Tutan ka cakuat cu nikum bantukin a sau lai lo. Zeicatiah, nikum ah kan ngeihmi stock pawl kha a tam-u cu ka zuar lo i a thar ka cawkchapmi zong a tamtuk lo. Nain, kan cawk chapmi companies pahnih-khat tu cu ka cawk lio caan ah thazaang kan ngeihmi dihlak in ka luhhnawh hna tikah atulio kan portfolio ah zatuak in a tam bikbik an simi cu kan account statement ah nan hmuh ko lai kha.
Result t'ha kan hmuhnak kong ka chim hlan ah tukum chungah ka tlolhmi caant'ha kong zeimawzat van chimta ka duh.
Microsoft nih billion 26 (Share khat ah $190 renglo) in cawk a zalh cuahmahmi Linkedin, Zika zawtnak t'ihphannak ruangah fak tukin an stock man a rak tlami tilawng khualtlawnnnak company Norwegian Cruise Line (NCLH) le vawleicung ah electric motor t'ha bikbik a sertu Tesla Motor (TSLA) stock hna hi kumpi kumkhat chung ka ngiatthlaimi cazin (watchlist) ah an um i man deng ngai in cawknak caant'ha kan ngei nain ka cawk lomi an si. An stock man a van t'um caan ah cawk dingah aa relrem tuk ka theih ko nain "t'um deuh ko rih hna seh" tiin ka zohsawh sual hna ruangah kan caw kho thai lo. Linkedin hi share khat ah $110, NCLH hi $34 le Tesla hi $143 hrawng in cawk khawhnak caan kan rak ngei nain kan tolh hna. A ruang cu Warren Buffett bia ihlan ahcun "ka kutpi caan sautuk kaa dawp sual". Nuclear rawl (uranium) a chuahtu Cameco Corporation (CCJ) tu hi cu voikhat kan tlolh nain Canada cozah he ngunkhuai kongah an buai cuahmah liomi nih cawknak caant'ha an kan pek te t'heo lai dah tiah ruahchannak ka ngei rih.
February, 2015 thokin US hrambunh Chin Khrihfabuu pawl caah phaisa cawinak kan tuahmi program cu kan rak ruahning bantukin hlawhtlinnak kan hmu rih lo. Biakinn cawknak ding caah phaisa cawinak application cu Khrihfabuu pathum-li nih an phit ko nain pakhat hmanh kan cawih hna lo. Zeicatiah, an ngeihmi cawva thazaang, an duhmi biakinn man tlawmtam le phaisa cawihnak dingah biapi in kan zulhmi kan phunglam aa tong thiammi an um lo. Hmailei ah kan phunglam he an sining aa tongkheng khomi Khrihfabuu an um te lai i kan program nih kan miphun caah t'hathnemnak a chuahpi hlei ah hlawknak kan hmuhnak ve te ko lai, tiah ruahchannak ka ngei ko rih.
November 8 ah tuahmi US President thimnak ah Donald Trump nih ruahning lengpi in teinak a hmuh tikah stock market aa hninsai hringhran. Globalization tilet cit in vawleicung ram kenkip ah chawlehnak a tuahmi companies pawl stock man cu faak ngai in an tla i bank stocks cu aman a kai thluahmah. Trump nih US President a tling te lai, tiah ka rak ruah bak lo caah timhtuahnak ka rak ngei lo i kan account ah phaisa fang a um huaha lo. An stock kan ngeihmi companies tamdeuh cu ram kenkip ah chawlehnak a tuahmi technological companies an si tikah an man a tla fawn i rianraang in zuar colh awk ah an paam tuk fawn. Cucaah, mumal ngei loin chikkhat aa hninsai nih market nih a chuahpi mi caant'ha chungah kan tuahmi chimtlak a um lo.
Kan semnak ram, Union of Burma, ah chawleh tuah a thiammi ramchung khuasa mino pakhatkhat he hmunkhat ah riant'uant'i dingin duhsaknak kan rak ngeihmi zong kha a taktak in a tlamtling kho thai lo. Zeicatiah, nan theih dih cang bantukin kan duhning he aa hoih in ramchung lei ah rian a t'uanmi mino kan hmuh khawh lo caah a si. Kan si khawk tawkin kan virhkhawih len i hmaitonh bakin kan beisei mi minung kan ton khawhmi kha kaa lungsi ngaingai t'hiam. Tonnak ah a rami nihcun atulio kan ram chawlehnak lei ah a tlangpi in Laimi nih rian kan t'uanning an fianter ngai cio hna lai dah ka ti i nan i lungsi cio ka zumh. Hmailei ah kanmah pumpak in kan tlun khawh cio tik ahcun kan rual in hmunkhat ah phaisa phumt'i khawh dingmi thil kan hmuh te t'heo lai, tiah ka hnabei a sei ko.
