Obama Nih ISIS Ralhrang Kahdohnak Dingah A Sermi Strategy Hi Hma A Kal Lai Maw??

Tuzarh nithum ni zaan US boruak cu aa phundang ngai. Zeiti phun pi khin dek lungthin a um. Khing a rit nain i hngahhlang pahmi thil nih lungthin a hliphlau ter nawn.US Eastern Time zaan suimilam 9:00, Americans minung tam bik nih TV zoh tawn caan thengte ah, President Obama nih State floor, innrangpi in biachimnak a ngeih. Minutes hleili dengmang chung a chimmi bia cu minung hawidang cungah tuk a summi thahnawnnak le rialditnak lam phunkip hmangin Islam ramthar ser aa timmi ISIS(ISIL) kong deuh lawng bak a si. "Ka hawidawt Americans, tuzan nan sinah chimfian ka duhmi cu ramdang kan hawile hna he i bawm in ISIL(ISIS) timi ralhrang buu hi zeitindah kan doh hna lai, timi a si. Nan hruaitu ah nan ka thim bantukin ka rian lianngan bik ah ka chiah zungzalmi cu kan ram humhimnak hi a si ko. Cucu Yemen le Somalia ti bantuk ah a herhning poah in ralhrang ka dohmi nihhin fiang tein a langhter ko" tiin a bia a domh.


  

"ISIL cu an i chimning bantukin Muslim an si lo i Ram pakhat zong an si lo. Zeicatiah, zeibantuk biaknak hmanh nih sualnak a ngei lomi minung thahnawn a duh bal lo. Vawleicung cozah pakhat zongnih pennak nawl a ngeimi Ram pakhat in kan cohlang fawn hna lo. Erlet misual (terrorists) buu bakte an si nak cu an tuahsernak in a fiang tuk ko cang. Khirhfa biaknak le biaknak dangdang a zummi poah cu an sersat hna lawng si loin an ci hmih ding tiangin an i zuam. Sualnak a ngeilo mi Americans pahnih, James Foley le Steven Sotloff, zong an hngawng an tan hna. An pennak tangah a ummi anmah Mulsim hawi lila zongnih himnak an hmu hlei lo. Anmah duhning bantukin a kallo mi poahpoah cu an hrem hna i an thah, an nawn t'hiamt'hiam ko hna. Muslim kan unau ko hi ISIS kut in fahnak a tuarmi an tam bik. Cucaah, American hruainak in kan doh hrimhrim hna lai i kan hrawh hrimhrim hna lai. US minung a t'hihphaihtu cu kawika hmun hmanh ah him tein dawrnak an hmu lai lo, an umnak poahah kan dawi ko hna lai. Iraq ram zongah kan nam hna i Syria ram chung zongah van ralkap hmangin kan luhhnawh cang hna lai" tiah thawngthanknak a tuah.

Noble daihnak laksawng a tingcotu pakhat a simi Obama hi a si khawh chungin raltuk a hrialmi President a si. "US rampi humhimnak kha hmaitonh (direct) in hnahnawhnak a pe lotu buaibainak cu zeibantuk buaibainak a si zongah kan ke ralkap nih an nunnak thapin ral an do lai lo" tiah a chim zungzaltu a si bantukin tutan ISIS kahdohnak ding zongah US ke ralkap hman ding aa tim lo. "ISIS hi chimpit in an sual ko nain atutiang ahcun US rampi humhimnak ngaingai cu an nursuang kho rih lo. Sihmanhsehlaw, kan zoh sawh salam hna ahcun hmailei ah hnahnawhnak phunphun an kan pek hrimhrim lai. An laknak hmunhma chungah khua a sami kan minung hawi, Miphun fa tete, cu an rildit tuk hna caah bawmhnak kut kan chanh hna hrim a hau fawn. Kannih US cu anmah tein zalonnak hmuh awk caah aa zuam diahmah nain thazang a ngei lomi mi harsa kha a zoh sawhsawhtu kan si bal lo. Cucaah, ISIS hi van ralkap kan hman lai i kanmah hruainak in kan doh hna lai. Nain, kan ke ralkap tu cu an nunnak thap dingin ka thlah hrimhrim hna lai lo" tiah raltuk a vuai tuk cangmi, US mipi sinah biakamnak a tuah.

