Lay Phyu, Chan Chan, Phyu Phyu Kyaw Thein le Ka Nihin Zingka

Voidang tawn bang, zahan ka ih a tuan lo ngai___2:00am lawng ah ka ihkhun cung ah ka kai. Ka palh sual, 2:00am cu tuzingka hme si leh lai cu. Ka lu le chantling ai tongh bak khan kai hngilh colh naisai fawn loh le tuzingka a si chinchin lehlam hme teh! Aw..a si poah si ko seh, suimillam zeizah a va si hmanh ah nizan zaanlei a van zultu zaan poah cu zahan zaan kan ti ko le. 

Tuzingka 7:00 hlan deuh ah kai thang (keimah thangh in ithanghmi cu si ruam loh fawh). Malaysia lei phone nih a van ka thangh biatu a si. Chungkhar kong he pehtlaiin ka cousin nih "na tho rih men lai lo nain..." tiin a bia a van awt caah thawngtha tuk cu a si lai lo tu cu ka hmawhmang zong in ka fiang pah ko. A bia a van peh taktak le thawngtha cu a si tak lo. Chungkhar kong si caah van tial awk a thami a si  lo.

Phone cu kan i chawn dih zau nain ihthan ding ah kai laklawh cang. 8:00am hrawng ah a tho ding ka si ko caah ihcaan suimilam pakhat hrawng van hlawnh ko cu a paam ka ti ngai. Nain, kan ichawnhmi kong zong cu ka ruat, thoh colh ka hauh thiamthiam cangmi kong zong ka ruat pah. Sivangh ah ka chantling tang ah ka chiah than cangmi ka "phone" ka lak than. Ka e-mail le ka Facebook notifications ka check. Zeipi a um lo. Cun, Youtube App te ka hmeh. Lay Phyu hla a ngai tawnmi ka si lengmang caah si lai, mah hi hla te hi ka hmuh colh i ka "Play" hgnap. Ka lung a ka ton tuk caah voihnih ka nolh. Ka ngaih bal lomi hla zong a si lo i atulio ka dirhmun le a hla sullam zong aa pehtlaimi a si fawn lo. Nain, a thiam ve rengreng le ka nolh ko. A hlabia sullam zong tha tein ka tuak pah le ruah lo piin ka ngeih hna a chia bantuk khin ka um..Hla nih fak piin minung lungthin hmehkhawhnak a ngei ti cu al awk a um lo cumu...

Voithum hmanh nolh ka timh nain ka kut nih hla dang a hmeh manh sual....A awro a tha ngaimi Chan Chan hla a si. "Voikhat te in dawt kan dawh caah a si ko" timi hla te. Caangkhat le a chorus a van phanh ah khin ka phone cu ka van lak than. Hla dang in van thlen ka timh. Nain, ka hmeh hlan deuh ah kai let than. Ka ngaih dih le a tha ngai ve.

Chan Chan hi a rak laar ngai nain a hla ka ngai bal tuk theng lo. Tuzingka ka ngeih in a rak laar ve hrimhrim awk a si ko ka ti____model muidawh huaha lo, aw-lai tete hmanh dawh Kawlram ah cun an laar len ko cu awh. Ka lungtling ngai nain Lay Phyu hla bantuk cun ka nolh lo. Ka kut nih a dang a hmeh colh ko.

A aw-ro a tha bak i a hla sakmi hawih in cawlcangh zong a thiam bakmi Ms Phyu Phyu Kyawn Thein hmanthlak khi ka hmeh. "Hihi maw duhdawtnak?" timi si ko. A music a turcawl tuk caah si men lai, kai hliphlau bak. Ka phone suimilam ka van zoh le 8:00 a rak si dengmang cang. Ka thawhpah in a hla ka zulh thluahmah. Kai hliphlau i si rua, ka mitkuh cimlo ka thei rih lo.

Eeee,lohtlau!!!Thawhka thlacam ka philh sual rua. Ka van cam ta than lai.