CYONA Nih Tuanbia Thar A T'ialnak Conference le Kei..

Hmanthlak hi zoh hmanh! Ahodah a si? Cun, zeidah a tuah? Umm...keimah ka si. Ball pen in cabuai khuh vialte pem viar in ka sawh! Cucu, dai zirziar tein a ummi Salai Lian S nih a thli tein hman a rak ka thlak.

Ummmm...8:30am in kan thok i 7:00pm a si cang nain agenda pahnih a tang rih. Kan suaisaam ningin kan caan a kal khawhlo tuk cang caah ka si a vang. Ka sivangh ngaingai caah umtuzia ka thiam lo. Tuah awk dang theihlo tukah ka thutnak hmai cabuai khuh pem viar in ka sawh. Nain, a poimi a um lo___kan cabuai khuh cu voikhat lawng hman dingah sermi hrimhrim a si ko.

"Ziah upa pi nih mah cuti um cu..na huam ti lo le hei chuah ziar ko ding???" nan ka ti men lai. Asinain, chuah awk a t'ha lo. A biapi tukmi conference a si. Chin Youth Organization Of North America (CYONA) tuanbia ah a caam len dingmi tonnak a si. Zeicatiah,  CYONA cu mah hi meeting ahhin a sining pi aa thleng. A muisam zong a thar bakin aa thleng dih!


CYONA President Salai Tial Khar Lian nih June 7, 2014 ah Kentucky & Cincinnati Area ah tuah dingmi CEC conference kong cu CYONA group-mail le CEC Facebook group ah a hlankan in voi tampi thawng a thanh. Sungsai ngaiin timhtuahmi meeting cu a takin a tlamtlin khawhnak hnga tiin atu leklekin aa thlengmi thil sining vialte cu CEC upa sinah update a tuah peng. Meeting nikhua cu ni thum lawng a hlaat cang caah khual donnak ding inn le meeting tuahnak ding hmun zong CEC FB group ah thawng a van thanh cang. Voidang tawn bang, "Like" kan pek cio. Mi cheukhat nih comment tete zong kan thlak pah. Amerillo leiin CYONA General Secretary Salai Van Dawt Lian zongnih comment a thlak ve i  ka van rel cu ka lau ko___Like zong ka pe ngam colh lo. "Sangbawi, Amarillo CYO president Aa Thang he June 6, 2014 (3:45pm) ah Louisville, KY airport ah kan rak phan te lai, nanmah retheih a hau te ko lai hi awh" tibak a si ko! "Aw, kan umnak he cun suimillam pahnih motor mawng  bak a si nain kan rak in don ko hna lai mu.." tiah zaang tlunglo ngaiin ka hei comment chin ve.

An vanlawng a hnu lo. An chimmi caan te bakah Louisville airport an van phan ko. Kan van iton lecangka in Aa Lian nih anmah don dingah lam hlat tuk kan ratmi cungah ngaihthiam an kan hal colh. "Ka dua, online in central upa lawng meeting kan tuah lio ah teh Louisville, KY hi Kentucky CYO an umnak hmun he aa hlat maw, tiah ka hal hna i U Sang Pui nih 'a nai te, minutes 40 mawng lawng a si' a ka ti le kaa lawmh tuk cu...U Khar zongnih aa neih te ko, a ti ve rih fawn le keimah zongnih zohfelnak ka ngei t'han ti lo...air ticket cawk ciami ka ngei i ka van irinh beh ko cu teh..." tiah siaremlo ngaiin thil sining an kan chimh. "A poi lo, lam hlat piin a rat hmanh nan van rat ah a don don te hna cu a fawi te ko cuh" ka hei ti ve hna. Cuticun bia zaza ruah pahin suimilaam pahinh dengmang kal a simi kan lamthluan cu zawht'i hram kan domh.

Zei hlan bikah CYO kong a ra hmasa. Holh tam cem ah keimah theo nih ka domh i Aa Lian nih "a si hrim ko.." ti phun deuh khin ka chimmi cu a ka "Amen" diahmah. CYO hi Chin mino sinah a min than tlukin a chunglei thazang a t'hawng ngaingai lo nain ka tleihchan tukmi Organization a si. Zeicatiah Chinmi nih kan herh tuk tiah ka ruah. Lai mino cat'ial thiam Pa U nih a blog ah a t'ialmi capar nihhin kan herhzia a fianh ngaingai ko. Thil dangdang kong zong tlo ngaiin kan iruah hna i kan lam tawisau hmanh kan thei lo. Kan i relh hlan ah khual donnak inn kan phan colh.

