a duh caah mahti an kan kah hi a si" tiah IS ralhrang nih an lem hna lai i buaibainak a tam chinchin lai, ti zong a phang fawn. "IS hi kanmah ral ngaingai an si lo, zeicatiah an sual tuk nain kan ram humhimnak ngaingai cu hnahnawhnak an pek khawh rih t'ung lo? Nanmah ral deuh tu an si. Kanmah lawng nih nanmah aiawh in doh piak awk a t'ha lo. Cucaah, kan doht'i hna a hau. Nan lungt'lin ahcun kan hruai hna lai i kan doht'i hna lai. Vawlei pumpi nih hmunkhat ah lungrual in kan doh dingmi cancer zawtnak bantuk an si" a ti i Muslim ram hruaitu pawlnih al aw a t'ha lo.

Relchap: Obama Nih IS Kahnak Dingah A Sermi Strategy Hi Hma A Kal Lai Maw?

Lungsau tein a sawm peng hna caah minung tampi nih kan ruahning nakin caansau deuh a lak hi a rak si. Atu cu a hawile Sunni Muslim ram cozah pawl he bombs thlak hram an thok taktak cang! Nain, vawlei in a rak nam kho dingmi ralkap ngaingai an um rih lo. IS ralhrang le Syria cozah ralkap he cuaitlai ahcun a der taktakmi Free Syrian Army cu Saudi Arabia ramah caan zeimawzat training pek hmasa an hau. Tikah, aa rak isuai cia ning bantukin duhsah huamsam deuhin a nawr ko rih hna lai, tiah zumh a um. Nithum ni ah tuah dingmi UN Security Council meeting hi amah pumpak baknih chairman a t'uan lai i IS ralhrang doht'i dingin mi sawmnak a tuah rih lai. Russia le Iran ti bantuk ram hna nih donhkhanh an timh len zongah hmai ah a nawr chih te ko lai dah. "IS ralhrang hi an t'hazang kan chah khawhnak ding ahcun ram pakhat cio nih kan tuah khawhmi cio kan rak tuah a hau. An phaisa luhnak zong kan kharkanh hna a hau i minung thar zong an lak khawhlonak dingin kan khamkanh hna a hau. Cucu, tutan UN Securiy Council meeting ah biatak tein ka aupi lai" tiah Obama nihcun a ti.