Ferguson, MO Ah A Cangmi Buaibainak nih A Phozarmi Aa Buaktlaklo Tukmi Nawlngeihnak??

Ferguson, MO ah Mr Michael Brown thihnak in a chuakmi mipi le nawlngeitu karlak buaibainak cu tuni in ni hleithum a si cang. Nain, a dai naisai rih lo. Zalam cungah an lungtlinlonak a langhtermi mipi an khat rih ko. Daihnak a len i ningcang zulh tein thil a kal zau t'han khawhnak dingah tiin Governor Jay Nixon hruaimi Missouri State cozah nih thil phunphun an tuah. Zaan suimilam 12 in zinglei 5 karlak caah curfew order a chuak i order a buarmi cu minung sawm riat renglo bak an tleih cang hna. Sihmanhsehlaw, zeipi aa hlei t'hiamt'hiam lo. A sivangh celhlo ah Coast Guards tiangin a kawh hna nain an buai t'hiamt'hiam ko. Lam cungah duhlonak a langhtertu mipi nih hnahnawhnak phunkip an chuak ter t'hiamt'hiam ko. Tutan buaibainak cu khua fate pakhat ah a cangmi a si ko nain phundang deuhte a si hlei ah alinhsat tuk caah ramkomhpi cozah zongnih an van itlak ve. Eric Holder nih a hruaimi, Federeral Justice Department nih Brown thihnak kong cu chekhlatnak kan tuah ve lai, tiah thawng an thanh ve. Sihmanhsehlaw, cu zong nihcun daihnak thlam a lenter kho hlei lo. Cucaah, President Obama nih Eric Holder cu amah pumpak hrimhrim nih thil sining va zoh dingin tuchun ah Ferguson khua ah a thlak. Asinain, atu caan tiang ahcun daihnak a leng kho t'hiamt'hiam colh hlei lo.

Mithli tlaktertu Gas khu lakah a au chihmi mino cheukhat

Zeiruangah hme mi sawhsawh te a simi, Mr Brown, thihnak nih mah bantuk buaibainak fakpi hi a chuah pi hnga? A vun(cuar) a nakmi Brown(kum 18) hi thih kelin a thi lo. Hriamnam zong aa ken lo nain Darren Wilson timi St. Louis County palik(police) nih meithal in a tlawmbik voi ruk akah caah a thimi a si. Mipi kilvengtu ding a simi palik nih zeiruangah dah hriamnam aa ken lomi mino pa hi akah, timi cu a fianlo caah atu bantukin buaibainak a chuah hi a si. Brown a thih thaizing ah zalam zawhin lungtlinlonak a rak langhtertu cu mitlawm te an rak si ko nain Ferguson palik nih zohchia tukin an rak kham hna. Hriamnam t'hat'ha in an chuah hnawh hna i hrokual taktakin an naam hna caah mipi an lung a fak i an buai chinchin. A buaimi mipi nihcun lamkam ah aa tlarmi dawr kha an baoh hna i ningcang loin thil an lak hna. Mi cheukhat lebang nihcun a thli in an meithal an iken ve i mibuu lak ahcun an puak pah lengmang. A caancaan ahcun palik lei zongah an hei kah pah tawn. Tikah, palik nih fak chinchin in an lehrulh ve hna. Cuticun, buaibainak cu nikhat hnu nikhat alinsat chin lengmang caah federal cozah pi tiangnih an van tlakphuatnak cu a si.

hriamnam ropui taktak he duhlonak langhtertu mipi a khamtu palik

Darren Wilson nih Michael Brown akah ning kong hi phun hnih in an chim. Palik lei nih an chimmi le Brown lei nih an chimmi hi aa dang taktak. A ralkah caah an buainak zong cu a si cumu! St. Louis County palik bawibik, Jon Belmar nih thawnglatu sinah a rak chimning ahcun Terry Wilson hi a palh lo. Sihmansehlaw, Brown he aa chawkt'i mi Johnson nih thil sining a chimning ahcun Brown hi a hman ve fawn.