Tukum chungah Kawlram lei ah hmunkhat ah phaisa kan phumt'i kho lo nain nanmah pumpak cio in a lam kenkip in chawva phumnak nan tuahmi kong tete nan ka chimhmi cungah kaa lunghmuih tuk. Hmailei ah hlawhtlinnak nan hmuh hrimhrim lai, tiah ka zumh fawn. A ruang cu kan semnak ram bantukin chawlehnak vawlei ah a t'hangcho cuahmahmi ramdang an um lo tluk a si. Vawleicung companies lian pipi le mirum hna nihcun Kawlram bantuk cu ramri (frontier) market a si i risk a tamtuk tiah an t'ih pah lio a si rih caah a tlangpi in kan ram sining kong a theimi kanmah bantuk caah cun kan ngeihchun phaisa phumnak dingah caant'ha taktak a si ko, tiah ka ruah.
Atulio vawleicung chawlehnak umtuning hrim hi Kawl holh cun "a t'husan ngaingai". Japan le Europe ram tamdeuh ahcun akarh um loin phaisa cawih dingin acozah le banks nih chawleh thiam pawl an nawr hna hmanh ah phaisa an cohlang duh lo nain kan Kawlram hna ahcun chawlehnak caah phaisa cawi duh tikah akarh ret 12% tang in cun hmuh khawh a si lo. Japan le Europe ram tamdeuh cu kum 2008 ah vawleipi nih kan tonmi financial crisis in an luat kho taktak rih lo i an chawlehnak a t'hancho rih lo caah an central bank pawl nih negative interest rate in an mawngh cuahmah rih hna. Kan ram ah phaisa karh ret a san tukmi nih phaisa phumnak le chawlehnak caah caant'ha tuk a um lio a si, timi a langhter.
Shan ram chaklei kam ah tlangcung hriamtlai cheukhat le acozah ralkap an ikah cuahmahmi nihhin ram daihnak caah hnahnawhnak a chuahpi i chawlehnak zeimawzat a hnursuan ko. Sihmanhsehlaw, Thein Sein cozah nih an rak thok cangmi kan ram thlenremhnak rian cu amah ning kel in a kal t'han baibai ko lai dah ka ti. T'hanchonak le chawlehnak he aa pehtlaimi thlenremhnak kongah ka thin a phang tuk lo. Zeicatiah, a luancia kum 5 chungah ramdang cozah le companies tampi nih kan ram ah phaisa tampi an phum i chawlehnak hram an bunhmi nih hram a thlakning a t'ha ngaingai cang. Tahchunhnak ah a luancia kum 5 lio ahcun Kawlram mipi ah 7% hmanh nih "Cellphone" kan rak itlaih kho lo nain Norway telephone company Telenor le Qatar company Ooredo0 nih zalong tein rian an t'uan tikah atu ahcun 55% renglo nih phone kan ngeih cang. Ka chim duhmi cu t'hanchonak le chawlehnak kong ahcun ramdang he kan ipehtlaihning a feh ngaingai cang caah awltehlek in hnu lei kan kir kho theng ti lai lo dah ka ti. Kan ram ah nan chawva nan phummi kongah zaan hngilh thi loin um sual lai ucih. Hlawhtlinnak nan hmuh te ko lai, tiah ka bei a sei hringhran.
Nikum chungah kan zuarmi stocks le ka cawktharmi stock cheukhat kongah fianternak ka van tuah cang lai.
Kan account statement ah nan hmuh bantukin kan phaisa tambik ka phumnak stock cu Apple Inc a si. Kan portfolio i 20% renglo bak, Apple company pakhat lawngnih a chilhmi hi nan sia a rem pah men lai lo. Share khat ah $100 renglo deuh in a cawk ka thokka ahcun mah zatzat cawk ding hi ka rak itim ve lo nain ka duhning hoih in thil umtuning aa thlenmi nih caant'ha tuk an kan pek tiah ka ruah caah ka chap lengmang i kan portfolio a chilh ngai nak a si. Caant'ha a um lio ahkhan kan account ah phaisa fang (cash) tam deuh ngei rih usihlaw ka chap deuh ngam rih ko hnga. Zeicatiah, man deng ngaiin company maktaduai stock kan cawk khawhmi a si caah risk a tlawm ngaingai, tiin ka tuak.
