Tuzan cu zanriah ka khim lecaangka in carel dingin computer hmai ah ka t'hu hngap. Cat'ial lungthawh tikah tial te dingin theihhngalh t'ha thil pawl kong deuh khi rel dingin ka kawl. Ka blog ahhin chawlehnak kong hi tam deuhin t'ial ka duh caah chawlehnak kong cabia deuh khi ka hngiathlai. Atulio ah chawlehnak kong he pehtlaiin thil sining hlathlai duh ahcun China(Tuluk) kong hi rel loin lanh tak awk a t'ha lo. Cucaah, China chawlehnak kong he aa pehtlaimi cabia t'ha khi caruuk minthang cheukhat ah beisei in ka dap. Nain, cabia pakhat hmanh ka rel manh lo. A dangpi ah ka pial. Hmantlak ka zohnak ah ka hngang.
A hmaisa bikah CNN maivan ka van kau i a hleice in khualtlawng pawl caah an tuahmi tab tangah hmantlak dawhpi ka hmuh. A cungah ka mouse voikhat ka hmeh i adang pakhat a van chuak t'han. Ka hmeh than, a dang pakhat bak. Cuticun, ka rel duhmi cabia rel ti loin khuaruahhar in aa dawhmi hmantlak tu cu ka zoh len. Ka hmantlak zohmi cu inn lawngte! Inn hmanh ah pumpak umnak ding caah a si lomi mirum nih zalong emem in an tha an idamhnak ding caah sakmi inn maktara rumro. Kan pipu hna nihcun Laiholh in an rak ngei rua lo. Cucaah, kanmah zongnih Hotel kan ti ve hi a si men lai dah. Tuzan ka zohmi hmantlak tu cu kanmah pawlnih Hotel kan timi, dawh ngaiin t'anhmawihmi innkhan chungah a neem taktakmi rizai chah pipi phahmi ihkhun in a khatmi inn lianpi sawhsawh khi an si lo. Mirang nih Spa an timi dinhnak phunphun le khuacuanhnak dawhdawh aa kemh chihmi Inn tleu pipi khi an si. An hmantlak pakhat khi sau taktak zoh an phu. Laitlang ka rak umlio ah khan mah bantuk inn-dawh-tleu pipi hi vanchungkhua hmanh ah khin a um kho lai, tiah ka rak ruat lo. Ka ruahnak nih a rak phanhmi phun khi an si lo rengreng!
Minung hi diriamh a thiam lomi thilnung phunkhat kan si. Kan ngeihmi a tam deuhdeuh le ka duhmi a tam chinchin. Kan hmuhmi a tam deuhdeuh le kan hmannak a karh deuhdeuh. Kan sining a t'hat deuh le kan tuahmi a sang thluahmah. Cun, vawleicung minung hi kan sining aa ruallo tuk. Mirum tlawmpalte nih an chanchung hman cawk loin chawva an ngeih lio ah misifak cheukhat cu rawlt'aam in nitin an nunnak a liam cuahmah ko. Mirum le sifak cu kan chawva ngeihmi aa dan lawng a si lo. Kan dirhmun aa dan tuk bantukin kan tuah duhmi zong aa dang ngaingai. Kan tuah duhmi aa khah sual hmanhah kan tuahning aa dang thiamthiam. Sifak nih phaisa tlawmte dihin tha damhnak le nuamhnak kan kawl nain mirum nihcun phaisa tomtom dihin an tha an i damh. Vanram bantukin duhtlinnak hmun an ser i nunnuamhnak an kawl. Cu bantuk nunnuamhnak le dinhnak hmun t'hat'ha tampi a umnak ram khi ram t'hangcho le ram rum an si ko. Ram sifak nihcun hi bantuk inn-tleu pipi cu hmun tampi ah sak cu van chimlo, hmunkhat zong kan ngei kho lo. Zeicatiah, kan dirhmun nih a phanhlo caah a miak a chuahpi dingmi a um lo. Cucaah, tuzan ka zohmi hmantlak nih China hi khuaruahhar in a t'hangcho taktak ko, timi cu fiang tukin tehte a khan.
"Hmantlak pakhat nih bia kaa thongkhat a chim khawh" tiah mirang nih chimphung an ngei. Ka van tarmi Hotel tleutleu hna nih hin Tuluk a t'hangcho tuk timi cu thang tukin an chim ve ko rua, ka ti. Rak zoh ve hna hmanh, na hnatla ve men lai.....
 |
| Shanghai khuapi, Haungpi tiva tlang ah zohco emem in a dirmi a dirmi, hotel special khan 600 a ummi, Shanghai Tower. |
 |
| Huzhou khua ah USD 1.5 billion dihin sakmi, zungbunh phung Sheraton Huzhou Hot Spring Resort. Thaihu tipual cungah sakmi, innkhan 301 ngeimi innpi hi aa phun dangmi a phungsaan ruangah a min thang ngaingai |
 |
| Changsha khua ah sak dingin timhtuah cuahmahmi, Dawang Mountain Resort hi an sak taktak hlan in a laar tuk cia cang. Shopping mall, ski slope, water park le rawldawr dawhdawh he aa tlai dih dingin sak an timhi hotel a si. |
 |
A thla aa zap i a zuang liomi va he a hmuisam aa lo in sakmi, Langham Place cu Guangzhou khua ah a um. A chungah hotel khan 500 le Guangzhou khua ballroom ngan bik zong an um chih.
|
 |
| Tuluk khuapi Bejing ah a ummi, Yanqi Lake Kempinski Hotel hi Tuluk cozah nih an khual lian an t'humhter tawn hnanak inn ropui a si. |
 |
| Kawlram he aa ramri mi Yunnan peng ah a ummi, khual rum dinhnak hotel minthang,Angsana Tengchong |
 |
| 2016 kum ah onnak tuah dingin, Macau ah sak cuahmah liomi,MGM Cotai hi Hotel lawng si loin game celhnak seh zong tampi an hun chih te lai. |
 |
| Tuluk nih vant'hatnak phurtu number ah an ruahmi, number pa 8 he aa lo in sakmi, Fifth hotel tower cu City of Dreams, Macau ah a um. |
 |
| Beijing khuapi ah a ummi, Hotel Eclat Beijing hi chanthar tuluk zungthiam(artists) nih an sermi zungdawh(contemporary arts) tambik a umnak hmun a si. |
 |
| Inner Mongolia, Kubuqi these rawn ah a ummi, Desert Lotus Resort hi tlakrawh le cuai-pia pakhat hmanh hmang loin sakmi inn dawh a si. These rawn ah ti,nika le thli hmangin amah tein aa tumcawp khomi si dingin eco-friendly thilri lawnte hmangin sakmi a si. |
A cunglei hmantlak hna nih hin Tuluk ram t'hancho zia lawng an ka hmuhsak lo. Hiarmi zong an ka ngeih ter. Rum taktak i an chungah nuamsulin vai dinh salam bak khi ka haw tuk!
No comments:
Post a Comment