Malaysian an inawicawt, Tuluk an sivang, Kannih kan Zo a lang ve

Kan hnu zarh niruk ni ah Malaysia in Beijing lei ah aa thawhmi vanlawng, Malaysia Airlines Flight No.370 cu a tlaunak in atutiang hmuh a si rih lo. Tuluk nih zarhpi ni ah a cutuh(satellite) in a tlaknak rili ah an ruahmi hmun hrawnghrang cung ah zeimaw hnawm nganpi pathum kan hmuh tiah Satellite hmantlak an thlah. Cucu, tuanvo ngeitu hna nih an zohfel cuahmah lio pi a si tiah CNN nih an thanh cuahmah. Nain, Malaysia cozah vanzuang lei tawlreltu hruaitu nih "Tuluk cozah sin in zeibantuk thawngpang le hmantlak hmanh kan hmu rih lo" tiah a chim tiah an van thanh chih hoi. A buai thlak rumro. Khuaruahhar zong a si. Thlapa cung hmanh ah duhtawk in a kai kho cang i vawlei pumpi zong mitt'hep ah a hrawk kho dingmi bomb hmanh tampi a ser kho cangmi minung nih vanlawng nganpi bak ninga chung reru pi an kawl cang nain hmuh khawhlo ko cu! Pathian thilser a rak mak ning hi dah___minung theihkhawh ci a rak si rumro rua lo.

MH370 aa citmi minung 239 hna i an chungkhatsahlawh le rualchan ca ahcun umkhua a har tuk ko lai. Minung fa nih celh awk a tha hrim lai lo. Malaysia Airlines ca zong ah a fak taktak ve. Chawlehnak vawlei ahcun mint'hatnak le midang nih zumhnak hi zeizongte a si an ti theo. Atu thil cangmi ruang ah vanlawng in khualtlawng tawnmi nih Malaysia Airline cu an zum ngam ti lai lo i an icit duh ti lai lo. Malaysia rampi ca zong ah ngaihchia ngai a si. An umnak theih loin a tlaumi pawl i an chungkhar pawl lawng si loin vawlei pumpi nih kutdong in sawh an ihuah cang. "Zeitindah passport firmi in minung pahnih nih KLIA(Kuala Lumpur International Airport) mi checktu lonh in vanlawng cung ah an kai khawh" timi biahalnak hi tha tein an let kho lo. Cu nak in a van fak deuh chinchinmi cu, a tlaumi vanlawng dirhmun kong ah anmah le anmah an inawnnok viar.

MH370 tlaunak rili

"A tlaumi MH370 vanlawng ah icit ding in tickets a caw cangmi chung in minung panga cu airport ah an chuahlo caah vanlawng chung ah khin cangmi an bag pawl cu t'humh piak than an si" tiah Malaysia Police nih thawng an thanh. Cucu, nikhat ni ah Malaysia Police luthlai, Khalid Abu Kabar nih "a hmanlo mi a si, tickets a cawtu vialte bau lo tein an phan dih ko" tiah a let. Cu tlawmpal ah Malaysia Airlines nih "Tickets a caw ko nain a rak chuak lomi minung pali an um, an bag zong airport a phanhlo caah thumh thanmi bag a um lo" tiah an van thanh ve hoi. Mah cu nak in a sual chinchin mi a um hoi. Malaysia vanlawng ralkap lubik (air force chief) general Rodzali nih "vawlei in tuanvo ngeitu le vanlawng mawngtu hna an ipehtleih khawh ti lo hnu ah vanlawng cu a hnulei ah aa mer i Malaysia lei ah tangniam tein kir than dawh a si" tiah a chim tiah Malaysia thawngthanhca nih nihnih ni ah an tial. Nithum ni ah Prime Minister zung aiawh in biachimtu Tengku Amad nih "Malaysia lei panh in zuan than dawh a si hrimhrim lo, kan vanlawng ralkap nih an ruahning ahcun a hnu lei ah aa mer timi lawnglawng a si ko" tiah a van remh hoi.

