Ka nu, na cungah kai lawm tuk! Kai lawm tuk hringhran. Harsa in thlakua na ka pawi. Keimah nih vawlei ka hmuhnak dingah thi dengmangin fahnak na tuar. Na hnuktlum in na ka cawm rih. Vawlei ah nungdam tein ka chuah khawhnak ding caah na intuarmi le na tuahsermi vialte cungah lawmhnak bia ka chim.
Ka nu, ka rak hngakchiat lio kong ka ruah ko ah hin na cungah kaa lawmhnak a sang khun. Zeicatiah, nu dang he naa lawhlonak tamtuk ka hmuhnak caan a si. Thangt'hat upattlak nusalt'ha na sinak taktak cu na ka hrinnak ah si loin na ka cawmkennak le zohkhenhnak ah hin a lang khun. Na hawile dang vialte nih fanu fapa cu an ngeih cio hna i an hnukthlum zong an dinh cio ko hna. Sihmanhsehlaw, na hnukthlum din ka ngolin keimah tein aa cawm kho ka si tiang, caan karlak chungah ka hmuhmi na tuahsernak tampi ruangah nu dang he tahchunhawk na t'ha hrimhrim lo. Uanthlarpi awk tlakmi nusalt'ha na si.Cucu, ral t'ha tein tehte ka khan ngam.
Ka nu, ka rak hngakchiat lio i kan sifah tuk kha ka philh lo. Inn chia tete inn 120 in sermi Vanzang khuate ah a ummi pherhinn chia bik pakhat chung ah kan unau pa nga ning tein khua na rak kan sak pi lio kha ka mitthlam ah a cuang lengmang. Facang ei khim kan rak ngeih lo caah zanriah poah ah ti-ka-luk na rak kan ei pi zong kha kaa cinken rih ko. Ti-ka-luk nih ka fale a simh tuk hna lai tiah a caan ah kawmcheu(fangvui) na kan kalhpi zong kha philh kaa tim lo. Zanlei sianginn lawi(t'in) in paiper he kawm hmun ah ka u he kan rak in don tawn zong kha ka lungthin ah a caam tuk rih. Kan innpa chakthlang he thilsuknak satpia kan rak ihlan tawn zong kha.......
Ka nu, kan rak harsatning a fah tukzia kha atu hnu ah hin ka ruat t'han tawn. Fak deuhin ka ruah caan poah ah kan upatnak a sang chinchin. Fale cungah a ngan tukmi na dawtnak zong fiang chinchin in ka hmuh t'han peng. Hmurka in chim awk a t'ha lomi, a thuk tukmi sifah tuknak hawrkuang chungin ka pa he nan ibawmh i nan kan chuahpi ning kha ka ruaht'han ah hin ka lung nih a phan lo. Pathian nih na t'uankawlnak ah thluachuahnak an pek hna caah a si, timi cu al awk t'halo a si ko. Sihmanhsehlaw, nifa na riant'uan ning cu ka rak hmuh peng caah Pathian thluachuah kan tincomi hi a si awk te a si ko, ka ti phah tawn. Zeicatiah, kan Pathian cu amah a zum i fak piin rian a t'uanmi hna cu thluachuahnak a pe zungzaltu hna a si, tiah teh na rak kan cawnpiak peng kha.
Ka nu, tang hnih ka kai lio ah ka pa ka rak ngaih tuk caah fak tukin ka rak zawt kha na thei ti maw? Ka rak mawh lo ti? Sifah tuknak hawrthukpi chungin chuahpi nan rak kan zuamnak ah nu le va hmanh hmun khat ah nan rak umt'i thiam bal lo kha! Nan dirhmun ka ruaht'han caan ah hin ka ngaih a chia tuk tawn. Chungkhar sinah um thiam loin khual a tlawng pengmi ka pa zong kha harsatnak phunkip a rak tuar ve ko lai. Sihmanhsehlaw, ka mit nih tampi a rak hmuh lo caah tamtuk chim ding ka thei lo. Innchungkhar pumhnak ah a rak chim tawnmi tlawmpal tete tu kha cu kaa cinken ve thiamthiam. Nang tu kha cu fiang tukin na harsatnak kha ka mit nih a hmuh i ka hna nih a theih. Nichiarte, arkhuan hlan in na tho i rawl na chuan. Khim tein rawl na kan pekta hnu ah lo kal nai thawh. Lolam kal caan cu sianginn kai caan nakin a tuanh deuh tuk caah kan unau rualin sianginn phan hmasa bik kan rak si tawn kha mu. Zaanlei inn na phanh in kan nu farual in vok rawl ka rak pek tawn kha ngaih a um tuk. Ka pa nih lai a kan hlumhpi lo buah vok pahra renglo na rak kan zuat pi peng khawhmi kha cu na rak menlo hrimhrim. Ka nu, kan fak bia a si lo. Nangmah bantuk nu t'hawng ka hmu rih hna lo.