Kum 2016, January thla donghlai ah Apple nih a luancia thla thum chung an riant'uannak kong report an pekmi cu phaisa phumnak kong tuaktan thiam (financial analysts) hna nih an rak i ruahning tlukin result a t'ha lo. A bikin China ah Iphone an zuar khawhning a zor ngaingai. A luancia kum, atu cemtuak thla thum chungah an zuarmi nakin 20% renglo in China ah an zuarmi Iphone a tlawm deuh. Cucaah, Apple Stock man cu caan tawite chungah share khat ah $100 renglo in $96 helham ah a tla. Thla hnih hrawng a van liam i Apple caah thawngpang chia a van dai deuh cang van ti lio ah investor minthang Carl Icahn nih "kan company nih 2003 thokin ($56 billion man hrawng) Apple stocks kan ngeihmi cu a luancia caan zeimawzat chungah khan kan zuar dih, CEO Tim Cook nih Apple cu a hruaining a t'ha tuk ko nain an t'hancho khawhnak bik ding hmun ah kan ruahmi China ah an cozah nih an riant'uannak ah hnahnawhnak a pek tuk hna tiah kan ruah i kan sia a rem lo caah kan zuarmi a si," tiah CNBC sin ah a chim. Icahn bia nih Apple hmailei riant'uannak kong he pehtlai in mi tampi thinlung ah lung awt'awmnak a chuahter i an stock man a tla chinchin. June thla chungah Great Britain mipi nih ruahlo piin European Union in chuah dingah vote an tlakmi (Brexit) nih vawleicung stock market a hnihsaih tuk hlei ah September thla ah Apple nih an chuah dingmi Iphone 7 cu tuan deuh model 6S nakin tampi a uak lem lai lo, timi bia chawkvai nih an stock man cu share khat ah $90 helham ah a t'humh.
Share khat ah $100 tangin cawk khawh a si lio caan ah kan account ah phaisa fang (cash) a um poah ahcun ka chap lengmang. Aman a tlak deuh caan ah tam deuh in chap khawh kaa zuam. Zeicatiah, Apple nih China ah an tonmi harnak hi caantawi harnak menmen a si, tiah ka ruah. Tim Cook hi Steve Jobs nakin ka uar deuhnak pakhat cu ram hruaitu pawl kawmh a thiam tuk. Apple caah ambassador t'ha taktak a si. China, India le ram dangdang a tlawn caan ah an hruaitu pawl he hawikawmhnak le hnatlaknak zeimawzat a ser khawh zungzal. Cucaah, China ah Apple nih an tonmi caantawi harsatnak cu Tim Cook nih a siamremh khawh hrimhrim lai, tiah ruahnak ka rak ngei. Iphone 7 cu 6s nakin zei pipa a t'hat deuh lo hmanh ah vawleicung ah Iphone aa tlaih cangmi minung kan tamtuk cang i Iphone model hlun aa tlaihmi zeimawzat nih an cawk tuk t'hiamt'hiam lai i Brexit ruangah aa hninsai tukmi stock market cu a liammi caan sin ah amah sining kel a si t'han zau lai, tiah ka rak tuak.
