Obama nih aluancia kum hnih in ngeihkhat t'hitumhnak kongah a cohlan ning a tlen hnu in anmah pawl caah fak piin hmai a nuar caah dotlalo ah rak ruahmi hna nih atu bantukin tinco hnga an tinco khawh ve hi a si. Mah hi thlennak hi ngeihkhat t'hitumhnak a cohlang lomi States ah a ummi federal cozah riant'uantu pawl caah a hlei in a sunglawi khun. Zeicatiah, an riant'uannak ruangah an hmuh hnga dingmi miakmainak kha tingco kho lo dingin an umnak State nih an kham kho ti hna lai lo. Ngeihkhat t'hitumhnak hi States 19 le District of Columbia nih an cohlan cang nain States 31 nih an cohlang taktak rih lo.
An phaisa cungah cuang ko in Pathian bochannak kong a tialmi USA cozah pi nih ngeihkhat t'hitumhnak bak a cohlan ko mi cu Laimi tampi caah cun khuaruah har ngaingai a si ko. Sihmanhsehlaw, mah cu nakin khuaruah har deuh tuk dingmi a um!
Khrihfabuu tuanbia ah a hmaisa bik pakhat a si i atulio vawleicung zongah a t'hawng bikmi khirhfabuu komh pakhat a simi, Presbyterian nih ngeihkhat t'hitumhnak cu an cohlan ve. Khirhfabu 10038 ai fonh i members 1.8 millions hrawng a simi, biaknak association pi nih June,14, 2014 ah Detroit khua ah an tuahmi Presbyterians general assembly ah ngeihkhat t'hitumhnak cohlan/cohlanlo dingmi cu vote thlaknak an ngei. Meeting a kaimi dihlak i 71% nih an cohlan caah minung tampi sinin lawmhnak mitthli a luang. "T'hitumhnak" timi cu "nu pakhat le pa pakhat thengtheng ifonhnak lawng khi si loin aa duhmi minung pahnih ifonhnak poah khi a si ko" an ti. Cucaah, ngeihkhat t'hitumhnak a cohlangmi States ah a ummi Presbyterians khirhfabuu ahcun aa duhmi minung pahnih cu pastor nih an chiat'ha zoh loin zalong tein kutsih thlacam piaknak a tuah piak cang hna lai.
Vawleicung khrihfabuu nganbik pakhat nih ngeihkhat t'hitumhnak a cohlan cu Laimi tampi nih kan kalpi ning dan he tuak chun in zoh ahcun duk a sum hringhran ko. Sihmanhsehlaw, Presbyterians hi ngeihkhat t'hitumhnak a cohlang hmasa bikmi khirhfabuu an si lo. The United Church Of Christ le Reform and Conservative Movements in Judaism tibantuk khirhfabuu hna nihcun aluancia 2005 lio khan an rak cohlan diam cang hna. Zumhning le tleihtleng aa dang lengluangmi khirhfabuu tampi nih ngeihkhat t'hitumhnak an cohlannak hi a ruang aa khat dih. Cucu, "minung vialte hi Pathian nih aa tluk tein sermi kan si dih, ngeihkhat aa ummi he ngeihdang aa ummi he kan ilo ciocio ko, a hmai ah miding kan um lo" timi a si.
A sang tuk cangmi vawlei fimthiamnak zongnih ngeihkhat aa ummi hi a dirpi hna. Scientists hna nih minung kan sining hi zohfelnak an ngeih tikah pakhat le pakhat kan ilo hna lo. Kan duhmi phun aa dan ciomi kong khi kokek in kan ichuah pimi thisa sining aa dan cio caah a si. Mi cheukhat cu an thilri cu pa thilri a si nain a chuaknak thisa bakin nu lungthin a ngeimi an um. Nu a si nain pa lungthin a ngei i Nu a uarmi zong an um ve thiamthiam. Cucaah, mah cu bantuk minung hna nih an chuakkehnak thisa in an duhmi thil a simi kha hramhram in va kham cu mifim tampi nih thil dawhcahlo ah an ruah. A ngaingai tiah cun vawleicung university t'ha bikbik pawl nihcun ngeihkhat t'hitumh an cohlannak hi caansau pi a si cang.