Vawlei area in Belgium ram tluk hrawng a kau i minung million hleiriat hrawngnih an umnak hmun pakhat pennak nawl a ngei cangmi erlet ralhrang ISIS hi fawi tein cun tei khawh an si lai lo. Ke ralkap hman loin cun a tei an har chinchin lai. Sihmanhsehlaw, Obama nih US ke ralkap hman a tim lo hrimhrim. Zeicatiah, Syria ram buaibainak le ISIS cawlcanghnak nihhin US rampi humhimnak ngaingai cu hnahnawhnak a pek rih lo hlei ah anmah ramchung buainak a si caah Syria mipi nih US an huat chinchinnak lehlam ah a cang len lai, ti a phang. ISIS hi an ci hmih ding tiangtiang cu a zal fawn hna lo. An thazang t'hawng kho lo dingin an thahri tu tampi in chah a timh hna. Aa tinhmi cu a tlamtlin khawhnak dingah strategy phunli a ser. Cucu, pakhat hnu pakhat in fianter ka van i zuam lai.

1. A herhning poah in vanlawng in bomb an thlak lai. August thla thok khan Obama cozah nihhin Iraq ram ah a ummi ISIS pawl cu van ralkap hmangin kah hram a rak thok cang. Iraq ram ahcun tinhmi ngan bik pathum he a kah hna; Kurdish khuapi Irbil ah a ummi US ralkap le zung riant'uantu hna kilvennak caah, Sinjar tlangpar ah tilo le rawllo in hren a tongmi Yezadis miphun pawl khamhnak ding caah le thlennak a tuahmi Iraq cozah le zauk phung hmangin dawhcah tein aa pen khomi Kurish ramt'hen cozah thapeknak caah, tiin an si. Phundang in chim ahcun ISIS pawl kha Iraq ramchung dihlak in zaam ter ngaingai ding kha a rak itimhmi a si lo. US van ralkap nih ISIS pennak area cungah voi 150 renglo bombs an thlakmi cu Iraq-Kurdish ralkap nih vawlei in an rak dawi ve caah an lohma a kal ngaingai i an itinhmi pathum cu an tlamtlinh khawh. Yezadis miphun pawl cu an chanh khawh hna i Kurdist ramt'hen kam tiang a phan cangmi ISIS pawl cu Mosul dam lawnh tiangin an dawi khawh hna. Sihmanhsehlaw, Syria ram ah hmun a khuarmi pawl tu cu an kap bal hna lo. Nain, atu cu Obama nih a van ralkap hmanning dan(strategy) cu a thlen cang. Iraq ram chung vialte ah siseh, Syria ram chung vialte ah siseh, a herhning poah in an hriamnam hmang dingin US van ralkap cu nawl a pek cang hna. Cun, Syria innpa Muslim ram vialte le NATO chungtel ram vialte cu lungkhat tein ISIS ralhrang dohti dingin a sawm dih hna.

F-16 raltuknak vanlawng

ISIS ralhrang doht'i dingin Obama nih a sawmmi nichuah laifang Muslim ram pawl lak ahhin anmah si khawh tawkin bawmhnak pek a duhmi ram an tampi. Nain, ke ralkap ngaingai in bawmh a duhtu cu um dawh an si lo. Nizan tihni (09/11/14) ahkhan Saudi Arabia ram Jeddah khuapi ah Arab ram  hruaitu pawl cu ISIS dohnak ding kongah tonnak an ngei i ram 10 nih US dirpi dingin an lung a tling. US dirpi dingin lungtlinnak a ngei i Military Coalition ser aa timmi ram cu Egypt, Iraq, Jordan, Lebanon, Saudi Arabia, Bahrain, Oman, Qatar, United Arab Emirates hna an si. Sihmanhsehlaw, US nih ISIS an dohnak ah a biapi bikmi ram ah ruahmi Turkey tu nihcun lungtlinnak min an thu lo. NATO chungtel a si i US hawit'ha zong a si pengmi, Germany le British nihcun "raldohnak ahcun kan bawm lai lo nain mi harsa bawmhnak (humanitarian) tuin kan dirpi lai," an ti. France le Denmark tu hna nihcun "US nih an kan herhning poah in bawmhnak pek khawh kan zuam ko lai" an ti ve. Russia tu nihcun US nih Syria cozah nawlpeknak loin Syria ramah vanlawngin ISIS ralhrang doh a timhmi hi vawleicung phung a buar a si, a ti i a doh. Assad cozah bawmhnak a pek lengmang hlei ah a nulear sernak in vawleicung ah buainak phunkip a chuahtertu Iran cu ISIS doht'i dingin US nih a sawm duhlo caah a thin a hung ve i US nih aa timhmi cu a soisel ve.
 