A hlan ah fiangfai tein ka rak theih bak lomi thil pakhat ka van pemh tiah ka ruahmi nih ralt'ha tukin Apple stock a ka cawkter ngam. Vawleicung technology companies minthang pipi lakah Apple Inc lawngnih a rak ngeihmi pahrang (thazaang), tluangtlam le him (seamlessly) tein hardware le software pehtonh khawhnak a si. Apple cu anmah nih an sermi hardwares (MacBook, Iphone, Watch tbk) nih anmah sermi software/operating system (MacOS, IOS, WatchOS tbt) lila an hman tikah a tlangpi in an thilri sermi hman a nuam i a him fawn. Vawleicung ah Iphone a zuamcawh kho biktu phone cu Korean company Samsung nih a sermi Samsung Galaxy model phunphun an si i annih nih an hmanmi software/operating system khi Google nih an ngeihmi Android OS a si. A sullam cu Samsung nih an phone riant'uannak system pi khi an control khawhmi a si lo i Google zongnih an operating system an bunhnak Samsung phone kuang khi anmah duh salam in an tawlrel kho ve lo. Android OS cu Samsung lawng si loin phone a sertu companies tampi nih an ihrawmmi a si fawn tikah a herh huaha lomi thil le hnawmtaam a zawi duh deuh i technical khokkhaknak le tluantlam lo nak tete a um duh deuh. Microsoft nih Windows phone hmang in software le hardware pehtonh aa zuam ve nain hlawhtlinnak a hmu kho lo. Cucaah, smart phone ahcun Apple hi midang nih an tei khawhnak lam a har ngaingai ding a si caah an stock ka duh khunnak pakhat a si.
Apple nih Iphone hmangin vawleicung cellphone market (share) a chilhmi hi 20% hmanh a tling loin vawlei pumpi ah cellphone in ahlawk hmuh khawhmi (the entire smartphone industry profit of the world) vialte i 90% renglo a hmuh khawh. Apple Brand kha mipi, abikin mino nih an duh tuk caah aman sangpi zongin an cawk duh t'hiamt'hiam caah a si. Mah bantuk dirhmun cu midang nih van phanh awk a har tukmi thil a si fawn.
Share khat ah $90 renglo deuh in kan cawk khawh lio ahcun P/E ratio in tuak tikah alet 11 hrawng lawng a rak si i aman aa deng tuk lawmmam in ka thei i tongta naam in ka rak namnak a si. Chawlehnak vawlei ahcun zeitluk thilt'ha hmanh kha aa thlakmi nakin aman tam deuh kan liam sual ahcun amah hmangin hlawknak kan hmuh t'hannak lam a um theng lo. Cucaah, kan duh tukmi company a si ai pet tiin stock kan cawkpi bal hna lo. Tukum chungah Apple stock zeimawzat kan cawkmi zong hi thil sining cuai ka thlai tikah aman aa deng tiah ka ruah caah ka cawkmi a si.
Apple cu kan portfolio a chilh biktu a si caah nikhat ah Apple he aa pehtlaimi cabia pakhat tel ka rel lo ni a um rih rua lo dah ka ti. Ka chim duhmi cu daithlang loin thil umtuning ka dawi camcin.
Brexit nih caan tawite chung stock market a hnihsaih lio ah a tlangpi in faak bikin aa suukhakmi stocks cu United Kingdom chungah hram a bunhmi Banks pawl an si. London khuapi cu vawleicung phaisa khuapi (financial hub) minthang a si bantukin bank tampi nih hram an bunhnak i European Union ramkawmh huap in riant'uannak hmun ah an hman. Tahchunhnak pakhat in kan chim ahcun Germany ah inn cawk aa timmi German pa kha UK hrambunh Barclays Bank nih (legal) buaibainak pakhat hmanh um loin inn cawknak caah phaisa (mortgage) a hei cawih khawh. A ruang cu UK ram cu EU chungtel ram pakhat a si ve caah a si. Britain mipi nih EU ramkawmh in chuak dingin vote an thlak cang tikah UK hrambunh banks hna cu tuan deuh bantukin EU ramkawmh chungah zalongte in riant'uan khawhnak nawl an ngei men ti lai lo, tiah ruah a si. UK Banks pawl nih a hlan bantukin kau piin rian an t'uan khawh lo ahcun sunghzatlaknak tampi an ton lai, tiah ruah an si caah an stock man an tla thluahmah.
Fak tuk lawmmam in an stock man a tlami UK Bank pawl cu ka si khawh tawkin ka kherhhlai hna i Barclays nih ka mit a ka laak bik caah thazaang kan ngeih tawkin ka cawk. Barclays hi UK hrambunh bank a si nain vawleicung ram kenkip ah rian a t'uanmi bank a si. US zong ah thuk piin rian a t'uan. A phaisa lut (revenue) dihlak i 40% hrawnghrang hi US ram chungah a hmuhmi a si. Cucaah, Brexit nih faak tuk lawmmam in a hnihsaihmi hi a si awk a si lo, tiah ka ruah caah ka duh khunnak a ruang pakhat a si.
