Zeiruangah World Cup Kong Ka T'ial Lo???

Ka cat'ialmi tete a rak rel tawntu pakhat nih naite ah ka sinah lawmhnak bia a chim. "Laica rel ka huam bal lo nain na cat'ialmi cu hrelhlo kai zuam" a ti caah kaa lawm tuk ve. A ngaingai tiah cun amah nakin keimah kaa lawm deuh men lai. Mah cu kaa lawmhnak cu ka hei chimh chin ve. "Hmailei zongah rak rel lengmang rih mu.." tiah lunghmuih ngaiin sawmnak bia zong ka chimh chih beh. Cun, hiti hin a bia a peh ve.

"Kawlram na um lio te khan ka rak in theih tukmi na si. Bawlung nan rak chuih lengmang lio zongah khan ka rak in zoh tawn hna. Bawlung na rak duh tuk ning lebang kha cu ka khuaruah a rak har tuk. Ka uar tuk ve mi lentecelhnak a si caah ka rak in upat ngai. Carel le cat'ial te hna cu a huam dingah ka rak in ruat bak lo cu teh! Nain, na cat'ialmi pawl ka rel tikah kan lawmh tuk t'hiamt'hiam ko. Ka khuaruah a harmi tu cu na blog ah bawlung kong na t'ialmi pakhat hmanh ka hmu lo. Zeitindah na sining si? Atulio lebang cu World Cup aa thokka a si le tampi in bawlung chuih kong van t'ial kho law ka duh taktak" a ka ti.

A chimmi hi a hman bak! Bawlung cu ka rak duh taktak! A molh in ka rak imolh pimi leekcelhnak a rak si ko. Atu zongah ka duh tuk rih t'hiam. Caan lawng ka ngeih poah ahcun ka zoh peng ko rih i chuihthiam hna zong keimah unau bantukin an min ka theih ko rih hna. Asinain, tuan deuh thlukin ka duh hramhram ti lo. Kaa sum! Zeicatiah, pumpululh chuih le ka dirhmun aa rem lo ngai cang. Nulepa umlo nak ram ah keimah telawng in khua ka sak cang caah riant'uan kho lo lakin ikhawn lai ka t'ih. Pumpululh chuih nih le khawnden a fawi tuk fawn. Cucaah, ka duh tuk nain a thli tein ka hrial hramhram. Ka tuah bal lomi tennis tuk tu ka cawng.

Ka lungchuakmi thil tete hi ka blog ah ka t'ial tawn nain pumpululh kong hi pakhat hmanh aa tel tak lo. T'ial dingin ka lungah a chuah bal lo caah ka t'ial lo a si lo. A caancaan ahcun t'ial thluahmah dingin ka lungah a chuak ko. A sining ka theih bikmi lekcelhnak phunkhat a si caah ca dangdang nakin fawi deuhin ka t'ial khawh zong ka zumh fawn ko. Nain, ka t'ial hramhram lo. Zeicatiah, t'hathnemnak ngaingai a kan pe lo nain Laica in (ca dang he tuak chun ah) tamtuk kan t'ialmi a si tiah ka ruah caah ka hrial hramhram. Hmailei ah ka t'ial bak lai lo tiah cun ka chim ngam lo. Zeicatiah, zalong ngaiin a duhmi poah tuah a hmangmi ka si. Sihmanhsehlaw, World Cup tuah kum a si ruang menmen ahcun t'ial hlei kaa tim lo. TV in an chuihmi zoh le midang nih an t'ial ciami rel tu ah thazang ka chuah salam ko lai.

Father's Day camtuak a si bantukin Father le Innchungkhar kong tu hi tampi in t'ial ka duh. Nain, ka duhning in ka t'ial kho lo. Ka theihhngalhnak a tlawm tukmi issue a si caah a har khun. Zeisikhom ah tlawmpal te tal cun van t'ial ta cu ka duh tuk. Catlang ser dingin khua zaza kaa ruah sek nain a chuak bak lo. Ka zoh pah cuahmahmi "Ivary Coast Vs Japan" puai nih ka lung a ka lak ngai ca zongah a si kho men. Nain, World Cup kong cu ka t'ial rih hlei lai lo.

Fanu fapa a ngeimi Pa vialte hna biahal kan duh hna; na nupi, na innchungkhar le na fale nakin World Cup kha biapi deuh ah na chia sual maw? 

Pabik lo cun innchungkhar Foundation a fek kho lo. Innchungkhar cu miphun Foundation a si. Chin miphun nih kan Foundation taktak cu chungkhar hruaitu Pabik hi nan si ko.

Ka pa, thlanti he thabaat tuarin ka caah rianhrang phunphun na t'uan hlei ah harsatnak in a khatmi vawlei ah keimah tein khuasa kho dingin na ka cawnpiaknak cungah lunglawmhnak chim cawklo ka ngei. Upatnak kan pek! 

Happy Father's Day!!!