Ramdang ah ka chuah hnu in ka sining aa thleng tuk ve. Thiammi le tuaktan khawhmi ngaingai ngei lem loin university sianghngakchia pakhat dirhmun in ram chungah ka rak tlawnlen lio ahcun ramkhel (politics) kong hna hi ka lung a rak lut pah bantuk. Malaysia ah caan zeimawzat khua ka sak hnu tiang zongah kan ram politics umtuning cu teirial ngai in ka rak cuanh pah t'heo. Sihmanhsehlaw, thiammi ngei loin mi ramdang ah aa hlawhfami minung pakhat dirhmun in khua ka sak caan a van sauh deuh tikah ka tonmi thil nih ka mit a ka deu ter. Minung kan nunnak ah a biapi hmasa mi thil pakhat cu champhang lo tein pawcawm khawh hi a si, timi ka fiang. Midang tei khawhnak ding ahcun fel lawngin a za lo, thil sining tuaktan le bihzoh thiam zong a herh, timi ka pemh. Cucaah, caan hman tein t'uan awk a um lomi, ka t'uan liomi wiring (construction) rian cu ka chuahtak i eidin dawr (restaurant) ah rian ka lut. Nihlawh a tlawm hlei ah riant'uan caan a sau deuh i rian dinh ni zong a tlawm deuh, timi ka theih buin rian kaa t'hialmi a si. A ruang cu thla dih nikhua taktak ahcun ka kut cungah phaisa a tangmi a tam deuh hlei ah zaangdam deuh in rian ka t'uan kho lai, timi ka fiang. Cun, mileng an um lo caan ah zalongte in ka duhmi ca ka rel kho fawn.
Rian ka t'uannak rawl dawr hi German le Asian rawl cawhrup (fusion) in zuarnak hmun a si tikah mirum le mi pipa deuh he hmuhtonnak le chawnhbiaknak caan ka rak ngei kho ngai. Biadang in chim ahcun mirum deuh pawl an nunning le an sining kha a taktak in tampi ka hmuh. Cucaah, ka khuaruahning tampi aa thleng. Ka lungthin cu nikhat hnu nikhat in chawlehnak (business) lei ah a kal deuhdeuh. Ka relmi cabia pawl zong cu chawlehnak kong he aa pehtlaimi a tam deuh thluahmah. Caan zeimawzat a kal hnu in ramkhel kongah ka buaibai zuam huaha ti lo. Ramkhel vawlei cu chawlehnak vawlei nih phunzar phen in a chak a merhmi a si, tiphun in ka ruah cang. Laimi zaran nih kan buaipi zuam tukmi vawleicung buaibainak (international affairs) lebang hi cu economic interests baknih a tlangpi in a mawghmi thil pakhat bantuk a rak si ko. Cucaah, chawlehnak lei ah biatak deuh in teiman ka thlu.
Chawlehnak lei ah biatak tein ka lungthin ka mer hnu cun Kawlram (Laitlang) kong ka dawi bak ti lo. Ramdang ah khua a sami nihcun Kawlram thil umtuning cu ramkhel rian a zuammi lawngnih biatak tein buaipi ding phun ah ka rak ruah. President Thein Sein hruaimi, democracy phunphai a hmangmi cozah nih thlennak tampi an tuah hnu zongah t'hit'ha in ka dawi hlei lo. Kawlram cu cozah aa thlen i chawlehnak lei ah a t'hancho tuk ko zongah ramleng ah khua a sami kanmah bantuk phaisa tampi a ngei lomi caah cun hnabeisei awk a um bal rih lai lo, tiah fawizaang in ka rak ruah. Caant'ha (opportunities) a um le um lo kongah fiang deuh in thil sining hlathlai duh hmanh ah pumsa in va tlun lo ahcun maivan (internet) in zei pipa aa thei kho lem lai lo, tiin ka rak um sawhsawh. Sihmanhsehlaw, November 2015 thimnak ah NLD nih fak piin teinak an hmuh hlei ah Yangon Stock Exchange (YSX) an onmi nih zeimawzat ka mit a ka purh ter. Cucaah, tukum kum thokka hrawng khan lunglut lo nawn in Kawlram chawlehnak vawlei dawi hram ka thok i ka hmuhmi thil nih a ka lauter lengmang. Ka rak ruahning nakin thil umtuning hlathlai a rak fawi deuh tuk i chawlehnak dingah caant'ha a rak tam hringhran.
Uknak t'halo tangah caan sautuk a rak rawkmi Kawlram chawlehnak cu Thein Sein cozah kut ah t'hawng ngai in a t'hangcho. Nikum (2015) hmanh kha July le August thla ah thlichia le ruahpi nih fak tukin a den i Chinram le ramt'hen dangdang ah harsatnak le sunghzatlak phunphun a chuah caah minung ting 16 hrawng nih umnak innlo ngei huaha loin khua an sak bu ah Kawlram economy (GDP) cu 7.2% renglo a t'hang t'hiamt'hiam. Asian Development Bank nih "Asian Development Outlook 2016 (P 216-219)" ah an tuakchung ning ah Kawlram economy cu 2016 kum ah 8.4% le 2017 kum ah 8.3% in a t'hang lai, an ti. World Bank zongnih a ralaimi kum 5-6 chung cu Kawlram economy hi 8% renglo in a t'hangcho ko lai, an ti ve. Vawleicung consultation company minthang, McKinsy lebang nihcun 2010 kum ah USD 45 billions hrawng lawng a simi Kawlram economy cu acozah nih ningcang tein an tawlrel thiam ahcun kum 2030 ahcun USD 200 billion renglo economy ah aa thleng lai, an ti. Phundang in chim ahcun Kawlram economy cu atulio vawleicung ah a t'hangcho bikmi economy pakhat a si. Cucaah, chawlehnak dingah caant'ha a tam hringhran.
Kawlram (Laithlang) ah kan chawva phum (khong) hna usih (Part II)
No comments:
Post a Comment