 |
| Nuam Tukin Hlasak le Lam Ruangah Tleihkhih A Tongmi Iranian Mino Paruk |
April thla chungah Youtube ah an tarmi video cu a laar tuk i zohtu tampi a ngei colh. Palik pawlnih van arfi zat Youtube video lakah pakhat a simi kong an theih zong hi a laar tuk caah a si. Laar tuk hlah sehlaw theihmi tampi a ngei huaha lomi Iran palik nih politics zong a tuah lomi mino tete cawlcanghnak hi an theih khawhnak ding a um lo. "Iran ram le miphun caah nunnak thapin rian ka t'uan" tiah aa ruatmi palik pawl ca ahcun mahle lakci in ram le miphun dawtnak langhter hi sual nganpi phun khat, rammi vialte sinah ngaihthiam hal haumi sualnak, a rak si diam ai.An president Rhohani tu nihcun internet hi kan dohkham ding a si lo, mizeipoah nih zalong tein inuamhnak le duhmi langhternak nawl kan ngei, a ti ko. Sihmanhsehlaw, a kuttang cozah riantuan cheukhat lungthin chungah cu bantuk ruahnak a um ve lo. Tikah, atu bantukin anmah ti khawhnak lamin an ram le miphun an dawtnak a langhtermi mino tete nih rilditnak an ton hi a si.
Chinmi zong "Ram le Miphun Dawt" kongah kan buaibai ngai ve. Kawl uknak tangin Chin miphun nih zalennak tlamtling kan hmuh khawhnak ding caah nunnak thapin dohtlennak a tuahtu buu an um. Cu bantuk buu cu Chinmi pakhat dirhmun in dirpi lo awk le upat lo awk an t'ha lo. Kei zong ka upat tuk ve hna. Ka si khawh tawkin dirpi peng ding zongah bia kai kam ve. Sihmanhsehlaw, nunnak thapin ram le miphun caah dohtlennak rian a tuantu hna nih Chinmi cungah sualnak tampi an rak tuah ve. Tikah, khuasual an sukmi tampi ruangah an cungah lungfakin a huatu hna zong kan um. An tuahmi khuasual cungah tuanvo an lakning a t'hatlo caah anmah hua lem loin thilt'ha duhah an tuahmi khuasual kha thuh piak loin langhter aa zuam zong kan um. "Dohthlennak an tuah lio teh a si fom cu, zeibantuk khuasual an suk zongah theithiam ko hna usih" tiah tongta dirkamh in a dirkamhtu zong kan um ve t'hiamt'hiam. A phung a si ko. A poi tukmi tu cu kanmah pomning in a pom ve lomi pumpak kha "Ram le Miphun" rawitu ah ruah kan hmanmi hi a si.
Iran palik bantukin mitleihnak nawl khi hei ngei ve usihlaw zeidek kan lawh hnga? "Ram le Miphun Ka Daw Tuk" tiah a au lengmangmi mi cheukhat hi cu anmah kan reng men lai lo dah! Kanmah he an kalning aa khat lomi poah khi cu "Miphun caah hling na si" tiin kan pawi duahmah ko men hna lai. Mah hi kan lungput hi a tenau tuk! Kan hlawt hrimhrim a hau. Culocun, "Democracy ee, Federalism ee" kan ti lenmi khi kan nganh diam ko lai.
Iran palik nih sualnak nganpi ah an ruahmi tuahsernak cu mah hi video i thlak le Youtube ah tar hi a si ko. Kannih zongnih Miphun leirawi/lungrualnak hrawktu kan ti tawnmi khi zeibantuk khi hme an si tawn?
Na bia cu a ki a hna a um pah,na ti hnawhchan duh a um,mi a susport lai bantuk in i um ter i ngaihthlem in mi kehleng phet phun na si,kan laiphungthluk....ka kawi ka ral a cang ti kha a hluan ruangmang ko hi,
ReplyDeletetha tuk!
ReplyDeleteSangbawi,na catial mi tete an tha tuk. Nain,na pom ning hi kan Chin minphun sining he a tlak deuh rih lo ka ti.Freedom of expression nan hman ning ai dang,kan miphun caah thatnak maw a chuahpi,chiatnak dah ti hi ruat ta a ho ka ti.Miphun nan dawt tak ko si cun mahbantuk catial na thlingza lai.SCA,Si Bawimanglian le nangmah nan catial ka rel leng mang tikah kan Chin miphun caah thatnak nan chuahpi mi nak in chiatnak/huatnak nan chuah pi a tam deuh hrim ko.Nan pomning cu a dik tuk ko nain freedom of speech hi a caan,hmunhma he ai tlak ning tein hman longah a tha hnem.Nan pom ning hi voikhat te tal in rak ruat than tuah uh law ti kan duhpi ngai hna. Ram hrawk ti hi a phun tam ngai, remh a timhmi a doh tu zong khi ram hrawktu an si ve cuh.(Kan huat caah ka tial mi si hrim lo,na pom ning hi ruat than seh ti kan duhpi caah a si).
ReplyDeleteAnonymous, ka catialmi na rel hlei ah na hmuhning na chimmi cungah kai lawm. SCA le Si Bawi Mang Lian nih zeibantuk ruahnak he dah ca an tial timi cu ka thei lo. Ca ka tial tikah zeitikhmanh ah Miphun caah hrawknak chuahpi seh timi lungput ka ngei bal lo. Keimah nih ka hmuh khawh tawk tein khua ka cuanh hnu ah t'ial dingah aa tlak ko tiah ka ruahmi poah khi ka siaremningin ka tial ko. Aho pumpak le buu caah an cawlcanghnak a dawntu ding cabia ka t'ial kai thei rih lo. Hmailei zongah ka tial fawn lai lo. Nan rel tikah zeibantuk lungthin he dah nan rel timi tu cu keimah control khawhmi a si ve lo caah a chim awk ka thei lo.
Delete