Kan Tthitumh Puai Tuahdan Hi.....????

Zaan khat cu kai manh ngai caah patung a si cangmi ka hawipa, Kawi Van ka va leng i bia kan i ruah. A phunphun kong kan ceih____Laitlang ah taksa in a dam lomi a nu kong in USA ah mirangholh thiam bak loin nifatin khuasak a buaithlaknak kong tiang khi kan cem viar. Kan caan tambik a latu taktak cu nu kong theo a si ko. Nungak kong lawng a si lo, an nu kong tampi aa tel. Nupi thit puai tuah kong zong aa tel fawn. Thitumh puai kong ko ah hin caan sau bik kan rau___a puai tuah lio kong tampi ka hal hlei ah Laimi nih mo puai kan tuahdan cung ah ka hmuhning tamlak te ka chim ve (nupi a thi bal i a theihngal ngai bang khin).

Mo puai kong kan ceih aa thoknak taktak cu kan bia lak pi ah "nupi na thi deng cang la lo maw?" tiah a ka hal caah a si.
"Ka thi deng khom rih lai lo," tiah fawi ngai khin ka leh. "Ziah zeiruangah hme..??" a van ti vial ah khin, "a ruang tam tuk eeh" tiin a bia ka tan. A bia ka pehter thai ti lo. A hmur a cawlter manh hlan ah keimah nih biahal hram ka thok khanh___"Nan puai lio ah zeizah hme nan dih, nan hmantlak le video ka zoh ah hin hlunghlai tuk dawh a si le...??" tiin. "Kannih umnak cu Laimi kan tlawm hlei ah "wedding hall" hlang loin biakinn ah kan tuah le hawidang bantukin kan dih lo," a van ti vial ah khin, a phaisa fang bakin van chim ko tiah ka nawr. "Chim ningzak khi si ko cuh, $12000-13000 kar hrawnghrang taktak te khi si," tiah lungsak lo ngai khin a van ti.

"Eee! A tam tuk thiamthiam ko cu teh! Kawlram phaisa lebang cun aaa..." ka ti. A tam taktak reng cu awh!

Ka chimmi a lungtlin lo tuk caah a lu a lei hmasa. Cun, huamsam nawn, i biatak ngai in a bia a peh.

Ka dua, midang lebang cu $ 20000 renglo hna teh an dih cu. Eiding le a dangdang ah an dihmi cu va um rih seh, an kawile le an mawle nih an ihrukmi thil lawng hmanh ah $2000 hrawnghrang an dih. Laimi puai tam-u ah monu nih an i hrukmi thitumhnak thuam hna khi $1000 tang man a um theng loh teh. Ka kawipa zong nupi a thi le a kam ah ka dirpi ve. Ka duh bikmi ka nungak caah voikhat telawng ka tuah piak dingmi a si ko caah tiin hawidang nih an tuahtawn ning bantukin a tuah ve. Santlailo deuh hrat kan ti cu puai zawhmi nih an pekmi hna kutput a tlawm ngai. An puai thaizing ah cun $5000 renglo leiba a ngei ko. Sang Bawi, keimah hmanh hi kan nu chungle nih hawidang bantukin chaw ka hau hna sehlaw zeidek ka lawh lai. Nangmah bantukin nupi ngei loin ka um khi hau ve ko rih hnga...haahahaa...A fawi ruam loh eeh!!!! Rian nganpi kan lim kanh le ka diriam ngai si....hahahaha

Kawi Van ka rak len hi US ka rak phahka te ah a rak si.

