Chan Kan Dawi Kho Ngai Ve Ko Rua

Kumhlun a liam. Kumthar aa thok. Voidang tawn bang, a luancia kumkhat chung tuahsernak le thil sining vialte, hnulei her in van cuah hnu ah a ralaimi thla 12 chung timhtuahnak caah hngawng dawh in khua hei cuah cio a si___tuah dingmi le hrial dingmi, ttumh dingmi le chap dingmi, remh dingmi le maak dingmi etc lists pawl nih lungthin ah khat thup in hmunhma an van la. Ka thluak zong, kumthar don zaan le kumthar chun hna cu vodang nak in ai manh lo ngai ve. Hnulei her in khua a cuanh chel, hmailei ah dingthlir in ka hngawng a dawh chel. Zeidang hlei a hmu lo;tuah dingmi le tuahlo dingmi list pawl nih an phenh ngai le.

Vawleicung buu phunkip le upatmi pumpak kenkip nih
"2013 in review" tiin kum khat chung an cawlcanghnak cio, a tawinak in an langhtermi zong rel cawk loin an phul. Relding tampi lak ah kai manh caan poah ah ka len tawnnak websites le ka uar tukmi minung pawl nih an tialmi lawng khi ka rel khawh. Khuaruahhar dih khi an si ko. An maak tuk viar. Asinain, pakhat te nih ka lung a ka laak khun. Cucu, vawleicung dictionary minthang bik pakhat a simi "Oxford Dictionaries" nih "2013 word of the year" an thimmi a si.

2013 chung ah rak ruahning nak in hman bikmi holh/cafang

cu "selfie" a si caah "word of the year" kan pek tiah Oxford Dictionaries nih an thanh. 2013 chung ah sertharmi cafang cu a si lo. Tuan piin a rak um cangmi a si ko. Asinain, 2012 lio nak in 2013 chung ah 17000% in an hmanning ret a karh tiah an langhter. "Selfie"cu zeidah a si/zei sullam dah a ngeih? Social Networks pakhat khat ah tar(post) ding in mah le mah hman ithlak ti nak sullam a ngei. Social networks ah ka hman bikmi Facebook ka van zohfel deuh. Ka hawikawm nih nan postmi photos zong ka van zoh duahmah hna. "Selfie" tor le cheng ka hmuh.

"Ee! Laimi hi chan kan rak dawi kho ngai ko hi teh" ka ti.