August

"Thla" timi biafang telhlo zongah "August" cu "August Thla" khi ka chim duhmi a si ko. "August" cu kum khat chungah a ummi thla hleihnih lakah thlakhat sawhsawh khi a si. Christmas thla zong a si lo i kum thar thla zong a si lo. Thawht'han thla zong a si fawn lo. "Chin Miphun Ni" he zong pehtlaihnak a ngei lo. Laimi nih kan sunhlawih ngaingaimi ni nikhat zong khi August chungah a um lo hrimhrim. Atu hi a dong deuh vak fawn rih lo. Nain, ka cabia tlangtar ah ka hman ko. A ruang cu tukum August hi ka caah a mak tuk! Chinchiah tlak thil tampi ka ton i lunglawmhnak tluachuah tampi ka co. Cu chungin tlawmpalte tal van chimphuan loin ka um kho lo.

US ahcun hawilekom le chungkhat he ITON caan khi caan sunglawi bikah ka ruah (ka sunhlawih tuk caah ITON timi poah cu cafang-lian in ka t'ial ko hih). Zarhkhat ah voikhat, biakinn ah zumtu hawidawt he ITON zong khi a sunglawi tuk ko. Nain, caansau pi aa hmuti lomi hawilekom he ITON khi cu a nuam lawlaw. Thil dangdang nihcun an tluk bak lo. Laitlang ah ka rak t'hant'i hawile he kan ITON caan lebang ahcun kaa nuamh tuk ahhin ih hmanh ka duh huaha tawn lo___zaan khuadei in biaphawng den rumro khi ka duh. August nikhat ahkhan Indianapolis ka tlawng i Laitlang ah ka rak t'hanpi hawile tampi he kan itong. Zaan khua cu kan dei lo nain ngol hngal loin zinglei pathum dengmang tiang bia zaza kan iruah.

Tutan Indianapolis ka tlawn cu rian herh tampi kemh dingin kaa timh caah zaan khat ka riak. Kan khua in kaa thawh lecangka in Indy ka hawile cheukhat cu "ka van ithawh cang" tiah text ka kuat hna. Kaa suaisam ning bantuk tein zanlei suimilam pasarih hlan deuh ah an khua chung ka lut. Nain, ka hawile sin ah ka kal colh lo. An fapa damlo ruangah Laitlang in US a rak tlawngmi, Thantlang kan innpa nupa sinah ka leng hmasa. Kan biaruah a dong kho loh i ka phone cu a tur lengmang cang. Zan suimilam pahra a si cang caah "nai manh deng cang maw?" timi text a van lut leklek. Innleng ka chuah bakin hnawhsare in Pate te inn ka panh. Ka tummi innka darkhing thawng ruangah kutka ong dingin a rak chuakmi cu Pate a si lo. An nu, Chinchin, zong a si fawn lo. Van T'ha tu a si. Sofa cungah zau pah nawnin Biak Biak zong a rak t'hu ve cang. "Par Ku cu zaan ah rian a t'uan," an ka ti. Kan kut kan itleih dih tlawmpal ah Indianapolis in suimilam cheu renglong deuh motor mawghnak, Avon, ah hmun a khuarmi Pa U nih innka darkhing a van tum ve. Biaphawng den hram kan van thok bakin Biak Biak cu letphettoh le tisa ser dingin coka lei ah a kal ve.

Biak Biak nih a sermi tisa chem pahin bia zaza kan i ruah. Zei kong thengtheng khi ceih hleimi kan ngei lo. Kan lungah a ummi poahpoah kha zalong ememin kan chim cio hna. Online in cun kan ipehtlai ngai hna nain hmaitonh in hmunkhat ah bia kan iruahlonak caan a sauh ngaingai cang caah chim dingmi kan ngei tuk cio. Issue tampi ah kan ruahning aa khat lo nain kan ceihmi issue poahpoah ah kan tlo taktak! Topic dang tlukin kan tlo tuk lem lo nain kan ruahning aa khat dih ngawtmi thil pakhat a um. Cucu, Laimi nih kan ngeihmi a buu (institution) in riant'uannak lakah a nganbik a simi, Khirhfa biaknak nih zumtu a simi Laimi sifak-santlailo cungah a ngeihmi a lungput kongah a si. "Hihi cu hitihin a si awk a si deuh tak ti lo ti,"kan ti dih. Lai khirhfabu nihhin home mission kan daithlanh tuk lawmmam ko rua, tiah kan ruah cio.