Interpol nih siseh, Malaysia police nih siseh, ralhrang kut aa tel cu an zum lo, rauhlo piin a cang sualmi thil si cem dawh in an zumh ko____vanlawng aa citmi lak ah passport firmi a hmangmi Iran minung pahnih an itel ko nain ralhrang he pehtleihnak an ngei lo an ti. Ruahlo in a cang sualmi thil a si ko zong ah Malaysia tuanvo ngeitu hna nih an tawlrel ning zoh tik ah zatlaknak a tongmi chungkhar caah i lungsi awk a tha lo. Zeicatiah, vanlawng cungah a tlaumi an chungkhat kong he aa pehtlaimi thawngpang cu atulio ahcun an caah thihnak le nunnak tlukin teh a biapit cu! Cu lio ah tuanvo ngeitu nih an chimhmi hna bia aa lawhlo tuk tik ah an sivangh an celh lo.

Midang Passport in vanlawng aa citmi Iran pahnih

A tlaumi vanlawng aa cittu minung 239 lak ah 153 cu Tuluk an si. Cu tik ah tuluk an sivanghning a fak bik. An umnak theih lomi Tuluk khualtlawng pawl i an chungkhar le sahlawh hna cu Kuala Lumpur International Airport he aa neihnak bik hotel bak ah umhmun an khur i tuanvo ngeitu sin in thawngpang an rak bawmh. Tuluk nih Facebook le Twitter bantukin an hmanmi Social Network sites pawl cu Malaysia hruaitu pawl cung ah thinhannak bia in a khat. "Malaysia, mah tlukin a nganmi thil pi hi zeitiktiang dah ka thuh khawh lai tiah nai ruah" ti bakin Tuluk nih Twitter bantukin an hmanmi Sina.com Weibo ah mi pakhat nih a tial i a laar chuahchuah. Tawifiang in chim ahcun, Tuluk cu an sivang taktak ko. Zarhpi ni ah an cutuh nih a rak thlakmi hmantlak, atu ah an van chuahlanghnak zong hi Malaysia hruaitu pawl phihnaamnak(pressure) an van tuahnak tactic a si lai tiah a ruatmi zong an um.

Lungrethei in thawngpang a hngakmi chungkhar pawl

Information Age ah khuasa hrat kan ti cu kanmah Laimi zong nih kan buaipi ngai ve hna__Malaysia vawlei ah khua a sa i an tirawl ei in a nungmi zong cu kan tamtuk ve le kan buai ding zong a si pah ko. Kan lungnuamhlonak kan langhter bik nak hmun cu kan Facebook cio ah a si. Naihrawng cu ka "news feed" ka zoh fate mah hi kong rumro ka hmuh ko. Cucu a poi ah ka hei ruat lo. A phung ah ka hei ruah i ka cohlan khawh tuk ko. Ka zoh khawh lomi tu cu mi nawnnok huam pawl nih an duhduh in MH370 hmantlak an tuahto riangmang i "Malaysia vanlawng a tlami kha an hmuh cang, minung 227 ning tein him tein an chanh khawh hna" timi ca he an tarmi kha a zummi kan tam tukmi a si. Ram thumnak ah sianginn a kai cuahmahmi mino tampi zong nih an "Timeline" ah an i "Share" len ko ee. Naite ah "www.malawivoice.com" nih "Obamacare cu Biathlam cauk chung ah kan hmuhmi sahrang number 666 timi kha a si" tiah an tialmi zong aa "Share" mi minung kan tlawm hoi lo. Atu chan ah internet chung ah kan hmuhmi thil hi zeibantuk source in dah a rami a si, zumhtlak a si maw, midang hmuh ding in phozar chin tlak a si maw, timi bantuk kan tuak khawh lomi hi a poi ngaingaimi a si. Internet chung ah kan hmuhmi poah fawi tukin kan zumhmi nih zeitlukin dah thil kan theihlo timi a langhter tuk rua ka ti. Cucu, kanmah pumpak ca zong ah a tha loh i kan tarmi ca a rak zum chintu midang caah a thalo chinchin___an khuaruahning fak piin a rawk kho cumu. Mah cu kan sining cu atu chan ahcun ningzah ngai awk tlak thil a si.

mi nawnnok huam pawl nih an tuahtomi FB hmantlak pakhat

Zeisikhom ah mah hi tuanbia hi cu dong zauzau hram sehlaw a tha tuk ko hnga.

Peace be with all the passengers!!