Kan Innchungkhar Nih Kan Fale Nunnak A Chilh Lo Ahcun...

Ka mirangca sayapa nih ca pipa deuh t'ial dingin a kan fial caan poah ah a chim lengmangmi bia a um. Marks t'ha(Good grade) hmuh nan duh ahcun "don't tell me, but show me" a ti theo. "Na catialmi nih khan na tialmi kong kha a chim in ka chim hlah seh, a hmuhsak in ka hmuhsak seh," ti hi a biatleih a si. A hman ngaingai. Careltu lungfiang lakin a t'ialmi kong a langhter khotu khi cat'ial thiam an rak si tak ko. Cat'ial thiammi nih an t'ialmi cabia cu rel tikah lung a fian tuk ahhin movies in zoh he khin aa dang lo. A fian lawng a si lo, a thawt hrim a thaw. Cucu cat'ialtu nih an izuam zungzalmi a si. Zicatiah, kan hmuhkhawhnak nih hin kan thluak le kan lungthin riant'uannak hi a uk khawh ngai. Kan mit nih fiang tein a hmuhmi thil cu fawi tein a sullam kan fiang kho i kan lungthin ah fak ngaiin a caam kho. Cucu, nizan ah ZCC mino hna nih mithmuhin an kan hmuhsakmi drama hmangin keimah hrimhrim nih ka tem ve.

CCBC&ZCC Mino

Kan hnu zarh cu Zophei Christian Church(ZCC) mino nih kan khirhfabuu an kan tlawng i kan i nuam ngai te. Hlasak an thiam. An aw a t'ha. An thlacam a tlo. An thawngt'ha bia hmul a ngei. An cawlcanghning aa dawh. Zeicatiah an tuahmi poahpoah ah an i biatak! An caan hmanning zoh tikah caan tampi pekin timhtuahnak an rak ngei timi hmuhkhawh tuk a si. Cucaah ka upat tuk hna. An sinin thlarau thazang tampi ka hmuh caah an cungah kai lawm tuk. An tuahmi thil vialte nih ka thinlung an ka lak dih ko. Sihmanhsehlaw, a hleice in ka thinlung a kawihtu a um. Cucu, Aa Ngun hruainak in an kan hmuhsakmi drama tawi a si. "Thlacam Nun" timi tlangtar in an kan hmuhsakmi drama tawi cu a tawi te. Minutes pahra hrawnghrang telawng bak khi a sau. Nain, minung tampi mitthli a thlak! Kei zong fak piin ka thinlung a ka suk ve. Ka kiangah uico mei bantukin ngol hngal loin a cawl pengmi Church School hngakchia pawl zong hna a chetmi pakhat hmanh an um lo. Dai dipdep tein an um dih. Cu tluk cun kan thinlung a kan lak!

Aa Ngun hruaimi drama team

Minung hleili nih an kan hmuhsakmi "Thlacam Nun" cu zumtu aa timi Laimi innchungkhar pakhat sining chirhchan in Aa Ngun nih a ser. Fanu pahnih le fapa pakhat a ngeimi nuva hna nih an hruaimi innchungkhar cu buainak phunkip in a khat. Zeicatiah a min men in khirhfa aa timi innchungkhar an si. An nunnak ah zumtu nun a um lo. Pa bik nih zuu din le nuamhhneih lawng a rian. Nu bik zong nih vawlei nuamhnak ah a pil i innchungkhar a zoh khenh lo. Innchungkhar ah pakhat le pakhat pehtleihnak a bau. Harsatnak an ton caan ah bianem in pakhat le pakhat ihnemhnak le Pathian bia in thazang ipeknak zong a um lo. Lungdaihnak a um lomi an innchungkhar cungah a lungrawk tukmi an fapa nih lungdongh in sualnak lam a zul ve. Cuticun, an innchungkhar cu buainak phunkip nih a tuam in a tuam dih. Dawtnak le velngeihnak nih hmunhma an ngeihlonak innchungkhar ahcun buaibainak nih bawi a t'uan ko.

