Biahalpang Pa: Vawleicung Sianginn Nganbik: Khan Academy

Aluancia kum 2009 lio ah khan Boston khua ah Hedge Fund Analyst rian a tuanmi, Salman Khan (Bollywood Fitlaw a si lo) nih a e-mail ah a theih bal lomi mino pakhat sin in lunglawmhnak cakuat a hmuh. "Tukum thal sianginn khar chung vialte, na Youtube ah ka caan ka hmang, kanan a rak thiam lo taktakmi ka si nain atu cu ka duhmi college nih an ka cohlan cang, sianginn luhnak ding caah phitmi kanan test ah mark tha taktak ka hmuh, cucu na tuahmi thil khuaruahhar ruang ah a si, kai lawm tuk, kei le ka innchungkhar nunnak cu nangmah nih na kan thlen ko....Kan innchungkhar ning in na caah nifatin thla kan in campiak zungzal," timi lawmhnak bia a si.

"Kan innchungkhar ning in na caah nifatin thla kan in campiak peng" tiah mihring pi sin in lawmhnak bia van theih cu Hedge Fund Analyst ca ahcun khuaruahhar tuk a si. Hegde Fund Analyst, Salman Khan nih a pawcawmnak ah a tuanmi rian cu cathiam pakhat dirhmun in financial market le thil sining dangdang kha fiang tein zohfelnak le chekhlatnak tuah hnu ah a hmuhmi thil sining kha phaisa phum/phawi in cawlehthalnak a tuahmi(investors) mirum pawl nih a hmanmi biakhiahnak an tuah khawhnak hnga,ruahnak pek a si.Vawleicung ah zirtian aa tel bikmi pawcawmnak cu phaisa lei in cawhlehthalnak riantuannak( financial sector) a si an ti theu. Financial sector ah riantuantu hi khawika ram poah ah buaktlak in phaisa hmu tam bik minung an si dih. US nihcun anmah pawl cawlcanghnak khi mindang tein an auh: Wall Street an ti. Zirtian le thluak rumro in riantuan a si tik ah dinfelnak le biahman chim a tlawm tuknak hmun a si. Financial Sector cu chawlehnak rian vialte lak ah hakkuahnak lungthin nih hmunhma a laak biknak hmun a si tik ah "Thlacam" timi cu a tlawm taktak. Cucaah a si men lai. Hngakchia pa cakuat nih Salman Khan lungthin a suk. A rian a chuah tak i a innkhan chung in caan tling in cachimh rian a tuan. Sihmanhsehlaw, mah cucu atu ah thla khat ah minung million 10 renglo nih an hmanmi, "Khan Academy" aa thoknak a si ti awk a tha lo.

Aa thokning taktak cu hiti hin a si. Mentairie, Louisiana ah Pakistan nu le India pa nih Oct,11,1976 ah an hrinmi, Salman Khan, cu 2003 ah Hedge Fund Analyst a tuannak Boston khua ah nupi a thi. Massachusetts Institute Of Technology(MIT) le Harvard Business School in Bachelor of Science(BS) le Master in Business Administration(M.B.A) a hmutu, Salman Khan nih a thitmi nu cu sii lei thiamnak a ngeimi, Umaima Marvi timi nungak dawh a si___atu cu fapa pakhat le fanu pakhat an ngei cang. Hmunkip in a nupi t'hit puai a van zawhtu chungkhatsahlawh lak ah New Orleans, Louisiana ah khua a sami, Nadia timi ta-wan-kuai a farnu te chungkhar zong an i tel ve. T'hitumh puai caanhmannak a dih hnu ah Khan nih lamhlat piin a puai a van zawhtu Nadia cu bia a va ruah. Bialam chuak ah "na sianginn kai hna teh zeidah na lawh?" tiah a hal. "Zeidang subjects cu kai harh lem hna lo, asinain kanan(maths) ka thiamlo tuk lawmmam le a si bak ka si kho lo" tiah Nadia nih a leh. "Aw, a si maw, keimah nih kan bawmh lai mu, na duh lai maw?" tiah a hal than. "Duh ee, na ka bawmh huam rilmal ah" tiah Nadia nihcun lungtho ngai in a leh than ve. Cuti cun an pahnih karlak ah biakamnak an ngei.

