January 13,2014 cu India ram caah philh awk a tha lomi lawmhnak ni sunglawi a si. Vawleicung nih lawmhpi mi tuanbia dawh an tial. Kum khat ah 27 million renglo hngakchia an chuahnak India ram ah kum thum pehtlai in Polio zawtnak in a zawmi mithar an um ti lo. A tawinak in chim ah cun, international standard in India nih Polio zawtnak an tei ni a si.
A luancia kum nga lio ah cun vawleicung ah Polio zawtnak a ngeimi dihlak i zatceo renglo cu India ram in an rak si tawn. Sihmanhsehlaw, tukum January 13 ni ah cun India nih Pollio kan tei cang tiah phorhlaw ngai in an au ko. Cucu, vawleicung zong nih zapei bengh in an lawmhpi. Lawmhpi an tlak hrimhrim. Atu bantukin caantawi te ah an tei khawhmi hi khuaruahhar thil taktak cu a si ko. Vawleicung ah hngakchia tambik an chuahnak le thianhhlinhnak lei ah chambaunak in a khatmi India ram nih Polio a teimi cu khuaruahhar a si hrim ko. Polio zawtnak donhnak ah pumpak in phaisa tambik a petu Bill Gates nih cun "vawleicung ngandamnak tuanbia ah lawmhnak ni ceu ngan bik kan hmuh ni a si" a ti phah.
Polio (poliomyelitis) cu fawi tein chawnh khawhmi zawtnak phun khat a si. A tlangpi in phun thum in then khawh a si; abortive polio, nonparalytic polio le paralytic polio tiin. Aboritive le nonparalytic polio hi cu cumpit tlangrai le fawi tein thlawp khawhmi zawtnak dangdang bantuk men ah ruahmi an si ko. Sihmanhsehlaw, paralytic polio cu tih a nung hringhran. Minung pakhat kutke tlamtling loin fawi tein a chiah khawh i nunnak tiang hmanh a laak theo tawn. Kanmah Laimi chung hmanh ah a hngakchiat lio ah Polio zawtnak nih a tlak ruang ah a chanchung kutke tlamtling loin a um thaimi minung hmuh khawh len an si. Polio zawtnak tih a nun bik nak cu tuan te ah a lang lo/ symtom a ngei lo i fawi tein chawnh khawh a si fawn. Mizaw 100 cung ah minung pathum, pali sin lawnglawng ah tuan tein aa langh tawn. Cucaah, a caan luan hlan ah thlawp manh a har ngaingai. A caan a luan hnu ah thlawp ah cun damh khawh ko hmanh ah pum tlamtlinglo in mi a chia.
Paralytic Polio zawtnak rungrul cu minung pum chung a luh tik ah ril ah a um hmasa. Ril chung cun thiri ah a lut chin. Thari a phanh hnu cun kan pumchung titsa an cawlcanghning le kan thaw chuah-dawpnak system kha hnahnawhnak a pek. Kan baan le kan al tit tibantuk kha fak bikin a hrawk caah Polio zawtnak a ngei balmi cu lamkal kho lo le baan hmang kho loin a ummi an tam bik.
Polio zawtnak hi 1950 lio hrawng ah hin vawleicung ah a rak tam taktak. Minung tampi nunnak a laak caah ram fim hna nih thlawpbulnak lam an kawl zokzok i 1955 hrawng cun khamkhawhnak sii/ ka-kuat-si (vaccine)an ser. Ram rum nih cun khamh khawhnak sii cu zokzok in an ram chung ah an vah ter i caan rau lo ah an ram chung in Polio zawtnak cu an thianh khawh hna. USA nih 1979 ah a ram chung in Polio zawtnak a thianh dih i 1991 ah nitlak lei ram hna ah cun hmuh awk um loin an thianh dih cio. Sihmanhsehlaw, cu lio ah cun vawleicung sifak ram tampi ah a phul in a rak phul rih. World Health Organization (WHO) cazin ning ah cun1988 kum ah hin vawleicung ram 125 ah Polio zawtnak a um rih.
Vawleicung cozah thatha hna, NGO nganngan hna, mirum rum hna le mifim fim hna i bawm in Polio zawtnak ral cu an doh. Mi tampi nih an ngeihchiah chawva tampi an pek i mi cheukhat nih an thazang le an caan an pek. An fimnak le thiamnak zong mi tampi nih hehchet in an hman. 2012 World Vaccine Summit ah a ra laimi 2018 ah vawleicung in Polio zawtnak hrik hloh thai ding tiah biakhiahnak an ngei i USD 6 billion renglo phaisa an sangsen. Mah cu phaisa cu Polio zawtnak a um rihnak ram poahpoah ah an hman. Minung tor le cheng in an hlan hna i khuate tete ah a ummi hngakchia tiang in ka-kuai-si an chunh dih hna. Polio zawtnak he pehtlaiin theihhngalhnak karhternak phunphun an tuah. India ram lawng hmanh ah ka-kuai-si chuntu minung 2 million renglo an chiah hna. Cuti bak cun an doh caah vawleicung ah ramthum lawng ah Polio zawtnak tei rih loin a um cang. Cu ram hna cu Pakistan, Afghanistan le Nigeria hna an si.
Polio zawtnak a tei rih lomi ram hna zoh tik ah an ilawh dihnak a um. Cucu, ralrang nih buaibaimi le biaknak ah a pial sualmi minung tampi an umnak ram lawngte an si. Phundang in chim ah cun daihnak le biaknak zalonnak a um lonak ram an si. Ralhrang hna nih ka-kuai-si chuntu pawl kha nitlak ram lei cozah nih mingiatu ah tlakmi nan si an ti hna i a phunphun in an hrem hna. A thah tiang in an thah hna. Polio zawtnak rungrul kamtu ka-kuai-sii cu nitlak ram mi hrokhrol, satan party pawl nih mi an mawnnak a si caah ahohmanh nih nan i chun lai lo tiah hehchat in mipi kha an ttihpheih hna. Cu tik ah vawlei le minung caah thiltha tinh in riantuantu hna nih an duhning in rian an tuan kho lo. Asinain, an lung a dong maw? Dong naisai hlah! An naam chin thluahmah! Harsatnak phun zakip an ton i nunnak tampi a liam lio ah "India nih Polio zawtnak a tei" timi thawngpang nih tampi thazang a van pek than hna. "India ah kan hmanmi Polio donhnak tactic tampi kha a tang rihmi ram hna ah kan hman ve hna lai i 2018 hlan ah vawlei cung in Polio zawtnak kan hloh thai khawh hrimhrim lai tiah kaa zum tuk" tiah Polio zawtnak kan tei khawh in Malayria kan doh rih lai tiah a cir bakin aa cirmi Bill Gates nih lunghmui ngai in India in a rami thawngpang cu a lawmh.
Mifim le mirum hi cu an rak maak tuk eeh! An ruahnak hi vanmi bantuk an si. Peng le tlang kong ah maak thei loin a buai i atu leklek buu aa thenmi Laimi zong, anmah thawng in Polio zawtnak rungrul a um ti lo nak vawlei thar ah khua kan sa dengmang cang.
Good Luck to Global Polio Eradication Initiative!! A Hnu Bik India Polio Sizung
No comments:
Post a Comment