Phaisa hi Ka Rak Hngakchiat Lio ahcun.....

Nizan cu zingkhuan in middle sianginn pakhat ah ka kal. A herhmi rian ka lim hlan ah ka zun a chuak. Ka kal ballonak sianginn a si caah siangcachim pakhat kha zun-inn umnak hmun ka hal. "Khika lei khin hei kal thluahmah law na kehlei kam ah na hmuh ko lai" tiah a kutdong in ka kalnak ding lei cu a hei ka sawh piak. A ka chimh ko buah luhlonak ding innkhan hna ah ka lut sual lai tiin ralring ngai khin "Pa" tiah aa tialmi zun-inn kutka cu ka kal pah in ka kawl diahmah. Hlat ngai ka kal hnu, a donghnak bik innkhan lonh zawn ah khin "Boys" tiah aa tialmi innka cu ka va hmuh. Rianrang in vikvak ka lut i ka zun ka zun(thawh). Ka zun ka zun(thawh) dih khin zeiti nawn in dek ka um. Ka pawngkal(ek) a chuakmi khi a lo. A chuak taktak khi cu a si fawn lo. Zun-inn in ka chuak luklak nain ka siaremlo deuh i ek-inn ah ka lut than. Ka pawngkal chuahning a fak tuk lo caah rianrang in kaa lim kho lo. Tikah, ek-inn chung ahcun khua ka ruat lawlaw. Ka mitthlam ah a van cuang tukmi cu ka hngakchiat lio kong! Cu hmanh ahcun, ka rak ruah caan poah ah ka rak ilunghmuih tukmi "phaisa sernak seh bak khi hei ngei ning law...." timi bak khi a si.

Rev.Dr.CK No Chum Chimmi Capo le Thawht'han...

Pakhat pa hi biahal a thiam ngai i a hawile pawl kha bia zaza a hal tawn hna. An hmuh pengmi le an theih peng komi zong khi amah nih phun dang tein a van hal tawn hna ahcun an lu an i kheuh len tawn, ti si. 

Zeiruang ah Israel nih Obama cozah a huat?

Sal ah rak ruahmi vun(cuar) nak miphun chungin innrangpi nawlngeihnak t'hutdan cungah a t'hu hmasa bikmi, President Barack Obama hi Laimi bantukin mindin a ngei ve. A chungkhar le a hngakchiat lio a lente celht'i hawile nihcun "Barack" an rak ti. Atutiang zong ah ngamhtlak ngaiin a mindin in an auh peng ko, ti a si. Laimi tampi nih ek ngeilo tlukah kan ruahmi Israel miphun nih caan thum kelte an ram hruaitu caah an thimmi, Benjamin Natanyahu zong hi a dawtu a miphun hawi nih a minfak in an au siang tuk lo. Dawtnak in "Bibi" an ti. A hngakchiat lio ahcun a hawile rual lawng nih "Bibi" an rak ti nain atu ahcun a uartu Israel miphun poahpoah nih "Bibi" an ti cang. Kei zong nih tutan ka cabia ahcun an mindin in ka auh ve hna lai. Rak ka theihthiam piak hram ko uh. Kan hngakchiat lio ah kan rak ikomh ruangah si loin mindin auh hi ka uar ve rengreng ruang ca tu-ah a si.

A Mak Taktakmi "April Fools' Day" Dehcawhnak(Prank)

April Nikhat cu mirang nih "April Fools' Day" an ti. A min hmanh ahcun "Fools Day" ti cu si kaw, midang kha a silo le silo in Dehcawh Ni ah hman a si. Pakhat le pakhat kha a silo le silo in i hlen i nihchuak ah i seih Ni a si. Nitlak lei ram ah aa thokmi a si i anmah nih an hman bik. Laimi zong nih kan hman tuk ve cang! Kawl ram ahkhan "Arfir-zaan__ciatkhu-ngiah" kan rak ti rua ka ti. "Arfir zaan ah Ar a firtu cu tuanvo ngeitu sin ah report zong ah voidang caan ah ar a firmi bantukin dantat an si lo" ti te hna in upa deuh nih lih lawngte an rak kan chimh tawn. Than Shwe zong kha kumtin te April Nikhat ahcun an rak thih ter lengmang.

A Rawkmi US Chawlehnak Remhnak Caah Hin Austerity Maw A Tha Deuh, Stimulus Dah??

Donald Trump, Republicans le economist cheukhat nih "US chawlehnak cu thli sawhsawh in a khatmi tutuhlut bantukin a puar sawhsawhmi a si" tiah an au lengmangmi khi tampi a hman ko. A bikin an leiba kong an chimmi khi cu a hman tuk. Cozah nih an langhtermi hi $16 trillion renglo deuh vak lawng a si nain a taktak ahcun a tlawmbik $2o trillion renglo a si lai an ti. Asinain, Obama cozah tangah US chawlehnak a t'hang lo an timi tu khi cu an palh dipdep. Anmah nih an duhmi chawlehnak(economic) policies le Obama nih a kal pimi chawlehnak policies khi aa ralkahmi an si ca tu ah a si deuh___raldoh a huam ngaimi G.W. Bush hruaimi cozah tang ah US chawlehnak fak tukin a rawk timi tu hi cu an pom veve. A rawk tukmi US chawlehnak cu remhnak ding ah a hmanmi lam tiah an ruahmi cu aa ralkah caah an idohning a fah tuknak a si.

Nunnak Thap in Dawtnak Biazai a tialmi Afghan Nu Hna....

Afghanistan khuapi Kabul khuaki zawn, University campus kiang te ah amah te lawng in a ummi inn pakhat chung ah Mirman Baheer(Nu caholh thanchonak bu) chungtel a simi Ogai Amail cu phone a hngak tawn. Mirman Baheer cu Muslim zumhnak in a pial sual i nu cu thilri bantuk menmen ah a ruatmi minung an tam taktaknak Afhgan ram ah khua a sami catial huammi nu hna nih an tonmi cio kha caholh hmang in an ichimhruahnak bu a si. Mirman Baheer tibantuk nubu pawl hi US nih Afhgan Taliban cozah kha a thlak hnu lawng ah dirh khawhmi bu an si. Cun, US le NATO ralkap hna nih zapi caah humhimnak tling an pek khawhnak Kabul ti bantuk khuapi lawng ah an um kho. Cucaah, khuate lei ah nu an si ruangah naamnetnak le sersatnak a tongmi nu tete pawl he pehtleihnak caah tiin Ogai Amail nih a hngah tawnmi Phone hi an hun. An bu kong le pehtleihnak phone cu ram chung radio in langhternak(advertise) an tuah tawn.