Kan Miphun Rothil Sunglawi Bik Hngakchia Hna Hi kan Hrawh Hna Awk A si lo....

"Fale hi Pathain sin in kan hmuhmi ro sunglawi bik an si" tiah Bible nih a kan cawnpiak. Bible cathiang a rel lomi zongnih kan Pastors le biaknak lei hruaitu hna hmurka in kan theih lengmang. Nulepa vialte nih an chimmi bia, aa khat dihmi pakhat cu "ka fale, nanmah hi a sunglawi bikmi ka thluachuah nan si. nanmah nan t'hat le ka chan chung kai nuam lai, nan sual le ka thih tiang ka lungre thei lai, nanmah hi ka zeizongte nan si ko" timi a si. Miphun cu innchungkhar tete fonhin sermi mibu a si. Tikah, innchungkhar cio nih kan ngeihmi hngakchia hi Miphun caah rosung bik thluachuah an si ve. Chin hngakchia tete hi Chinmi nih kan ngeihmi Pathian thluahchuah rosung bik an si ko.

Rothil cu rohmi nih a zohkhenh zia le a tawlrel zia a thiam lo ahcun amah caah rawhralnak chuahpitu thil ah aa cang theu. Kilkawi thiamlonak nih ro cotu pumpak caah ningzah mualphonak a chuahpi hlei ah a innchungkhar caah sunghzatlaknak nganpi a chuahpi. Innchungkhar pakhat nih sunghzatlaknak an ton tikah sang le zawl a buaibai. Sang le zawl aa mahcahlo ahcun khua nih a tuar. Khua le ram nih sukdennak a tuar ahcun a khurawmhtu Miphun caah harsatnak a chuak. Miphun pakhat nih a harsatnak le buaibainak kha a hrihram kawlin t'hatnak lei ah a thlen lo ahcun Miphun dangnih an lonh duahmah. Cuticun, hawi hnu a den chin lengmang i ningzah mualphonak nih muai cawk loin a tlak thuat deuhdeuh. Chin miphun hi cu bantukin a rawkral cuahmahmi dirhmun lei ah kar a hlang diahmahmi Miphun kan lo ngai. Cucu, Pathian sin in kan hmuhmi rothil sungbik hna hi a kilkawi zia kan thiam hna lo caah a si. Mi cheukhat cu a kilkawl zia thiamlo cu van chim lo, a timh hrim kan itim lo. Lam kam kip ah a vakvaimi, ngeitu ngeilo innzuat sat'hil bang, kan thluachuah sunglawi hna cu kan thlahdah sawhsawh hna. Tikah, caan a rauh cun nulepa le innchungkhar caah lungretheihnak chuahtertu le Miphun mualpho tertu ah an cang.

Chin Miphun nih nunzia dawhlo ruangah ningzah mulphonak kan tonmi hi a tlawm hrimhrim ti lo. A bikin ram thumnak a phanmi nih kan tonmi hi an faak khun. Zeicatiah, mi ramdang ah dirhmun fek lo ngaiin khua a sami kan si caah a si kho men. Asiloah, kan rak hman tawnmi nunphung le zatlang ziaza hna he aa dang tukmi sining chungah lutaw hngal loin kan ipaih lio a si ca zongah a si kho. Thil dang tampi ruang zongah a si kho thiamthiam. Zeisihmanh ah Chin miphun nih kan nunzia dawhlo ruangah ningzah mualphonak kan tonmi hi a tam tuk rumro ko cang. Naihrawng kan tonmi mualphonak vialte lakah a fak bikmi pakhat cu aluanciami caan tlawmpal ah Indianapolis(USA) ah siangsangruun a kai liomi Chin mino pahra cu tuanvo ngeitu hna nih sualnak ngan pipi lunghrinhnak in an tleihkhihmi hna kha a si men lai. Mithah, thil fir le hramhram in mithil chuh tibantuk sualnak ngan pipi lunghrinhnak ruangah tleihkhih a tongmi mino tete kha Chinmi lakah a sualbikmi an si lai lo. A sualmi tampi lakah thleihkhih a tongmi mi tlawmte lakah aa tel sualmi men an si ko lai. Sihmanhsehlaw, an tonmi thil nih atulio kan miphun sining a langhter ngaingai ko rua. Hi bantuk t'hangchiatnak hi cu innchungkhar hruaitu nulepa, biaknak lei hruaitu Pastors le khirhfa upa, zatlang buu kenkip hruaitu hna le Miphun hruaitu upatmi upa hna nih kan rian kan tolh ruangah a chuakmi theitlai an si. Ahohmah thian aa chek ngam ding kan um lo. Kan miphun ning in kan tuah dingmi kan tolh caah a cangmi thil a si ko. Cucu, remh kan hau___hawi lawh kan duh ko ahcun.

