Ka Kumthar Biathiam (2017)

Atu ahcun nikum ti a si cangmi, kum 2016 thokka te ahkhan "Kumthar biatiam" tiin cabia pakhat ka rak t'ial. Kum khat chungah kaa hmaithlak bik dingmi thil kongah pumpak in biakamnak ka rak ngeihmi fehternak ding caah ka t'ialmi a si. Ka biatiam cu "Kan nu caah a lamkip in a t'ha deuhmi pasal si kaa zuam lai" ti a rak si.

Christmas thaizing, December 26, 2016 ahkhan zaanriah kan ei t'i lio ah kan nu cu bia pakhat ka hal. Tukum a donghnak dingah ni 5 telawng aa duh cang va sikaw tukum chungah "I love You (Kan Dawt Tuk)" kan ti lo ni a um el maw, tiah. "Eee, na ka ti peng tak ko, ziah cucu__" tiah a ka leh. "Kan lung kan ihmuh thiam lo ni zongah kan ti peng ko kha mu" tiah ka van betchap i "hmai kum cun kan ti ti lai lo na ti duhnak maw" tiah a ka leh. "Na caah pasal (va) t'ha deuh si dingin a lamkip in kaa zuam lai tiah kum thonghka ah pumpak biakamnak ka rak sermi thlinternak ding caah ka tuahmi thil pakhat a si, hmailei zongah kan ti ko lai ee" ka ti i aa lawmhnak mithmai nih lawmhnak a ka pek ve.

Kan nu caah nifatin in pasalt'ha deuh si kaa zuamnak ruangah hlawknak ka hmuhmi thil a tamtuk i chim cawk ding phun a si lo. Ka caah nupi t'ha deuh si aa zuam ve tikah kan innchungkhar ah dawtnak a leng. Dawtnak nih kan chumtual a tuam tikah riant'uan retheihnak nih a chuahpimi t'habatnak le lungretheihnak zongnih fak piin hnahnawhnak an kan pe kho lo. Kumpi kumkhat chungah voihnih bak lawng bia kan i al. Cu zong cu chun ni an tla kho lo. 

Zawtfah ruangah voikhat hmanh sii-inn kan phan lo i chawva kan kawlnak zongah hlawhtlinnak kan co. Kan innchungkhar caah Pathian a t'ha hringhran!

November 28, 2016, zinglei suimilaam 5:58 ah Pathian nih thluachuah vialte lakah a sunglawi bikmi fanu rosung, Abigail Sang, an kan pek fawn. What a great year!

Kum 2017 caah biakamnak ser kaa fawih tuk cang. Kan nu le ka fanu caah a lamkip in Pa-t'ha le Va-t'ha (good father and husband) si kaa zuam lai. An duhmi le an herhmi thil a tlamtlinnak ding caah teirial in cawlcangh kaa zuam lai. 

Ka fanu caah father t'ha ka si khawh i ka nupi caah pasal t'ha ka si khawh ahcun ka pawngkam le vawlei ca zongah mi-t'ha ka si ko lai dah ka ti. Lutaw hngal loin kan chungkhar caah rian ka t'uannak kip ah nunnem le tangdor tein khua a sa khomi ka si nak hnga, ka thilmi hla hi ngaih khawh lengmang kaa zuam fawn lai.

Pathian tu nih lam kan hruai cio ko seh! Happy New Year!!