"A phan cangmi khual an um el maw?" tiah inn kan luh lecangka in khual donnak inn a hngaktu ka hawile pawl cu ka hal hna. "Aw...Dallas President Salai Sang Hu Lian cu a phan nain dongtu ka ngei a ti caah kan dong lo" an ka ti. Caan rau loah Chicago leiin Salai Tawk Za Lian (Tata) nih Pu Steven Thang cu "nan airport ka phan cang hih" tiah thawng a van thanh. "Aw, Irin nih a van in don ko khah.." tiah a hei leh cu ai lunghmuih kho tuk! Tha nuam takin "Like Like Like" tiin "Like" voithum bak a pek. Asinain, Irin he an van iton taktak cu a lau ko. A rak iruahchan bantukin Irin Van Neih Bik hi nungak a si lo, tlangval bak a si diam ai! Zaan t'im ahcun hmun dangin a rami vialte cu an tling dih ngawt cang. Nain, suimillam hleiruk chung motor a van imawnghmi Houston,Texas kan hawile tu cu zinglei pathum hrawng lawngah an phan kho. Seattle,Washington in a van rami kan u Sai Cung zong ai timhning nakin a tlai deuh vak. Zaan tim hlanah a phan ding a si nain Chicago ah a vanlawng sau tuk a dir caah zinglei pakhat hrawng lawngah a phan ve. Thaizing conference ah biatung dirh dingmi he pehtlai in timhtuah chungnak a ngeimi Central CYO upa hna zong an ihnak hlam dingin zinglei pahnih hrawngah inntang meeting room in inn cungah an kai ve.

June 7, 2014 cu zing suimilam pasarih hlan deuhah meeting tuahnak ding hotel ka phan i t'ukmat'ak tete ka siamremh. Lukmalak loah meeting thok dingin suaisammi caan, suimilam pariat cu a tling nain meeting kai dingmi minung kan tling nai lo. Pali-nga taktak lawng khi kan chuah kho. Kan mawh lo. Khual lamhlat ruangah le a dangdang thil herhmi tuaktan ruangah zahan zaan ah ih caan a ngeimi kan um lo. Nain, suimilam pakhat taitai cu kan hnu hraw lo___pakua hlan ah meeting kan awt kho ko. Kan General Secretary Salai Van Dawt Lian nih chun hlan chung meeting a kan hruai. Hramthoknak ah kan pastor Rev. T Hrang Kap nih Pathian sinah kan caan apnak a ngeih hnu ah CYONA President Salai Tial Khar Lian nih biatawi chimnak a ngeih. Tawi taktak telawng a chim nain ruahdingmi biat'ha tampi le thazang peknak biathlum tampi aa tel. "Kan tuahmi hi midang nih an hmuhning ruangah ah thachiat ding zong kan si lo i thapor ding zong kan si lo. Kanmah nih a hman tiah kan ruahmi a si poahpoah ahcun lungsau tein a dongh tiang kan t'uan cio ding a si ko. Mipi sinah a laarmi thil menmen kha tuah hna hlah usih. Kanmah nih fiang tein a hman tiah ka ruahmi tu kha teirialnak he hmai ah a nawrmi mino pakhat cio si dingin i zuam cio hna usih.." a timi ko nih ka lung a ka ton khun.

States kipin meeting a kaimi CYO upa hna

Chun hlan cu kan meeting a tluang ngai. Kan suaisam ciami a caan chung teah kan lim khawh caah kan ilunghmuih tuk cio. Nain, chun hnu cu kan ruahcia bantukin kan i tap diahmah. Zeicatiah, CYONA cu a ning piin a muisam thlennak ding Agenda chungah kan luh caah a si. Hmailei caan ahcun amah tein aa tumcop kho te dingin duhsaknak he rian khinhmi upa hna nih an suaimi CYONA phungsan thar cu laikhal caah cun lungfian ding a fawi lo. A hnoksak taktak! Asinain, meeting a kan hruaitu kan President cu a lung a sau hlei ah a fit tuk caah tluang tein kan lim khawh t'hiamt'hiam. Pumpak cio nih kan lungfianlonak zawn tete ah lungsau tein chimhfiannak a kan ngeih piak lengmangtu Salai Elisha Vahnie le Salai Dr Van Thawng Ling zongnih kan meeting an tluanter chinchin.

Zeiruangah dah CYONA cu a muisam(Structure) nan thlen, tiah biahalnak a tampi men lai. Cu hlan chungah tluang tein a kal pengmi CYONA kha a t'halo tiah ruah ruangah thlenmi a si hrimhrim lo. Aa thleng zungzalmi thil sining le caan chungah t'hawng deuhin riant'uan kho seh, tiah duhsaknak he thlenmi tu a si. A ngaingai tiah cun aa thlen hrimhrim a hau. Zeicatiah, Chinmi nulepa tampi nih thazang an pek lo caah chawva lei in a thazang a der tuk. A chung a kua.

I biatak ngaiin Meeting room chungah....

