Nunnak Thap in Dawtnak Biazai a tialmi Afghan Nu Hna....

Afghanistan khuapi Kabul khuaki zawn, University campus kiang te ah amah te lawng in a ummi inn pakhat chung ah Mirman Baheer(Nu caholh thanchonak bu) chungtel a simi Ogai Amail cu phone a hngak tawn. Mirman Baheer cu Muslim zumhnak in a pial sual i nu cu thilri bantuk menmen ah a ruatmi minung an tam taktaknak Afhgan ram ah khua a sami catial huammi nu hna nih an tonmi cio kha caholh hmang in an ichimhruahnak bu a si. Mirman Baheer tibantuk nubu pawl hi US nih Afhgan Taliban cozah kha a thlak hnu lawng ah dirh khawhmi bu an si. Cun, US le NATO ralkap hna nih zapi caah humhimnak tling an pek khawhnak Kabul ti bantuk khuapi lawng ah an um kho. Cucaah, khuate lei ah nu an si ruangah naamnetnak le sersatnak a tongmi nu tete pawl he pehtleihnak caah tiin Ogai Amail nih a hngah tawnmi Phone hi an hun. An bu kong le pehtleihnak phone cu ram chung radio in langhternak(advertise) an tuah tawn.

Merman Baheer chungtel nu cheukhat

Voi dang tawn bang  Amail hngahmi phone te cu khing riangmang tein a van ring diahmah. "Hello....hello...helloo...."tiin a van tleih. A thinphan tuk caah a thir pah ciahmahmi kut hnih komh in khat lei phone kuang a rak tlaitu cu Kabul in meng 400 renglo deuh a hlatnak ah a ummi, Taliban ralhrang pawl an hrah taktaknak, Gereshk khua in "Zarmina" timi nungak no te a si.

Zarmina hi Afghan phung bantukin chungkhar nih hnatlaknak an ngeih piakmi tlangval pakhat a um. Sihmahsehlaw, mah cu tlangval pa te cu ral a dohnak ah a nunnak a liam. Cucaah, Afhgan phung bantukin a unau pakhat khat kha Zarmina nih a vat hrimhrim hna a hau. Mah cu vat ding cu a duh lo. Sihmanhsehlaw, a pa le a t'ale pawl kha a al kho fawn hna lo. Tikah, duhthimnak a um lomi a nun cu lung sivang in amah te lawng in a tuar zungzal. A caancaan ah cafung aa lak i a tuarnak hna cu biazai in a tial tawn hna. Mah cu biazai hna cu Radio chungah a theihmi Merman Baheer phone a rak hngaktu Amail sin ah a chungkhar theihlo kar te i can in a van rel tawn. Cu ti cun, a relmi poah cu phone a van chawntu midang cio zong a tuah piak tawn hna bantuk tein Amail nih a tuah piak tawn. Catlap cung ah a tial piak i tlau lo ding in a fim.

Voikhat cu a upa nupi nih a thli tein Amail a chawnh cuahmah lio cu a va hmuh. "Zarmina, tlangval pa zeizah dah na ngeih?" tiin a t'ale hmai ah a capo i a t'ale nihcun thil sining an hlathlai colh. "A thli tein Phone na chawnh tawnmi hi nangmah nawl in na ngeihmi tlangval a si hrimhrim lai" an ti i fak piin an vuak. "A si lo" tiin a al lengmang hna zong ah ngol hngal loin fahnak an pek thiamthiam tikah a nun a rit tuk i amah le amah mei in aa khang i a nunnak a liam...

Muslim biaknak kha fek thup in aa tleih i a pial sualmi Afghan Pa hna ruahning ahcun Nu nih anmah duhmi tlangval an ngeih hi sual ngan phunkhat a si. Mah cu an ngeihnak kong chim le t'ial chinchin cu sual hmanh ah sual chimpit phun in an pum caah a tuahtu poah cu dantatnak fak bikbik an pek tawn hna.

*****************************************

Zarmina tuanbia cu catial thiam Eliza Griswold nih a theih tikah hmantlak thiam Seamus Murphy aa sawm i Afghan nu hna nih an inntuarnak cu hlethlai ding in an pok. Nu an si ruang ah sersatnak le tukdennak an tuarmi cu cafung hmang in Afghan nu hna nih an tialmi cu an va komh suat. An khawmhsuatmi biazai cu Griswold nih mirang in a leh hna i Murphy nih thil sining taktak te hman a thlakmi hna he an kawp chih i Vawlei kutdok ka si timi tlangtar in cauk an chuah.

Mirman Baheer chungtel nu pakhat nih a thinlung kekkuai dih in a tial i Murphy nih hman a thlakmi catlang pakhat cu "Duhdawtnak ngeih hi Sual a si lo___Loving is not a Sin" ti a si.

Atu zong ah hin thinphan tukah kut thir thluahmah buin Taliban ralhrang an t'hawnnak khuate in Amail phone a chawn i a tialmi biazai a rel piaktu Afghan nungak no tete an tampi thiamthiam rih. An thinlung ah a khah tuk hnu ah a liammi Dawtnak biahlum hna cu catlap cungah an tlak ter ruang ah an nunnak caah thinphan awk a si an theih ko. A khaat tuk caah an nunnak nih a celh ti lomi harsatnak cu cafung hmang in an zai ruang ah hremnak phun kip an in sual khawh zong an theih thiamthiam. Sihmanhsehlaw, an maa hlei lo i hmailei zong ah an maa hlei fawn lai lo. Zeicatiah, hi nu hna hi lungdonghnak le vansannak hei lonh ah a ummi, zeipoah si ah a poi ti lo timi ralthatnak nih a thuammi, Nu raltha taktak an si hna. Amail phone cu caan sin ah khiing liaimai tein a ring lengmang ko rih lai.

Rel chap te:Sorry, Kan Rak Ei Viar Cang Cu Teh....

Afghan nu raltha hna nih lungthin kekkuai dih in an tialmi Dawtnak biazai cheukhat, mirang ca in an lehmi cu Kristof nih hmantlak pakhat cung ah a tar hna i ka van tar chin ve...