Ka nu, ka hngakchiat lio ah ka mitthlam in ka rak suai khawhmi Vancungkhua nakin a ropui deuhmi New York City zong innsang piin ka cuanh cang. A thawngpi lawng kan rak theih tawnmi vanlawng pi khan vawlei ki khat lei in khatlei ki tiang, chunzan hlan in ka zuang bal cang. Video le hmanthlak chungah khuaruahhar in na zok tawnmi.thlalaang innsang nuva cung zong ah khan ka kai bal cang. TV in anmah zoh ka rak duh ruangah zinglei suimillam pa 4 tiang it thiam loin hna ka rak in cheh hnawh tawnmi hna bawlung chuihthiam club, Chelsea zong kha a taktakin voi hnih ka hmuh bal cang hna. Vawleicung ah a um lai tiah a ruah awk hmanh na theih lo dingmi khuaruahhar thil dang tampi zong ka hmuhmi an um len rih ka zumh. An mak tuk dih i khuaruahhar awk tlak hrimhrim an si ko. Sihmanhsehlaw, caldomh in khua ka ruah tikah ka hmuhtonmi khuaruahhar thil dangdang vialte nakin khuaruahhar bikmi thil pakhat a um. Cucu, kan hngakchiat lio ah sianginn he aa pehtlaimi phaisa thawh ding a um fate, a tho hmasa bik kan rak si zungzalmi kha a si. Ka nu, mah kha tlukin kan sifah lio ahkhan khawika ah hme mah kha phaisa kha na rak lak tawn? Facang koko hmanh khim tein ei awk kan ngei lo kha mu. Ka ruaht'han ah ka lung nih a phan hrimhrim lo. Ka caah cun vawleicung thil khuaruahhar bik pakhat a si camcin ko lai.
Ka nu, dinei le hnipuan nakin fale fimcawnnak kha biapi deuh ah na rak chiah zungzal ti? "Ka fale, kan sifah zong ah nan t'hachia hlah u, ka thihlo poahpoah ahcun sianginn cu nan huam chungin nan kai hrimhrim lai" na rak kan ti tawn kha thangt'hat awk na tlak tuk. "Kan fale an upa cang le khuapi ah kan luhpi hna lo ahcun hawidang bantukin fimnak an cawng kho lai lo i an vaivuan lai" tiah tangkua kai ding ka si ah ka pa he Thantlang ah na rak kan peem pi kha nan ral a rak t'ha tuk ti? Fale caah cun ngamh lomi hrim nan rak ngei lo. Khuate ah caansau tuk sianginn ka kai caah khuapi ka cacawn hawi bantukin ca ka thiamlo i ka tha a rak chiat tuk tawn. Ka lungdongh sivangh tukah "sianginn ka kai ti lai lo" tiin hna kan hnawh tawn kha na philh naisai lai loh ti? "Ka fa, atu bantukin sianginn ah ca na thiam lomi hi kanmah na nu le na pa santlaihlo ruang bakah a si ko, na duh ahcun kan cungah na thin hang ko, kan mawhchiat hrim lo....sihmanhsehlaw, sianginn cu na kai hrimhrim lai, na nu le pa zong nih kan tuah khawhmi poah kan tuah ve lai i nai zuam ahcun midang na phanh te ko hna lai, na caah thla ka cam peng ko" na rak ka ti tawn kha ka philh naisai ve lo.
Ka nu, zan fatin te Bible cacaang na rak kan by-heart ter tawn le zarh khat voikhat chungkhar pumhnak na rak kan tuahpi tawn kha na fa ka caah a rak t'ha tuk hringhran. Atu ah hin hawidang bantukin Pathian lei ah zohchunhtlak cu ka si lo. Sihmanhsehlaw, ka thisa chungah dongcat loin na rak luhtermi Pathian biatak ruangah khan ka zumhmi fiang tein ka hngalh. A caancaan ah sualnak rili chungah fak piin ka pil sual theu. Asinain, ka lungchung ah thuk tukin na rak pil termi biatak nih khan sualnak chungah um len kho loin a ka tuah zungzal. Ka nu, pumsa in na sin ah ka um tilo hnu ah hin na rak ton ciami harnak phunkip ka ton ve. A caancaan ahcun ka tha a baa, ka ngaih a chia i ka lung a dong dengmang tawn. Sihmanhsehlaw, phone chungin na awneem nih "ka fa, zeihmanh rak t'ih hlah, thilt'ha a si tiah na ruahmi poah kha na si khawh chungin rak tuah ko, na nu nih thla kan campiak peng ko" a van ka ti ah khin ka thazang a tlung t'han i harnak ton dingah timhcia ka si t'han. Zeicatiah, ninga ni fatin, rawl-ulh in thla na camnak ah ka min na telh zungzal ko timi cu fiang tein ka hngalh.
Ka nu, a ngan tukmi na dawtnak hi zeitikhmanh ah kan cham kho lai lo. Nain, kan dawt tuk timi biathlum hi ka lungthin dihlakin ka van in chimh ve. A ngaih zong kan ngai tuk fawn. Na lung kan fahter sualmi le na ngaih kan chiatter sualmi a um ahcun ngaihthiam kan hal. Ka nu, sianginn kharpi zaan ah hawile he nuamhnak tuahnak ding caah le t'hal caan ah hawikom rual he ramleng chuakin hnianghrawm tuahnak ding caah phaisa ka rak in hal caan ah ka hmurin a chuakmi ka Aw le atu keimah tein kaa cawm khawh hnu ah kan chawhnak Aw hi aa dan sual ahcun rak ka chim mu.
Relchap te: Hngakchia vs Media
Ka nu, kei nihcun na sin in hmuh ding theu kan hal ko rih lai. Ka caah dong loin thla rak ka campiak peng ko rih mu... Pathian nih ngandamnak le chansaunak thluachuah in pe ko seh..
"Happy Mother's Day"!!!!
"Happy Mother's Day"!!!!
No comments:
Post a Comment