*******************

Laimi nih "nupi thit le samtom phawih" timi chimpung kan ngei. A sullam cu nupi thit ah cun ngeihchiah cawva tampi a dih ti khi a si ko ( a palh zong ka palh sual khawh men). A dih ding hrim zong aa tlak. Minung nih a sunglawi bikmi caan thum kan ngeihmi lak ah caan khat a si cu mu. Cu caan thum lak ah kanmah nih kan duhning tein kan i thim khawhmi le kan itimhtuah khawhmi  van ti ah cun mah hi caan lawng bak a si leh cu awh. A rengreng ah mising pi nih chan khat chung kan nun hrawm pi ding in an thinlung le an taksa an kan pek ko cu a mak tuk rumro ve le sunghlawih a phu bak ko. Tuak setset ah cun, minung cu kan chambau dih le midang nih kan sin ah an nunnak pumpi in an van i hrawm ngaingai ding cu kan phu lem hna lo. Zapi-zaran cu sifak santlai lo le mihrut minga kan si chinchap rih. Cu si ko buah, nazi pakhat a si lo, nikhat zong a si lo, chanchung bak minung nih  kan ngeih khawhmi a tlamtling lomi dawtnak in pakhat le pakhat nun hrawmti ding in biakamnak tuah a si ko mi cu a ropui ve bak ko. Pathian thilser khuaruahhar lah ah pakhat cu a si ve.

Kan sunhlawih ding cu a si hrimhrim ko. A si ah, zeitindah kan sunhlawihnak kan langhter lai. Ngeihchiah dihlak dih in mo-lomh puai tuahnak in maw?

Laimi lawng kan si lo. Vawleicung miphun kip nih an sunhsak cio. Khirhfa biaknak lawng nih thitumhnak hi biapi ah a chia lo. Biaknak phun vialte nih biapi ah an chiah dih. Kan sunhlawihning le kan langhter dan tu cu an i dang cio. Laimi lawng thitumh phungphai tampi a ngeimi le man aa manhmi kan si lo. Thitumhnak cu mizei miphun poah nih an nuphung chung ah an telh dih cio. Nunphung cu miphun pakhat chung in mi tam-u nih tuah tawn lengmangmi cawlcanghnak le ruahnak in a rami a si. Miphun cu innchungkhar in a rami a si. Innchungkhar cu thitumhnak in sermi a si. Cucaah, thitumhnak le nunphung cu an i then kho lo. Laimi nak in thitumhnak phungphai tampi a ngeimi miphun an tampi i zarh khat chung mo puai a tuahmi miphun zong an um ko.Laimi nih thitumhnak he pehtlaiin phungphai tamtuk kan ngeihmi zong hi thiltha a si ko. Miphun tling pakhat kan si nak langhtertu zong a si.

Man zong hi an i manh cio ko. Cheukhat nih mo nu man kan manh i cheukhat nih mo pa tu man an manh. Laimi nih kan phung ning in mo nu man kan manhmi zong hi uar a um ngai: Mo nu nih nu le pa inn chuaktak in mo pa sin ah aa fonh ko caah. A poi ngaimi tu cu monu chungle nih kan fanu an kan thit ti cu kan theih nain kan fanu pasal a ngei timi kan philh tawn rua ka ti. "An kan thit___passive voice" timi lawng kan theih tik ah a herhmi poah pa lei chung rian ah kan ruah. "Pasal a ngei___active voice" timi kan hngalh lo caah kanmah nih dihheu ding in kan i ruat lo. A thiangmi a si pek, thiang lomi a si pek ah thitumhnak poahpoah ah thil pahnih a um dih. Cucu, "Pek le Laak___Give and Take" a si. Fanu kan pek le fapa kan hmuh ve. Asiloah, fapa kan pek le fanu kan co ve. Sihmanhsehlaw, Laimi tampi nih kan fanu lawng kan pek hna tiah ka ruah i a sung lei ah kan i rel theo. Cu tik ah, kan sunghnak hmetter ding in lam kan kawl i man sansang kan hauh hna__kan nunphung nih cun a van dirkamh tuk ve fawn. Kan fanu kan dawt tuk caah kan tuah kan timi cu caan a van ruah cun a pasal le a chungkhar sin ah a mithmai biit tertu ah a cang.

Cucu maw, miphun tling pakhat kan si ve tiin kan i chawr tukmi kan "Nunphung" cu an si ko....??? Asiloah, kan "Nunphung" hme caan he aa rem in kan hman thiam lo...??

