Apple CEO Tim Cook Nih Gay A Sinak Kong Aa Phuanmi Cu Chantiluan Nih A Fenhchihmi Laikhal Mitin Ka Cuan Ve

Theihternak: A tanglei cabia hi vawleicung company lian bik pakhat a simi, Apple Inc ah CEO a tuanmi, Tim Cook nih mipi theihin padawk-nudawk(gay) a si nak kong a chimmi kha rianrang in ka cuanh sawhsawhmi a si tikah a fil ngaingai men lai i nan theihthiamnak kaa ham cia.

Mipi theihin Gay a sinak a phuangtu Tim Cook

Tuzing ah chuahmi Bloombergbusinessweek ah Timothy Cook nih "Gay, padawk-nudawk ka si" tiah aa phuan. Vawleicung ah a lar bikmi thilri, Iphone, Ipad le Macbook tepawl a sertu, Apple company ah CEO a tuanmi nih atu bantukin gay a sinak aa phuanmi cu upat awk a tlak tuk, ka ti. Zeicatiah, mipi nih theih dingin a sining chim a herhnak a um lo nain an i chuahpi mi an sining ruangah nehsawhnak le tlanglamhnak phunkip a tongmi mitlawm, LGBT hna nih aa tlukmi nuhrin covo an hmuh khawhnak ding caah a tuahmi a si caah a si. A bialak dan hrim hi a thiam tuk hoi. "Gay sinak hi Pathian nih a ka pekmi laksawng sunglawi bik lakah pakhat a si tiah ka ruah" a timi nihhin biaknak mit lawngin khua a cuan i anmah kal ning loin a kalmi poah cu tongta phomhin phomh a hmangmi pawl kha chim ding ngeilo in a tuah hna. Bill Clinton telin vawleicung mi makmak tampi nih an van lawmh tukmi zong hi a phu bak tak ko. Mark Zuckerberg nih " Tim, hruaitu t'ha timi cu a sining dik taktak teah ral t'ha tein a dirngammi hi an si ko, timi na kan hmuhsak t'han caah kan lawmh tuk" tiah a Facebook cahmai ah a tar phah. Thuk deuh vakin ka van lut lawlaw tuah lai iai!

Ngeihkhat aa duhmi pawl hi kan kham hna ding a rak si lo tuk zia cu US ralkap t'uanbia zoh ahhin a fiang ngaingai rua dah ka ti. US ralkap ahhin ngeihkhat aa duhmi cu an rak cohlang hna lo. Ralkap a t'uan liomi zong kha Gay an si an theih bak hna ahcun an rian in rak phuah an si. Limhang ngeilo le dotlalo bakah an rak chiah hna. Sihmanhsehlaw, an kham kho taktak naisai lo. A hrang tukmi phunglam in an hren ko bu ahcun chan a kal deuhdeuh i an karh deuhdeuh lehlam tikah ngeihkhat duh a hmangmi poah kha an rian in phuah dih awk an t'ha ti lo. Cucaah, President Clinton nih US ralkap caah "Don't Ask, Don't Tell" timi phunglam a rak ser. "Nu a duhmi maw, pa a duhmi na si" ti bantuk kha ralkap chung ahcun "i hal le i chimh um ti hlah seh" a ti. Phundang in chim ahcun ngeihkhat aa duhmi pawl kha dantatnak hmu lo dingin phunglam hmangin an sining a thuh piak hna. Cucu, nudawk-padawk pawl caah US cozah nih a tuahmi thlennak nganpi ah an rak ruah cio. Sihmanhsehlaw, caan sau a rau lo. Anmah kong in baunak phunkip a chuak t'hiamt'hiam colh. Zeicatiah, dantatnak luat dingin an sining thuh piak cu an covo tling pek a silo caah a si. 

Ngeihkhat aa duhmi ralkap cu cozah phunglam nih an sining cungah dantatnak a pek ti hna lo tikah zalong deuhin an sining an van langhter ngam cang. An duhmi pa(annih caah cun nungak) zong cu an chanchung umt'i ding caah kutsihnak tuahpi an duh ve. Duhdawtnak cu a mit a caw, ti si cumu. Sihmanhsehlaw, an phunglam nih a onh lo caah an tuah kho lo i mi cheukhat lebang cu a thli tein an i um. Phunglam ning tein t'hitumhnak an tuah khawhlo tikah cozah hmai  ah nuva an si lo. Nuva in pom an si lo tikah an pa a zawt sual zongah an nu nih zohkhenhnak caan a ngei kho lo. An pa nih ralram ah a nunnak a liam sual hmanhah a tantakmi a thaisung nih cozah sin in zeibantuk liamhnak hmanh a tingco kho lo. A tonmi thil nih a lungfahnak lawng a karh ter chinchin i hawi a lo thai kho ti lomi tiangin an um, ti si. Cu bantuk cu vawleicung ah ram t'hawngt'ha bik a simi nih a ram caah a nunnak a pemi ralkap cungah a tuah awk thil a si ko hnga maw mu??