Laimi le Khrihfa biaknak cu t'hen awk a t'ha lo. Khrihfa biaknak cu zumtu pumpak nunzia lawngah si loin Khrihfabuu muisam ah a sining a langmi a si ve. Pathian dawtnak thawngin Laimi zong vawleicung ram t'hat'ha ah a tomtom in kan phan  hna. Holh theihlonak ram ahcun mahcarei in khuasak cu a har deuh caah a hlum deuhin um kan izuam. Hmunkhat ah Pathian thangt'hatnak ding caah tiin Khrihfabuu tete zong kan ser hna. Amah Pathian lamhruainak thawngin kan sermi Khrihfabuu cheukhat cu an ngan ngaingai cang. Members a thong renglo a si i kum khat ah cheuhra cheukhat in a lutmi phaisa hmanh hi million pakhat hualham a simi kan um pah cang. Laimi chungin khuaruat kho upa lungfim nih an kan hruai i a lamkip in zoh tikah kan t'hangcho hringhran. Rammui ah ceunak thawngt'ha a karhnak hnga caah tiin chawva tampi dihin thazang chuahin rian kan t'uan. A t'ha tukmi thil an si dih. Nain, kanmah Khrihfabu chungah sifak-santlailo mi caah rian kan t'uanlo ngaingai. T'hihnak kan ton ahcun chawva le caan tampi dihin kan izuanhnawh tuk nain thil phunphun ruangah hawi alo lo deuhmi, sifak-santlailo caah khrihfabuu nih bawmhnak ban kan zo bal t'heng lo. Lai Khrihfabuu nih kumtin in kum khat caah a hran in phaisa hmannak ding an suaisammi ah "member chungah bawmhchanh hau deuhin a ummi sifak-santlailo bawmhnak ding caah" tiin phaisa a sangsenmi ka thei bal rih hna lo. Ka biaruah hawile zongnih an thei ve bal hlei lo____kanmah theihlo tuk bia zong cu a si kho ko.

Voi tampi cu Khrihfabuu nih zangder deuh le santlailo deuh kha bawmhnak kutnem chan loin a nam tuin kan nam lehlam hna. Cucu, chungkhar buaibainak pakhat khat ruangah aa t'henmi nuva kan fonhtonhnak hna ahhin a lang khun. Laimi hi miphun dang he tuakchun ahcun nuva aa t'henmi kan tlawm ngaite. Thilt'ha tuk a si. Hiti hin aa t'henmi kan tlawmnak hi a ruang a tampi. Cu lakah al awk t'ha loin aa tel vemi pakhat cu aa t'henmi pumpak nih a duhlo ko nana in tongta fonhin fonh kan hman caah a si. Nawr chihin mi fonhnak ahhin t'uanvo ala biktu cu Khrihfabuu ah rian a t'uanmi upa le pastor deuh hi an si zungzal. Tikah, Lai Khrihfabuu poahpoah nih a tlang piin kan kalpi mi ningcang a si, ti khawh a si ko. Hiti ka ti tikah nuva it'hen hi a t'ha ko, ka ti nak a si hrimhrim lo. Innchungkhar a kuai ahcun falenau ca cu chim lo, sanglezawl ca tiangin a t'ha loh i khualeram tiangin a rawk kho. Nain, zeitindah khirhfabuu nih aa t'henmi innchungkhar kan remh, timi cu ruah awk a tam ko.

 Laimi chungah aa t'henmi nuva tam deuh cu Pa nunzia le tuahsernak hmanlo ruangah a cangmi an si, kan ti ahcun kan palh lem lai lo. Biadang in chim ahcun a nupi nih a in khawh bak tilo ruangah aa t'henmi kan tam. Tikah, aa t'hemi nuva ahkhan Nu kha thazang in santlaihlo ruangah fahnak a tuarmi (victim) a si. Laimi nih Nu cu a chanchan in tangniam deuhin kan zoh peng hna caah mah le mah izumhnak lei ah an chambau deuh ngaingai. Fa ngeitu le innhngaktu lawngah kan ruah hna caah pawcawmnak dingah an thiammi rian zong a tlawm deuh fawn. Vale bochan in khua a sami an tamtuk! Cu nihcun an santlaihlonak kha a ngan ter chinchin. Mah cu an sining le an dirhmun cu an thei ko nana in an pasal sin in an zaam cangmi khi cu bawmh a herh taktakmi minung an si cang(Hiti ti tikah a va he aa t'henmi nu poahpoah hi a palhmi an si lo, ka ti duhnak a si lo). Mah bantuk minung pawl khi an va sinah kir colh dingin Khrihfabuu nih kan naam hna awk a si lo. A bawmh tuin kan bawmh hna awk a si. An herh ahcun inn kan hlan piak hna i rawl kan pek hna awk a si. An lungrawhnak kal takin rian an tuan i anmah ke cungah an dir khawhnak hnga, an herhmi bawmhnak poah kan pek hna awk a si. Anmah tein aa zohkhenh kho mi an si i an lungthin a dam tikah anmah duhthimnak in an innchungkhar cu an ser t'han awk khi a si ko hnga.

