A Mak Bik Ka Timi "Proposal" Pahnih....

Mirang le Laimi hi kan ilo lo ngai___mirang ka ti tikah Mirang Ram i khua a sami Minak zong ka telh chih hna hi awh. An cawlcanghning le kan cawlcanghning aa dang bak. Kannih cu kan duhmi thil cungah kan ivelhuai theu. Annih cu an tuah duhmi cu zeidang tampi tuak tuk loin an tuah mei ko. An sunghsakmi zong an thup lo, an langhter bak. An upatmi zong thangthatnak an pek bak hna. An duh lomi zong raltha takin an chim ko. "Mihmai ah zoh a chia ee, cu ee, kha ee" an ti lo.

Kannih nih a thiangmi t'hitumhnak khi kan upat taktak___anmah le anmah aa duh lomi zong khi kaphnih chungkhar hnatlaknak in kan fonh top hna le kan lawmhpi hngang mei hna. Annih nihcun kaphnih chungkhar tel lem loin anmah pakhat le pakhat dawtnak in chanchung lenti ding in biakamnak ser chung khi an uar taktak ve. Pa pipi nih khin an dawtmi an nungak hmai ah an khup an bil i " na ka va ko lai lo maw?" tiah zungbunh he an hal hna. An dawtmi nu zong nih an tlangval sin in "Proposal" an hmuh ahcun an ilunghmuih tuk ve. An nungak nih an uar tuk tikah Pa pawl nih an nungak nih aa lunghmuih taktak ding duhsaknak he phundang tete in tuah an i zuam cio__annih theo cu midang he aa lo lomi tete hi an uar rengreng cumu!

A tlanglei ah ka van thilmi Video pahnih hi ka zoh balmi "Proposal" ah amak bikmi an si. Zeitindah an nungak le nih "No" an ti khawh hna lai? Lau tuk ruang ah ngang ko in a ummi an mitmu cung in lawmhnak mitthli a luan diahmahmi khi an mawh lo ka ti. Rak zoh ve hmanh, a mak bak na ti ve men lai.

Disney Downtown ah laamthiammi tlangval pa nih "Marry You" timi Bruno Mar hla laam piaknak in a nungak nu a "Propose" nak hi No.1 ka pek!

America's Got Talent timi hlasak zuamnak ah itel a duh lo nain a dawtmi nungak nih a fial chih peng ruang ah aa telmi Travis Pratt nih Stage cung bak ah a nungak nu a "Propose" nak hi No.2 ka pek! Mark petu vialte nih "Yess!!" tiah an au piakmi zong khi au piak a phu. 

Phone in a relmi caah link ka van thil chih.

A tling lomi minung nih kan ngeih khawhmi a tling lomi Dawtnak hmang in mi fanu dawt kha chanchung nunhrawmt'i ding in va sawm ko cu thil fatuai cu a si lo hrimrhim ko. T'hitumh puai tuah khi cu biakhiahnak nawl a ngeitu nih "Amen" a pek cang hnu ah "kan nun kan ihrawm cang" timi thawngthanhnak deuh a si ko cu awh. Tawifaing in chim ahcun, mirang nih an sunhlawihmi "Proposal" hi sunhlawih tlak bakmi a si ko, ka ti.

Mah hi zong hi relchih te: Kan T'hitumh Puai Tuahdan Hi.....????