Vanmi.....

Hmantlak hi ka rak hmang tuk bal lo. Camera hmai ahcun zeitipi khin dek ka um. Umtuzia bak khi ka thiam lo. Ding tein ka dir kho loh i dawhcah tein ka t'hu kho lo. Tikah, hman kaa thla theng bal loh i ka hmantlak hi a tlawm ngaite.Tanghra ka cawn tiang ah keimah pumpak telawng hmantlak hi pahnih lawng bak ka rak ngei. Mah cu pahnih hmanh ahcun pakhat cu ka hngakchiat lio, mawm nawn cerhcorh in duh ka rak nun saling, hmanthlak khi a si.

Hawidang he kaa thlakt'i mi zong hi chim a tlak t'hiamt'hiam lo. Pali-nga taktak lawng khi a rak si. Ka hawile he kaa thlakmi zong ahcun kaa rem ngaingainak a um huaha fawn lo. Kaa tlak pah luklaknak khi hmun hnih hrawng telawng bak a um. Cu zong cu hmanthlatu nih kaa relh hlan deuhvakah a rak hmehmi khi an si. Kaa relh cang hnuhnu ahcun kaa rem kho lo rengreng. Atutiang zong ahhin ka sining kelte cu ka si ko rih. Hmantlatu nih kaa relh lo lio ah camera an hmeh sualmi hmantlak hi kaa relh taktak hnu ah an kan thlakmi nakin zoh an co deuh zungzal. Keimah nih midang va thlak zong khi ka t'hiam hlei fawn lo.

Camera hrimhrim hi a tongh ka thiammi thilri ah aa tel lo. Kam khatlei ah tongh thiam pah ikpak ding zong cun ka muaitam bal lo rengreng! Mi zeimaw nih lamton ah hmantlak an ka fial sual caan ahkhin nawisen ka hnuk theo. Ka thlanhripi nih paih colh a ka zalh. Aa rem deuh dingin an umtuning ka siamremhter bal hna lo. A suaisam awk hrimhrim khi ka thei pumpuluk lo ko. "Hiti hin kan i rem lai maw?" an ti poah ahcun "ummm, nan i rem tuk ko" ka ti peng hna. Zoh a dawh deuhnak hnga caah tiin hmunhma kenkip an kawl i a phunphun in an kutke an tuahto lebang ahkhin cun ka ai a puang hngap. Aa dawh huaha lomi an si sual lebang ahcun ka lungchung in tangah ka thlak hna. Zokzok in thlak zau hna i kaltak diam rumro nihkhin a ka hiar. Sihmanhsehlaw, nai hrawnghrang cu hman ka thla taktak. Ahohmanh nih an kan fial lo nain motor ka mawngh pah zongin ka kut khatlei nih ka phone camera a hmeh pah lengmang.

Ka mit nih a hmuhmi dawhnak hna hi ka lungthin nih an thawtnamnak teh t'han leklek a duh lai caah fimtawl hrimhrim an hau, timi cu ka thluak nih a hngalh tuk. Ka orhlei kut le ka phone camera hi cu tukbukhur nih nawlpek ning bantukin a cawlcangmi sawhsawh khi an si ko. Zingnu nih a sermi kokek sining pi hi aa dawh tuk hringhran caah hmantla loin ka um kho lo. A hmu khotu caah cun khuaruahhar maktak-tara khi a si ko. Mur-le-kaa nih lung diriam tiangin a phuan khawhmi thil phun menmen khi a rak si lo rumro. Hmantlak thiammi nih chanthar camera t'hat'ha hmangin an thlakmi hmantlak dawhdawh zongnih kokek sining hi tlamtlingin aa dawhnak an langhter kho bal rih lo. Hmailei zongah an langhter kho taktak thai fawn lai lo. A ropui tuk palia hme cu awww!