Lai Khrihfabuu nihhin mission le a dangdang caah phaisa kan sangsen bantuk khin a cunglei ah ka langtermi sifak-santlailo bawmhnak ca tibantuk ahhin phaisa sangsen cio si sehlaw kan Khrihfa si nak hi aa dawh deuh tukmi zumhnak a si hnga, tiah kan hawle rual cun kan ruahnak kan chim cio. "A biapi bikmi nan si" tiah kan ti lengmangmi mino le "kan thlarau rawl petu" tiah kan upat ngaingaimi, Pastors te ca zongah khihfabuu nihhin chawva siang deuh hna sehlaw a t'ha chinchin hnga, ti bantuk zong khi kan ceih len nain ka t'ial ti lai lo. Tlawmpal tein "Duhnak Ramvai" timi cauk kong tu ka van thai lai.

Ruak hmum dingin kan khua ah a rami Bawi Pi nih "Duhnak Ramvai" timi cauk a ka purh. An motor hnulei kutka in uk ruk a van chuah i "uk khat cu kan t'henh" a ka ti. Lawmhnak bia chim pahin uk nga man cu ka pek colh ve. Motor in thlankhur lei kan kal pahin cat'ialtu kong le a cauk kong kan ceih  pah. Kan itonlonak a sauh ngai ve cang caah ruak a hmummi khom kan lo lo. Duhnak Ramvaipa kong cu tlo ngaiin thlankhur kam ah a dirmi mibu pi sin kan phanh taktak tiangin kan ceih ko. Hi kan hawipa,  Bawi Mang Lian, hi cu Lai mino ahcun ai za bak ko, kan ti veve. " Na rel dih cang maw" ka ti i "Dal thum tiang lawng ka lim rih" a ka ti.

Duhnak Ramvai hi rak caw cio u.

Rel lai kaa ngaih taktakmi lenhloi cauk cu a thaizing chunlai in rel ka thawk. Ka kalnak hmun poahpaoh ah kaa ken i dinh hngal loin ka rel. Dal khat nak ka rel dih ah Norway holh pakhat kaa chap. Ka motor ah datsi ka thun pahin "bensen" tiah ka chim.hehe...

"Duhnak Ramvai" cu Laica in a chuakmi  lenhloi ahcun phundang te a si. A tuanbia serning hi a sawhsawh a si lo. Ramdang ah khua a sami Lai mino nih a taktakin kan ton chuahmahmi thil tete kha Laitlang in kan irat pimi ruahnak le nuning hna he fonhtonhin sermi tuanbia a si caah uar a um khun. Laimi nih chimceih phung lo ah kan ruahmi sex tuahnak kong zong pianghlang ngaiin a phuan caah rel a nuam khun. Dal hleithumnak hrawnghrang cu van rel ahhin chung a kik pah. A nuam tuk! Sex hi cu Nu le Pa nih kan iduhdawtnak ah aa tello kho lomi thil pakhat a si ko caah thuh len dingmi a rak si lem lo. Mah bantuk kong tete hi Laica in van t'ialnak nih Laica thawtnamnak zong a karh ter. A thlum-al deuhmi cu minung tam deuh nih duh a si ko caah Laica t'hanchonak zongah bawmchantu a si lai, tiah ka zumh.

Inn ka phanh hnu in ka thlah ti lo. A zaan lila ah a hmailei phaw in a hnulei phaw tiang ka chuah. Bawipi nih hmun dangdang ah ka kua rihlo a ti caah US ummi Laimi ahcun "Duhnak Ramvai" hi a rel dih hmasa bik ka si hrimhrim lai dah ka ti. Cucu, ka caah cun August thluachuah phunkhat a si ko. Cat'ialtu cungah kaa lawm. A ka phurhtu Bawipi cung zongah kaa lawm. A hlawizia ka thiamlo caah Nau Bawi nih Facebook ah a hlawimi chungin ka duhnak bik zawnte ka var char.

Miphun lianlian hna an tirawl he a or ai ziak tuk cang mi asi ko, nain. Laichi le bawnbok , hamhhuai , annthur , belawi tbt a tlaihchan tuk ruang, Vanmi ah kan rak ruah mi hna Mirang nu dawhdawh le elbom tthattha lak ah Ram a rak vai ko . A meithal zong a rak puah len ko nain, Lainu he theng kan thlanrim kan ihnimh ko lo tiah a sahliamh zong a dawi ti lo tu, Ramvaipa.
 