An nulepa nih vawlei nuamhnak kawlin an vahvaih lio caan ahcun an fanule pahnih nih an innchungkhar caah dongcat loin Pathian sinah thlaza an rak cam ve. An chungkhar sining an zohah an mitthli a tla zungzal. Mitthli le hnapduk he Pathian sinah an innchungkhar an ap i bawmhnak an hal. A caancaan ahcun lungdongh in Pathian sin ah an zai tawn. "Ka pa, king ulaw onh nan si lai, kawl ulaw nan hmuh lai, hal ulaw pek nan si lai....nan kan ti ko tung! Kannih unau nih mitthli he kan in halnak hi na kan leh bal kun lo" an ti. An mawh hrim lo. Midang nih vanram bantuk ah an ruahmi innchungkhar cu annih caah cun hellram bantuk nunkhua-harnak hmun a si fom cu teh! An thlacamnak authawng cu Pathian sinah a phan rua lo tiah lungawt'awm in an um theu. Sihmanhsehlaw, Pathian nihcun an thlacamnak aw cu a rak theih camcin ko. A caan a za rih lo, a rak ti caah a rak lehcolh hna lo bia tu a rak si. Zumtu hna nih bawmhnak halin kan aunak aw let loin a um kho lotu kan Pathian nihcun an thlacamnak cu amah nih aa rem a timi caan teah a leh ko hna. An nu nih sualchirnak lungthin a ngei t'han. An pa zongnih lungchir in mitthli he a fale sinah ngeihthiamnak a hal hna. An t'apa zongnih thil t'halo a tuah tawnmi kha a ngol i nunzia dawh in a nung than. Cuticun, a rak tlaumi innchungkhar cu a nuammi khirhfa innchungkhar thar ah aa cang t'han.

An fanu pahnih thlacamnak thawngin a tlaumi an nulepa le an t'a nih ngaihchihnak lungthin he sualnak khuamui chungin dawtnak in a khatmi ceunak Pathian lei ah pakhat hnu pakhat in an van kir lio ah hlasakthiam Emily Ngun Hlei Sung nih aw-hno taktakin Thlacam Cu timi hla a van sak ahcun a ngaih a chia lomi kan um lo. Ngaihchiat tiah khin lungrawk lei ngaihchiat khi a si lo. Kan hmuhmi thil nih kan lungthin fak tukin a suk ruangah a chuakmi lungnuamhlonak phun tu khi a si. Ziah cuticun kan lung a kan suk dih hnga? A kan hmuhsaktu an thiam tuk timi cu chim haulo a si ko. Sihmanhsehlaw, professional a si lomi a piahtu thiamnak bakbak ruangah mi tampi nih mitthli tlak ding cu a har ngaingai. A fiangmi cu a hmuhsaktu thiamnak ruang lawngah si loin mi tampi nih kan sining he aa khatmi a si caah a si.

Atu chan ah zumtu aa timi Laimi tampi nih innchungkhar kan hruai dan cu "Thlacam Nun" drama tawi nih an kan hmuhsakmi dirhmun khi a si taktak ko. Nulepa nih fale nunnak ah kan itel lo. Chawva kan kawlnak ah kan fale kan philh hna. An fim cawnnak zong ah thazang kan chuah duh lo. An ngandamnak koko hmanh ah kan chawva kan hmang siang lo. Pathian bia in fale cawnpiak kan daithlang i thlacamnak zong kan tuahpi huam fawn hna lo. Tikah, fale nunnak ah innchungkhar nih a hiip ti hna lo. Pawngkam ah ni fatin in an hmuhmi thil hna le sianginn ah an cawnmi thil tu nih an nunnak ah fak piin a chilh hna. Innchungkhar ah kanmah holh in kan fale kha kan chawnh huaha lo tuk hna caah anmah pakhat le pakhat an i chawnh tikah mirang holh in an i chawn cang. Hi hi kan miphun caah t'ih a nung taktakmi thil a si.

Ram t'hangcho cu zatlang nih hmanmi instutions hi an t'hat tuk caah kan fale mino hi kanmah nih kan zohkhenh tuk hna lo zongah ca an thiam t'hiamt'hiam ko men lai. Laimi hi a tlangpi in kan nunrinnak thluak zong a t'hat ngaingai caah an cacawn hawile lakah a thiam bikbik hmanh khi an si kho men ko. Sihmanhsehlaw, zumtu innchungkhar nih a nunnak a chilh lomi fanu le fapa cu zeitlukin ca an thiam hmanh ah hmailei ah bochan awk a thlakmi an si hrimhrim lai lo. Anmah pumpak khuasaknak ahcun nunnuamhnak phuntling zong an va tingco ko men lai nain innchungkhar, khirhfabuu le miphun caah hman awk an t'ha hrimhrim lai lo. Pathian bia nih a nunnak a chilh cangmi mino caah cun Darwinism te hna khi khurkhuaruah khawhnak ding caah a t'ha tukmi science theory a si ko. Sihmanhsehlaw, zumhnak kong kha aa fiang lomi mino caah cun "Pathian a um lo" tiah fawi tein a chim ngam tertu ding theory a si ve. Cucaah, kan fale mino hna hi zumtu innchungkhar nun in an nunnak ah kan chilh hrimhrim hna a hau. Culocun, fimthiamnak sangsang an ngeih hmanh ah lohlak-va an kan hrawn tak lai i nulepa le miphun caah mitthli tlak tertu an si ko lai.

Rel Chapte: Kan Miphun Rothil Sunglawi Bik Hngakchia Hna hi Kan Hrawh Hna Awk A Si Lo