Zeiruang ah Microsoft nih Nadella an thim?

Microsoft Corp nih nizan tihni ah an hruaitu thlennak kong he pehtlai in thawng nganpi an thanh. India ram Hyderabad chuak, Setya Nadella cu Chief Executive Officer (CEO) in aa dinmi Steve A. Ballmer chaangtu ah an thim. Microsoft Corp Founder, Bill Gates cu Chairman in CEO Technology Advisor ah a rian aa thial. Ballmer nih August 2013 ah "kaa din zau lai" tiah thawng a rak thanh ni thok in Microsoft Board Of Directors nih CEO kawltu committee ah hruaitu rian an khinhmi John W. Thompson cu Chairman rian an pek.

Bill Gates, Nadella & Ballmer

Technology companies tam-u hi Founders nih rian an tuan khawh chung poah cu a lubik an tleih deuh zungzal. Midang kut cung ah fawi tein an up bal lo. Nain, Bill Gates cu a si lo___kum 54 lawng a si rih lio, January,2000 kum ah Steven Baller sin ah CEO si nak a rak pek. 2008 tiang cu Microsoft Corp cawlcanghnak ah a chung in aa tel ngaingai rih nain Baller nih zalong deuh in riantuan kho seh tiah executive power vialte a pek dih i Jan, 2014 dih tiang, a caan vialte i cheunga cheukhat tlinglo deuh lawng, Chairman dirhmun in Microsoft caah a hman____vawleicung mi harsa le zawtnak dohnak ah full-time in aa phum. Sihmanhsehlaw, atu thokin a caan cheuthum cheukhat cu Microsoft ah a hman than cang lai. Amah nih keimah lo cun a si kho lo tiah aa paih bia a si lo, Microsoft nih CEO ah an thim tharmi Setya Nadella nih "Production and Technology" ah ruahnak petu ding ah a fial caah a si.

Zeiruang ah dah Microsoft nih min ngei ciami CEO tampi aa laak kho dirhmun ah an dir ko nain Nadella hi an thim hnga?  Microsoft Corp cu Technology company a si caah Technology lei in thiamnak a ngeimi engineer nih a hruai ah a tha bik ko tiah an ruah. Sale le Marketing lei ah thiamnak a ngeimi Ballmer nih kum 13 a hruai hnu ah a fiang bakmi cu Technology ah thiamnak a ngeimi Bill Gates nih a rak hruai lio tlukin a thangcho lo timi cu al awk a tha lo. Ballmer kut dang ah kum fatin phaisa lut le amiak cu a karh nain Google, Apple le Samsung ti bantuk nih Mobile Phone ah hmanmi software ah tam tuk in an lawnh. Windows 8 zong, rak iruahchanning bantukin mipi sin ah a laar lo hlei ah "Google Search" he zuamcawhnak ah an sermi "Bing" zong nih Microsoft caah tampi sunghnak a chuahpi. Cucaah, Ballmer a chawngtu ding caah cun Computer Engineer a si i Microsoft chunglei sining tha tein a theimi hruaitu an duh bik. Cucu, India ram, Hyderabad pa, Setya Nadella ah an hmuh.

Setya Nadella cu mizei dah a si? Theihawk ah aa tlak bikmi a sining pasarih in ka langhter tuah lai.

1. 1967 ah Hyderabad, India ah a chuakmi a si i fa pathum a ngei. India ram, Manipal University ah Bachelor of Engineering in Electronics & Communications a laak hnu ah USA ah a pemmi a si. Indian bak nih US company nganbik pakhat van hruai dingmi lawng bak hmanh hi thil ropui taktak pakhat cu a si. BE a rak hmuhnak sianginn, Manipal University zong nih an ilunghmuih taktak!
2. Microsoft sining le dirhmun fiang tein a theitu a si. Microsoft ah kum 22 chung, hmunhma tampi in rian a tuan cangmi a si. Microsoft cu 1975 hrawng ah rak dirhmi company a si caah a chancheu renglo chung a cawlcanghning a theitu a si.
3. Computer Engineer a si. Hika zawn hi CEO in aa dinmi Ballmer he an dannak bik hmun a si. Manipal University in Bachelor of Engineering a laak hlei ah University Of Wisconsin in Master's in Computer Science a hmuh fawn.
4. Business zong a cawngmi a si thiamthiam. Steve Ballmer he an van ilawhnak zawnte a si kan ti lai cu. Technology le Computer Science in degree a hmuh hlei ah, University Of Chicago in Master's in Business Administration (MBA) a hmuh fawn. Weekend caan tete ah khua a saknak Buellevue, Washington in Chicago ah vanlawng in sianginn a rak kai tawn.
5. A rian kai ter lengmangmi minung a rak si. CEO ah an thim hlan ah Microsoft i department pariat ah Vice President asiloah President a rak tuan cangmi a si. Kum 22 chung ah department pakua ah hotu asiloah hotu chang a si khawhmi cu a rak men lo hrim ko. Riankainak cu riantuan khawhnak ruang ah tincomi a si caah a riantuanmi ah teinak a rak hmu ngai timi cu a fiang ngai ko. Zapi nih kan theih tuk lo nain Microsoft nih phaisa tampi an rak hmuhnak a simi,Windows Azure, Windows Server, SQL Server, System Center and the software-development tools ti bantuk chuahnak zong ah bochanmi riantuantu a rak si.
   
6. Microsoft nih computer software based in cloud based ah aa thlennak ah a biapi tukmi minung a si___Office 2013 hna cu computer ah a hrambunhmi si loin khuadawm(cloud) ah hrambunhmi a si cang. A luancia kum hra lio ah Technology company pakhat caah Mobile le computer market ah teitu si a rak biapit tluk tein atu ah cun "Cloud" ah teitu si hi a biapi ve tiah ruahmi a si. Atu CEO an thim hlan ah VP dirhmun in Nadella nih a hruaimi department cu "Cloud and Enterprise Products" a si. 
7. A min a rak lang tuk bal lomi a si. Microsoft Corp ah thutdan sangsang ah a rak thut ko buah zapi sin ah voi tampi langhnak a rak tuah bal lo. Interview zong tampi a rak tuah lo caah zapi nih rak theih lo ngaingaimi a rak si. Atu hnu tu cun aa thleng ve cang lai. A duh zong, duhlo zong ah a rian nih mipi sin chuahlangh hau in a chiah cang fom lai cu teh.

CEO dirhmun in a voikhatnak Microsoft riantuantu sin ah biachimnak a ngeihmi ah hiti hin a chim: Kan rian(business) hi a cawlcang taktakmi (aa thleng pengmi) rian a si. Ning le cang a upat i tuanbia a sunhlawih tukmi a si lo. Hmailei ah rang pi in a fong i sertharnak a cawnglawmhtu a si. Cucaah, Mobile le Cloud nih hruaimi technology chan ah zeitindah lungrual in hmunkhat te ah teinak hmu kho ding in kan cawlcangh lai timi hi a biapi bikmi a si. Mah cu cawlcanghnak ding lamthluan ah Microsoft nih hruaitu ah nan ka thimmi cung ah kai lawm tuk!

Eelaw! Ka bia fun ka philh. Nanmah cio in rak i fun uh.