CACC Silver Jubilee ah Rev. M Thawng Kam chimmi bia ka lung ah a chuak: "Nunphung kong ah hlanlio nun paoh kha nunphung kan ti sual tawn.Cu ti kan lak ah cun hlan chan cu hruh chan a si caah kan nunphung zong nunphung hrut mi a si kho. Nunphung hrut ti cu ahohmanh nih kan duh ding a si loh.A sining hrimhrim ah Nunphung hi thleng loin a dirmi, asiloah thlen khawh loin hren chihmi a si bal lo.A luancia mi caan ta lawng kha nunphung a si fawn lo.Fimnak a tthan bantuk in nunphung zong a tthang ve.Cu ti ti tikah duh paoh in kan thlen kan merh lai tinak a si hrimhrim lo.Kan rak si tawn ning cung ah hram bunh in tuchun he aa rem mi zapi nih kan cohlan i kan i hrawm khawh mi zatlang nun zong hi kan nunphung an si ve. Cucu a bia pi ngai ngai. Cucaah, kan ttanh tuk mi kan nunphung kan hmanning hi ttha tein kan zohtthan an herh ko lai. Thil hlun a tleih chanmi paoh miphun le ram dawmi an si hlei lo. Aa tlak ti lomi nunphung hlonh thiam hi phundawt a si deuh lai." 

Kum hnih renglo deuh te USA ka um chung ah thitumh puai tam ngai ka zawh cang. Ka hawikom tha nih an tuahmi puaihnih ah cun a chung ngaingai in kaa tel ve.Nunphung i tleih in monu man sangpi hauh a hmangmi upa cheukhat nak in hna a hnok deuhmi ka hmuh hoi hna. An ka neng bak! Cucu, maw nu cheukhat an si. An hawinu dawt sunlawihnak caah a pasal ding nih phaisa tampi dih in a timhtuah piakmi puai bak khi anmah laarnak ding hmun ah an hman. Monu nih an caah a duhmi thilthuam a timh piakmi hna bak khi a mitthmai zoh loin an al mei. "Ka duh lo, aa dawh lo tuk, keimah tein ka duhmi kaa order lai i receipt kan pek te hna lai," tiah pakhat nu hna nih cun puai timtuahtu minung tampi kan hmai bak ah monu cu a ti huar ko. Ka kaam bak kaa seh! Ka hmuhmi le ka theihmi kaa zumh kho lo. A thaizing ah monu cu a maw-nu thil cahmi kong ka hal. "Nangmah na si le in chim ko ning, ka rak cah piakmi nak in a let reng loin a man fak deuhmi a si," a ka ti. Ka mit-au tha deuh in a van ka zoh. "Na khuaruah har hlah, atulio hrawng puai tuahmi cu an si dih ko, kannih cu san kan tlai loh le hawi bantuk hmanh in kan ti piak kho hna loh le an hmai ka khap lehlam hna lo," tiah keimah tu cu lungcen a ka pek. A dang ka kawipa pakhat puai lio zong ah maw-nu pawl hruk ding ah an cahmi thil an khirh than ve. Mawnu pawl nih an duhmi an icah ve thiamthiam___a man tam deuhmi.

Hihi maw, Lai mino nih thitumhnak puai thilhruk kong ah kan pawmmi "New Normal" a si tak ko...??

Thitumhnak he aa pehtlaimi kan Nunphung kan hmandan le kan mo puai tuahdan hna hi....????

Ai!! kan chan le kan dirhmun he an i tlak taktak ko tih???

************

Ni khatkhat ah ka duhmi nu he innchungkhar ser ka duh ve te lai. Laimi ka si bantukin Laiphung tein ka dawtmi sunhsak ka duh ve. Lai nunphung itleih in man tampi hei ka hau sual hna sehlaw....??? 

Ummm!!! Bialam kaltu le upa rian...!!!(ka thawpi ka chuah).

Mawnu pawl nih an caah kan timhtuah piakmi hna thil duh loin ka al sual sual hna sehlaw...???

Maw ka nu!! Ka lung kaa thleng men lai....thinhan in....

Kawi Van kawipa bantukin ka puai thaizing ah leiba $5000 ngeih ding cu ka duh bak lo....

Si than loh..Um rih, Um rih!! Thomas L Friedman nih a ka chimhmi a um...www.tradesy.com..!!!

Bravo!!The power of "The Sharing Economy."....