Aa rawkmi thil pakhat khi tlamtling tein remhnak ding ahcun aa rawknak zawn theih lawngin a za lo. A rawk aa thoknak zawn khin remh hmasa a hau. Culocun, remh chom in aa rawk t'han thotho. Chin mino nunzia in a langmi kan Miphun rawkralnak hi khuazei in dah aa thok hnga? Al awk a um lo, innchungkhar in aa thok ko. Cucaah, remh kan duh ahcun innchungkhar in remhnak rian kan domh a hau hnga. Innchungkhar a remh khotu cu nulepa lawnglawng nan si. Biaknak buu le zatlang buu nihcun nulepa nih an tuan dingmi rian khi chan khawh a si lo. A bawmh lawngin an bawmh khawh. Cucaah, kan Miphun pi remhnak ding taktak ahcun chungkhar hruaitu nulepa hi nan biapi bik. Nulepa t'ha tampi kan ngeih ahcun fanu fapa t'hat'ha cu anmah chuakin an chuak ko lai. Cucaah, zohchunhtlak nunzia dawh he fale hruai a thiammi nulepa t'ha kan herh tuk. Nulepa hi anmah fale ca cio ahcun a t'hami nulepa an si dih ko. Sihmanhsehlaw, zapi nakin fale cawnpiak le kilkawi dan a thaim deuhmi nulepa an um. Cu bantuk nulepa cu an sining aa dang dih cio nain a tlangpi in an kalning aa khat. An zulhmi ningcang cheukhat hna cu mizeipoah nih cawn khawhmi an si hna. 

