Obama Cozah Nih ISIS Pawl Hi Syria Ram An Umnak Hmun Tiangin A Naam Hna Lai Maw?

US humhimnak vuanci(Secretary of Defense) Chuck Hagel le U.S ralkap bawizik General Dempsey hna cu kan hnu zarh nili ni ahkhan atulio vawleicung ah duk a summi ralhrang pawl cawlcanghnak ruangah a cang cuahmahmi buaibainak phunkip le US humhimnak kong he aa pehtlaimi thil dangdang kongah fianternak tuah dingin Patagon ah a ummi an thawngfianhnak innkhan ah an van chuak t'i. An tonak dingah rak chiahmi, cabuai he aa hungmi, t'hutdan ah an tawt'awk an chiah lecangka in secretary Hagel nih biatawi chimnak a ngeih hmasa. Hramthoknak bia a chimmi cu minutes panga telawng a sau nain thil tam taktak a kemh khawh.


Hagel and Dempsey in Pentagon

Secretary Hagel nih a biahram domhnak cu ISIS nih a hngawng an tanmi James Foley kong a si. "Minung ruahnak hmanh a keng lomi ISIL ralhrang nih miralt'ha James Foley cu dawhcahlo tukin an t'hahmi cungah kan lung a fak i kan ngeih a chia. Theihter kan duhmi hna cu James Foley telin ralhrang nih an tlaihhrenmi Americans pawl khamhnak ding caah tiin tukum t'hal thok ahkhan vanlawng in kan ralkap nih Syria ram ah hmun pakhat an rak luhhnawh. Nain, kha caan lio ah kan theih khawh colh khawh lomi hmun dangah an rak t'hial manh hna caah minung pakhat hmanh kan rak chanh kho hna lo" tiin a hram a domhmi a bia cu harsatnak a tuarmi Iraq mipi chanhchuah dingin US nih an izuamnak ah bawmhnak ban a zomi Britain le ram dangdang sinah lunglawmhnak biachimnak in a donghter.

Ralbawizik Dempsey cu ralkap aa theihnak ah a bia a tawi chinchin. Minute pahnih hmanh a sau lo. Ralkap hruaitu a si bantukin atulio ah US ralkap nih Iraq ah an cawlcanghnak kong he aa pehtlaimi deuh lawng bak a chim ko. Cun, an pahnih in thawnglatu sin in a rami biahalnak hna cu pakhat hnu pakhat in suimilam cheu chung dengmang lehnak an ngei. Thawnglatu hna nih biahalnak phun tampi an hal hna lo. Iraq ram ah van ralkap hmangin an doh cuahmahmi, James Foley hngawngtantu, ISIS muslim ralhrang pawl kong rumro a si ko.

August 8,2014 thokin Syria le Iraq ram ah hmunhma a khuarmi ISIS ralhrang cu US nih van ralkap hmangin Iraq ram chakleikam ah an doh hna I nizan tiang ahkhan voi 94 bombs an thlak hnawh cang hna. US bombs thlakmi nih ISIS cu fak piin a hrawh hna caah vawlei in a rak naamtu Kurds le Iraq ralkap nih an hmunhma an chuh t'han diahmah hna. Cuticun, Iraq ram ah a lian bik a si i Sunnis miphun deuh an umnak Iraq chaklei pang vialte electric mei a petu tikham, Mosul dam zong cu ISIS kutin an lak t'han khawh cang. Sihmanhsehlaw, Obama cozah nih atu a kalpi ningin bombs an thlakmi le Kurd+Iraq ke ralkap raldohnak nihhin ISIS cu an hloh thai taktak khawhnak ding a um lo. Zeicatiah, ISIS cu Iraq ram lawngah hmun an khuar lo. Syria ram nichuak-chaklei le Iraq ram chaklei kha fonh in Muslim ramthar an ser. An sermi muslim ramthar cu Syria ram ah a ummi Raqqa khua in an uk. Phundang in chim ahcun Syria ram ahhin an hmunhma khuar ning a t'ha deuh.