Mitdongh pinlei a sannak vancung ah a chahmi muihnak nih a kham buin a thep diahmahmi arfi hna khi an idawh lawng a si lo. A ngan hrimte an ngan tuk. Zeimaw-zeimaw ruangah a pet sualmi a ci pakhat te hmanh nihkhin a lianngan tukmi vawleipi caah rawhralnak tampi a chuahter khawh. Rili tawne ah aa kaammi vawlei tang lung ngan pipi nih "ku-runng" tiin an umnak an iremh ruangah an chuahter tawnmi, aa niamsan lomi tilet nganpi, tsunami timi hmanh khi minung le ramsa tamtuk nunnak ala tawn ko nain amah bakbak cu aa dawh tuk t'hiamt'hiam. Nak zelzul in vandum a khuhtu khuadawm cungah sum hrilhmi bantukin a thawng a thangmi khuari nih a hnu in a zulh pengmi tteek zong khi a tleu hlei ah hro a kual tuk. A vikvak hrim a t'hat tuk hlei ah phundang tein zoh a co ve t'hiam. A viarnak nih a muimi zaan koko hmanh thazang chuah kho loin a tuahtu hawrha raang zong khi khuaruahhar in aa dawh thotho. Hawikom he nuamsul in i dainak ca hrimhrim ahcun a rak mak tuk!

A paw chungah a puak khomi thilri phunkip kha caan saupi aa uam hnu ah a chelh ti loin a lengah van chaakphut a hmangmi meitlang zong khi minung caah harsatnak chuahpi tu lawng a si lo. A khuvai le a rimrua nih vanlawng lam tiang hmanhin a kham tawn ko nain aa dawh tuk ve t'hiamt'hiam. Cun, sermi thilnung caah thilt'ha tampi a chuahpi chap rih. Vawleicung ah aa dawh bik tikulh pakhat a simi, Hawaii hna khi amah nih a cilsa in a rak sermi a si. Thlalang innsang pipi in a khatmi Japan zong khi amah rak um hlah sehlaw a um ve men hnga lo. Sertu kutzung hi a tiru tuk rumro i minung menmen nih t'heih khawh ding phun a rak si lo hrimhrim. Ti le tlang in aa cawh hrupmi vawleipi hna hi pum luai in a hnuai ko. Zeitluk maktara dah a si? A hei irem tuk hoi chapbei cumu!

Ruahti ah a sining thlen aa timmi Fall khuadawm cu vanlawng cungin hman ka thlak ve

Din loin aa hermi caan sinah aa thlengmi khuacaan hna zong hi anmahle sining cio in an i dawh tuk dih. Khuasik nih a chuah pimi vur hi aa dawh bik a timi kan tampi ko lai. "Hmun kenkip ah khat lulhin a parmi pangpar nihkhin Springs hi aa dawh bikmi khuacaan a si ter ko," a titu zong hi kan tlawm hrimhrim lai lo. Hawilekom rual he biasawngtorlh pahin tibual kiang sarawh kha a nuam bik, tiin t'hal khuapau rumro a hngakmi zong kan um ve t'hiamt'hiam ko lai. Sihmanhsehlaw, kei nihcun Fall(autumn) hi ka uar bik! Kik tuklo, lum tuklo in a ummi te hmanh hi ka tleihchan tuk. Ka uar chinchinnak cu aa dawh tuk lawpaw.

Hnahno corhnak dingah hmunhma lonh dingin timhtuahnak a ngeitu hnahhlun hna nih aa dang lulhmi an muici cio chuahin an langhtermi an siningnih an innpi cu hmurka in chim khawh lomi dawhnak in an thuam. Hawidang bantukin khualrangin a umnak hmun aa t'hialkaam kho lomi thinghnah hna kha zungzal an umnak ding an innah kalpi dingin fak pah nawn tein a hrang lilhlalhmi zilthli zongnih hirha a kawhter tuk. Leiro ah aa phahmi chawlro kha hmailei ah a chuak dingmi thingram nih an t'hanchonak caah an dinei dingmi tirawl t'hawt'haw ah serchuah dingin zalong ngaiin aa chawhleh tawnnak vandumpi kaltakin ruahti ah a sining thlen aa timmi khuadawm dum pipi zong khi an kenglei in ninu nih a van ceuh hna zawn ahkhin zoh a co hringhran ko.