Britain mipi nih EU in chuak dingin vote thla cang ko hmanh hna sehlaw a taktak ah an chuahnak ding ahcun caan a rau ngai ding a si. Kum hnih chungah EU in kan chuak ko lai timi caah Article 50 of the Treaty of European Union an tuah/ap a herh. Cu hnu ah UK ram hruaitu le EU hruaitu hna nih "zeitindah hmailei ah kan i pehtlaih lai i chawlehnak kan tuaht'i lai" ti bantuk kongah hnatlaknak an ngeih a herh fawn lai. Acozah hruaitu hna nih a herhning in an buaibai chung ahhin chawleh thiam (businesspersons) pawl nihcun thil sining hoih in an companies caah a t'ha bikmi lam an kawl khawh hrimhrim lai, tiah zumhnak ka ngei fawn. Cucu, UK hrambunh Barclays stock kan cawkpi hna nak a ruang pakhat a si fawn (atutiang ahcun kan portfolio ah a tluang bik lei ah aa tel rih ko khi).
Phaisa phumnak vawlei ah ka uar bikmi cu Warren Buffett le Bill Ackman an si. An cawlcanghning hi ka si khawh tawkin ka dawi pah peng hna. A caancaan ahcun ka duh ciami stock kha anmah nih an cawk ve timi ka theih tikah ka duhnak a zual khun tawn. Valeant Pharmaceutical International Inc hi cu bantuk company cu a si. Bill Ackman nih 2014 lio ah share khat ah $196 hrawng in share tampi a rak cawk i an CEO Mike Pearsons riant'uannak kongah a lungtlin tuknak tampi a rak chim lengmang. Sihmanhsehlaw, kum 2015 dihlai hrawng ahcun Valeant stock cu share khat ah $40 helham ah aa zi. A ruang cu Phillidor Rx timi specialty pharmacy company hmangin ningcang loin sii tampi a rak zuar i health insurance companies sin in phaisa tamtuk a rak lakmi kha a hun laang.
Sii companies fatete kha a rak cawk hna i an sermi sii, caan saupi an rak zuar cangmi pawl kha aman alet tampi in a rak kaiter fawn hna caah US Congress tiang nih an CEO le a hawile pawl cu kherhhlainak le biahalnak an tuah phah hna. Mike Pearsons nih sii company fatete cawknak ah a rak hmanmi phaisa tam-u cu an riant'uannak in an hmuhmi phaisa miak si loin banks sin in cawimi an si tikah Valeant cu leiba nih a nenh tuk chinchap. Phillidor he ningcang loin an rak ipehtlaihnak ruangah a dik lo ning in cazin a rak laangmi pawl kha an van siamremh tikah a phaisa lutmi taktak a van fiang i rak ruahning nakin a tlawm deuh ngaingai. Tikah, an stock man cu a tla chin lengmang hi share khat ah $30 hrawnghrang ah aa zel.
Buaibainak pakhat hnu pakhat nih a chilh chin lengmangmi Valeant cu Bill Ackman nih a chuahtaak lo. A luh tuin a luh hnawh chinchin. A rak ngeih ciami share zat bak kha a cawk chap t'han i Board of Director rian zong aa khinh chih lawlaw. CEO Mike Pearsons cu a rian a dinhter i Joseph Papa nih a chan. Joseph Papa nih CFO a t'uan liomi cu pharmaceutical vawlei ah an upat ngaimi Henderson in a thlen. Aman deng tukin aa zuarmi Valeant stock le Bill Ackman hrihhawhnak le zohfelnak tangah a cangmi thlenremhnak nih ka mit a ka laak tukah Chevron stock kan ngeihmi ka zuar i Valeant cu a buaktlak in share khat ah $26 hrawngin ka cawk.
