Ukraine Buainak Puanzar Phen Ah A Rak Ithupmi Cold War A Lang Thluahmah Cang

Ukraine cozahpi tang ah amah tein aa ukmi Crimea tikulh ah Russia ralkap 15000 an um cang i vanlawng bual le cozah zung ngan deuhdeuh cu anmah nawlngeihnak tang ah an um cang tiah CNN nih thawng an thanh cuahmah lio a si. Russia President Putin nih Ukraine buainak ah a herh ahcun ralkap thazang hmang in ithlaknak nawl pek ding in Russia paliament ah a halmi cu "Amen" a hmuh caah fiang puut in a cawlcanghnak a van langhmi khi a si ko. A ngaingai tiah cun Paliament ah nawl a hal hlan in an hmai aa hupmi Russia ralkap nih Crimea ramthen cozah cu an lak diam cang tiah an ruah. Feb 27,2014 zaan ah a mui aa langhter lomi ralkap nih Crimea ramthen paliament innpi cu an luhhnawh diam cang timi cu Reuters nih an tarmi mahhi CCTV Video nih fiang tein a langhter. Meithal aa kenmi pawl nih an hmanmi motors i license plates khi Ukraine cozah nih an chuahmi araangmi si loin anakmi a si hlei ah Russia holh in an holh caah Russia ralkap an si ko tiah an ruah.

Tuchun ah US President Obama le Russia President Putin cu minutes 90 chung hrawng phone an ichawn. Fak piin bia an i-al caah an awro a chuak caan zong a um tiah min langhter a duh lomi mithmutu nih an chim. Obama nih "amah tein uknak tling a ngeimi ram pakhat a simi, Ukraine ramchung buainak ah nangmah nawl in na ralkap na luhtermi hi vawleicung pumpi nih kan ihrawmmi phunghram na buar a si, zokzok in kirter than hrimhrim hna, na duhlo ahcun Ukraine buainak a karh chinchin hlei ah vawleicung hmai ah Russia muihmai chiattertu a si lai" tiah Putin cu a nawl pah, a cerhro pah. "Russia nih a ralkap a auh than hna lo ahcun June thla ah Sochi ah tuah dingmi G8 meeting kan kai lai lo" tiah innrangpi nih Obama nih Putin phone a chawnh hnu ah thawng an thanh. Vawleicung ram dangdang hruaitu zong nih Russia ralkap nih Ukraine an luh hnawhmi cu an mawhchiat cio i kirter than ding in nawlnak bia an chim cio. Asinain, keimah aa ti ve mi Putin nih Obama le ramdang hruatu bia cu a ngai duh naisai lo___US nih Feb 28 zong ah ralkap hmanglo ding in ralrinnak a rak pek cang buah a tuah chih hramhrammi a si cumu. Hiti hin a al ve: Ukraine ram buainak ruang ah a hrawk dingmi Russia's interests le Ukraine ram chung ah a ummi Russian ciruang pawl humhimnak caah Russia cozah nih rian kan ngei, kan ralkap zong Black Sea hnatlaknak bantukin an umnak ding hmun a simi Sevastopol base leng ah an chuak rih leh lo teh! (Mah hi Putin bia nih Simferopol ah meithal he a ummi ralkap pawl hi zeibantuk ralkap dah an si hnga timi biahalnak a chuahter ngai).

Putin & Obama

United Nations Security Council(UNSC) zong nih Ukraine kong ah nihnih chung ah voihnih emergency meeting an auh ve. Ukraine mipi nih an nuhrin covo a simi anmah uknak kong tawlrelnak nawl cu upat piak i ahohmanh nih ralkap thazang hmang in an buainak ah ithlak lo ding in meeting kaimi nih bia an chim cio i Russia tuahsernak cu an mawhchiat cio. Tahchunhnak ah Canada zong nih Russia nih a ralkap a lakthan colh hna lo ahcun aralaimi June thla ah Sochi,Russia ah tuah dingmi G8 meeting kan kai lai lo tiah thawng an thanh.Sihmanhsehlaw, "Russia nih a cawlcanghning ngol hrimhrim seh, a ngol lo ahcun...." timi bantuk biakhiahnak vote tu cu an tuah lo. A ruang cu tuah ding in an izuam zong ah Russia nih veto power a ngeih caah a thah thiamthiam ding a fian caah a si. Voidang tawn bang, hriamnam hmang loin remnak ser ding a biapitnak kong theotheo an chim ko. UN Secretary General Baan Ki Moon nih "Putin he kan ichawn leklek ko i Ukraine ram buainak a zual chinchin nak hnga lo, ralkap luhterlo ding in ka nawl cuahmah peng ko, atu bantuk caan ah hin kan zapi in hriamnam hmang loin bia kan iruah hna i a phi kan kawl ding a biapit bik" tiah a chim.

Putin & Ban Ki Moon

Ukraine Prime minister, Arsiney Yatsenyut nih "Russia nih ralkap hmang in kan ram pennak nawl chuh an kan timh poah ahcun hriamnam hmang in doh ding ah timhcia kan si ko, kan ralkap zong timhcia tein kan umter ko cang hna" tiah thawng a thanh ve. Ukraine ralkap nihcun zeitluk hmanh in itimtuah hna sehlaw Russia kut cu an ikham khawhnak ding a um lo. Crimea ramthen khuapi, Simferopol lebang cu meithal aa ken i Russia holh in a holhmi uniform hring aa hrukmi pawl kuttang ahcun teh a phanh cang ko leh cu. "Russia ralkap nih an in kah hna poahpoah ahcun rak kap ve hna u tiah Kiev cozahpi sin cun nawlpeknak cu kan hmuh ko, asinain an thazang le kan thazang aa thluklo tuk lawmmam timi cu chim hau lo khi a si ko" tiah a min langhter a duh lomi, Sevastopol ah a ummi Ukraine ralbawi pakhat nih AFP sin ah a chim. Thil pakhat cu a fiang. Russia nih a kah poah ahcun Ukraine cu a lak colh ko lai!