Khuaruahhar ngai a simi cu nudawk-padawk hi fak tukin an kham hna nain an zor hlei lo. An sining bakte a si ve caah zeibantuk in thlen ter an timh hna zongah an thleng kho taktak bal hna lo. An t'uanmi rian ah an sining nih a dawnkhan hna lo. Hawidang tluk tein an t'uan kho ve ko. An sual hlei lo i an t'ha hlei lem lo. Cucaah, an sining tein kan cohlan hna awk a si, tiah mi tampi nih an lung a fiang cang. Cucaah, President Obama zongnih zalong tein t'hitumhnak nawl a pek hna nak hi a si ko i thil dawhcah ngai a si ko.

Chimceih lio lawlaw ah "an sining te" ka ti lengmangmi ahhin tlawmpalte in ka van lut deuh tuah lai!

Biologists nih hlathlainak an tuah tikah minung kan sining hi kan genes(kokek ci) nih tampi lai a rel, an ti. Kan genes hi kan pusa sining cu chimlo, kan ei duhmi tirawl le thilri phun tiang hmanh khin pehtleihnak a ngei ti si. Tahchunhnak ah, hngakchia pa nih kum 12, 13 hrawng a si ah a takpum a langhlonak zawn cheukhat ah a hmul tete an van chuahmi khi a genes nih rian a t'uannak in a chuakmi a si.  Tlangval lung a van theih pahin a aw a van pin nawn hnu ah a aw a ngan deuh thai behmi zong khi genes riantuannak t'hiamt'hiam a si, an ti. Hngakchia nu nih a hnuk a van bom i nuphung a van theihmi zong khi a genes nih rian a van t'uanmi a si ve. Nudawk-padawk zong cu an kokek ci (genes) nih an sining khi a mawngh ve hna.

Pa thilri an ngei nain kum 15 an si cang zongah nu bantukin an aw a chuakmi hna khi an tuah hramhrammi a si lo. Nu uarlo in Pa tu uar an hmanmi zong khi an sining te bak a si ko, ti si. Tikah, minung ruahnak ngeih ko ahcun mah cucu va huat i va dohdal phung a si hnga lo. Kam khatlei ah an kokek sining a si lo nain hurduh-cuainak ruangah a tuah hramhrammi zong cu an um ve len ko lai. Cucu, khirhfa nihcun kan huat i fak piin kan dohdal ding a si ko hnga. Sihmanhsehlaw, ningcang loin a nungmi mi cheukhat ruangah midang hnahnawhnak pe loin anmah kokek sining tein a nungmi minung hna kha an sining hlawt kan fial hna ahcun aa dawcahlo tukmi thil khi a si ko hnga. Cucaah, an sining tein kan cohlan hna ding bak khi a rak si ko.

Ngeihkhat aa duhmi hi hramhram in kan kham hna awk a si lo, kan theihthiam hna i an sining tein kan cohlan hna awk a si, timi hi ka pomnak a sau ngai ve cang. Kaphnih an lungtlin ko ahcun biakinn chung zongah lungthiang tein kutsih thlacamnak kan tuah piak hna awk a si ko, ti tiangin ka pom khawh. Ka pomning cu ka hawile sinah ka chim theo tawn i "na tlau ko cang hih" an ka ti theo. Sihmanhsehlaw, "an khuaruah ning cu teh aa dang tuk cio fom cu" ka ti i fak piin ka dirhmun ka chim tuk theng bal lo. Nain, tukum July thla ah tuahmi CBCUSA mino conference ahkhan Dr Cung Lian Hup nih amah cawnpiak caan ah lung ummi poah ceihhmainak caan a kan pek caah ngeihkhat t'hitumh kongah ka dirhmun cu ka chim ve i fak ngaiin debate a chuak. Kan khan chung ahcun a t'hangcho cangmi ram ah ca a cawngmi mino an um ngai caah sau lakte kan i al nain a theithiam ngaimi an um pah ve caah kaa lunghmuih ngaite.

Ngeihkhat minung kha dotlalo ah a ruattu minung tampi nihhin an dirhmun cu an biaknak in an dirkamh tawn. Khirhfa cheukhat zongnih kan zumhnak hmangin kan cohlang duh ve hna lo. "Bible nih a duh lo" kan ti. A hman! Bible nih ngeihkhat sualnak tuah cu a duh bak tak lo. Sihmanhsehlaw, Bible nihcun sualnak vialte hi a doh dih. A ngaingai ah ngeihkhat sualnak telawng bak hi Pathian mithmuh ah erhhlei sualnak a si tiphun in amah bing tein a thlir hleinak ka hmu bak lo__keimah theihlo tuk zong a si kho ko. Sualnak dangdang he a chim chih peng ko. "Pathian hmai ahcun phuanchia tlek hmanh a tluk lomi misual kan si dih ko" timi hi kan itleihmi a si fawn. "Kan sual cuahmah lio ahkhin Pathian nih a fapa in an kan tlanh" timi khamhnak thawngt'ha hi kan caah cun a tlum tuk. Asinain, ngeikhat aa duhmi pawl khi cu kan sinah dotla in kan cohlang hna lo. Biadang in chim ahcun a lianngan tukmi Pathian vel kha kanmah nih kan duhning in ari kan suai i a lengah kan nam hna. Lungthiang tein an sining te khin cohlang kho hna usilaw zeidah kan sungh hnga? 

Lam kenkip in rak ruah deuh cu a hau bak ko.

Relchap: Mah Hi Thil Hi Laimi Sinah A Cang Kho Zau Ve Hnga Maw?