Kan luhnak man hi a niam ngaingai tiah ka ruah caah ka hna a rak ngam ngai. Thawngpang t'ha a van um caan ah vurvur in aman a kai i 30% tluk kan hlawk caan hna a um t'heo. Sihmanhsehlaw, naihrawng hi a tluang lo ngaingai. Mi kenkip nih taza an cuai lulh i New York le California State Attorneys zongnih hlathlainak an tuah cuahmah. Phillidor CEO le Valeant executive pakhat cu FBI nih ningcang loin rian an rak t'uannak ruangah an tlaih cang hna i Valeant lutlai bik a rak simi, Mike Pearsons tepawl hi cozah nih an hngalh rih lomi sualnak an ngei kho men, tiah lunghrin lo awk an t'ha pah lo. Cucaah, Valeant stock man a thlak chin lengmang nak a si. Sihmanhsehlaw, ka hnabei a sei ngai rih caah atutiang ka zuar rih lo. Management team thar hi a thiangmi an si hlei ah Bill Ackman zohfelnak tangah lamding lei ah Valeant an mer khawh lai, tiah ka zumh. Cun, a biapi lo deuhmi business pawl kha an zuar diahmah hna lai i an leiba an cham ceomao ahcun mipi nih zumhnak an ngei t'han lai i thil sining aa thleng puut te lai, tiah kaa ruahchan. A taktak ahcun caan rau lo ah bankruptcy a file ding bantukin market nih a ruahmi Valeant hi kumkhat ah phaisa lut (revenue) $10 billion dengmang a ngeimi company a si. Ngangngan ngai in mipi nih an hmuhning a muisam aa thlen dingmi caan ka hngak ko rih. A t'ha lei ah aa thlen ahcun tampi hlawknak kan hmuh khawhnak dingmi stock ah ka ruah.
Tukum chungah Chevron le Microsoft stocks kan ngeihmi cu a dihlak in ka zuar dih hna. A ruang cu an pahnih in 30% helham an t'hang nain hmailei caan zeimawzat chung thil sining ka cuanh tikah ka siarem lomi tete an um caah a si. Chevron ka zuarnak bik a ruang cu Nigeria ram ah an ngeihmi meiti chuahnak khur le pipeline cu tapung le ralhrang nih atu leklek in hnahnawhnak an rak pek tikah sunghzatlaknak tamtuk an chuahter sual lai tiin ka thin a phang. Australia ah natural gas an chuahnak project nganbik, Gorgon, cu technical issue ruangah caan zeimawzat an rak khar fawn i management lei daithlan deuh phun in ka ruah caah ka sia a rem lo. CEO Nadella kut tangah Microsoft aa thlenning cu lung a hmui hringhran. Cloud Computing le Office 365 lei ah teimak an chuah tikah hlawhtlinnak tampi an hmu i an stock man zong a kai ngaingai. Sihmanhsehlaw, 26 billion hrawng dihin Linkedin an cawkmi nih ka lung a ka tuai. Aman a fak tuk lawmmam in ka thei i hmailei caantawi chungah Microsoft stockholders caah sunghnak zeimawzat a chuahpi lai, tiah ka ruah caah kan sining a t'hat lio te ah ka zuar.
Exxon le Petrobaras stocks kan ngeihmi cu tlawmpalte ka zuar veve hna nain chim tlak tuk ah ka ruat lo. Chevron he an sining aa khatmi zeimawzat a um pin ah an man a tla sual lai i kan hlawk ciami kan sungh t'hannak ah a cang sual lai, tiah ka tuaktanmi an si.
Bia donghnak:
Tukum hi chawlehnak vawlei ah kum dang he aa lawh bak lo kum a si. A bikin stock market vawlei ah a zual. Zeicatiah, ruah pak lo piin Britain mipi nih Europe in chuah an duhmi (Brexit) le Donald Trump nih US President a tlinmi nih thil umtuning a hnihsaih tuk hringhran. Caan tawite chung cu kan account nih minus a piah caan hna a um. Mirang holh van i hlan ahcun "one of the most volatile years in history" a si. Sihmanhsehlaw, Pathian lamhruainak le nanmah dirkamhnak thawngin result t'ha ngai kan hmuh caah lunglawmhnak tampi ka ngei.
A luancia kum hnih chungah kan riant'uannak a tluan bantukin hmaikum zongah hlawhtlinnak kan hmuh t'han te ko lai, tiah ruahchannak ka ngei. Minung nih a hlanken in kan theih khawh lomi thil a tampi nain aa thlengmi thil sining chungah a t'ha bikin riant'uan khawh kaa zuam ko lai, tiah bia kan kamh hna. Pathian tu nih lam kan hruai cio ko seh.
Note: Kan partnership website a ciankuan lo caah mahka hin ka tarnak a si. Fawizaang deuh in tutan ka cakuat mi nan lungfian khawhnak ding caah tiin nikum cakuat zong kha mahka hin ka thil chih.
No comments:
Post a Comment