Nizan zaanlei ah ka phone in ka thlakmi kan sianginn

Sertu Pathian nih dawh tukin a sermi kokek sining pi chungah aa tenh lulhmi thil fa tete hi minung caah cun theihfian awk an har tuk dih ko. Sihmanhsehlaw, phundang tein theihfian a har khunmi te pakhat a um. Cucu, Nu hi an si. An sining hi theihfian a har hringhran. Pa ca ko ah a har khun. An duhmi le an duhning koko hmanh hi theih awk a har tuk. Aa thleng leklek rih fawn hoi! A caancaan ahcun lam thongkhatin an duhnak kawllen zongah an lungton khawh a si lo. Zeimaw caan tu ahcun neem tein an taksa voikhat van tonghnak bak nihkhin an thinhunnak vialte a tlau ter dih khawh fawn. Fawi tein an mitthli a tla nain fahnak phunkip an tuar kho. Thang piin an hrumai lengmang. Nain, kamseh in a mithmai aa panhtermi pa nakin lungfahnak an ing kho deuh. Theihfian awk a har tukmi thilthup phunkhat cu an si rengreng.

Nu lak ahhin ngaknu hi an sining theihfian a har chinchin rih. Anmah he ipehtleih deuhdeuh ah an sining theihfian taktak hi a har a zual khun fawn. An duhmi an thuh i an lungrawk caan ah aa nuammi bantukin an um theo. "Zeihmanh a poimi a um loh cuh" an ti caan khi zeizong vialte a poi dih  caan a si ziar. Duhdawtnak lungthin a ngei cangmi pa lak ahhin tlangval hi Nu sining le duhning a theilo cem kan si hoi iai. Zaran tlangval nih kanmah tein ngaknu ka ton tawn lomi zong hi khuaruahhar tuk ding a rak si lo. Theihfian a har bikmi minung pakhat kha theihnak a ngeilo biktu nih a sining hrawmpi dingin a lungthin mersan khawh ding cu thil fawi a si bak loh hme cu! Mi cheukhat caah cun pe sawmthum a thuhnak leihak tangah a ummi lungvar fate pakhat kawl hmanh khi ngaknu pakhat lungton ding izuam nakin rian fawi deuh a si kho. Cu tluk cun a har. A har tuk palia. Nain, an duhnak le kan duhnak aa ton thiam ahcun thil fawi taktak a si fawn.

Theihfian awk a har tukmi thilthup phunkhat a simi nu hi pa caah cun sermi lakah aa dawh bikmi phunkhat an si. Tlangval caah ngaknu dawh an idawhning lebang hi cu hmurka in chim awk a t'ha lo. Nain, tlangval pakhat cio nih kan caah aa dawh bikin kan hmuhmi ngaknu khi an ikhat dih lo. Kan duhmi ngaknu phun cu kan uarci cio nih a ngeih. Pakhat nu te hi ka mit ahcun Vanmi a hluan. Aa dawhnak hi pakhat hnu pakhat in cun a chim awk ka thei lo. Nain, aa dawh tuk.

Thirthir phangphangin duhdawtnak bia ka chimhmi cu lunglawm tein a ka cohlan caah kaa lawm tuk. Kan umt'i caan ah dawtnak in a ka zohkhenh. Lum tein a ka tuammuai. Hnangam tein a ka chiah. Kaa hlawhmi a um hrimhrim lo. Kokek in aa dawh tuk i a sining theihfian a har tukmi ngaknu dawh, vanmi hi zeitinhme a lung ka ton khawh zia? Ihlauh ka huam ti loo!!!!

Relchap: Kan T'hitumh Puai Tuahdan Hi...???