ISIS nih a hngawng an tan tiah ruahmi James Foley

Ralhrang nih Foley an rak tleihnak hmun hi Syria ram chungah a si tikah thawnglatu hna nih "ISIS hi Iraq lawngah nan kah hna i Syria ah nan kah ve hna lo tikah zeitindah an ci mih khawh lai" tiah bia an hal hna. Ralkap kong he direct in aa pehtlaimi biahalnak a si caah ralbawi Dempsey nih hiti hin a leh. ISIS hi tinhmi nganpi a ngei i suaisam ciami ningcang te he a thomi ralhrang bu nganpi pakhat an si. Tikah, Syria ram ah hmun a khuarmi pawl hi kan kah chih hna lo ahcun kan hlo kho hrimhrim hna lai lo. Cucu, a fiang tukmi a si ko. Asinain, van ralkap in kah hna hi cu an cihmih khawhnak dingah a herhmi thil tampi lakah pakhat menmen khi a si. Thil dangdang tampi nih a hnu in a zulh a hau. Hiti ka ti tikah US nih kan tuah theng lai tinak a si lo fawh iai. General Dempsey nih aa ralrin tuk buin bialehnak tuah ko hmanh sehlaw a bialak ning zoh tikah aa phun dangmi a lo. Raltuknak lei kongah President ruahnak petu nganbik a si tikah thawnglatu pawl sinah a langhtermi a ruahnak hi a sawhsawh a si lo hrimhrim ti cu zawndomh khawh a si ko.



Hagel, Obama, Dempsey

Cansau a rau tak lo! Tuchun ahkhan US mingiatu vanlawng cu Syria cozah nawl hal ta loin ISIS kut tangah a tlami Syria ram nichuak-chaklei vancung hrawngah an vakvai pah ko, ti a si. Cu kong he pehtlaiin President nih a dirhmun sining cu thawnglatu hna nih innrangpi thawngthanhtu (press secretary) Josh Earst sinah an hal tikah "Syria ram chungah hmun a khuarmi ISIS pawl kong he aa pehtlaiin President nih biakhiahnak a tuahmi a um rih lo" tiah a leh hna. "Asinain, lam tampi in khua a khan cuahmah lio cu a si ko. Zeibantuk lam hmanh khi hman dingin biakhiahnak a tuah zongah Assad cozah he riantuant'i ding cu a si hrimhrim lai lo" tiah a chap.

Syria president Beshear Assad cu mipi nih an ram uktu ah an duhlo caah a rian kaltak dingin duhlonak an langhternak in aa thokmi Syria ramchungral cu kum thum renglo a si cang i minung tam taktak nih an nunnak an sung cang. Mah hi daih a thaim lomi ramchungral hi Assad tuahsernak ruangah a chuakmi a si. Mipi nih an au hnawh tuk nain a t'hutdan kal tak duh loin a dotu hna cu "ralhrang an si" a ti hna i sum phawmh in a phawmh hna caah mipi nihcun hriamhnam an ilak ve i taphung bu tampi an dirh. A cheukhat cu dawhcah deuhin zalennak an khel nain Syria ram kha Muslim biaknak phung bakin ukmi ram ah ser a duhmi phu zong an um ve. Hriamnam le ralkap thazang in a der taktakmi tapung pawlnih hmunhma an khuarnak lei cu Syria ralkap nih tongta den in an den ciammam i mipi nih fak tukin an tuar. Assad nih Syria ram ah muslim an unau tampi a tuahto ning hna cu a kiangkam ram dangdang ah a ummi Muslim ralhrang hna nih an zoh kho loh i Syria ram chung ahcun anmah luh in an lut cio i Assad cozah cu an doh ve___Syria cozah doh dingah ramdang in a lutmi ralhrang bu lak ahcun ISIS zong hi pakhat an rak si ve. Cuti cun caan sau deuh a kal tikah Syria ram cu a buai chin lengmang i ralhrang caah hmunhma khuarnak ah a rem chin lengmang.