Chinmi cu a tlangpi in ramkhel kong le biaknak kong lawngah biatak tein kan buai huam__biaknak buu le ramkhel buu a si lomi buu poahpoah cu t'hazang pek phungah kan rel lo. Cucaah, biaknak le ramkhel aa hmaithlak duh lomi CYONA nih Chinmi nulepa tampi thinlungah hmunhma a ngei lo. "CYO nih kan Miphun caah a tuah khawhmi thamtham cu an umnak hmun cio ah dawhcah tein khua a sa ziarmi kan fale kha kum hnih ah voikhat pumh riangmang i an duhmi sualnak le nuamhnak poah tuahnak caan pek teh a si ko cu...kan fale nunzia hrawktu buu a si..." an ti i an doh. An chimmi hi a hman ngaingaimi a lo. Kum hnih danah tuah tawnmi CYO conference & tournament puaipi ahhin zoh a dawh lomi Chin mino nunzia tampi hmuh khawh a si taktak.Sihmanhsehlaw, zalong tein mino tampi iton caan ah a lang tawnmi Chin mino hna kan ziaza dawhlo hna hi CYO cawlcanghnak nih a chuahpi mi thil an si hrimhrim lo. Kan innchungkhar cio ah kan fale nih an ngeih pengmi nunzia an si ko. Kan mit nih a hmuh bal lo caah kan theihlo bia tu a si deuh. Cucaah, kan fale sualnak ruangah CYO hi mawh kan phurh ding a si lo i kan doh ding zong a si lo. Kan innchungkhar tuin kan remh hna ding a si.

Nulepa tampi nih an huatmi CYO cu an fale mino tampi nih kan uar ve. Asinain, mino tam deuh cu rian a t'uan rih lomi kan si tikah phaisa thazang in kan dirpi kho lo. Tikah, CYO cu phaisa thazang in a der ngaingai. Fiang bakin chim ko ahcun zapi nih a lengin hmuhning bantuk a si lo. Cucaah, a kan hruaitu upa hna nih a thazang t'hawnter deuh dingah le a dirhmun fehter deuh dingah lam kawl dingin duhsaknak nganpi he tutan conference hi an kan hrihhawhmi a si. Tikcu caan a phanh hlan ah bochanmi upa vialte nih CYO siamremhnak ding kongah voi tampi tonnak an ngei hmasa i hmailei ah t'hawng deuhin rian a t'uan khomi buu a si khawhnak dingah ruahnak phunkip an chuahpi. Chinmi chungin fimthiamnak sang a ngeimi mino hna nih an ruahnak an fonhmi in a chuakmi "Structure (Plan)" cu a ropui ko. A tiru tukmi Structure thar cu conference a kaimi nih sau lakte biahalnak le bialehnak kan ngeih hnu ah kan fehter caah CYO cu a muisam le a sining pi aa thleng cang. President nih a hruaimi buu in Board of Directors nih mitthlirhnak tangah Executive Director nih a hruaimi Non-profit Organization ah aa thleng. Mah hi thlennak nih aa tinhmi cu hmailei ah t'hawng ngaiin amah tein a dir khomi buu siter khi a si ko. Aa tinhmi goals aa thleng hrimhrim lo.

Chinmi chung lawngah chawva thazang kawl ti loin hmun dangdang zongah bawmhnak phunkip sawk kho dingin CYONA tharchuahnak ah hmai a kan nawrpi tu upa hna cungah lunglawmhnak a tam ko. Miphun caah an fimthiamnak, an caan le an thazang an chuah duhnak lungthin zoh tikah upat lo awk an t'ha lo. Online in siseh, hmaitonh in siseh voi tampi ton biaruahnak an ngeih hnu ah an chuahpi mi Structure thar cu conference a kaimi vialte lungfiang dingin lungsau tein chimfiannak an kan ngeih piaktu, Salai Tial Khar Lian, Salai Elisha Vannie, Salai Dr Van Thawng Ling, Mai Tha Tin Par le Salai Van Dawt Lian cungah lawmhnak a ngan hringhran. Ruahnak phunkip chuahin an kan hruainak thawngin CYONA cu hmailei ah a t'hawng chinchinmi buu a si hrimhrim lai, tiah zumhnak ka ngei.

Cincinnati cuanhnak tlangpar ah nuam taktakin...

Beach ah BBQ rawh pahin nuamhnak tuah dingin kan suaisammi cu kan meeting dih a tlai tuk caah kan let t'han. Nain, rianrang in a tlung colh lomi khual le inntek mino cu khua cuanhnak tlangpar in Cincinnati khua kan cuanh hnu ah Pu Steven Thang inn ah biaphawng kan deng hna. Salai Cung Lianthang Khenglawt nih a mak taktakmi capo bia ceilak an kan dangh caah kan i nuam tuk hna. Aa Hoi lebang cu a nihnak ah a paw zong fak dih! Zaan a tlai tuk cang caah sianglo ngaiin pakhat le pakhat mangt'ha kan icah hna. Cucu, zapi kan it'hennak caan a si beh ko. Cun, a thaizing ah Chicago leiin a rami Salai Tawk Za Lian cu Irin nih airport ah a thlah than.....