Zahan Zaan Vs Tu Zaan...

Zahan zaan cu ka mang a hluan. Ka mit in ka hmuh, ka hna nih a theih, ka nun nih a takin a teh ko nana khin kaa zumh kho tuk lo. Ka lu kaa muai. Ka mit kaa hnuai. A taktak a rak si diam___ka pawngkam ah Pate le an nu(ChinChin) an rak dir ve. Hngerhte bantukin a tammi mibu pi lakah kanmah hlawk cio in kan i hlawk len ko. Lady Antebellum nih stage an lamh thokin a hnulei khuamui lakah an kir hlan tiang, kan t'hutdan ah kan t'hu lo. Midang vialte zong an si dih ve. Grammy Award zong tampi a hmu cangmi, "Need You Now" in mi vialte nih theihmi Lady Antebellum nih an tuahmi tutan "Take Me Downtown Tour" cu a ropui rumro!

Music a duh lomi minung kan um lo, ti si. Kei zong hi music cu thiammi ka ngei lo nain ka duh tuk ve. Zaan chiarte hla ngai ta loin ka ihkhun ka panh a um lo. Hla phunphun ka ngai peng. Zaan tlai hnu ah ka ngaih huam bikmi cu Country Hla phun a si. Country hlasa tu vialte lakah ka uar bikmi cu Lady Antebellum an si. An thiam kho tuk, ka ti. An hla vialte ka duh dih! Hilary hmurin a chuakmi Aw nihcun zeibantuk hla poahpoah khi Hla-T'ha tukah a ser ko.

Kaa Selfie ve phawt..

Keimah bantuk an rak tamtuk ve. An hla ka thiammi a tam ngai ve kaa ti nain ka pawngkam ah a dirmi pawl sin ahcun ningzak khi ka si. An hla vialte an thiam dih. Cu bantuk minung cu an hei tam khawh hoi ning!! Video lawngah ka rak zoh tawnmi Michael Jackson le Bon Jovi tepawl show he khin aa dannak a um lo. Hngerhte banbukin aa bu lulhmi minung tam taktak lak ahcun mirang nungak dawh cu thah cawk ding khi an si lo. An tam taktak! Minaak bal an umlo tluk a si. Latino zong ka hmu huaha t'hiamt'hima hna lo. Asian chinchin cu kanmah pathum lawng kan si rua, ti awk khin a um. A dang pakhat zong kan hmu hna lo.

Pate darling(ChinChin) he 

Zahan an sakmi hla vialte lakah lunghno taktakin ka zulh ve lenmi hna hla te cu mahte hi a si.


Anmah Lady Antebellum lawng an si lo. Ohio State in Country hlasakthiam minthang Billy Currington zongnih hla tampi a sak ve. Anih hi cu puai lumhtu deuh ah khin an hman. Nain, a thiam khawhning cu khuaruah har khi a si ve thiam ko. A aw koko lebang cu anmah Lady Antebellum nakin a t'ha deuh rua ka ti caan a tampi.

Lady Antebellum an chuah hlanah puai lumhtu Billy Currington

Billy Currington nih a sakmi hla ah mipi nih an uar bikmi fung hnih cu "People Are Crazy" le "Must Be Doing Something Right" an si. Ka uar ngai ve hna caah ka van tar hna...

Zahan Zaan cu a nuam bak ko! Kaa lunghmuih tuk! Ka chan chungah ka philh khawh lo dingmi zaan lakah zaan khat a si ve.

Tuzan tu cu chim awk a t'ha lomi a ruang tampi ruangah kai nuam lo ngai. Kawlram a tlawng liomi, journalist minthang, Nicholas Kristof nih Rohingya pawl cungah Thein Sien cozah nih duksummi sualnak an tuahnak kong a tialmi ka rel i zeitindek ka um chinchin . Ka ngaih hna chia, ka thin hna hang!! Nain, thil pakhat ruangah kai nuam ngai t'han.