Syria President Assad

Syria ram buaibainak cu a hnawksak tuk caah US le nitlak lei ram cheukhat nihcun fak piin dir pi i thazang pek dingmi bu hmanh an i fiang kho zazau lo. Hriamnam tlaiin taphung a sermi bu tampi lakah Syria ram zalennak hmuitinh in Assad cozah a dohtu tapung cu Free Syrian Army an si. Cucaah, anmah cu US nih a dirpi hna. Nain, minung thazang in siseh, rakdoh thiamnak thazang in siseh an derthawm tuk hringhran. Zeibantuk hriamnam t'ha pek hmanh ah raldohnakin Syria cozah a tei kho ding khi an si lo tuk. Tikah, Obama cozah nih raltuknak hriamnam nganmi an bawm duh bal hna lo. Zeicatiah, hriamnam ngan pipi cu hei pe hna sehlaw a donghnak ahcun ISIS bantuk Muslim ralhrang kutah a phan lai, ti khi an phang tuk.

President Obama hi a dotu hna nih an sawinak bik cu Syria buaibainak kong ahhin a si. Syria ram buaibainak a chuak lecangka te khan US nih rak ithlak colh sehlaw Syria ram ah daihnak a len hlei ah ISIS zong hi atu bantukin an t'hazang a t'hawng kho hnga lo, an ti. Hi kong ahcun midang cu van chim lo, Secretary of State in aa dinmi Hillary Clinton hmanh nih Obama a mawhchiat. Sihmanhsehlaw, Obama cu a dirhmun ah fek tukin a dir ve. "Syria buaibainak cu anmah ramchung buaibainak a si caah ramdang nih hriamnam hmangin kan ithlak awk a t'ha lo. Lam dangdang lawngin daihnak ser khawh dingah kan ruah caah UNO hmangin US nih voi tampi kan cawl nain kan bia a len kho bal lo. Zohchia in mipi fahnak a petu Assad cozah hi a thla kho tu dingah bawmh dingmi bu kan kawl len ko. Kan hmuhmi cu Free Syrian Army lawnglawng hi an si. Annih nihle an t'hazang a der tuk lawmmam tikah fak piin bawmh awk hmanh an t'ha lo. A ka dotu pawlnih an chimning bantukin khin Assad cozah hmanh khi va kap ning law atu nak in a buai chinchin lai. Syria ka kah lomi le hriamnam ngan  pipi in tapung ka bawmh hna lomi cu kaa ngaichih hrimhrim lo." tiah Thomas Friedman sinah a dirhmun a chim ve.

Minung Lungthin Khom a keng lomi ISIS ralhrang

Syria ram vialte a hrawk dihtu anmah ramchungral cu atu ahcun anmah ramchungral lawng a si ti lo. Iraq ral zong a si ve cang i US ral zong a si ve cang. Zeicatiah, Syria buaibainak nih caant'ha a pekmi ruangah a t'hazang a t'hawng tukmi ISIS ralhrang nih Iraq ram cu an khuai dih cang i American pa cu a hngawng an tan cang. A ngaingai ah anmah bantukin a kal lomi minung poahpoah cu maisam in sam a hmangmi ISIS hi nuhrin covo le zalonnak a dirpitu minung vialte nih kan ral an si. Minung phun nih kan ral an si ko. An rammi minung pakhat nunnak a sunhsak tuktu US nih a cungah an tuahsernak hi aa in sawhsawh lai lo. A thin linh in a angki-ban aa hlim cang ko rua. Nain, Obama nih Assad cozah he raldoh t'i a huam lai lo. "Keimah President ka si chung koko ahcun US humhimnak kha direct in thinphannak a petu buaibainak a si lomi poahpoah ahcun kan ke ralkap pawlnih mi ramdang ah an nunnak thap in ral an do lo rengreng" tiah a chim lengmangtu pa a si fawn. A ralkap bawizik nihle "van ralkap lawng cun an ci hmih khawh a si lai lo" a ti ve fawn. A kah taktak sual a si ahcun special ke ralkap tlawmpalte kha a thlak hna lai i anmah nihcun ISIS an umnak hmun pawl kha an kawl hnu ah an fialnak poahpoah ah vanlawng nih bombs a thlak men te lai, tiah an zumh ngai.

Relchih: Ahodah A Palh??

Obama nih amah lawngin Syria a kap taktak lai maw? Assad cozah he pehtlaih le a duhlo caah hei kap taktak sehlaw zeitindah a kah hnga? Asiloah, Syria kiangkap ram vialte dah a sawm hna lai i an dirpi duh ahcun an kah t'i lai? Caan raulo ah a fiang zau men lai.