Obama nih Syria ram ah umhmun a khuarmi ISIS dohnak ding caah van ralkap lawng hman a timhmi hi Iraq ram ah a hmanmi bantuk cun hma a kal lai lo. Zeicatiah, Iraq ram ahcun US van ralkap nih  an kahnak poahpoah kha Iraq-Kurdish ralkap nih vawlei in an rak nam bawmh nain Syria ahcun vawlei lei in bawmchantu t'ha a nei lai lo. Mipi nih an duhlo ruangah an doh lengmang nain a t'hutdan a kal tak duh lomi Syria President al-Assad cozah ralkap cu Obama nih riant'uant'i dingah dotla lo ah a chiah. Hmun khat ah raldoh t'i cu chimlo, anmah he biaruah hrimhrim a duh lo. Shiite cozah a simi Iran zongnih bawmhchanh dingin a ka a pau pah nain US nih a zum lo i kutsih in riant'uant'i a duh lo. Turkey nihle a dirpi ngam taktak lo. Ke ralkap in bawmh cu van chimlo, zapi theih in a vanlawng bual hmanh a hlan ngam rih lo. Zeicatiah, Assad cozah a huat tuk hlei ah an ramleng palai pakhat telin an ram minung 59 cu ISIS kut chungah an tan caah an nunnak kongah an t'hinphang tuk. Tikah, Obama nih zumhtlak ngaingai bawmtu dang a ngei lo. Saudi Arabia lei ah aa mer i an siangpahrang he hnatlaknak pakhat an ngei. Cucu, a strategy pahnihnak cu a si.

NATO meeting ah Turkey President le Obama

2. Syria ram zalennak ding caah dawhcah tein Assad cozah a dotu Free Syrian Army cu Obama cozah nih a herhning poah in hramnam bawmhnak a pek hlei ah raldohnak training zong an pek chih hna lai. ISIS le Assad cozah ralkap he cuaitlai t'i awk tlak loin a dermi Free Syrian Army hi Syria ram buainak aa thokka nawn khan US nih bawmhnak an rak pek peng ko. Sihmanhsehlaw, anmah thazang kha a der tuk rumro caah hriamnam ngan deuhmi hmanh an rak bawm ngam hna lo___hmun dangdang ah a phanh dih sual ding kha an rak phang tuk. Sihmahsehlaw, Obama nih thim ding dang hlei a ngei ti lo. Syria ram ah hmun a khuarmi ISIS hi hmul ngei ngaiin a doh khawh taktaknak ding caah cun anmah hi aa bochan hrimhrim hna a hau. Cucaah, hriamnam lawngin bawm ti loin raldohnak training tiangin pek a timh hna hi a si. Obama nih a nawlmi cu Saudi Arabia siangpahrang nih a cohlan caah Free Syrian Army cu US ralkap nih Saudi ram chungah raldoh thiamnak training an pek hna lai.