Darren Wilson

Palik zung nih an chimning cu hiti hin a si. W. Florrisant lam kam ah a ummi Ferguson Market & Liquor timi dawr nih "kan dawr ah mifir an lut i kan zuarmi thil an fir" tiah thawng an kan thanh caah Wilson cu zokzokin cuka hmun lei panhin a va kal. Thilfirnak dawrin aa hlat tuk lemlo mi hmun ah a ummi Canfield Ct lam cungah lamlai bakin a kalmi mino pahnih cu lamkam minung kalnak platform in kal dingin a hei caak hna. Sihmanhsehlaw, Michael Brown nihcun a ngai duh lo. A dirmi Wilson motor cu a van neih i motor thlalangawng in bia an i al. Bia an i al pahcun an i thlai i an i thing len. Wilson nih amah aa vennak dingah a meithal cu a chuak i Brown nih chuh a zalh. An i chuh nak ahcun meithal cu motor cungah voikhat a puak. Meithal a puak cun Brown cu a zaam. A zaammi Brown cu Wilson nih a dawi i dir dingin nawl a pek nain a dir duh colh lo caah meithal in a kah pah. Brown cu a hnu ahcun a dir nain cawlcang loin a um duh lo. Wilson lei ah aa mer i naam a timh t'hiamt'hiam caah Wilson nih amah aa vennak ah a cawl khawhlo tiangin akahnak a si, an ti. An isual lennak ahcun Wilson cu aa khong i sizung ah aa thlawp ta lehlam, tiah an chim chap.

Kum 18 a simi Michael Brown

Sihmanhsehlaw, Brown he a vakt'i mi Johnson nih a chimning ahcun phundang pi a si ve. Canfield Ct lam cungah kan kal cuahmah lio ah palik pakhat nih a van kan hro. "Nan zang ning hmanh zak loin platform khin teh nan kal!" a van kan ti ahcun kan kamah a ser lei hawihin a motor a dir manh cang. Leng chuak dingin a motor kutka a van on ahkhin a kutka nih Brown cu a khawn caah bia an i al. Wilson nihcun a motor cungin tum colh lem loin Brown cu a hnawng in a van tleih i an i sual pah. "Kan kah lai hih" tiah Wilson hmurin aw ka theih luklak ahkhin meithal a puak ko. Tikah, Brown cu zokzokin a zaam nain Wilson nih akah pahin dir dingin a fial. Meithal kuan  nih a khen caah maw si hnga ka thei lo, a taksa khi a thir bantukin an um hnu ah Brown cu a dir i a kut a thlir. "Meithal ka ngei ve lo, ka kut ka thlir ko hih, ka kap ti hlah" tiah Brown nih a nawl buah Wilson nihcun a meithal cu a puah thluahmah ko. Cucaah, Brown cu a umnak hmun ahcun a ril beh thai ko, tiah a chim ve.

Kap khat lei nih thil sining kongah an chimmi aa dan tuk veve bantukin an buaibainak cu a fak taktak ve. Palik zungnih "amah le a innchungkhar humhimnak caah" tiin Mr Brown a kaptu palik min kha zapi sinah an rak chim duh zau lomi nih mipi kha an ai a rak puanh tuk hna caah ruahlo lengpi in an rak buaibai deuh tuknak kha a si pah, an ti. Fak tukin a buai cangmi cu daihternak ding ahcun upadi ning loin fahnak le sunghzatlaknak a tuarmi hna nih ilungsaknak an co khawhnak hnga thil sining taktak kha t'ha tein hlethlai a hau. Hmailei zongah a can t'han sual ti lo nak dingah a palhtu kha zangfahnak um loin aa tlakmi dantatnak pek a herh. Cucaah, thil sining taktak hngalh khawhnak ding ahcun Mr Brown ruak cu mithi checkthiam sibawi te nih zohfelnak an tuah.