Zeiruang ah hme Ukraine ramchung buainak ahcun Russia nih rianrang tukin ralkap hmang in aa thlak duh hnga? Atulio thil umtuning kan fiannak ding ah Ukraine buainak aa thokning zeimawzat tein zoh ta hmanh usih.

Aluancia November, 2013 lio ah khan President Viktor Yanukovych hruaimi Ukraine cozah nih Russia he pehtleihnak tha deuh ser an duh caah European Union (EU) nih chawlehthalnak le riantuantinak he ai pehtleimi hnatlaknak minthut ding in ceihhmainak a tuahdingmi cu tuah duh loin an um caah EU he pehtleih ding a duhtu minung 10000 hrawng nih an khuapi Kiev ah duhlonak an langhternak in buainak aa thok. Duhlonak langhtertu mipi cu an karh duahmah tik ah acozah nih an halmi tuah piak duh loin palik hmang in hramhram in daihter an timh hna. An cozah nih duhlonak langhtertu hna cung ah a tuahto ning cu a lungtling lomi mipi an tam tuk caah an karh chin lengmang. Daihnak tein duhlonak rak aupi mi kha hriam le naam he thahnawnnak tampi aa telmi buainak ah aa cang. Aralaimi caan tlawmpal ah thimnak tuah ding in duhlonak langhtertu cu acozah nih biakamnak a tuah hna nain buainak cu a dai kho hlei thai lo. Minung 25 nunnak a liam i minung 100 renglo nih hliamnak an tuar hnu ah an President Viktor Yanukovych nih a umnak inn cu a zaam tak i paliament nih ramhruainak nawl an chuh i caantawi cozah an ser.

Ousted Ukraine President Viktor Yanukovych

Atu bantukin European Union lei ah ibek ding in a duhtu mipi nih Russia he pehtleih a duhtu President Yanukvych hruaimi acozah le mipi cheukhat kha an tei tik ah Russia nih a cohlang kho lo. Zeiruang ah dah a cohlan khawh lo? Ukraine nih EU he chawlehthalnak hnatlaknak an ngeih ahcun a innchar bak ah zalong taktakin US le EU aa cir ding an si. Atu hmanh ah Ukraine nih ramleng ah an chuahmi thilri vialte i cheuk thum cheukhat cu EU market ah a kal. A kiangkam ram fa tete kha hiphip (influence) hnu ah Cold War hlan Soviet Union bantuk ser a duhtu Putin caah cohlan awk a tha lomi thil a rak si. Cucaah, a herh ahcun ralkap zong in luhhnawh in laak lawlaw ding zong a ngamh phahnak hi a si.

Putin nih vawlei pumpi au-aw ngai duh loin aa channak caah a tha tukmi ichim ding a ngei ve. Cucu, an duhnak aa thencheo tukmi Ukraine mipi an si. Ukraine ramthen a tlanglei deuh ah khua a sami, 46% mipi nih EU he ipehtleih an duh lio ah chaklei ramthem, Russia he ramri lei ah khua a sami, Russia thisa aa cawh i Russia holh in a holhmi 36% hrawng nih Russia he ipehtleih an duh deuh ve. Atulio ah Russia ralkap an lut an tinak, Crimea ramthen hi Russia he pehtleih a duhtu mipi an tamnak hmun a si. Putin nih a chimning ahcun "Crimea ramthen uktu bawmhhalnak ruang ah atu bantukin khua kan khannak a si" ti a si ve. Russia nih ralkap hmang in an ram buainak ah a van ithlak tik ah Russia he pehtleih a duhtu mipi kha an tha a por i khuakhat hnu khuakhat in US le EU an duhlonak langhter in an ila than ve. Cuti cun, Ukraine cu daih deuh itim loin a buai chin lengmang ko.

Ukraine cu tuai-bur in buai-ur ko hmanh sehlaw thil pakhat cu a fiang. Europe le Russia nih an karcehmi, minung 45 million hrawng nih kan ram tiah an auhmi, Ukraine buainak cu anmah buainak sawhsawh a si lo. Putin nih communist uknak in a hruaimi Russia( ahlan Soviet Union) le Democracy phung in aa hruaimi EU+US(Cold War's Alliances) hna zuamcawhnak a si____an kaphnih in biapi tuk ah an chiah caah eidin awk le umnak inn ngei loin vansang a au-mi Syria nu le hngakchia pawl cu philh bak an si ko hi.

United Nations nih ralkap hmang lo ding in nawlnak a tuahmi cu Russia nih a ngai duh men lai lo. US le EU nih an chimmi chinchin cu zeihmanh ah a rel lehloh cu teh! Cu ti si ah, zeitin dah mah hi buainak hi an daihter khawh lai? "Raltuk kan duh lo" an ti dih nain biaruahnak in an daihter khawhlo ah teh lamdang hlei a um maw? Russia le US+EU cu hriamnaam hmang in iceih ciammam hna sehlaw vawlei hi zeidah a lawh hnga? Ruah ngam ding a si lo.