• Fale nunnak ah aa telmi an si. Fale cawnpiaknak caah a biapi bikmi pakhat cu fale an nunnak chungah luh i itel hi a si. A tlang in dir riangmangin "khakha na tuah awk si loh, mah kha tuah, na ngaihlo ahcun na cei lai" tiah hro len khi a si lo. Fale nih an tuah duhmi thil kha nulepa nih nuam tein tuahpi i tuahpi pahin tuahter duhmi lei ah huamsam tein mer khi a si. Hihi vunrang nulepa hna nih an hman bikmi fale cawnpiaknak lam pakhat a si. Annih cu an fale nih an tuah duhmi khi thil fate a si zongah biatak tein an tuah pi hna i an tuahpi pah hna in anmah duhmi lei ah an mer hna. Biahrang in an hro hna lo i fung thukin an t'hih phaih hna lo. An nunnak chung tu-ah an lut i huamsam tein an chilh hna.
• Fale caah zohkhenhtu t'ha an si. Nu zong pa zongnih fale caah zohkhenhtu t'ha si khawh a si. Pa nih "hngakchia zohkhenh le tuammuai cu nu rian lawng a si" ti ding a si lo. Nu tluk tein Pa nih tuah khawhmi a si ve ko. Tuah hrimhrim zong a hau. Zeicatiah, ram t'ha ahcun nu he pa he riant'uan cio a si tikah fale nih nulepa dawtnak le tuammuainak an haal tuk. Mi tampi cu kan fale cu kan umh ko hna nain kan zohkhenh hna lo. Kan hmurka in kan dawtnak ka chim hna lo i kan tuahsernak in kan langhter fawn lo. A thlah i kan thlah sawhsawh hna i kan ven hna. Nulepa t'hami nihcun an fale sinah an hmurka le an tuahsernak in an dawtnak hna kha an langhter zungzal. An caah an ruahchan piakmi hna zong kha an hngakchiat lio tein an chimh leklek hna. Sualpalhnak an tuah caan ah dan an tat sawhsawh hna lo. An palhnak an ichir caan ah an lawmhpi hna. 
• Fale caah cawnpiaktu saya t'ha an si. Saya ti tikah fimthiamnak lei in cawnpiaktu thengtheng khi chim duhmi a si lo. Nulepa nih fale cungah an ngeihmi rian nganbik pakhat cu a chia le a t'ha thleidang kho dingin cawnpiak a si. Kannih Chinmi tampi cu fale cawnpiak kan hmang lo. Awro le fungfekin chimhrin lawng kan hmang. Cucu, hngakchia lungthin le khuaruah khawhnak a rawk khotu, a t'halo tukmi cawnpiak dan a si. Hngakchia nihcun neem te le nuam tein an duhmi tuahpiak pah in cawnpiak khi an cohlan khawh bik tiah hngakchia lungthin lei thiamsang, Dr. Lisa Marott nih a chim.
• Fale he chawnhbiaknak an ngei zungzal. Nulepa t'ha le a daithlangmi nulepa an idannak bik pakhat cu fale chawnhbiaknak ah hin a si. Nulepa t'hami nihcun an fale kha upatnak he an chawnhbiak zungzal hna. An duhmi an hal hna. An duhpiakmi hna zong an chimh hna. Thilt'ha an tuahmi cungah an lawmh hna i thangt'hatnak an pek hna. Thilt'halo an tuahmi cungah an ngeihchiatnak kha an theihter hna. Sihmanhsehlaw, a daithlangmi nulepa nihcun an fale kha an chawnbia huaha bal hna lo. Thilt'ha an tuah zongah an lawmhpi hna lo i thilt'halo an tuah zongah "thilt'halo a si" tiah an lungfian tiangin an chim hna lo. An hrocer hna i dantatnak lawng an pek hna. Tikah, hngakchia nih an nunnak in thilt'ha le t'halo kha an thleidang kho taktak lo. Cuticun, fiang huaha loin an t'han tikah an upat hnu ahcun remh an itimh zongah an iremh kho ti lo. A tlai tuk cang. 

Chinmi nulepa tam deuhnih kan hmanmi fale cawnpiak dan hi fale caah nunzia remhnak si loin rawkralnak a chuahpitu a tam ngaingai. An nunnak chungah lut loin a tlangin thlen kan timh hna. Kan zohkhenh duh hna lo. Kan thlahdah sawhsawh hna. Neem tein nun kan cawnpiak hna lo i nun an sual caan ah dan lawng kan tat hna. Kan hmurka in siseh kan tuahsernak in siseh kan dawtnak hna zong kan theihter hna lo. Tikah, thilt'ha le thilchia thleidang kho taktak loin an t'hang i innchungkhar le Miphun caah ningzah mualphonak chuahpitu ah an cang. Cucu, Chin miphun nih kan remh hrimhrim a hau cangmi a si. Culocun, vawleicung ram t'ha bikbik ah khua kan sa nain kan Miphun nih kan ngeihmi Pathian ro sunglawi bikmi hngakchia le mino hna hi Miphun hmaihngal tertu si loin belmang nehtu ah an cang lengmang ko lai. Hihi nulepa nih rian nganbik kan ngeihmi a si.

Rel chap:Zeimaw Na Hmuh Ahcun Zeital Chim!

Theihternak: Mah hi capar chungah hin "Chin" timi Miphun min voi tam-ial ka hman. Cucu, t'ha tein research ka tuah hnu ah ka hmanmi a si lo.  Ka cuanh khawh tawkin ka cuanh hnu ah mah hi issue he aa pehtlaimi ahcun fawi tein kan Miphun min hi hman ngam ding a si ko, tiah ka ruah caah ka hman sawhsawhmi a si. Ram thumnak a phan cangmi nulepa ca deuh ah duhsaknak he ka t'ailmi a si i www.thechinstar.com zongah tar cangmi a si.