Rian hmun ah Salman Khan

Meng 1523 aa hlatmi, Boston, Massachusetts le New Orleans, Louisiana ah an um tik ah an ibawmh khawhnak ding ah lam kawl a hau. Computer a thiam taktakmi Salman Khan nih a thimmi lam cu Yahoo! Notepad a si. Khan nih a riantuannak in a lawi hnu ah Yahoo! Notepad hmang in a tuahmi kanan pawl cu Nadia kha e-mail in a hei kuat lengmang. Nadia zong nihcun t'ha tein a rak zoh ve i caan tawite chung ah fak piin a thangcho. Nadia nih a thancho ning a ran tuk tikah a nu le pa cu an khuaruah a har tuk i an chungkhatsahlawh vialte kha mah cu kong cu an chimh hna. Cuti cun, Salman Khan cu Yahoo! Notepad hmang in a chungkhatsahlawh le neihniam minung vialte i an fale ca chimtu ah aa chuah.

2006 zaanlei voikhat ah Salman Khan cu a hawile he rawldawr ah zanriah an ei t'i. An ei khimka ah a hawipa pakhat cu Yahoo! Notepad in a naule le a tule pawl ca a chimh tawn hna nak video tete cu a piah. "Eeee! An t'ha tuk hi teh, ziah Youtube ah na tar hna lo?" tiah ruahnak a pek. "Aaa, kadua, Youtube thamtham cu chizawh hlasaknak ti bantuk pawl, zei huaha lo tete tarnak dawh a si ko cuh" tiah Khan nihcun nih pah in a leh. Sihmanhsehlaw, caan sau a rau lo. Khan cu a lung aa thleng i a ca chimhnak Videos tete cu Youtube ah a tar than hna. Tlawmpal a rauh ahcun a tarmi Videos tawi tete cu a chungkhatsahlawh ngakchia lawng nih an zoh lo timi a fiang tuk. A zohtu minung rang tukin an karh i a tangah comment thlum tete zong an van thlak diahmah. Aa lawmmi tampi lak ah minung pakhat a simi, pakhat pa te nih a hramthok ah ka langhtermi cakuat khi 2009 kum dihlai te ah a kuatmi a si____thiltha deuh ka tuah khawh hrimhrim lai tiah ruahchannak a ngeih caah nihlawh a tha taktakmi a rian cu a dinh tak diam ko.

2009 kum dihlai thok cun a innkhan chung ah amah lawng caantling in rian a tuan cang. A sermi website cu a min ah "Khan Academy" tiah a sak. A tlangtar(motto) cu "Vawleicung hmun kenkip ah a ummi, mizeipoah kha man loin vawleicung standard a simi fimthiam cawnkhawhnak lam pek___Free World class Education for Everyone, Everywhere" ti a si.

Niikhat hnu nikhat, zedang rianruan loin a sermi a sianginn a remh le a chap nak caan cu thla hra hrawng a si cang. A hmangtu minung zong an karh diahmah ve ko nain tuahsernak in lawmhnak bia a chimmi an um huaha rih lo. A rak kawl ciami chawva tampi a dih cang caah hmailei ah zeitindah kar ka hlan lai tiah lungdong ngaiin khua a ruah pah cang lio ah khin US mirum pakhat, atulio ah President Obama i Economic Advisor pakhat a simi, John Doerr nupi, Ann Doerr sin in ruahlo piin lunglawmhnak cakuat le check 10000 a hmuh. "Kai lawm tuk, a lengah inn ngan pipi in a ummi sianginn cu si usihlaw kan sianginn inn pakhat cu nangmah min kan bunh hnga" tiah Khan nih cun Ann Doerr cu lawmhnak ca a hei kuat. "Keimah kai lawm deuh, ka fale ca chimhnak ah na tuahmi ka hman i amak tuk lawmmam, vawleicung fimcawnnak a thleng kho tu dingmi thil bak na ser tiah ka ruah, kan mipum in iton i biaruah kan duh ko" tiah Ann nih cun a leh chin ve. Caan rau loah ton biaruahnak an ngei. Cu caan thok cun atutiang Ann Doerr cu Khan hawikom tha ah aa can hlei ah phaisa thazang hmang in Khan Academy a dirpitu a si thai.

