A Rawkmi US Chawlehnak Remhnak Caah Hin Austerity Maw A Tha Deuh, Stimulus Dah??

Donald Trump, Republicans le economist cheukhat nih "US chawlehnak cu thli sawhsawh in a khatmi tutuhlut bantukin a puar sawhsawhmi a si" tiah an au lengmangmi khi tampi a hman ko. A bikin an leiba kong an chimmi khi cu a hman tuk. Cozah nih an langhtermi hi $16 trillion renglo deuh vak lawng a si nain a taktak ahcun a tlawmbik $2o trillion renglo a si lai an ti. Asinain, Obama cozah tangah US chawlehnak a t'hang lo an timi tu khi cu an palh dipdep. Anmah nih an duhmi chawlehnak(economic) policies le Obama nih a kal pimi chawlehnak policies khi aa ralkahmi an si ca tu ah a si deuh___raldoh a huam ngaimi G.W. Bush hruaimi cozah tang ah US chawlehnak fak tukin a rawk timi tu hi cu an pom veve. A rawk tukmi US chawlehnak cu remhnak ding ah a hmanmi lam tiah an ruahmi cu aa ralkah caah an idohning a fah tuknak a si.

Billionaire Donald Trump he a ruahnak aa khatmi economists pawl hi "acozah nihcun a tlawm khawh chung tlawm in phaisa a chuah i tampi hmang loin mipi tu kha chawlehnak ah a rinh hna ahcun chawlehnak cu amah t'hat in a t'ha thluahmah ko" a timi deuh an si. Fiscal conservative an i ti i a cozah nih a rawkmi chawlehnak remhnak caah tiin tamtuk phaisa a hmanmi khi an hua tuk. Chawlehnak a zor ko ahcun aa chawkletmi phaisa zong cu a zor awk hrimhrim a si ko. Acozah nihcun phaisa chuah chap loin ngunkhuai tu t'hum lehlam sehlaw a hmanmi phaisa zong zor ter seh. Mah tik ahcun teh a der deuhmi poah cu an thaw cet lai i a t'hawng bikbik caah lamt'ha aa on chinchin lai cu. Teinak a hmutu, a fit bikbik hna nihcun riant'ha tampi an ser lai i mipi nih hlawknak an hmuh ve lai  i rampi ca zong ah thanchonak a chuahpi lai, an ti. Economic Crisis cu dandatnak(austerity) hmang in remh ding a si tiah a pommi Absolute Capitalism a uartu an si kan ti hna lai cu.

Obama cozah nih a kalpi mi tu cu G.Bush cozah tangah fak tukin a rawkmi US chawlehnak cu mipi kut cung ah chia top loin acozah nih a tuah khawhmi poah a tuah ding a si, ti a si ve. Tikah, aa tartahakmi US chawlehnak cu aa hlauht'hannak hnga caah nikum dih ah chairman in aa dinmi Ben Bernanke hruainak in Federal Reserve nih phaisa tampi an chuah chap i hehchet in an hman hramhram. US cozah nih a chuahmi bond kha tampi in an cawk hlei ah a tlumi companies ngan pipi kha an tlanh hna. Cun, a karh umlo tlukin Banks pawl kha phaisa an hlanh hna. Mah cu phaisa cu Banks nih a karh tlawmte in mipi kha an hlanh chin hna tikah chawlehnak aa rawkmi ruang ah harsatnak a tongmi mipi nih an tuah duhmi chawlehnak kha an tuah khawh than. Quantitative Easing(QE) tiah an auhmi mah cu program nihcun amah thazang in a taw a phawk kho ti lomi US chawlehnak kha cawlcangh khawhnak thazang a van pek than ti khawh a si hnga.

Timothy Geither le Jack Lew nih an hruaimi, Treasury Department zong nih anmah lei in an naam ding hnga an rak naam ve. Bush nih a rak dawt tuk i midang nakin ngunkhuai ret niam deuh in a rak kholhmi mirum taktak pawl kha sang deuh in ngunkhuai a kholh ve hna. Mah cu phaisa pawl cu Obama cozah nih US leiba chamnak le chawlehnak he direct in aa  pehtlaimi cawlcanghnak ah hmang loin fimcawnnak lei ti bantuk ah an hman deuh. An itleihmi cu atu bantukin chawlehnak lei in harnak kan ton lio ah hmailei thanchonak  caah a biapi tukmi fimcawnnak ti bantuk hi kan daithlanhlo bak a hau. Kan harsa ai tiin biapi ah kan chiahlo sual ahcun hmailei ah kan imuai cawk lai lo, ti a ti. Cucaah, fimthiamnak cawnnak le science lei hlathlainak ah phaisa tampi an sangsen i sianginn kai a duhmi caah cozah sin in fawi tein phaisa cawi khawh ding in an tuah. Annih nih an kalpi mi cu aa rawkmi chawlehnak remhnak ahcun mipi lawng rinh loin acozah nih a ngeihmi thazang vialte a chuah ve ding a si. Aa remh hnu tu ahcun acozah nih a cawlcanghnak cu a mak than lai i mipi kut ah chawlehnak cu a chiah than ko lai. Phundang in chim ahcun aa rawkmi chawlehnak kha remhnak ding caah cun acozah nih dantatnak si loin thazang peknak(stimulus) tu kha a hman ding a si timi an itleih i cuti cun an cawlcang.

US Secretary of Education, Duncan Biaroling

Obama hruaimi cozah nih US chawlehnak a t'hang i rian ngeilo mi an zor deuh an timi hi a hman taktak ko. "Obama hruainak tangah Geither le Bernanke nih an hmanmi fiscal policies le monetary policies nihcun US chawlehnak t'hancho ter loin thilman tu vantawng in a kai ter lai i harsatnak a chuahpi chinchin lai" tiah stimulus a duhlotu hna nih an rak chimchung ning bantukin thilman a kai lo. Naihrawng kum chung ah a tlangpi in US ah thilman a  kaining hi 2% hmanh a si lo i chawhlehnak tu cu 2% renglo deuh in a t'hang. A t'hangchomi chawlehnak nih a lulu in a chuak pimi thil pakhat cu rian ngeilo mi minung zorter a si ko. Cucaah, Obama hruaimi cozah nih an hmanmi Stumulus Policies hi aa rawkmi US chawlehnak remhnak caah aa tlak bikmi policies a si ko. Stimulus a dohtu pawl an palhnak cu President Hollande hruaimi cozah nih Austerity hmang in an chawlehnak remh aa zuammi France zoh tikah a lang ngaingai. A t'hangcho cangmi ram vialte lakah 2008 Financial Crisis nih a chuahpi mi chawleh harsatnak in aa hlipphuak kho lo bikmi ram pakhat an si ko rih khi. 

Stimulus hi ramdang nakin US caah aa rem bikmi Policies a si tertu thil pakhat a um. Cucu, Dollar hi international reserved currency a simi hi a si. Rak ruahning nakin fak deuh tukin a rak rawkmi US chawlehnak nih atu lio ah a herhmi cu a t'hawng chinchinmi Stimulus policies a si. Sihmanhsehlaw, dotu tamtuk a ngeih caah Obama le Yellen nih an naam chap kho ti lem lai lo. Mah cucu a poi ngaingaimi thil pakhat a si ve thiamthiam.

Relchap:Thank You and Goodbye, Mr Bernanke

Note: Ka ruah, ka zumh tibantuk biafang pawl ka hmang huaha lo nain keimah tialmi a si ko caah amah pumpak ruahning lawng bak a si ko tiin rak ka hmuh piak u tiah kan nawl hna.