Khirhfa aa timi Laimi nihcun atutiang ahcun ngeihkhat t'hitumhnak cu kan cohlang rih lo. A huat in kan huat! "T'hitumhnak" timi cu nu le pa ifonhnak lawngah kan ruah. Nudawk-padawk le padawk-nudawk pawl khi a tlangpi in kan zohniam deuh hna. Sihmanhsehlaw, mah khi kan zohniam deuhmi hna khi Pathian nih a ser hna ningte bak a si ve. Anmah duhthimnak a si lo. Cucaah, kan huat ding hna a si lo. Kan theihthiam hna i kan cohlan ding tu hna a si.
Zeitikah khin dah kanmah bantuk a si lomi minung khi an sining tein kan cohlan khawh ve te hna hnga? A cunglei ah ka langhtermi ruahnak nihkhin Laimi sinah hmunhma a ngei zau ve hnga maw?
***************
Facebook ah mah hi cabia nih a hmuhmi comment cheukhat;Mang Kung: Hi kong hi ka rak tial bal ve. "Saram ruahnak" tiah an rak comment bal. Kei ka rak tialnak ruang bik cu, zeidang ruangah si loin, 'Zei ruangah dah an caah khua an ruahpiak ve hna?" timi a ruat bal rih lomi careltu caah langhter ka duh ca ah a rak si. Obama nih a rak chimka i tialmi a si i a hlun ngai cang.. Same-sex thitumh kong Lai mit in cuan ve tuah usi..
NB Lian: Kung Kung nih a tial lio in siarem lonak ka rak langh. Hi kong lawng si loin zeizong te ah duhthimnak nawl he hrin kan si ko. A fundamental bakmi Presbyterians assembly pi nih a cohlan mi cu ka khuaruah a har ko! Keimah dirhmun cun ka si kho lo. Cun, na biatlangkawm bang in kan miphun cungah cun tlung hram hlah seh, ti ka duh.
Swoman Cinzah: Nuhrin covo upat mit in cuanh ahcun cohlang a fawi ko; Pathian nih minung a serning nature in zoh belte ahcun sining phung kalh a si fawn. Hi kong hi minung lei fimnak hlethlai tikah gender disorder ruang ah a si tiah hmuh a si.
Minung nih minung a hrin tikah thinlung, ruahnak le duhmi dihlak Nu (female) sining ngeih viar ttung i, a tak pum ah pa thilri rak ngeih/thlai tiabntuk hi minung tampi lakah a um ko ti a si. Cucaah, hibantuk in a rak chuakmi hi anmah duh a si lo- an chuahpimi a si caah, ngeihkhat i duh le i um hi an birth right a si ko tiah cohlang a si.
Cucaah, hi kong he pehtlaih in ka ruah ngaimi cu: "Gender Disorder" in a rak chuakmi hna cungah sertu Pathian maw kan mawhchiat kun lai? Nulepa lehlam cu mawchiat awk an thalo- an tuah tawnning in an hei tuah ko lai:) Pathian nih mipa le minu a ser hna ti vial in a dih lo- "karh" khawhnak hi a kan ser piak chih. Mah karh khawhnak "Ci" hmang in kan karh vima tikah, kan karhning le kan karnak ah dingte, hmante in karh zungzal ding hi, amah Pathian control nak tang a um ti lo caah maw, "gender disorder" hna hi an um khawh hnga? tibantuk hi a si. Lo (farm) ah thlaici kan tuh; hmaphek hna kan tuh, nain a kheu ning le a theitlai umtuning cu tlaici vawrhtu/ tuhtu cungah um ti loin, khua caan hawih in an kheu, an tlai i, a cheu hmaphet hna cu, minung pa thilri hna an lawh bantuk khi- minung sining he tahchunh awk an tha hnga maw tibantuk zong ka ruah len caan a um. Siaherh sawh ah ka rak i thlak ve.
Run Za Thang: Nan comments ka rel cio hna I ka lung tling dih, a holh khao deuh mi sin ah a hrawm ding phun in ka um. Ngeihkhat ( Sang Bawi tial mi ka hlan) hi zei tik hrawng in dah a rak thawk hnga? Bawizisuh chan lio hrawng ah hin tah a rak um cang hnga maw? Kei mah ruah nak ah cun Nu le pa kan I um mi cu tefa ngeih ding ah kan I um mi si, nuamh sawhsawh ruah ah cun si rua lo ka ti. Laimi zong kei mah ka theih mi ah ngeihkhat a um mi cu an um ko.(Biakinn chung ah cun si lo) Kan lai phung nih ma a awnh mi si ka tlei ve lo. A sau tu cu an um ti kha lo. A tu cu fa zong an ngei cang hna. Ngeihkhat I um hi cu zerpan sawh2 ah ka ruah ko. Pathian nih a kan ser ning te si ko ah cun a dongh tiang an I um ding si ko . A tu cu an huam ti lo in an I then I Va/Nu Pi an ngei than ko hna hi ta. US ah hin bawi a sang ngai mi si ning law ngeihkhat an um mi pawl hi I then khao lo ding in ka tuah hna hnga...
