Social Networks(Facebook) Hi A Chia Maw, A T'ha Dah??

Vawleicung ah hmuhtheih khawhmi  information hi kum hnih dan ah alet bakin a karh peng ti a si(Silver,2012). Phundang in chim ahcun, a ralaimi kum hnih chung lawng ah minung nih kan chuahser dingmi information hi vawlei aa thokka in aluancia caan vialte chungah rak sermi vialte he aa zat lai tinak a si. Zeitindah cuticun a si khawh tiahcun a thawng tukmi information chuahtu thilri, internet kha a hmangtu kan tam tuk cang caah a si. Internet cu phun tampi in hman a si i “Social Networks” hi atulio ah a laar bik a si. “Social Networks” cu maivan(internet) hmang in “mibuu le pumpak, pumpak le pumpak ipehtleihnak” a si kan ti ahcun kan palh lai lo dah. A hlan ah rak hman tawnmi media dangdang he aa dannak bik cu a hmangtu pumpak pakhat cio nih information ser khawh a si. Tahchuhnak ah Social Networks a simi Youtube le Facebook tibantuk kan hman tikah a um ciami info lawng kan hmang lo, kanmah zong nih kan duhmi kan tarlangh khawh ve. Social Networks tampi lak ah Laimi nih ka hman bikmi cu Feb 4, 2014 ah kum hra a tlingmi, Facebook a si ko. Vawleicung minung pasarih ah pakhat renglo nih hmanmi Facebook cu internet a hmang khomi Lai mino poah nihcun kan hman dih ngawt cang theu lai.

Lai mino nih kan hman tukmi a si caah Social Networks (a bikin Facebook) hi “a tha maw, a chia” timi biahalnak hi kan ibuaipi ngaingaimi a si ve cang. Kei cu a tha tuk ka ti. A ruang cu Facebook telh in Social Networks poahpoah nih a kan pekmi cu minung pakhat le pakhat ipehtleihnak hmuhma(platform) a si ko caah thiltha tuk a si ko. Billion 1 renglo minung nih itonnak hmun a si tik ah kan hmannak thawng in vawleicung thil cangmi__news feed hmang in___ rianrang tein kan theih khawh. Information Age ahcun speed(rannak) hi a biapi tukmi a si. Theih ciocio zong ah hawidang nakin a thei hmasatu si hi man tampi a ngei. Laimi nih cun Laica deuh hmang in kan ichawnhbiak ko caah mino tampi nih Laica thiamnak ah kan hman. A ngaingai tiah cun Facebook hi rak um hlah sehlaw ramleng khuasa Lai mino tampi nih Laica kan hmu ti lai lo. Kan rello le kan tiallo ahcun zeitindah an thiam rua hnga mu? Cucaah, Laimi bantuk miphun fa tete ca ko ah hin a tha khun ka ti. Zeicatiah, kan caholh kilven le t'hachoter khawhnak thazang an kan pek.

Mi tampi nih uarmi thil dang cio bang thatlonak tete cu a ngei ve. Mi-leem a hman ngai hlei ah a hmanzia thiamlo ahcun mah humhimnak a hrawk khotu thilri a si. Mino cheukhat nihcun ngol hngal loin kan hman i inn rian le sianginn rian kan tholh dih theo. NBCNews(Sept,7,2010) nihcun homeworks(ing-sa) tuah lio ah Facebook on chih a hmangmi siangngakchia cu an marks/grades 20% tiang a zor kho an ti. Mi tampi nih an rianngeitu(employer) nih an Facebook kha an zoh khawh timi tuakchih loin an rianhmun/tuanmi an huatnak tibantuk kha an FB cahmai ah zalong ngai in an tar tawn. Cucu an rianngeitu nih an hmuh tawn i rianphuah tiang an tong lengmang. Cucaah,zapi nih an hmuh/theih zong ah kan humhimnak caah thinphannak a chuahpi kho lo dingmi kan sining lawnglawng hi “Social Networks” ah kan tarlangh ding a biapi ngaingai

Feb 4,2004 ah Haverst University sianghngakchia umnak innkhan chung ah Facebook a rak sertu, Mark Zuckerberg nih Social Networks(Facebook) kong an hal poah ah a chim zungzalmi cu hihi a si: Facebook nih a tuahmi cu pakhat le pakhat pehtleihnak thatter le icheihbauhnak nun thawnter a si ko, minung tam deuh nih t'ha deuh in kan ipehtleih i kan icheuhbauh khawh deuhnak vawlei cu a tha deuhmi vawlei a si ko tiah ka ruah. A chimmi hi ka lungtling tuk! Kan miphun ca zong ah a hman thiamthiam tiah ka ruah. A hmanzia thiamlo ahcun thatlonak cu a chuahpi ve.ko hme teh! Nain, khakha cu a hmangtu palh cu hme a si fom ko cu!

Note: March 2014 chuak T'hingt'hang Magazine nih Social Networks kong he pehtlaiin ruahnak langhternak section an tuahmi caah ka rak kuat balmi cabia tawi a si.