US ralkap nih raldohnak training an pek ko hna hmanh ah Free Syrian Army hi Assad cozah ralkap le ISIS karlak ah fek tein an dir kho colh lai lo. An thazang a der tuk rumro caah sau deuhpi zohkhenh le bawmhchanh an hau lai. Cucu, Obama nih a theih tuk caah Syria ISIS pawl hi hnawhsare tukin a nam hna lai lo. Doh dingin a dirpitu ram dangdang hna he thil sining an theihmi cio tu kha an icheubau lai i sullam ngei dingin caan rem tete lawngah bombs a thlak hnawh hna lai, tiah an zumh.  Zeicatiah, van ralkap in raldoh hi aman a fak tuk! Raltuknak lei chawva kongah thiamsang a simi, Jason Fields nih Reuters ah a t'ialning ahcun bombs pahnih aa phorhmi US F-16 vanlawng pakhat nih Turkey ram airport pakhat in aa thawh i suimillam pahnih a zuan hnu ah a rian a va lim ahkhin US$ 84000 in $104000 karlak hrawng a dih, a ti. ISIS nih an hmanmi raltuknak t'heng le motors hna hi a tam-u cu US nih Iraq ralkap le Syria tapung a rak bawmhmi hna an si caah aman a fak chinchin. Biadang in chim ahcun amah sermi raltuknak thilhri kha amah nih a hrawh t'han caah aman a fak khun. F-16 vanlawng pakhat nih aa tinhmi a khen ahcun a hrawkmi hriamnam man hi $1000000 in $12000000 tiang a phan kho ti a si. Cucaah, an thlakmi bombs nih sullam an ngeihnak ding ahcun vawlei lei in bawmchantu an herh tuk hringhran.

Syria taphung training peknak cu caan saupi a rau khomi a si caah a herh dingmi phaisa cu Obama nih US congress sinah bawmhnak a hal. "President nih Syria ram ah kan ke ralkap ka hmang hna lai lo tiah fiang tein a chim cang i kan lung a tling cio. Sihmanhsehlaw, van ralkap nih an kahmi hi hmual a ngeihnak ding ahcun minung pakhat khat tal nih vawlei lei in an rak doh ve hrimhrim a hau. Congressmen/women chungin mah hi raldoh a duh lotu zong an tampi ko men lai nain Syria taphung training peknak  ding caah an kan halmi phaisa hi cu kan pek hrimhrim awk a si. Zeitisihmanh ah hmaizarh chung hrawng ahcun vote tlak dingin congress ah ka chuakpi ko lai" tiah Speaker John Bohner nih thawnglatu pawl sinah a dirhmun a chim ve. A strategy pahnihnak hi sullam a ngeihnak ding ahcun aa timhtuah chungah ISIS pawl hi an thazang a rak karhlo a hau. Cucaah, strategy pathumnak a ser t'han.

3. Free Syrian Army kha an thazang t'hawnter dingin a bawmh hna lio ah ISIS pawl cu an rak karh ve nak hngalo, a hawile ram tampi he an i bawm lai i phihkharnak phunkip an tuah hna lai. Vawleicung Muslim vialte i an hruaitu ka si aa timi,Abu Bakr al-Baghdadi (kum 43) nih a hruaimi ISIS hi a karhning a rang taktakmi erlet ralhrang bu an si. An minung zat hi fiang tein theih ngaingai cu an si lo nain minung 30000 cung cu an kai lem lai lo, tiah an zumh. An penmi Syria le Iraq ram chungah anmah nih hramhram in mi an luh hlei ah thim ding dang hlei ngei loin anmah sinah aa paihmi Muslim pialsual zong an tamtuk caah an karhning a rang hringhran. "Islam biaknak kha uknak phungah ser in penmi ramthar kan ser khawh cang" tiah social media le lam dangdang hmangin thawngzamhnak an tuah khawh tuk caah vawlei killi ah a ummi Mulsim pialsual pawlnih an fuhpanh duh tuk. US sungt'hoh nih an zumhnak ahcun Iraq le Syria ram ah raldo dingin ram dangdang in a kalmi Muslim pawl hi 15000 hrawng an si. Mah cu minung 15000 hrawng cu vawleicung ram 80 hrawngin a rami an si i a tam bik cu ISIS sin ah rian an t'uan. Sunni Muslim milu an tam deuhnak ram a si tung i daihnak a len tuklonak Tunisia, Iran le Nigeria tepawl in ISIS a van lutmi cu an tambik nain France, China, UK le US ti bantuk zongin a kalmi an um ve t'hiamt'hiam.

