Zeitulkin dah nulepa hi an fale kan nunning ruangah an thinlung a fah lai? Laitlang bantukin fale nunchimhnak ah tukden a ngah ti lo tikah an si a vang hringhran ko lai. An mawh hrimhrim lo. Cucaah, kan pawngkam ah kan hmuhmi mirang nulepa nih nichiar tein an fale sinah an chim pengmi bia thlumthlum hna khi kan nulepa hmurka in kan theih ve bal lomi zong khi khuaruah har ding a si lem lo. An fale nih kan ihlawhlo tuk hlei ah kan nunphung zongnih thazang a pek tukmi fale conglawmh dan a si lo caah anmah palh a si lo. An fale kanmah palh a si ko.
Nulepa tampi nih fale palhnak ah kan ruah sualmi kanmah palhnak pakhat a um ve rua, ka ti. Cucu, kan fale nih Laiholh an thiamlonak kongah a si. Ramthumnak ah a ummi Laimi tampi cu fale mino nih innchungkhar ah Laiholh in an holh ti lo. Mirang holh rumro in an holh. Zatlang in mibu itonnak zongah mirang holh nih hmunhma a lak ngaite. Lai hngakchia tampi cu Laiholh in bia van hal deuh ahcun ninghngal ngaiin "I Don't Know" an ti mei ko. Laimi a si ko nain Laiholh a thiam lomi fale a ngeimi nulepa tam deuh cu an fale sining cungah an hmai a hngal lem lo( mi tlawmte tu cu an fale nih Laiholh an thiam lomi kha a uang bakin aa uangmi zong an um ve ko).
Laiholh a thiamlo mi fale a ngeimi nulepa tambik nih an chim tawnmi cu "kan fale hi cartoon rumro an zoh i kan chimhmi hna zong zeihmanh an ngaih duh lo caah Laiholh zong an thiam ti lo nak a si" ti hi a si. Laimi tampi he aa hlatnak hmunhma ah khua a sami mi cheukhat nihkhin an umnak hmunhma le an fale rumro khi an puh ve hna. "Kannih cu hmundang pi ah kan um tikah kan fale nih Laiholh in lentecelh hawi an ngei loh le Laiholh zong an thiam ti lo" an ti ve. An chimmi hi a hmanmi a lo ngai. A si zong a si pah tak ko lai. Zeicatiah, minung hi pawngkam le thil sining dangdang nih kan nunnak a hip khawh tuk! Sihmanhsehlaw, Laiholh a hmangmi nulepa nih an ngeihmi fale nih Laiholh an thiamlo cu nulepa mawh a si ko. Thildang silhnalh len awk a um lo.
Nulepa tampi cu sifah tuknak ram in caan tlawmpalte chungah ramrum tukmi kan phanh tikah chawva lawnglawng kan naam. Kan mawh hrim lo. Sifah harsatnak kha kan nunnak nih fak tukin caan sau tuk a rak tuar cang caah luat kan duh tuk ve. Laitlang ah kan tantakmi kan cingla rualchan zong kha kan lungah an tap tuk fawn. Kan sining thar kha zeimawzat tal hrawmh kan duh hna. Cucu, aa dawh tukmi nunzia a si ko. Sihmanhsehlaw, zapi cu kan umnak ram nih a herhmi hmanrua thiamnak kan ngeihlo hlei ah an holh hmanh kan thiamlo tikah hawidang nakin kan nihlawh a niam deuh. Tikah, kan duhmi kha zeimawzat tal kan tlamtlinh khawhnak ding ahcun midang nakin caan sau deuh pi riantuan kan hau. Cucu, Laimi nulepa tam deuhnih kan duh zong duhlo zongah kan zulhmi lam a si ko.
Nunnuamh deuhnak ding caah riant'uan ihnek hi a sualnak a um lo. Upat awk a tlak tukmi nun dawh a si lehlam. Sihmanhsehlaw, Laimi nulepa tampi cu Over-Time(OT) hmangin chawva kan kawlnak ah kan fale kan philh hna. " A ngaingai ah rethei le thaba in rian kan t'uanmi cu kan fale caah pei a si ko cu.." tiah nulepa tampi nihcun an ti ko lai. Cucu, thil hman ngai a si ko. Asinain, kan fale nihhin an herh bikmi hi chawva rumro a si lem lo, timi hi kan fiang tawn lo. Tikah, kan fale nih nulepa sin in an herh bikmi "Nulepa Dawtnak le Zohkhenhnak" pek kan philh hna. Kan fale nakin chawva kha biapi deuhah kan chiah tikah an hmailei t'hatnak ding timhtuahnak ah phaisa phum/hman piak cu chimlo, atulio ah an herhmi thil koko hmanh ah kan chawva cu kan hmang siang lo. An zawt sual zongah cazoh sinin ngandamnak aamahkhan an hmuh lo ahcun sii inn ah kan panh pi duh hna lo. "Phaisa a dih tuk sual lai" kan ti. Sianginn ah an ei dingmi an chuncaw ca hmanh ah phaisa fangkhat thawh kan zeng. Cucu, fale nakin chawva kha biapi deuh tukah kan chiah caah a si.
A si! Kan nihlawh a niam caah Over-time kan t'uannak ah hawi hlei in kan baa. Thabat ahcun ai rumro a puang ko. Sihmanhsehlaw, thlanti he kan kawlmi chawva nakin Pathian rosung bik fale hna hi an sunglawi deuh, timi hi kan philhlo a hau. Kan fale hi an sunlawi zia kan fian taktak ahcun kan dawt deuh ko hna lai. Kan dawt deuh hna ahcun kan zohkhenh deuh ko hna lai. Kan t'habat ko zongah hmurka thlum in kan fale kan chawnh khawh deuh hna lai. A diklo tukmi cu kanmah holh in holhlonak ram ah khua kan sa ti kan thei ko nain kanmah tuahsernak tal loin kan fale nih Laiholh in an holh lai, tiah kan ruahmi hi a si. Kan fale nih Laihloh an thiamnak ding ahcun Laiholh a hmangmi an nulepa nih Laiholh in kan chawnh peng hna a hau. Kanmah nih ingpuang lakin rian kan t'uan i Dawtnak awneem in kan fale kan chawnh tung hna lo ahcun mirang holh lawng an thiammi hi kan khuaruah har ding a si lo. Pawngkam minung le media hmangin chunchun zaanzaan in annih nih an theihmi Dawtnak aa telmi aw cu Mirang holh lawngte teh a si fom cu!
Laiholh a thiam lomi Lai hngakchia kan tamtukmi hi cu a poi bak ko. Kan caholh hmanh kan thiamlo ahcun kan tlau zau lai, timi cu a fiang tuk. Ummm...khirhfabu le a dangdang zatlangbu zongnih tuanvo a ngei ve ko. Sihmahsehlaw, ahodah a palh taktak???
Relchap: Kan Innchungkhar Nih Kan Fale Nunnak A Chilhlo Ahcun..??
No comments:
Post a Comment