Voikhat cu Doerr sin in "Text Message" a hmuhmi nih Khan cu umtuzia thiam loin a tuah. "Atu hi conference ka kai lio i Stage cungah Bill Gates nih hlawptlo takin na tuahmi kong a chim cuahmah ko...A fale ca chimhnak ah Khan Academy timi ka hman le amak taktak a ti len ko hih" timi text a si. Thla khat a rauh hlan ah Bill Gates nih mi bawmhnak caah a dirhmi "Bill & Melinda Gates Foundation" nih phone an van chawnh i Seattle, Washington ah tonnak an ngei. Khan Academy nih aa tinhmi le a riantuanning cu an lungtlin tuk caah kum khat ah USD 1.5 million bawmhnak an pek. Google zong nih a van hmuh ve tik ah kum khat USD 2 million in bawmhnak an pek ve. Vawleicung mirum bik, Carlos Slim le mi dangdang zong nih bawmhnak an van pek cio i atu bantukin t'hawng taktakin rian an van tuan kho__holh phun 20 renglo in an leh cang. A dirhtu Salman Khan zong cu vawleicung milaar bik pakhat ah aa chuah ve.

Thlakhat ah minung million 10 renglo nih an hmanmi Khan Academy hi Videos le technology hmang in fiamthiam cawnnak a thok hmasa biknak a si lo___1980s dihlai hrawng ah MIT tibantuk sianghleirun nganmi nih an rak thok cang ko. Sihmanhsehlaw, Salman Khan nih a chuahmi "IDEA" cu aa dang ve hrimhrim. Amah holh cun "ca cawnnak khan kha a bihtaling in leh___flipping the classroom" a si. Sianginn ah ca chimtu saya te nih hehchet in cawnpiak i inn ah ingsa(homework) tuahmi kha "inn ah mah thiam khawhning dan in cawn i sianginn ah saya te he thiamlonak zawn poah kha zohti i ibawmh" timi cawn dan a si. Sianginn khan khat chungah an tluak t'hatning aa dang dihmi, kumkhua in aa t'hikhatmi sianghngakchia tampi kha saya/mah pakhat nih aa khatmi ca kha hmunkhat ah chimh a si tikah thluakchia deuhmi nih an thiam kho lo. An zapi in an thiam dih hlan ah ca dang cawnpi than lengmang an si tikah caan a rauh deuh cun cathiam lomi kha an thiam lo chinchin i cathiammi nih an lonh chin lengmang hna. Tik ah, a fum deuhmi pawl kha hnu ah an pil chinchin i a donghnak ahcun cacawn hmanh an huam lo. Mah cu aa ningcang lomi pi cu "Khan Academy" nih videos le ca phunphun hmang in thlen aa timhmi pakhat a si.

A thluak fum tukmi na si sual maw? "Khan Academy" nih na duhning tluk fum in an hngak khawh. "Ca cawnnak dingah kumkhua in ka upa tuk cang" aa timi na si maw? Tleirawl luri rual he innkhan khat chungah t'hut hau loin na ihnak khan in "Khan Academy" hmang in na duhmi na cawn khawh. Na fa homework tuah na bawmh khawhlo ruang ah na lungrawk tuk tawn maw? "Khan Academy" nih na rian an chawn khawh thiamthiam. Sianginn ah na cawnmi kha na lungfiang lomi a tam tuk maw? "Khan Academy" nih na huam chung an chimh peng khawh rih. The College Board nih an tleih i University t'hami ah luh khawhnak ding ah hmanmi,Princeton Review ti bantuk nih USD 999.00 hrawng an lak tawnmi, SAT test timtuahnak ca tiang in an ngeih cang. Na tuah dingmi cu www.khanacademy.org ah alakin "account" ser lawng a si ko.