Vawleicung Muslim vialte hruaitu ka si aa timi, Abu Bakr al-Baghdadi

Ralhrang ah lut dingin vawleicung ram kenkip in a rami pialsual hna nih an hman bikmi lam cu Turkey le Syria ramri a si, ti si. Kum 2013 chung lawngah Turkey nih Syria he an ramri hrawngah lunghrinh in a tleihmi minung hi 92000 hrawng an si. Zeiruangah dah ISIS hi vawlei killi in a tomtom in an fuhpanh duh hnga? An prophet Mohamad chan lio ah nichuak chaklei ah a rak ummi Caliphate timi Muslim ram kha a tharin ser a duhmi Muslim hi vawleicung ah an rak tampi. Cucu, Osama bin Laden zong nihkhan a mitthlam ah a rak suai bal vemi pakhat a si, ti si. Nain, anih nihkhan cun hmailei caansau pi hnu lawngah ser khawh te dingin a rak ruah. ISIS hruaitu Abu Bakr al-Baghdadi tu nihcun a lakmi Syria le Iraq ramkomh cu Islam biaknak bakah hram a bunhmi uknak phungin hruaimi Muslim ramthar, Caliphate, a si tiah vawleipi theihin thawng a thanh tikah an biaknak ah fak tukin a rak pilmi Muslim poahpoah nihcun hmuh an duh tuk cio. ISIS cu an phaisa luhnak a t'hawn tuk fawn tikah an ralkap hna le an pennak ram chungah a ummi cozah riant'uantu hna cu t'ha tein nihlawh an pek khawh hna caah ramchungral ruangah sifahnak a tuarmi nih an sinah an lut thluahmah.

ISIS nih phaisa tambik an hmuhnak cu an pennak hmun chungah a ummi meiti(oil) zuarnak in a si. An kut tangah a ummi meiti cu Turkey ram lei in a thli in an tholh i vawleicung ram kenkip ah man deng deuh tein an zuar. An meiti zuarnak lawngin an hmuhmi phaisa hi nikhat ah US$ 1000000 in 200000 karlak a si lai, tiah an zawndomh. Ramdang minung kha an tleih hna i an chungkhar le an cozah sinin tlanhnak phaisa tampi an lakmi zongnih chawva lei in a bawmh ngaingai hna. Syria le Iraq ram ah an lakmi khua kenkip ah a ummi banks ah a ummi phaisa vialte cu anmah nih hramhram in an i lak dih fawn caah ralhrang dirhmun in cun an rum taktak lai tiah ruah an si. An pennak ram chungah a ummi khirhfa le biaknak dangdang hna cu danthatnak phunkip an pek hna hlei ah phaisa tampi an cawi ter fawn hna caah biaknak dang nihcun an zaam tak dih ko hna. Muslim biaknak kha fak tukin aa tleihmi minung tu nihcun nunnuam tein an umnak ram rumrum kha an chuah tak i Syria ram lei ah an kal duahmah ve. United Kingdom lawng hmanh nih a ram chungin Syria ah a kalmi hi minung 600 hrawnghrang an si, an ti. US zongnih a rammi minung 100 renglo cu Syria lei ah an kal ve tiah an zumh. Nithlak lei ram in Syria ISIS sinah a va kalmi minung tampi hi an chuahnak ram passport aa ngeihmi an si caah training an kai dihin an ratnak ram cio ah an kir t'han lai i buainak phunphun an chuah ter te lai, tiah thinphang in a ummi ram an tampi cang.

ISIS nih meiti zuarnak le mithar luhnak ah an hman bikmi Syria le Turkey ramri

Hi bantukin ISIS nih minung an luhnak lam hi phihkhenh dingin vawleicung ram kenkip nih an i zuam cuahmah ve. France le British hna nihcun Syria ram tlawn aa timmi an rammi hna cu lunghrinhnak mitin an zoh colh hna i lam an kham cang hna. Nichuak chaklei ram in a rak kirmi khualtlawngmi cu palik nih ahleice in chekhletnak nawl an nei i an zumhlo deuhmi cu an passaport tiangin chuhnak nawl an nei. ISIS nih an phaisa luhnak t'ha bik a simi meiti zuarnak zong cu Obama cozah nih phih an zalh cuahmah. Turkey President cu amah Obama pumpak nih Wales ah tuahmi NATO meeting ah hmaitonh in ton biaruahnak a ngeih hlei ah Secretary Of Defense, Chuck Hagel nih kan hnuzarh ah a va tlawn t'han. Riant'uant'i dingin hnatlaknak ngaingai an ngeih khawh hlei lo caah Secretary Of State, John Kerry nih atuzong a va an chawnhbiak t'han hna. Turkey dirhmun cungah hin US hi an ing a puang tuk ko nain ISIS dohnak ding ahcun a biapi bikmi ram an si caah lungsau in an nawr peng ko. A ralaimi Sept, 24, 2014 ah tuah dingmi UN Security Council meeting cu Obama nih chairman a tuan lai i ISIS nih mi an luhnak lam cu mahle si khawh ning cio in rak kham dingin vawleicung ram kenkip hruaitu cu a sawm hna lai.Cu lawngin a za rih lo. Obama nih a tuahlo awk a t'ha lomi thil dang pakhat a um rih. Cucaah strategy pakhat a ser t'han.