Zungzal Vakok: Kei zong ka cohlannak a sau ngaingai cang !!Pachuakthiam pumruatha Brad pitt he kan fonhtonh hna seh law thih hmanh ka ngamh lai.Cu vial ruah hmanh ah a cheuchum cu cohlan khawh a si ko ka hei ti.Cun ngeihkhat aa hiarmi le thitumh a duh mi hna hi an pum chung i homones pawl aa thlen ning a dik lo caah timi hi ka pom ngaingai.A ruang cu homone cu nupa si duhnak lei zong ah rian a ngei mi a si ve caah a si.Tahchunhnak ah kan ngakchiat lio i kan aw Upa aw nih a vun tlen hi kan kum nih a thlen mi si loin kan pumchung um homone nih a thlen mi tu a si an ti. Pasal pakhat nih nupi tu duh loin Va tu duh cu fawi ten an pom mi cu a si hrimhrim lai lo.Kiangkap zohchuhnak tampi mitchinh,lungfak in an tuar hnu ah ngeihkhat kherkher an i thim hi a si lai dah ka ti
Lian Lian: Nuhrin covo kan neih mi ( minung kalpining)in kan tuak ahcun pom pi awk ngai asi ko.A mahbel cu kan Bible ahkhin "Genesis 2:24 Cucaah cun pei pa nih a nu le a pa a kaltak hna i a nupi he an i fonh i pum khat i an can hi a si cu."ati ve hoi tung i Bible nih a kan cawnpiak ning he cun ai ralkah deuh rua tiah ka ruah.,Pa le nu timi hi i dang tein an kan ser i cu ai dang mi(kan i dannak kan chiatha,kan cawlcangh,kan ruahning...)pa le nu cu an i duh tikah hmunkhat ah um ti in pumkhatsinak an ser tu khi asi deuh ko hnga lo maw!
Vanblian Hlawnceu: Hi same sex thitumhnak le an covo kong chim tikah hin tleihtleng pakhat lawnglawng i tleih ahcun poipang suk a fawi ngai tiah ka ruah. Kan Khrihfa Bible nih cun same-sex marriage hi a hlawt taktak ko (1 Cor. 6:9;Lev. 20:13; Rom. 1:27). Vancung Pennak chung hmanh ah khumh lo dingah chiah an si. Bible cacang kherkher tein a tleihmi nih cun hi kalpi ning hi an tanpi taktak ve. Asinain, Christian Ethics le Liberation theology mit in cuanh ve ahcun, hi kongah hin Bible cacang ning tein kalpi cu kanmah bantuk Minung a si vemi hna same-sex pawl caah namnehnak le an nuhrin covo cungah hranhramnak va tuah a si ve thiamthiam. A ngaite ti ahcun, hi same-sex pawl hi anmah le zatlang ah hlanlio tein rak namneh pengmi an si. Kan Laitlang zongah Nudawk-padawt tiah nek ngai in kawh le zohchuk an si. Kum 2000 hnu dah ti lo cun Vawlei cung hmun tampi ah anmah le an umnak zatlang cioah namnehnak an tong. Cu bantuk pawl caah Khrihfa Khamhnak kan timi nih hin Thinlung, Taksa lei khamhnak kaltak riangmang i Thlarau khamhnak lawnglawng ah kan zuan ahcun kan khamhnak hi a tlam hna tling loin a um sual hnga maw? ti hi ruah ngaingai a hau ve. Cun nupasinak (sex tuah) hi "Tefa karhnak" lawngah maw a si? timi zong ruah awk a um. Kum 2000 ah Netherlands nih same-sex thitumhnak hi phungning tein a rak cohlan i atu ah cun vawlei cung ram 15 leng nih an cohlan cang. A cohlangmi ram pawl hi Khrihfa ram deuh lawngte an si fawn. Kawlram zongah kum 2013 hnu in same-sex covo kongah cawlcanghnak a thawng chinchin ve cang. Minung lungthin hi khawika hmun poah ah a samh chin uahmah cang. Kan Laimi zong nih hi bantuk kongkau ah hin kan lungthin le kan rauhnak kan samh deuh awk a si ve ko cang tiah ka ruah.
No comments:
Post a Comment