$341.72 in ka cawkmi textbook

August cu sianginn luh thla a si. Thla thum dengmang sianginn kaa dinhnak in zanlei fate sianginn lam ka panh t'han. Sianginn kai hi ka huam ngaimi a si nain sianginn luh thla hi cu ka hua kho tuk! A t'ih in ka t'ih! Zeicatiah, ka bank a ro deng zungzal. Tutan zong a si t'hiamt'hiam. Mitchinh kam sehin sianginn man cu a donghnak bik ni ah ka liam. Nain, textbooks ka caw dih lo. Aman a deng deuhdeuhmi lawng ka cawk hmasa. Aman a fak tukmi pahnih cu caw thai loin kaa chang thai kho te men lai, tiah cacawnnak khan chung ahcun zarhkhat chung cu ka lut phawt.

Ka hrialmi textbooks man fak pahnih cu cawklo awk an t'ha lo, ti ka fiang t'han. Pakhat cu Amazon ah man deng ngaiin hmanciami ka cah. A dang pakhat tu cu access code he aa kemh chih caah kan cauk dawr ah ka cawk colh lo ahcun homework a tuah kho ding ka si ti lo. Tikah, cauk zuarnak hrawl cungah cuang didiai in aa thuatmi cu aman zoh pah buin zanguai nawn in ka lak. Cashier nih aa kenmi meiceu seh tein "beep" tiah a van kah cu $341.72 bak a cuang ko. Ka bank account kong a ruatmi ka thluak nih panh kho huaha loin a chiahmi ka hmai cu cashier nu hmaikah loah kaa panh ter chih buin ka bank card cu ka ziah. "Cauk pakhat a si komi hna mah zatzat hauh hna cu" tiah ka lung chungin voikhat zai cu ka zai. Nain, Ka lungthin nih "Pathian thluachuah a si" tiah a van ka chimh colh t'han. Thluachuah a si taktak ko. Hngakchiat lio ah innpa he satpia a rak ihlang komi nih cauk pakhat man ah kawlram phaisa in 300000 hrawng ka liam khawhmi cu Pathian thluachuah a si loah zeihme a si hnga? Ka cungah Pathian a t'hatzia ka fian t'han colh caah lung nuam tein ka duhmi poah tuah t'han dingin thazang ka ngei colh t'han.

Hlasak ka thiam lo. Nain, hla ngaih cu ka huam taktak___hla fungkhat tal ngaihta loin ka ihkhun cungah ka kai bal theng lo. Love song zong ka ngai i Pathian hla zong ka ngai t'hiamt'hiam. Laihla lawng ka ngai lo. Mirang hla le Kawl hla zong ka ngai pah peng. Mirang hlasa ko hi ka uar cem hna.

Mirang in Pathian hla a sami lakah ka duh bikmi cu Hillsong an si. Harsatnak phunzakip nih a zelhmi vawlei ah lungretheihnak le harnak phunkip nih ka nunnak hi a chilh theo. A caancaan ahcun ka thazang a der i ka lung a dong dengmang tawn. Sihmanhsehlaw, Pathian nih khuaruahhar in an awzai a hmanmi hlasa bu, Hillsong, nih an sakmi hla pawl ka ngaih hna tikah thazang thar ka hmuh lengmang. Zumtu pakhat ka si nakin ka nun lamthluan ah sullam an ngeih tuk caah hmaitonh in hmuh ka rak duh tuk peng hna. Cucu, nizan tihni ahkhan kan khua ah hlasaknak puai(show) an rak tuah i ka hmuh hna. The Bank Of Kentucky Center ah an tuahmi "No Other Name" show cu Messiah, HlawnHlawn le T'ha Ku tiin kan va zoh ve.

Kan ticket cio ken in innka kan van luh cu kan lau ko. Thutnak todan hmanh an chiah rihlonak, stage a hmai zawn bak ahkhin kan duh ahcun dir kan ngah. Pakhat le pakhat kan ikawlnak ah a hmun kan phanh a tlai deuh caah a hmaicem tlang ahcun dirnak kan ting lo. Nain, kan itenh lengmang i a donghnak ahcun a tlang thumnak ah kan dir kho. Anmah hlasa tu he kan i neih tuk caah a hramthok ahcun siarem loin ka tickets ka zoh t'han pah lengmang. Music dawhdawh he a rami an hlabia thlumthlum lakah lawmhnak lungthin he aa hlawkmi zumtu mibu pi chungah awcareng chuakin ka t'hilrit vialte ka t'humh ve. "I've decided to follow Jesus, no turning back, no turning back.....Christ is enough for me" tiah Pathian ka thangt'hat khawh caah kaa lunghmuih hringhran. Pathian cu lungthin dihlak, ruahnak dihlak, thazang dihlak le awzai dihlak in t'hangt'hat ahhin taksa nih damnak a hmuh i nunnak cu lawmhnak in a khat. Cucu, ka August thluachuah sunglawi cem a si ko.