 St. Louis County nawlngeitu nih an tuahmi Brown ruah chekhlatnak in an hmuhmi thil sining cu zapi sinah an langhter rih lo. Nain, min langhter a duhlotu rian ngeitu pakhat nih a chimmi cu a takpum chungah sechauh a um, ti a si. Brown te chungkhar nih ruak chekthiam sibawi minthang Dr Baden cu Brown ruak check an fial ve. "Kei cu a voikhatnak a chektu bantukin a thilpuan te hna ka hmuhlo tikah fiang tukin ka chim ngammi a tlawm ngaite. Sihmanhsehlaw, Wilson nihhin Brown hi a tlawmbik voiruk tal cu a kah i a hnubik kuanfang hi a lubiik kamin a lutmi hi si dawh bik a si. A lubiik kamin a lut i a khabe in a chuah t'han hnu ah a t'angah a lan t'hanmi kuanfang nihhin a langhtermi cu Brown hi a hnubik a kah hrawng ahcun a hmailei ah aa nok cang, tihi a si" tiah a chim. Federal cozah pi zongnih Brown ruak cu anmah tein chekhlatnak an tuah ve nain mipi sinah an hmuhmi an chim rih lo.

Zohdawhlo in a buaimi pawl

Mr Brown thihnak ruangah a chuakmi buaibainak nih Ferguson khua hrawnghrang cu buar-urr in a chiah rih caah lungfim loin um rih hmanh sehlaw a fiang tuk cangmi thil pakhat a um. Cucu, Ferguson,MO ah khua a sami miphun karlak ah aa buaktlaklo tuk lawmmammi nawlngeihnak a si. Phundang in chim ahcun mirang le minak karlak ah nawlngeihnak aa thlau tuk palia. Minung 21000 hrawng an umnak Ferguson khua hi a luancia 1990 lio ahcun 74% hi mirang an rak i 25% hrawng hi minak an rak si. Sihmanhsehlaw, cucu rang tukin aa thleng i 2010 ahcun minak tu hi 67% an si i mirang cu 29% lawng an si cang. Asinain, nawlngeitu cu an itleng lo. Mirang khuabawi nih a uk hna hlei ah City Council zongah minak pakhat lawng aa tel. Palik zongah 6% lawnglawng hi minak an si. Tikah, mitam a simi minak pawlnih ningcang loin namneetnak tampi an rak ton peng cang. Missouri State Attorney General zungnih naite ah an langhtermi report cazin ning ahcun palik nih motor an dir termi dihlak i 86% hi minak an si. Cun, thil t'halo lunghrinh in an motor chung tiang an chekmi dihlak i 92% cu minak an si hoi. Sihmanhsehlaw, cazin ning ah minak motor nakin mirang motor an chekmi ah thil t'halo an hmuh deuh ti a si fawn. An chekmi minak motor ah thil t'halo an hmuhmi cu 22% buaktlak a si nain mirang motor ah an hmuhmi cu 34% bak a si, ti si.

Brown thihnak kong ahhin amah Brown zong a palhmi a si ko men lai. A hawipa Johnson zong cu fir a hmangmi a si ko caah a biachimmi a diklo kho men ko. Asiloah, Darren Wilson hi ningcang loin nawlngeihnak a hmangtu a si, tiin dantatnak a ingtu zong a si te ko men t'hiam ko. A ngaih a chia tukmi Brown hringtu anu zongnih a fapa zuuntlem in a chanchung lungnuam loin khua a sa thai kho men. Asiloah, a fapa thihnak ruangah a hmuhmi mipi zangfahnak le hnemhnak hna nih thazang tampi a pek khawh men ko. Sihmanhsehlaw, a fiang ko mi cu Ferguson ahcun hmun dangdang nakin mirang le minak karlak ah buaibainak a chuak duh deuh hrimhrim ko lai i aa sungh deuhmi cu nawlngeihnak a ngeilotu minak an si deuh peng ko lai. Cucu, Ferguson ah khua a sami minak hna nih an i zuamnak in le lungrualnak lawnglawng in an thlen khawh dingmi thil sining a si.  Cucu, Chin ram zongah a simi a si ve ko. Chinmi nih a zatawkin nawlngeihnak kan ngeih lawnglawng ah kanmah ram ah namneet lomi Miphun kan si kho ve te lai.

Relchap te: Ahodah A Palh?