4.Obama cozah nih ISIS dohnak dingah lam kenkip in tei a rial lio ah philhtak awk a t'ha lomi cu ISIS tuahsernak ruangah harsatnak phunkip a tongmi mipi an si. Islam biaknak ah hram a bunhmi uknak phungin an pennak ram an uk tikah Mulsim a si lomi biaknak dangnih zaam tak an hau. Muslim hmanh ah anmah kalning in a kal lomi cu fahnak phunkip an pek t'hiamt'hiam hna caah Muslim zongnih a zamtakmi an tampi t'hiamt'hiam. Ruruhranghrang in ram an uk caah Khirhfa le biaknak dangdang cu an pennak ram chungah a umlo tluk an si cang. Inn-le-lo chuah takin an zaam caah din-ei awk ngei loin harsatnak a tongmi mipi hna cu US nih bawmhnak a pek hna. Kalnak thei loin tlangcung ah an hrenmi Yezadis pawl cu vanlawng in ti le rawl a thlak hna i an nunnak a khamh hna. ISIS cu Syria ram tiangin a kah cang hna lai caah ral ruangah harsatnak a tuarmi hi an tam chinchin lai i t'ha tein zohkhenh an hau lai. Hi bantuk zawn ahhin ramdang a hawile nih tampi an bawmh khawh te lai. Nain, daithlanh awk a t'ha lomi a si. An daithlanh sual hna ahcun sivangh lungdongh in ISIS lei ah minung tampi nih an imer te lai.

*****************

Obama nihhin Syria ramchungral cu a hrial in a rak hrial peng. Miphun pakhat le pakhat karlak ah a chuakmi buaibainak ah biaknak aa cawh chih rih caah aa thlak duh bak lo. Kan ithlak len ahcun kan buaibai ter chinchin lai, a rak ti peng i kum thum renglo cu fak piin a lut duh lo. Atu zong hi aa thlak duh tuk caah aa thlak a si lo. Syria ram buaibainak nih hmunhma t'ha tuk a pek i an thazang a t'hawng tuk cangmi ISIS ralhrang nih an tuahsermi tuksum thil hna nih thim awk dang ngei loin an tuah cang caah a si.

Mipi sinah biachim a t'hiam tukmi Obama cu tuzarh nithum ni zaan ah bia a chim tikah raltu dingin thawng a thanh nain aa hrocer lo. Mi cheukhat nihcun "US journalists pahnih hngawng a tantu ralhrang bu doh dingin thawngthanhnak a tuahmi ahcun aa biatak lomi a lo" ti tiangin an ti. Nain, a biachim a ngaimi vialte nih al awk a t'ha lomi pakhat a um. Aa ralring tuk! Asi. Hmailei ah thil poipang a chuahnak hnga lo caah caan sau nawn la in a dah khawhmi lam poahpoah cu a dah dih. Sihmanhsehlaw, van ralkap lawng hmangin ralring takin Syria ram ah ISIS hi a kah tik ahhin a palh kho mi thil a tam tuk rih t'hiamt'hiam. A tlaknak ding a si lomi hmun ah a tla sualmi bomb pakhat te hmanh nih US caah khua tampi a sual khawh. Zeicatiah, a luanciami kumhra bu khan cun Muslim vawlei nihcun US hi an zum kho taktak ti lo. Caan saupi a rau dingmi raltuknak a si lai caah raltuk a duhlo tuktu President nihhin a tukmi ral dihta loin a t'hutdan a tum tak te men lai.

Relchihte:Vawleicung Sianginn Ngan Bik: Khan Academy