Manlo a si i Manlo a si Zungzal lai (It's Free and Always will be)

“Manlo a si i manlo a si zungzal lai(It’s free and always will be)” timi cu Facebook ahmangmi vialte nih kan account kan “log in” lai ah siseh, kan “log out” dih ah siseh, kan hmuh zungzalmi catar a si. “Sign Up” tuahnak hmun lebang ah cun hmuh lo awk tha loin a lang.

Facebook hi man loin hmanmi a si taktak maw? A si! Phaisa fang in pia khat hmanh liam loin kan hmanmi a si caah man lak lomi a si taktak ko kan ti khawh. Asinain, mifim tampi nih vawleicung social network nganbik cu manlo(alak-ka) in hmanmi a si lo an ti. “Information Age” ah kan um caah minung pakhat cio nih kan ngeihmi sining(information)__ kan chuah nithla, kan tuah huam phun, kan fimcawnnak sining le kan hawikom pehtleihnak tibantuk__ vialte hi man ngeimi an si dih. One billion renglo minung nih lungtling tein kan pumpak cio sining kan chimhmi hna a van ifonhmi data khi Facebook caah man tamtuk a ngeimi thil sunglawi cu a si ve hrimhrim ko. Vawleicung minung dihlak i cheu-sarih ah cheu-khat nak tam deuh nih kan itonnak hmun cu companies tampi  caah an thilchuahmi le an services langhternak (advertisements) caah hmun tha tuk a si. Facebook nih kumkhat chung ah advertisement in an hmuhmi phaisa hi 4 billion renglo a si i an phaisa lut dihlak i 80% renglo a si. Zeisihmanh ah Laimi nih cun pumpak cio nih kan ngeihmi kan sining(information) cu phaisa in man a ngei lomi ah kan ruah ko caah Laimi nih manlo in kan hmuhmi thil cung ah kan ngeihmi lungput van langhter ka duh.

Kawl nih “chimmi poah va zum hlah, danghmi poah va ei hlah, pekmi poah vaa lak hlah” tiah phunthluk an ngei. Laimi tu nih cun man pek hau loin kan hmuhmi poah cu kan hrialmi a um lo. Ramthumnak phanmi Laimi kan lungput zoh ko ah hin ngeichia bik kan si. Alak in hmuhmi poah cu a pelte hmanh tanhta  kan tim lo! Kan hmuhmi poah lak dih kan duh i ane tiang in kan khawih dih! Cozah thami ram ah kan um cang caah kan ihlawh lo buin sifak santlailo bawmhnak phunkip kan tingco. Bawmhnak sungh lai phan ah riantuan duh huaha loin khuasa mi zong kan tampi cang! Ram thawngtha an si bantukin ziknawh le duhdenh ngei loin phungphai le ningcang zulh in phawtzamh a si caah bawmhnak kan hmuhning le kan hmuhzat an ikhat cio lo. Cu tik ah “annih chung vial cuzat an bawmh hna le kannih chung vial cuzat lawng an kan bawmh” tiah kanmah ta a simi bang, bawmhnak cung ah ninghngal ngain in kan zai ngam rih. Kanmah tein holh kan ithiam lo tik ah tawlrel piaktu cung ah kan thin a hung i “mithleidan ahmang” tiin kan thangchiat hna. Zai cu kan cak chiahru nain tuahsernak in lunglawmhnak langhter cu kan daithlang hringhran. Hi kan zia hi mi tenau le miphun te kan sinak a langhtertu a si caah thancho kan duh taktak ah cun kan hlawt hrimhrim a herh.

Facebook nih hawikom le chungkhatsahlawh he taksa in aa tong kho ti lomi minung tampi lungduh biaruahnak le ipehtleih khawhnak hmunhma a kan pek. “Ca” lawng si loin “hmantlak le video” tiang in icheuhbeuh khawhnak innka a kan on piak. Non-profit organization a si lo i public listed company pakhat asi ve bantukin  angeitu(shareholders) caah amiak chuahpi ding rian a ngei ve. Cu tik ah thil-langhternak (advertisements) tampi kan cahmai ah a rak tar lengmang. A hmangtu hnahnawh lo deuh ding in tar khawhnak ding caah tiin an tuah ningcang zong an tlen leklek. Atulio an tuahto ning cu aluancia kum tlawmpal a rak sining he cun aa dang hringhren i athat deuhnak a tampi bantukin advertisements nih hna akan hnawh deuh caan zong a um. Cu tik ah mi tampi nih “Timeline ka rem lo, Graph Search a ka neng, Myspace hna alo cang” ti bantukin kan zai ngai hna. Zeisihmanh ah manlo in an kan hmanter caah azai ngam tukding cu kan si lo. Cu lawng hlah, manlo in kan hman caah kan ilawmhnak langhter ve dingmi rian kan ngei. Kan cahmai cung atlami advertisements poah ah 2009 February thla ah an sermi “like” button te hmeh lengmang nak in ka lim khawhmi rian a si. Advertisements cung ah “like” kan hmehmi a tam deuhdeuh le Facebook  nih phaisa an hmuh deuhdeuh ve. “Like” tam deuh hmehnak in lunglawmhnak bia chim cio hna usih. Man pek loin ni fatin kan hmanmi "Facebook" sin ah lawmhnak bia chimnak in miphun tenau nih fawizang in hmuhmi thil cung ah kan ngeihmi ruahnak hme hi thlen hram thok hna usih.